1 እስ ሀናንያ ጌተትያ አደይ ባ ማቸ ሳጵርራ ጋደ ባይዝስ። 2 ሄ ባይዝዳ ሚሽያፐ ባ ማችያ ኤርሽን ባጋ አሽድ፥ አትዳይሳ ኤህድ ሀዋረታስ እሚስ።

3 ሽን ጰፅሮስ ሀናንያኮ፥ “ኔኒ ጌሻ አያና ጭማና መላነ ጋድያ ባይዝዳ ሚሽያፐ ሻካዳ አሻና መላ ፃላሄይ ነ ዎዛናን አይስ ገልዴ? 4 ኔኒ ባይዛናፐ ካሰ ጋደይ ነባ ግደነዬ? ቃስ ኔኒ ባይዛ ስምንካ ሚሸይ ነባ ግደነዬ? ያትን፥ ሄሳ መላባ ኦꬃናዉ አይስ ነ ዎዛናን ቆፓዲ? ኔኒ ፆሳ ቦላ ዎርዶታዳሳፐ አትሽን፥ አሳ ቦላ ዎርዶታባካ” ያግስ።

5 ሀናን ሄ ቃላ ስእዳ መላ ኩንድድ ሀይቅስ፤ ሄሳ ስእዳ ኡባይ ዳሮ ያይስ። 6 ናአተꬃ አሳት ሶ ገልድ እያ አሀ ፃፅድ ኤፍድ ሞግዶሶና።

7 ሄꬑ ሳተፐ ጉየ ሀናንያ ማችያ ሄሳ ኤሮና ደአሸ ጰፅሮስ ደእያሱዋ ገላሱ። 8 ጰፅሮስ ኢኮ፥ “ህንተ ጋድያ ሀይሳ መላ ሚሸስ ባይዝደቲ? አነ ታዉ ኦዳ” ያግስ።

እያካ፥ “ኤ፥ ሀይሳ መላ ሚሸስ ባይዝዳ” ያጋሱ።

9 ጰፅሮስ ማጫስዉ፥ “ኔራነ ነ አዝናራ ጎዳ አያና ፓጫናዉ አይስ ዞረትደቲ? ሄኮ፥ ነ አዝና ሞግዳ አሳት ካረን ደኦሶና፤ ነናካ ኤንቲ ካረ ከሳና” ያግስ።

10 ማጫስያ ኢራካ ጰፅሮሳ ቶሁዋ ማታን ኩንዳዳ ሀይቃ አጋሱ፤ ናአተꬃት ገልያ ዎደ ሀይቅዳሮ ደምድ ካረ ከስድ፥ እ አዝና ማታን ሞግዶሶና። 11 ኩመꬃ ዎሳ ኬꬃይነ ሄሳ ስእዳ ሀራ አሳ ኡባይ ዳሮ ያይዶሶና።

12 ሀዋረት ዳሮ ማላታታነ ኦራꬃባታ አሳ ግዶን ኦꬆሶና። አማንያ ኡባይ ሶሎሞነ ባራንዳን እስፈ ሺቆሶና። 13 ሀራ አሳፐ ኤንታራ ጋሄታናዉ እስ አስካ ምንቤና፥ ሽን አሳይ ኤንታ ቦንቼስ። 14 አማንያ አደታነ ማጫሳታ ታይቦይ ካሰይሳፈ ዳርሸ ብስ። 15 ሄሳ ግሾ፥ አሳይ ሀርጋንቾታ ሀላንነ አልጋን ቶክድ ጰፅሮስ አꬍያ ዎደ እያ ኩያይ ኤንታፈ እሶታ እሶታ ቦላ ሸምፓና መላ ኦገ ዶናን ከስድ ዎꬆሶና። 16 ቃስ ዳሮ አሳይ የሩሳላመ ማታን ደእያ ካታማታፐ ሀርጋንቾታነ ቱና አያን ዋይስያ አሳታ ኤክድ ዮሶና፤ ኡባይካ ፓፅዶሶና።

17 ካህነ ሀላቃይነ እያራ ደእያ ሳዱቃወት ኡባይ ቃናተን ኩምድ ሀዋረታ ቦላ ደንድዶሶና። 18 ሀዋረታ ኦይክድ ደርያ ቃሾ ኬꬃን የግዶሶና። 19 ሽን ጎዳ ኪታንቾይ ቃማ ቃሾ ኬꬃ ፐንግያ ዶይድ ሀዋረታ ካረ ከስድ፥ 20 “ብድ፥ ፆሳ ኬꬃን ኤቅድ ሀ ኦራꬃ ደኦ ቃላ አሳ ኡባስ ኦድተ” ያግስ። 21 ሀዋረት ሄሳ ስእዳ ዎደ ዎንታ ጉራ ፆሳ ኬꬅ ገልድ ታማርሶ ዶምዶሶና።

ካህነታ ሀላቃይነ እያራ ደኤይሳት ይድ፥ እስራኤለ ጭማታ ኡባ ፄግ ሺሽድ ሀዋረታ ባንታ ስን ኤሀና መላ ዎታዳረታ ቃሾ ኬꬅ ኪትዶሶና። 22 ሽን ዎታዳረት ቃሾ ኬꬅ ብድ ሀዋረታ ደምቦኮና። ጉየ ስም ይድ ደርያስ፥ 23 “ኑኒ ብያ ዎደ ቃሾ ኬꬃ ፐንገይ ምንꬅ ጎርደትን፥ ናገይሳት ፐንገን ኤቅዳይሳታ ደምዳ። ሽን ኑኒ ካርያ ዶይያ ዎደ ግዶን ሀር አቶሽን እስ አስካ ባዋ” ያግዶሶና። 24 ሄሳ ግሾ፥ ፆሳ ኬꬃ ዎታዳረታ ኪተይስነ ካህነ ሀላቃት ሄሳ ስእዳ ዎደ፥ “ሀዋረታ ቦላ አይብ ሀንዴ?” ያግድ ህርግዶሶና።

25 ሄ ዎደ እስ አደይ ኤንታኮ ይድ፥ “ሄኮ፥ ቃሾ ኬꬅ ህንተ ገልስዳ አሳት ፆሳ ኬꬃን ኤቅድ አሳ ታማርሶሶና” ያግድ ኤንታዉ ኦድስ። 26 ፆሳ ኬꬃ ዎታዳረታ ኪተይስ ባ ዎታዳረታራ ብድ ሀዋረታ ኤህስ። ሽን ኤንቲ ባንታና አሳይ ሹቻን ጫዳና ግድ ያይዳ ግሾ ኤንታ አዳሽድ ኤህዶሶና።

27 ኤንቲ ሀዋረታ ኤህድ፥ ሺቅዳ ሻንጉዋ ስንꬃን ኤስን ካህነ ሀላቃይ ኤንታኮ፥ 28 “ህንተና ኑኒ ሄ ኡራ ሱንꬃን ታማርሶና መላ ምንꬅድ ኪትቦኮ? ሄኮ፥ ህንተ ትምርትያ የሩሳላመ ካታማ ኡባ ጋꬅደታ። ሄ ኡራ ሸምፑዋስ ኑና ኦይꬃናዉ ቆፔቲ?” ያግድ ኦይችስ። ማቶ 27:25.

29 ጰፅሮሳራነ ሀንኮ ሀዋረታራ ኤንታዉ ዛርሸ፥ “ኑኒ አሳስ ኪተታናፐ ፆሳስ ኪተታናዉ በሴስ። 30 ማስቃልያ ቦላ ህንተ ካቅድ ዎꬍዳ የሱሳ፥ ኑ አዋታ ፆሳይ ሀይቆፐ ደንꬅስ። 31 እስራኤለት ናጋራፐ ስማና መላነ ኤንታ ናጋራይ አቶ ጌተታና መላ ፆሳይ የሱሳ ሃረይሳነ አሸይሳ ኦꬅድ ቦንቾን ባፐ ኡሻቻ ባጋን ኡትስስ። 32 ሄሳስ ኑኒ ማርካ፤ ቃስ ፆሳይ ባና አማነይሳታስ እምዳ ጌሻ አያናይካ ማርካ” ያግዶሶና።

33 ሺቅዳ አሳይ ሄሳ ስእዳ ዎደ ዳሮ ይሎትድ፥ ሀዋረታ ዎꬋናዉ ቆፕዶሶና። 34 ሽን አሳ ኡባን ዳሮ ቦንቸትዳ ጋማልያለ ጌተተይስ፥ እስ ህገ አስታማረይነ ፋርሳወይ ደንድ ኤቅድ ሀዋረታ ጉꬃ ዎደስ ካረ ከሳና መላ ኪትስ። 35 ሄሳፈ ጉየ፥ ሺቅዳ አሳኮ፥ “እስራኤለ አሳዉ፥ ሀ አሳታ ቦላ ህንተ ኦꬃናዉ ቆፕያባፐ ናገትተ። 36 አይስ ጊኮ፥ ሀይሳፈ ካሰ ተዎዳስ ባና፥ ‘ታኒ ግታ’ ግድ ደንድን፥ ኦይዱ ፄቱ ግድያ አሳት እያራ እስፍዶሶና። ሽን እያ ዎꬍን እያ ካልዳ ኡባይ ላለትን ፓꬆና አስ ግድድ አትዶሶና። 37 ሄሳፈ ጉየ፥ አሳይ ታይበትያ ዎደ ጋልላ ይሁድ ደንድድ ዳሮ አሳ ፓንጋይድ ካለꬅስ፥ ሽን እያካ ዎꬍን እያ ካልዳ አሳ ኡባይ ላለትስ። 38 ሀእካ ታ ህንተዉ ኦዳይስ፤ ሀ አሳታፐ ሻከትተ፤ ኤንታ ቦቾፍተ። አይስ ጊኮ፥ ሀ ቆፋነ ሀ ኦሱዋ አስ ኦꬅያባ ግድኮ ꬋያና። 39 ሽን ሀ ቆፋይነ ሀ ኦሶይ ፆሳፈ ይዳባ ግድኮ፥ ህንተ ኤንታ ꬋይሳናዉ ዳንዳኤከታ። ሄሳዳ ሀንሸ ህንተ ፆሳራ ካጨታና” ያግድ ኦድስ። ሄሳ ግሾ፥ ሺቅዳ አሳይ ጋማልያለ ዞርያ ኤክዶሶና።

40 ሀዋረታ ሶ ፄግድ ልሶን ጋራፍስስ። ሄሳፈ ጉየ፥ ኤንታኮ፥ “የሱሳ ሱንꬃ ናምአንꬆ ደንꬆፍተ” ግድ ብርሽድ የድዶሶና። 41 የሱሳ ሱንꬃ ግሾ፥ ኤንቲ ካዉያናይስ በሲያባ ግደይሳ ኤርዳ ግሾ ሻንጉዋ ስንꬃፈ ኡፋይትሸ ከይዶሶና። 42 ኤንቲ ኡባ ጋላስ ፆሳ ኬꬃንነ አሳ ሶን የሱሲ እ ክርስቶሳ ግደይሳ ታማርሶነ ሳባኮ አግቦኮና።