1 ሄ ዎደ ካለይሳታ ታይቦይ ዳር ዳርድ ብሽን፥ ግርከ ዶና ኦደትያ አይሁደት ይሁዳን የለትድ ደእያ አይሁደታ ቦላ ዙዙምዶሶና። አይስ ጊኮ፥ ግርከ ዶና ኦደትያ አይሁደት፥ “ጋላስ ጋላስ እመትያ ካꬃን ኑ አምኤት ናቀቶሶና” ያግዶሶና። 2 ታማነ ናምኡ ሀዋረት ዎሳ ኬꬃ አሳ ኡባ ፄግድ፥ “ኑኒ ፆሳ ቃላ ኦደይሳ አግድ ካꬅ ግሻናዉ በሰና። 3 ህዛ፥ እሻቶ፥ ሎኦ አሳታ፥ ጌሻ አያናንነ ጭንጫተꬃን ኩምዳ ላፑን አሳታ ህንተ ግዶፈ ዶርተ፤ ኑኒ ኤንታ ሀ ኦሱዋስ ሹማና። 4 ሽን ኑኒ፥ ኑ ኩመꬃ ዎድያ ዎሳንነ ቃላ ታማርሶን ፔሻና” ያግዶሶና።

5 ሀዋረት ኦድዳ ኦዳይ አሳ ኡባ ኡፋይስስ። ሄሳ ግሾ፥ አማኖይነ ጌሻ አያን ኩምዳ እስፅፋኖሰ፥ ፍልጶሳ፥ ጵሮኮሮሳ፥ ንቃሮና፥ ፅሞና፥ ጳርመናነ አይሁደ አማኖ ገል ስምዳ አንፆከ አድያ ንቆላዎሳ ዶርዶሶና። 6 ኤንታ ሀዋረታ ስንꬃን ኤስን፥ ሀዋረት ኤንታ ቦላ ኩሸ ዎꬅድ ዎስዶሶና።

7 ፆሳ ቃላይ ዳልግ ዳልግ ብስ። የሩሳላመን ደእያ አማነይሳታ ታይቦይ ዳር ዳርድ ብስ፤ ዳሮ ካህነትካ አማንዶሶና።

8 እስፅፋኖሰይ አꬎ ኬሀተꬃንነ ዎልቃን ኩምድ አሳ ግዶን ኦራꬃባታነ ማላታታ ኦꬄስ። 9 አይለተꬃፈ ከይዳ አይሁደ ዎሳ ኬꬃ አሳይ ቀሬናፐነ እስክንድረፐ ክልቀፈነ ኢሰፐ ይዳ እስ እስ አሳት ደንድድ እስፅፋኖሰራ ፓላምዶሶና። 10 ሽን እስፅፋኖሰይ አያና ዎልቃን ኦደትያ ጭንጫተꬃ ኤንቲ ኤቀታናዉ ዳንዳእቦኮና።

11 ሄ ዎደ ኤንቲ፥ “ሙሰነ ፆሳ እ ጫይሽን ስእዳ” ግያ ዎርዶ አሳታ ሻምዶሶና። 12 ሄሳዳ ኦꬅድ ቢታ ጭማታነ ህገ አስታማረታ እያ ቦላ ደንꬅዶሶና። እስፅፋኖሰ ኦይክድ ሻንጉዋ ስን ኤፍዶሶና። 13 እያ ቦላ ፓይድዳ ዎርዶ ማርካት፥ “ሀ ኡራይ ሀ ፆሳ ኬꬃነ ሙሰ ህግያ ዛር ዛር ጫዬስ። 14 እ፥ ‘ሀይስ ናዝረተ የሱሲ፥ ሀ ፆሳ ኬꬃ ላላና፤ ቃስ ሙሰይ ኑስ እምዳ ህግያ ላማና’ ያግሽን ኑኒ ስእዳ” ያግዶሶና።

15 ሻንጎ ሺቆን ኡትዳ አሳ ኡባይ እስፅፋኖሰ ሎይꬅድ ፄልያ ዎደ እያ ሶምኦይ ኪታንቾ ሶምኦ ዳኔስ።