1 ሄ ዎደ ሳኦል ጎዳ ካለይሳታ ዎꬋናዉ ማንድድ ካህነ ሀላቃኮ ብስ። 2 ጎዳ ኦግያ ካልያ አደነ ማጫ ደምኮ፥ ቃችሸ የሩሳላመ ኤሀናዉ፥ ዳማስቆን ደእያ አይሁደ ዎሳ ኬꬃታስ ዳብዳበ ባዉ ፃፋና መላ ዎስስ።

3 እ ብድ፥ ዳማስቆ ካታማ ጋካናዉ ማትሽን፥ ቆፖና ሳሎፐ ዎልቃማ ፖኦይ እያ ዩሾን ፖእስ። 4 እ ሳአን ኩንድዳሽን፥ “ሳኦላ፥ ሳኦላ፥ አይስ ታና ጎዳይ?” ግያ ቃላ ስእስ።

5 ሳኦል፥ “ጎዳዉ፥ ኔኒ ኦኔ?” ያግድ ኦይችስ።

“ታኒ፥ ኔኒ ጎድያ የሱሳ” ያግስ።

6 ሽን ሳኦል ኮኮርሸነ ማላለትሸ፥ “ጎዳዉ፥ ታኒ አይ ኦꬃና መላ ኮያይ?” ያግስ።

ጎዳይ እያኮ፥ “ደንዳዳ ካታማ ገላ፤ ኔኒ ኦꬃናዉ በሲያባይ ያን ነዉ ኦደታና” ያግስ።

7 ሳኦላራ ኦገ ብያ አሳት አይኮካ ኦደቶና ኤቅ አትዶሶና። ቃላ ስኦሶና፥ ሽን ኦናካ በእቦኮና። 8 ሳኦል ኩንድዳ በሳፈ ደንድድ ፄልያ ዎደ እያ አይፈይ ደሞና እፅስ። ሄሳ ግሾ፥ ኤንቲ እያ ኩሽያ ኦይክድ ካለꬅድ ዳማስቆ ገልስዶሶና። 9 ሄꬑ ጋላስ ጋካናዉ እ ፄላናዉ ዳንዳእቤና፤ አይኮካ ምቤና፤ ኡይቤና።

10 ዳማስቆን እስ ሀናንያ ጌተትያ የሱሳ ታማረይ ደኤስ። ጎዳይ ቆንጨꬃን፥ “ሀናንያ” ያግድ ፄግስ።

ሀናን ዛሪድ፥ “ታ ጎዳዉ፥ ሀይሳን ደአይስ” ያግስ።

11 ጎዳይ እያኮ፥ “ደንዳዳ ሱረ ጌተትያ ኦግያ ባዳ፥ ይሁዳ ሶን ሳኦላ ጌተትያ ታርሰሳፐ ይዳ ኡራ ኮያ፤ ሳኦል ዎሴስ። 12 ቃስ ሀናንያ ጌተትያ አደይ ገልድ፥ ሳኦል ናምአንꬆ ፄላና መላ ባ ኩሽያ እያ ቦላ ዎꬅሽን ቆንጨꬃን በእስ” ያግስ።

13 ሀናን ዛሪድ፥ “ጎዳዉ፥ የሩሳላመን ነ ጌሻ አሳ ቦላ ሄ ኡራይ አይ መላ ኢታባ ኦꬅዳኮ ታኒ ዳሮ አሳፐ ስአስ። 14 ቃስ ዳማስቆን ነ ሱንꬃ ፄገይሳታ ኡባ ቃቻናዉ፥ ካህነ ሀላቃት እያዉ ማታ እምዶሶና” ያግስ።

15 ሽን ጎዳይ እያኮ፥ “ሳኦል አይሁደ ግዶና አሳ ስንꬃን፥ ካዎታ ስንꬃንነ እስራኤለ አሳ ስንꬃን፥ ታ ሱንꬃ ኤርሳናዉነ ታዉ ኦꬃናዉ ዶረትዳ ሚሸ ግድያ ግሾ ኔኒ እያኮ ባ። 16 አይስ ጊኮ፥ ታ ሱንꬃ ግሾ፥ እ አይ መላ ዋየ ኤካናዉ በሲያኮ ታኒ እያ በሳና” ያግስ።

17 ሀናን ብድ፥ ሶ ገልድ፥ ባ ኩሽያ ሳኦላ ቦላ ዎꬅድ፥ “ታ እሻ ሳኦላ፥ ኔኒ ያ ኦግያን ነዉ በንትዳ የሱሲ፥ ኔኒ ፄላና መላነ ጌሻ አያናን ኩማና መላ ጎዳይ ታና ኪትስ” ያግስ። 18 ኤለስድ፥ ሳኦላ አይፈፐ እስ ፖቆ መላባይ ዎꬍን፥ ሳኦል ናምአንꬆ ፄልስ። ቃስ ደንድድ ፃማቀትስ። 19 ካꬅ ምድ ፃልድ፥ ዳማስቆን ደእያ አማነይሳታራ ጉꬃ ጋላስ ጋምእስ።

20 ኤለስድ ሳኦል፥ “የሱሲ ፆሳ ናአ” ያግድ ዳማስቆን ደእያ አይሁደ ዎሳ ኬꬃታን ቃላ ታማርስስ።

21 ሄሳ ስእዳ ኡባይ ማላለትድ፥ “ሀይስ የሩሳላመን የሱሳ ሱንꬃ ፄገይሳታ ቃቸይሳ ግደነዬ? ቃስ ሃ ይዳይ ኤንታ ቃችድ፥ ካህነ ሀላቃታ ስን ኤፋናሳ ግደኔ?” ያግዶሶና።

22 ሽን ሳኦል ቃላ ኦዶን ምን ምንድ ብስ። የሱሲ፥ እ ክርስቶሳ ግደይሳ ቆንጭስድ ኦድዳ ግሾ ዳማስቆን ደእያ አይሁደት እያዉ ዛርያባ ꬋይዶሶና።

23 ዳሮ ጋላሳፐ ጉየ፥ አይሁደት ሺቅድ፥ ሳኦላ ዎꬋናዉ ዞረትዶሶና። 2 ቆሮ 11:32-33. 24 ሽን አይሁደት ባና ዎꬋናዉ ቆፕዳይሳ ሳኦል ስእስ። ኤንቲ እያ ዎꬋናዉ ቃማነ ጋላስ ካታማ ፐንገን ናጎሶና። 25 ሽን እያ ታማረት እያ ቃማ ኤፍድ፥ ግምበ ድርሳ ማስኮተራ ዳቾራ ዎꬍስዶሶና።

26 ሳኦል የሩሳላመ ጋክዳ ዎደ አማነይሳታራ ጋሄታናዉ ኮይስ። ሽን እ ክርስቶሳ አማንዳይስ ኤንታዉ ቱማ ዳኖና እፅን እያዉ ያይዶሶና። 27 ሽን ባርናባስ ሳኦላ ሀዋረታኮ ኤፍስ። ኦገን ጎዳይ ዋንድ ቆንጭዳኮነ ኦድስዳኮ፥ ቃስ ሳኦል ዳማስቆን የሱሳ ሱንꬃን ያዮና ዋትድ ቃላ ኦድዳኮ ኤንታዉ ጌሽድ ኦድስ። 28 ሳኦል የሩሳላመን ዩይድ ጎዳ ሱንꬃን ያዮና ቃላ ኦድሸ፥ ሀዋረታራ እስፈ ደእስ። 29 ቃስ ሳኦል ግርከ ዶናን ሃሳያ አይሁደታራ ኦደትሸ ፓላሜስ። ሽን ኤንቲ እያ ዎꬋናዉ ኮይዶሶና። 30 አማንያ አሳት ሄሳ ስእድ፥ ሳኦል ቅሳረ ኤፍድ ታርሰሳ የድዶሶና።

31 ይሁዳን፥ ጋልላንነ ሳማረ ኡባን ደእያ ዎሳ ኬꬃት ሳሮተꬃን ደእዶሶና። ቃስ ምንዶሶና፤ ጎዳስ ያይሸ ጌሻ አያና ምንꬆን ዳር ዳርድ ብዶሶና።

32 ጰፅሮስ ቢታ ኡባ ዩይሸ ሊዳን ደእያ አማንያ አሳታኮ ጋክስ። 33 ያን ሆስፑን ላይꬅ ኩመꬅ ጉንድድ አርሳን ዝንእድ ደእያ ኤንያ ጌተትያ አድያ ደምስ። 34 ጰፅሮስ፥ “ኤንያ፥ የሱስ ክርስቶሲ ነና ፓꬃና፤ ደንዳዳ ነ ሂፃ ደንꬃ” ያግስ። እካ ኤለስድ ደንድ ኤቅስ። 35 ሊዳንነ ሳሮናን ደእያ አሳ ኡባይ ኤንያ በእድ፥ ጎዳኮ ስምዶሶና።

36 ዮጰ ካታማን እስ ፃብቶ ጌተትያ አማንያራ ደአዉሱ። እ ሱንꬃይ አራምከ ዶናን፥ “ፃብቶ”፤ ግርከ ዶናን፥ “ዶርቃ”፤ ሄ ናምኡ ሱንꬃ ብርሸꬃይ “ገንኤ” ጉሱ። እያ ባ ደእዳ ዎደ ኡባን ሎኦባ ኦꬃሸነ ማንቆታ ማዳሸ ደአሱ። 37 ሄ ዎደ እያ ሀርጋዳ ሀይቅን፥ አሳይ እ አሀ ሜጭድ፥ ፖቀ ቦላ ከስድ ዝንእስዶሶና። 38 ሊደይ ዮጰስ ማታ። አማነይሳት ጰፅሮስ ሊዳን ደኤይሳ ስእድ፥ “ሀያና ኑኮ ኤለሳዳ ያ” ያግድ ናምኡ አሳታ እያኮ ኪትዶሶና።

39 ሄሳ ግሾ፥ ጰፅሮስ ደንድድ፥ ኤንታራ ብስ። ያ ጋክን፥ ፖቀ ቦላ ደእያ ክፍለ እያ ገልስዶሶና። አምኤት ጰፅሮሳ ዩሾን ኤቅድ ዬክሸ ዶርቃ ኤንታራ ፓፃ ደአሸ ኦꬅዳ ቃምሰታነ አፍላታ ኡባ ጰፅሮሳ በስዶሶና። 40 ጰፅሮስ ኤንታ ኡባ ካረ ከስድ፥ ጉልባትድ ዎስስ። ቃስ አሃኮ ስሚድ፥ “ፃብተ፥ ደንዳ” ያግስ። ፃብታ ባ አይፍያ ዶያዳ ጰፅሮሳ በአዳ፥ ደንዳ ኡታሱ። 41 ጰፅሮስ እዮ ባ ኩሸን ማድድ ደንꬅድ ኤስስ። ሄሳፈ ጉየ፥ አማነይሳታነ አምኤታ ፄግድ፥ ደንድዳሮ ኤንታ ስን ሺሽስ።

42 ሀ ኦዳይ፥ ዮጰ ካታማ ኡባ ጋክስ፤ ዳሮ አሳይ ጎዳ አማንዶሶና። 43 ጰፅሮስ ዮጰን ስሞና ጌተትያ ጋልባ ሃሸይሳ ሶን ዳሮ ጋላስ ጋምእስ።