1 ቅሳረን፥ “ፃለ ኦላ አሳታ” ጌተትያ ኦላንቾታ ግዶን እስ ቆርነልዮሳ ጌተትያ ማቶ ሀላቃይ ደኤስ። 2 ቆርነልዮስ ባ ሶ አሳራ ፆሳ ምንꬅ አማንያ አስነ ፆሳ ጎይንያ አስ። አይሁደ ማንቆታካ ዳሮ ማዴስ፥ ቃስ ፆሳ ኡባ ዎደ ዎሴስ። 3 እስ ጋላስ ኡዱፉን ሳተ ሄራን ፆሳ ኪታንቾይ እያኮ ይድ፥ “ቆርነልዮሳ” ግድ ፄግሽን እ ቆንጨꬃን ጌሽድ በእስ።

4 ቆርነልዮስ ዳጋምድ ኪታንቹዋ ትሽ ኦꬅ ፄልድ፥ “ጎዳዉ፥ እ አይቤ?” ያግስ።

ኪታንቾይ ዛሪድ፥ “ነ ዎሳይነ ማንቆታ ነ ማደይስ ፆሳ ስንꬃን ሀሳየትስ። 5 ሀእ ዮጰ አሰ ኪታዳ፥ ጰፅሮሳ ጌተትያ ስሞና ኤህሳ። 6 ጰፅሮስ አባ ዶናን ጋልባ ሃሽያ ስሞና ሶን እማꬃተꬅ ሲራትስ” ያግስ።

7 ቆርነልዮስ ባዉ ኦድዳ ኪታንቾይ ብን፥ ባ አይለታፐ ናምአታነ ፆሳ ጎይንያ ባ ማታ ዎታዳረታፐ እሱዋ ፄግድ፥ 8 ኤንታዉ ኡባባ ኦድድ ዮጰ ኪትስ።

9 ዎንተꬃ ጋላስ ኤንቲ ብድ፥ ዮጰ ካታማ ማትሽን ኡሱፑን ሳተ ሄራን ፆሳ ዎሳናዉ ጰፅሮስ ፖቀ ቦላ ከይስ። 10 እ ኮሻትድ ካꬅ ማናዉ ኮይስ፥ ሽን ካꬅ ካፅሽን እ ቆንጨꬅ በእስ። 11 ሳሎይ ዶየትን፥ ግታ አፍላ ዳንያባይ ኦይዱ ባጋራ ኦይከትድ ዎꬍሽን እ በእስ። 12 እያን ኦይዱ ቶሆራ ደእያ መሄት፥ ዎራ ዶአት፥ ኡሎራ ጎሸትያ መተꬃትነ ሳሎ ካፎት ኡባይ ደኤስ። 13 ሄ ዎደ፥ “ጰፅሮሳ፥ ደንዳ ኤቃዳ ሹካዳ ማ” ግያ ቃላይ እያኮ ይስ።

14 ሽን ጰፅሮስ፥ “ጎዳዉ፥ አካይ! ታ ቱናባ ኡባራካ ማ ኤርከ” ያግስ።

15 ቃስ፥ “ፆሳይ ጌሽዳይሳ ኔኒ ቱና ጎፓ” ግያ ቃላይ ናምአንꬆ እያኮ ይስ። 16 ሄስካ፥ ሄꬑ ቶሆ ሀንዳፐ ጉየ ሄ ግታ አፍላ ዳነይስ ኤለስድ ፑደ ሳሎ ኤከትስ።

17 ጰፅሮስ ባ በእዳ ቆንጨꬃ ብርሸꬃይ፥ “አይ ግዳንደሻ?” ግድ ባ ዎዛናን ቆፕሽን፥ ቆርነልዮስ ኪትዳ አሳት ስሞና ሶ ኦይች ደምድ ካረን ኤቅዶሶና። 18 ባንታ ቃላ ꬎቁ ኦꬅድ፥ “ጰፅሮሳ ጌተትያ ስሞና ጌተትያ እማꬃይ ሀይሳን ደኢ?” ያግድ ኦይችዶሶና።

19 ጰፅሮስ ቆንጨꬃን በእዳባ ቆፋ ቦላ ደእሽን፥ ጌሻ አያናይ እያኮ፥ “ሄኮ፥ ሄꬑ አሳት ነና ኮዮሶና። 20 ደንዳዳ ዎꬋ፥ ታኒ ኤንታ ኪትዳ ግሾ ስꬎና ኤንታራ ባ” ያግስ።

21 ጰፅሮስ አሳታኮ ዎꬍድ፥ “ህንተ ኮየይ ታና፤ አይስ ይደቲ?” ያግስ።

22 ኤንቲ ዛሪድ፥ “ኑና ማቶ ሀላቃይ ቆርነልዮስ ኪትስ። እ ፅሎ፥ ፆሳ ጎይንያ አስነ አይሁደ አሳ ኡባን ዳሮ ቦንቸትዳ አስ። ቆርነልዮስ፥ ነና ባ ሶ ኤህስድ ቃላ ኔፐ ስአና መላ ጌሻ ኪታንቾይ እያዉ ኦድስ” ያግዶሶና። 23 ጰፅሮስ አሳታ ሶ ገልስድ ሞክስ።

ዎንተꬃ ጋላስ፥ ደንድድ ኤንታራ ብስ። ዮጰ ካታማን ደእያ አማነይሳታፐ እሶት እሶት እያራ እስፈ ብዶሶና። 24 ዎንተꬃ ጋላስ፥ ቅሳረ ጋክዶሶና። ቆርነልዮስ ባ ዳቦታነ ባ ማታ ላገታ እስፈ ፄግ ሺሽድ፥ ጰፅሮሳ ናጌስ። 25 ጰፅሮስ ሶ ገላና ሀንሽን፥ ቆርነልዮስ እያራ ጋሄትድ እያ ስንꬃን ኩንድድ እያዉ ጎይናናዉ ኮይስ። 26 ሽን ጰፅሮስ፥ “ደንዳ፥ ታካ ታ ሁጰን ነ መላ አሰ” ያግድ እያ ደንꬅስ።

27 ጰፅሮስ ቆርነልዮሳራ ኦደትሸ ሶ ገልያ ዎደ ዳሮ አሳይ ሺቅዳይሳ ደምስ። 28 እ አሳኮ፥ “አይሁደ አስ ሀራ ደረራ እስፋናዉ ዎይኮ ጋሄታናዉ ዎጋ ግዶናይሳ ህንተ ኤሬታ። ሽን ታኒ ኦናካ ቱና ዎይኮ ጌሽ ግደና ጎና መላ ፆሳይ ታና በስስ። 29 ሄሳ ግሾ፥ ህንተ ታኮ ኪትን እፆይ ባይና ያስ። ሀእ ታና አይስ ፄግስዳኮ ታዉ ኦድተ” ያግስ።

30 ቆርነልዮስ፥ “ታኒ ሀች ኦይዱ ጋላሳፐ ካሰ ሀኖደ ኡዱፉን ሳተ ዎሳ ዎስሽን፥ ጶልያ ማኦ ማእዳ አስ ታ ስንꬃን ኤቅስ። 31 እ ታኮ፥ ‘ቆርነልዮሳ፥ ፆሳይ ነ ዎሳ ስእስ፥ ኔኒ ማንቆታ ማድዳይሳካ ሀሳይስ። 32 ህዛ፥ አሰ ዮጰ ኪታዳ፥ ስሞን ጰፅሮሳ ገይሳ ፄግሳ። ስሞን ጰፅሮስ ስሞና ጌተትያ ጋልባ ሃሽያ ኡራ ሶን አባ ዶናን ሲራትስ’ ያግስ። 33 ሄሳ ግሾ፥ ታኒ ኔኮ ኤለሳዳ ኪታስ፤ ነ ሎኦ ያዳሳ። ህዛ፥ ፆሳይ ነና ኪትዳባ ኡባ ስአናዉ ሀእ ኑኒ ኡባይ ሀይሳን ጎዳ ስንꬃን ደኦስ” ያግስ።

34 ካልድካ፥ ጰፅሮስ፥ “ፆሳይ አሳ ሶምኦ በእድ አሰ አሳፐ ሻከና። ዛረ 10:17. 35 ሽን አሰ ኡባ ኦና ግድኮካ ባዉ ያየይሳነ ፅሎ ኦሶ ኦይሳን ፆሳይ ኡፋይተይሳ ታኒ ቱማ አኬካስ። 36 ፆሳይ፥ ኡባ ጎዳ ግድዳ የሱስ ክርስቶሳ ባጋራ ሳሮተꬃ ኦድሸ ሀ ዎንገላ እስራኤለ አሳስ ኪትዳይሳ ህንተ ኤሬታ። 37 ዮሃንስ ፅንቃተባ ጋልላን ሳባክዳ ዎድያፐ ዶምድ ይሁዳ ቢታ ኡባ ጋካናዉ ሀንዳባ ህንተ ኤሬታ። 38 ፆሳይ ናዝረተ የሱሳስ ጌሻ አያናነ ዎልቃ እሚስ። ፆሳይ እያራ ደእያ ግሾ ሎኦባ እ ኦꬅሸ ፃላሄ ኩሸን ሃረትዳ ኡባ ፓꬅሸ ዩይስ።

39 “አይሁደ ቢታንነ የሩሳላመን እ ኦꬅዳ ኡባባስ ኑኒ ማርካታ። ኤንቲ ማስቃልያ ቦላ ካቅድ እያ ዎꬍዶሶና። 40 ሽን ፆሳይ ሄꬓንꬆ ጋላሳን ሀይቆፐ እያ ደንꬅድ አሳስ ቆንጫና መላ ኦꬅስ። 41 ሄ ቆንጨꬃይ ፆሳይ ኮይሮ ዶርዳ ማርካታሳፈ አትሽን፥ አሳ ኡባሳ ግደና። እ ሀይቆፐ ደንድዳፐ ጉየ እያራ ምዳነ ኡይዳ። 42 ፆሳይ ዎንገላ አሳስ ኑኒ ኦዳና መላነ ፓፃ ደኤይሳታ ቦላነ ሀይቅዳይሳታ ቦላ ፕርዳናዉ ሹመትዳይ የሱሳ ግደይሳ ማርካታና መላ ኑና ኪትስ። 43 ፆሳይ እያ አማንያ ኡባ ናጋራይ፥ እያ ሱንꬃን አቶ ጌተተይሳ ናበት ማርካቶሶና” ያግስ።

44 ጰፅሮስ ቡሮ ሄ ኦዳ ኦንጎናሽን ቃላ ስእያ ኡባ ቦላ ጌሻ አያናይ ዎꬍስ። 45 ጰፅሮሳራ ዮጰፈ ይዳ አማንያ ቃፃረትዳ አይሁደ ኡባይ፥ አይሁደ ግዶናይሳት ቦላ ጌሻ አያናይ ጉክዳ ግሾ ማላለትዶሶና። 46 ጋሶይካ፥ ኤንቲ ዱማ ዱማ ዶናን ኦደትሽንነ ፆሳ ግታተꬃ ሳቢሽን ስእዶሶና።

ሄ ዎደ ጰፅሮስ ዛሪድ፥ 47 “ሀይሳቲ ቃስ ኑ መላ ጌሻ አያና ኤክዳይሳት ፃማቀቶና መላ ሃ ድጋናይ ኦኔ?” ያግስ። 48 ኤንቲ የሱስ ክርስቶሳ ሱንꬃን ፃማቀታና መላ ኤንታ ኪትስ። ሄሳፈ ጉየ፥ ኤንቲ ባንታራ ጉꬃ ጋላስ ኡታና መላ ጰፅሮሳ ዎስዶሶና።