1 ሀዋረትነ ይሁዳ ኡባን ደእያ አማነይሳት፥ አይሁደ ግዶናይሳትካ ፆሳ ቃላ ኤክዳይሳ ስእዶሶና። 2 ጰፅሮስ የሩሳላመ ብዳ ዎደ ቃፃረትዳ አማነይሳት፥ 3 እያኮ፥ “ኔኒ ቃፃረትቦናይሳታኮ ገላዳ ኤንታራ ካꬅ አይስ ማዲ?” ያግዶሶና።

4 ሽን ጰፅሮስ ሀንዳባ ኮይሮፐ ዶምድ ማራን ማራን ኦድስ፦ 5 “ታኒ ዮጰ ካታማን ፆሳ ዎሳሸ ቆንጨꬅ በአስ። ግታ አፍላ ዳንያባይ ኦይዱ ባጋራ ኦይከትድ ሳሎፐ ዎꬍሸ ታኮ ይስ። 6 ታኒ ትሽ ኦꬃ እያ ግዶ ፄልያ ዎደ ኦይዱ ቶሆራ ደእያ መሄታ፥ ዎራ ዶአታ፥ ኡሎራ ጎሸትያ መተꬃታነ ሳሎ ካፎታ በአስ። 7 ‘ጰፅሮሳ፥ ደንዳ፥ ሹካዳ ማ’ ግያ ቃላ ስአስ።

8 “ሽን ታኒ፥ ‘ጎዳዉ፥ አካይ፥ ቱናባይ ዎይኮ ጌዮናባይ ኡባካ ታ ዶናኮ ሺቅ ኤረና’ ያጋስ።

9 “ ‘ፆሳይ ጌሽዳይሳ ኔኒ ቱና ጎፓ’ ግያ ቃላይ ናምአንꬆ ሳሎፐ ይስ።

10 “ሄስ ሄꬑ ቶሆ ሀንን፥ ዉርሰꬃን ኡባባይ ሳሎ ፑደ ኤከትስ። 11 ሄ ሳተንካ ሄꬑ አሳት ቅሳረፐ ታኮ ኪተትድ ታኒ ደእያ ኬꬃ ጋክ አግዶሶና። 12 ስꬎና ኤንታራ ባና መላ አያናይ ታዉ ኦድስ። ቃስ ሀ ኡሱፑን እሻት ዮጰፈ ታራ ቅሳረ ብዳይሳታራ ቆርነልዮሳ ሶ ገልዳ። 13 ኪታንቾይ እያ ሶን ኤቅድ፥ ‘ዮጰ ኪታዳ ጰፅሮሳ ጌተትያ ስሞና ፄግሳ። 14 ነናነ ነ ሶ አሳ ኡባ አሽያ ቃላ እ ነዉ ኦዳና’ ግዳይሳ ቆርነልዮስ ኑስ ኦድስ።

15 “ታኒ ሃሳያ ዶምያ ዎደ ጌሻ አያናይ ኮይሮ ኑ ቦላ ዎꬍዳይሳዳ ኤንታ ቦላካ ዎꬍ አግስ። 16 ሄ ዎደ፥ ‘ዮሃንስ ሃꬃን ፃማቅስ፥ ሽን ህንተ ጌሻ አያናን ፃማቀታና’ ያግዳ ጎዳ ቃላይ ታዉ ቆፈትስ። ሀዋ 1:5. 17 ፆሳይ ኑስ ጎዳ የሱስ ክርስቶሳ አማንዳይሳታስ እምዳ እሞታ አይሁደ ግዶናይሳታስካ እምኮ፥ ያትን ፆሳ ድጋናዉ ታኒ ኦኔ?” ያግስ።

18 ኤንቲ ሄሳ ስእዳ ዎደ ባንታ ፓላማ አግድ፥ “ያትን፥ ፆሳይ አይሁደ ግዶናይሳትካ ናጋራፐ ስሚድ ደኦን ዳናዳ ቃዳ እሚስ” ያግድ ፆሳ ጋላትዶሶና።

19 እስፅፋኖሰ ሀይቆስ ጋꬅዳ ጎዳ ጋሶን ላለትዳ አማነይሳት ቃላ አይሁደታ ፃላላስ ኦድሸ ስሮፍንቀ፥ ቆጵሮሳነ አንፆከ ጋካናዉ ዩይዶሶና። ሀዋ 8:1-4. 20 ሽን ቆጵሮሳፐነ ቀሬናፐ ይዳ እስ እስ አማንያ አሳት አንፆከ ብድ፥ ጎዳ የሱሳ ዎንገላ ግርከ አሳስካ ኦድዶሶና። 21 ጎዳ ዎልቃይ ኤንታራ ደኤስ፤ ቃስ ዳሮ አሳይ አማንድ ጎዳኮ ስምዶሶና።

22 ሄ ኦዳ የሩሳላመን ደእያ ዎሳ ኬꬃይ ስእዳ ግሾ ባርናባሳ አንፆከ ኪትስ። 23 ባርናባስ አንፆከ ብዳ ዎደ ፆሳ አꬎ ኬሀተꬃ ኦሱዋ በእድ ኡፋይትስ። ኤንቲ ኡባይ ባንታ ኩመꬃ ዎዛናን ጎዳን ምንድ ዳና መላ ኤንታ ዞርስ። 24 ባርናባስ ጌሻ አያናይነ አማኖይ ኩምዳ ሎኦ አስ ግድያ ግሾ ዳሮ አሳይ ጎዳ አማንዶሶና።

25 ሄሳፈ ጉየ፥ ባርናባስ ሳኦላ ኮያናዉ ታርሰሳ ብስ። 26 ያን ሳኦላ ደምዳ ዎደ አንፆከ ኤክድ ይስ። ባርናባስነ ሳኦል ዎሳ ኬꬃ አሳራ ላይꬅ ኩመꬅ ኡትድ ዳሮ አሳ ታማርስዶሶና። አማነይሳት አንፆከን “ክርስታነ” ጌተትድ ኮይሮ ፄገትዶሶና።

27 ሄ ዎደ እስ እስ ናበት የሩሳላመፐ አንፆከ ዎꬍዶሶና። 28 ኤንታ ግዶፈ አጋቦሳ ገይስ ደንድድ ቢታ ኡባን ግታ ኮሽ ከያናይሳ አያና ዎልቃን ትንብተ ኦድስ። ሄስ ሀንዳይ ሮመ ካዋ ቃላዉድዮሳ ዎደና። ሀዋ 21:10. 29 አማነይሳት ሁጰን ሁጰን ባንታ ዎልቃ መላ ሚሸ ከስድ ይሁዳን ደእያ አማነይሳታስ ማደ የዳናዉ ቆፋ ቃችዶሶና። 30 ኤንቲ ሄሳዳ ኦꬅድ፥ ሚሽያ ባርናባሳ ቦላነ ሳኦላ ቦላ ዎሳ ኬꬃ ጭማታስ የድዶሶና።