1 ሄ ዎደ ካዎይ ሄሮዲስ *ካዎይ ሄሮዲስ፦ ሀይስ ካዎይ ሄሮዲስ፥ ሄሮዲሳ አግርጳ ጌተትያ ኮይሩዋ። እ፥ 37-44 ማሮተꬃ ላይꬃ ጋካናዉ ሃርስ። እ ካዋ ሄሮዲሳስ ናአ ናአ ዎሳ ኬꬃ አሳፐ ባጋ ጎዳ ዶምስ። 2 ዮሃንሳ እሻ ያይቆባ ማሻን ዎꬍስስ። 3 ሄስ አይሁደታ ኡፋይስዳይሳ በእድ፥ ጉጅድ ጰፅሮሳካ ኦይꬅስ። ሄስ ሀንዳይ ፓስካ ባኣለ ቦንችያ ጋላሳታና። 4 ጰፅሮሳ ኦይክድ ቃችስ። ፓስካ ቦንችያ ጋላሳታፐ ጉየ ደርያ ስን አꬃናዉ ቆፕድ፥ ኦይዱ ኦይዱ ዎታዳረት እያ ናጋና መላ ታማነ ኡሱፑን ዎታዳረታስ አꬅድ እሚስ። ከሳ 12:1-27. 5 ሄሳ ግሾ፥ ጰፅሮስ ቃሾ ኬꬃን ናገቴስ። ሽን ዎሳ ኬꬃ አሳይ እያዉ ምንꬅድ ፆሳ ዎሶሶና።

6 ሄሮዲስ ጰፅሮሳ አሳ ስን ሺሻናፐ ካሰ ቃማ ጰፅሮስ ናምኡ ባጋራ ናምኡ ዎታዳረታራ ሳንꬃላታን ቃሸትድ ኤንታ ግዶን ꬍስክስ። ናገይሳት ቃሾ ኬꬃ ፐንገታን ኤቅድ ናጎሶና። 7 አኬኮና ደእሽን ጎዳ ኪታንቾይ ቆንጭስ። ቃሾ ኬꬃን ፖኦይ ፖእስ። ኪታንቾይ ጰፅሮሳ ምያ ቦች ባርክስድ፥ “ኤለ ደንዳ” ያግስ። ኢራካ ሳንꬃላታይ እያ ኩሽያፐ ዎꬍ አግስ። 8 ኪታንቾይ እያኮ፥ “ነ ማኡዋ ማአ፥ ነ ጫማካ አꬃ” ያግስ። ጰፅሮስ ሄሳዳ ኦꬅስ፤ ኪታንቾይ፥ “ነ ላፃና ማአዳ ታና ካላ” ያግስ።

9 ጰፅሮስ ቃሾ ኬꬃፈ ከይድ ኪታንቹዋ ካልስ። እያዉ ቆንጨꬅ በእያባ ዳንስፐ አትሽን፥ ኪታንቾይ ኦꬅያባይ ቱማ ዳንቤና። 10 ኪታንቾይነ ጰፅሮስ ኮይሩዋነ ናምአንꬆ ዎታዳርያ አꬍድ ካታማ ኤፍያ ብራታ ፐንግያኮ ጋክዶሶና። ፐንገይ ኤንታዉ ባርካ ዶየት አግስ። ኤንቲ ከይድ እስ ኦግያራ ብሽን ኪታንቾይ አኬኮና ጰፅሮሳፐ ሻከት አግስ።

11 ጰፅሮሳስ ዎዛን ስምን፥ “ታና ጎዳይ ባ ኪታንቹዋ ኪትድ፥ ሄሮዲሳ ኩሸፐነ ናግድ ኡትዳ አይሁደ አሳ ኡባፈ አሽዳይሳ ሀእ ቱማ ኤራስ” ያግስ።

12 እ ሄሳ አኬክዳ ዎደ ዳሮ አሳይ እስፈ ሺቅድ ፆሳ ዎስያ በሳ፥ ማርቆሳ ጌተትያ ዮሃንሳ አየ ማይራም ሶ ብስ። 13 ያን ካረን ኤቅድ ፄግስ። እስ ሮዳ ጌተትያ ኦሳንችያ ፐንግያ ዶያናዉ ያሱ። 14 ሮዳ ጰፅሮሳ ቃላ ግድዳይሳ ኤርዳ ዎደ ኡፋይሳን ኩማዳ ካርያ ዶየና ጉየ ዎፃ ባዳ፥ “ጰፅሮስ ካረን ኤቅስ” ያጋዳ አሳስ ኦዳሱ።

15 አሳይ ኢኮ፥ “ኔኒ ጎያይ!” ያግዶሶና። ሮዳ ጰፅሮሳ ግድዳይሳ ጌሻዳ ኦዳሱ። ኤንቲ፥ “ሄስ እያ ናግያ ኪታንቹዋ” ያግዶሶና።

16 ሽን ጰፅሮስ ካረን ኤቅድ ፄግድ አጎና እፅን አሳይ ካርያ ዶይድ እያ በእድ ማላለትዶሶና። 17 ሽን ኤንቲ ስእ ጋና መላ ጰፅሮስ ባ ኩሽያን ማልድ ጎዳይ ቃሾ ኬꬃፈ እያ ዋት ከስዳኮ ኤንታዉ ቆንጭስ ኦድድ፥ “ሀይሳ ያይቆባስነ አማንያ አሳታስ ኦድተ” ግድ ያፐ ከይድ ሀራሶ ብስ።

18 ሳአይ ዎንትያ ዎደ፥ “ጰፅሮስ አዉ ብደ” ግድ ዎታዳረት ዎል ግዶን ዳሮ ካጭዶሶና። 19 ሄሮዲስ ጰፅሮሳ ኮይስን፥ እ ꬋይዳ ዎደ ናገይሳታ ቆርድ፥ ኤንታ ዎꬋና መላ ኪትስ። ሄሳፈ ጉየ፥ ሄሮዲስ ይሁዳፐ ቅሳረ ዎꬍድ ያን ጉꬃ ዎደ ኡትስ።

20 ሄሮዲስ ፅሮሳ አሳ ቦላነ ስዶና አሳ ቦላ ዳሮ ሀንቀትስ። ኤንታ ቢታይ ካꬅ ሄሮዲሳ ቢታፈ ደምያ ግሾ ኤንቲ እስፈ ግድድ እያ ሞርና ብላስፆሳ ባንታዉ ጭማ ኦꬅድ ጊጋናዉ ሄሮዲሳኮ ብዶሶና።

21 ሄሮዲስ ባርዳ ጋላሳን ባ ካዎተꬃ አፍላ ማእድ፥ አራታ ቦላ ኡትድ አሳስ ኦድስ። 22 አሳይ፥ “ሄስ ፆሳ ቃላ፥ አሳ ቃላ ግደና” ያግድ ዋስዶሶና። 23 ሄሮዲስ ፆሳ ቦንችቦና ግሾ ኢራካ ጎዳ ኪታንቾይ እያ ደችን ጉፁነን ሜተትድ ሀይቅስ።

24 ሽን ፆሳ ቃላይ ድጭሸነ ዳልግሸ ቤስ።

25 ባርናባስነ ሳኦል ባንታ ኦሱዋ ፖልድ ማርቆሳ ጌተትያ ዮሃንሳ ባንታራ ኤክድ የሩሳላመፐ ስምዶሶና።