13
ባርናባሳነ ሳኦላ
1 አንፆከን ደእያ ዎሳ ኬꬃን ናበትነ አስታማረት ደኦሶና። ኤንቲ ባርናባሳ፥ ካሬꬅ ጌተትያ ስሞና፥ ቀሬናፐ ይዳ ሉክዮሳ፥ ካዋ ሄሮዲሳራ ድጭዳ ምናሄነ ሳኦላ። 2 ኤንቲ ጎዳ ጎይንሽንነ ፆምሽን ጌሻ አያናይ፥ “ታኒ ፄግዳ ኦሱዋስ ባርናባሳነ ሳኦላ ታዉ ዱማይተ” ያግስ።
3 ሄሳ ግሾ፥ ኤንቲ ፆምዳፐነ ዎስዳፐ ጉየ ባንታ ኩሽያ ኤንታ ቦላ ዎꬅድ የድዶሶና።
ባርናባስነ ሳኦል ቆጵሮሳን
4 ሄሳ ግሾ፥ ጌሻ አያናይ ኤንታ ኪትስ። ሰለዉቀ ብዶሶና፤ ያፐ ማርካበን ገልድ ቆጵሮሳ ሃꬃን ተቀትዳ ቢታ ብዶሶና። 5 ኤንቲ ስልማና ጋክድ አይሁደ ዎሳ ኬꬃታን ፆሳ ቃላ ኦድዶሶና። ዮሃንስ *ዮሃንስ፦ ሀ በሳን ፃፈትዳ ዮሃንስ፥ ሀዋርያ ዮሃንሳ ግዶናሽን ዮሃንስ ማርቆሳ ጌተትያ ማርቆሳ ዎንገላ ፃፍዳይሳ። ማድሸ ኤንታራ ደኤስ።
6 ኤንቲ ዩሾይ አባን ተቀትዳ ቢታ፥ ቆጵሮሳ ካንꬅድ ጳፉ ጋክያ ዎደ፥ እስ ዎርዳንቾ ናብያ፥ ባር-የሱሳ ጌተትያ አይሁደ ማሩዋ ደምዶሶና። 7 ሄ ማሮይ ደርያ አይስያ ሳርግዮስ ጳዉሎሳ ጌተትያ አኬካንቾ አድያራ ደኤስ። ሳርግዮስ ጳዉሎስ ባርናባሳነ ሳኦላ ባኮ ፄግድ ፆሳ ቃላ ስአናዉ ኮይስ። 8 ሽን ግርከ ዶናን ማሩዋ ሱንꬃይ “ኤልማሳ” ጌተቴስ። እ ደርያ ሃረይስ አማኖና መላ ድጋናዉ ኮይድ ባርናባሳራነ ጳዉሎሳራ ኤቀትስ።
9 ሽን ጳዉሎሳ ጌተትያ ሳኦል ጌሻ አያናን ኩምድ ማሩዋ ጫድ ፄልድ፥ 10 “ላ፥ ፃላሄ ናአዉ፥ ኢታተꬅ ኡባይ ኩምዳይሶ፥ ፅሎተꬃ ኡባስ ሞርክያዉ፥ ሱረ ጎዳ ኦግያ ምርቀይሳ አግኪ? 11 ሄኮ፥ ሀእ ጎዳ ኩሸይ ነ ቦላ ደኤስ። ኔኒ ቆቀ ግዳና፤ ጉꬃ ዎደስ አዋ ፖኦ በአካ” ያግስ።
ኢራ ጫጋንነ ꬉሚ እያ አይፍያ ጎዝን፥ ባ ኩሽያ ኦይክድ ካለꬅያ አስ ኮይሸ ዩይስ። 12 ደርያ አይሰይስ ሄሳ በእዳ ዎደ ጎዳባ ታማርስያ ትምርትያን ማላለትድ አማንስ።
ባርናባስነ ጳዉሎስ ጵስደ አንፆከን
13 ጳዉሎስነ እያራ ደኤይሳት ጳፉፐ ደንድድ፥ ጵንፍለን ደእያ ጳርገ ማርካበራ ብዶሶና። ዮሃንስ ኤንታፈ ሻከትድ የሩሳላመ ስምስ። 14 ሽን ኤንቲ ጳርገፈ አꬍድ ጵስደን ደእያ አንፆከ ጋክዶሶና። ሳምባታ ጋላስ አይሁደ ዎሳ ኬꬅ ገልድ ኡትዶሶና። 15 ሙሰ ህገይነ ናበታ ማፃፋይ ናባበትዳፐ ጉየ አይሁደ ዎሳ ኬꬃ ሀላቃት፥ “ኑ እሻቶ፥ አሳ ምንꬅያ ቃል ህንተዉ ደእያኮ አሳስ ኦደርከት” ያግድ ኤንታኮ ኪትዶሶና።
16 ጳዉሎስ ደንድ ኤቅድ ባ ኩሸ ማልድ፥ “እስራኤለ አሳቶነ፥ ፆሳ ጎይንያ አይሁደ ግዶና አሳዉ፥ ስእተ። 17 ሀ እስራኤለ አሳ ፆሳይ ኑ ማይዛታ ዶርስ። ግብፀ ቢታን እማꬃተꬃን ኤንቲ ደእሽን፥ ኤንታ ዳርስድ ባ ግታ ዎልቃን ግብፀ ቢታፈ ኤንታ ከስስ። ከሳ 1:7፤ ከሳ 12:51. 18 መላ ቢታን ኦይታሙ ላይꬃ መላ ኤንታ ዳንዳእስ። ታይቦ 14:34፤ ዛረ 1:31. 19 ካናነ ቢታን አይሁደ ግዶና ላፑን ካዎተꬃታ ድግድ ኤንታ ቢታ ባ አሳ ላትስስ። ዛረ 7:1.
20 “ሄሳፈ ጉየ፥ ናብያ ሳሜላ ዎደ ጋካናዉ ኦይዱ ፄታነ እሻታሙ ላይꬃ መላ አይስያ ዳይናታ ኤንታዉ እሚስ። ዛረ 2:16፤ 1 ሳሜ 3:20. 21 ሄሳፈ ጉየ፥ ኤንቲ ባንታዉ ካዎ እማና መላ ዎስን፥ ፆሳይ ብንያመ ሼሻፐ ቂሳ ናኣ፥ ሳኦላ ኦይታሙ ላይꬅ ካዎታና መላ ኤንታዉ እሚስ። 1 ሳሜ 8:5፤ 10:21. 22 ፆሳይ ሳኦላ ሻርዳፐ ጉየ ኤንታ ቦላ ዳዊታ ካዎꬅስ። ፆሳይ ዳዊታባ ማርካትሸ፥ ‘ታኒ ኮይያ ኡባ ታ ዎዛና መላ ኦꬅያ እሰየ ናኣ ዳዊታ ደማስ’ ያግስ። 1 ሳሜ 13:14፤ 16:12፤ ማዝ 89:20.
23 “ፆሳይ፥ ‘ታኒ ዳዊታ ሼሻፐ እስራኤለ ደርያ አሸይሳ ኤሀና’ ግዳይሳ መላ የሱሳ ኤህስ። 24 የሱሲ ያናፐ ስን እስራኤለ አሳ ኡባይ ባንታ ናጋራፐ ስሚድ ፃማቀታና መላ ዮሃንስ ቃላ ኦድስ። ማር 1:4፤ ሉቃ 3:3. 25 ቃስ ዮሃንስ ባ ኦሱዋ ዉርሳና ሀንሸ አሳኮ፥ ‘ታና ኦና ግድ ቆፔቲ? ታኒ ህንተ ናግያ ክርስቶሳ ግድከ፥ ሽን ታኒ እያ ጫማ ብርሻናዉ ታዉ በሶናይስ ታፐ ጉየራ ዬስ’ ያግስ። ማቶ 3:11፤ ማር 1:7፤ ሉቃ 3:16፤ ዮሀ 1:20፥ 27.
26 “ታ እሻቶ፥ አብራሃመ ሼሻቶ፥ ቃስ ሀይሳን አይሁደ ግዶናሽን ፆሳስ ያየይሳቶ፥ ሀ አቶተꬃ ቃላይ ኑስ ኪተትስ። 27 አይስ ጊኮ፥ የሩሳላመን ደእያ አሳይነ ኤንታ ሀላቃት የሱሳ ኤርቦኮና። ሳምባታ ኡባን ናባበትያ ናበታ ቃላ አኬክቦና ግሾ እያ ቦላ ፕርድድ ናበት ኦድዳ ቃላ ፖልዶሶና። 28 የሱሳ ዎꬍሳናዉ እስ ጋሶይካ ኤንታዉ ꬋይን ጵላፆስ እያ ዎꬋና መላ ዎስዶሶና። ማቶ 27:22-23፤ ማር 15:13-14፤ ሉቃ 23:21-23፤ ዮሀ 19:15. 29 ኤንቲ የሱሳባይ ጌሻ ማፃፋን ፃፈትዳባ ኡባ ፖልዳ ዎደ ማስቃልያፐ እያ ዎꬍስድ ሞግዶሶና። ማቶ 27:57-61፤ ማር 15:42-47፤ ሉቃ 23:50-56፤ ዮሀ 19:38-42. 30 ሽን ፆሳይ ሀይቆፐ የሱሳ ደንꬅስ። 31 ሄሳፈ ጉየ፥ እ ባራ ጋልላፐ የሩሳላመ ይዳይሳታስ ዳሮ ቶሆ በንትስ። ኤንቲ ሀእ እያባ አሳስ ማርካቶሶና። ሀዋ 1:3.
32 “ፆሳይ ኑ አዋታስ እማና ግዳ ዎንገላ ኑኒ ህንተዉ ኦዶስ። 33 ዳዊቲ ባ ማዝሙረ ማፃፋን ናምአንꬆ ሸምፑዋን፥
“ኔኒ፥ ታ ናአ፥
ታኒ ሀች ነና የላስ”
ጌተትድ ፃፈትዳይሳ የሱሳ፥ ፆሳይ ሀይቆፐ ደንꬅድ ኑ ማይዛታስ እማና ግዳይሳ ኑስ ኤንታ ናይታስ ፖልስ። ማዝ 2:7. 34 እ ዎቆና መላ ፆሳይ ሀይቆፐ እያ ደንꬆን ኤርሳናዉ፥
“ ‘ታኒ ዳዊታስ እማና ግዳ
አማነትዳ ጌሻ አንጁዋ ህንተዉ እማና’ ያግድ ኦድስ። እሳ 55:3.
35 ሄሳ ግሾ፥ ማዝሙረ ማፃፋን ሀራ በሳን፥
“ ‘ነ ጌሻ ናኣ አሀ ዎቅሳካ’ ያጌስ። ማዝ 16:10.
36 “ዳዊቲ ባ ዎደ ፆሳ ቆፋ ፖልዳፐ ጉየ ሀይቅድ ባ አዋታራ ሞገትድ ዎቅስ። 37 ሽን ፆሳይ ሀይቆፐ ደንꬅዳይስ ዎቅቤና።
38 “ሄሳ ግሾ፥ ታ እሻቶ፥ ናጋራ አቶተꬃይ የሱሳ ባጋራ ካሰትድ ህንተዉ ኦደትዳይሳ ኤርተ። ሙሰ ህገይ ናጋራፐ ፅልሳናዉ ዳንዳኤና። 39 ሽን የሱሳ አማንያ ኡባይ ናጋራፐ ፅሌስ። 40 ሄሳ ግሾ፥ ናበት ግዳይስ ህንተ ቦላ ጋኮና መላ ናገትተ።
41 “ ‘ፆሳይ ግዳባ ለቅሰይሳቶ!
በእተ! ማላለትተ! ꬋይተ!
ኦንካ ኦድን፥ ህንተ አማኖና ኦሱዋ
ታኒ ህንተ ዎድያን ኦꬃና’ ” ያግስ። እብራ 1:5.
42 ጳዉሎስነ ባርናባስ አይሁደ ዎሳ ኬꬃፈ ከይሽን፥ ካልያ ሳምባታን ሄሳ ጉጅድ ኦዳና መላ አሳይ ኤንታና ዎስዶሶና። 43 ሺቆይ ላለትዳፐ ጉየ፥ ዳሮ አይሁደትነ አይሁደታ አማኑዋን ገልድ ፆሳ ጎይንያ ዳሮት ጳዉሎሳነ ባርናባሳ ካልዶሶና። አማንዳይሳት ፆሳ አꬎ ኬሀተꬃን ምንድ ዳና መላ ኤንታ ዞርዶሶና። 44 ካልያ ሳምባታን ካታማን ደእያ አሳፐ ዳሮት ፆሳ ቃላ ስአናዉ ሺቅዶሶና። 45 ሽን አይሁደት ዳሮ አሳ በእዳ ዎደ ጳዉሎሳ ቃናትድ እያ ሃሳያ እፅድ እያ ጫይዶሶና።
46 ጳዉሎስነ ባርናባስ ያዮና፥ “ፆሳ ቃላይ ኮይሮትድ ህንተዉ ኦደታናዉ ኮሼስ። ሽን ህንተ ቃላ እፅድ መርና ደኡዋ ኤካናዉ ኑስ በሰና ግድ ህንተ፥ ህንተ ሁጰን ፕርድዳ ግሾ ህዛ ኑኒ አይሁደ ግዶናይሳታኮ ስሞስ። 47 ጋሶይካ ጎዳይ፥
“ ‘አላመ ኩመꬃይ ነ ባጋራ አታና መላ፥
ታኒ ነና አይሁደ ግዶና ደርያስ ፖኦ ኦꬃስ’ ያግድ ኑና ኪትስ” ያግዶሶና። እሳ 42:6፤ 49:6.
48 አይሁደ ግዶናይሳት ሄሳ ስእዳ ዎደ ኡፋይትድ ፆሳ ቃላ ቦንችዶሶና። ቃስ መርና ደኡዋስ ዶረትዳ ኡባይ አማንዶሶና።
49 ጎዳ ቃላይ ሄ ቢታ ኡባ ጋክስ። 50 ሽን አይሁደት፥ አይሁደ ግዶና ፆሰ ጎይንያ ዱረ ማጫሳታነ ካታማን ደእያ ግታ አሳታ ጳዉሎሳ ቦላነ ባርናባሳ ቦላ ደንꬅዶሶና። ሄ አሳት ኤንታ ጎዳ ዶምድ ባንታ ቢታፈ ከስዶሶና። 51 ሽን ጳዉሎሳራነ ባርናባሳራ እፀይሳታስ ማላ ግዳና መላ ባንታ ቶሁዋፐ ባና ፕትድ እቆንዮነ ካታማ ብዶሶና። ማቶ 10:14፤ ማር 6:11፤ ሉቃ 9:5፤ 10:11. 52 ቃስ አንፆከን ደእያ አማነይሳት ጌሻ አያናንነ ኡፋይሳን ኩምዶሶና።
*13:5 ዮሃንስ፦ ሀ በሳን ፃፈትዳ ዮሃንስ፥ ሀዋርያ ዮሃንሳ ግዶናሽን ዮሃንስ ማርቆሳ ጌተትያ ማርቆሳ ዎንገላ ፃፍዳይሳ።
13:17 ከሳ 1:7፤ ከሳ 12:51.
13:18 ታይቦ 14:34፤ ዛረ 1:31.
13:19 ዛረ 7:1.
13:20 ዛረ 2:16፤ 1 ሳሜ 3:20.
13:21 1 ሳሜ 8:5፤ 10:21.
13:22 1 ሳሜ 13:14፤ 16:12፤ ማዝ 89:20.
13:24 ማር 1:4፤ ሉቃ 3:3.
13:25 ማቶ 3:11፤ ማር 1:7፤ ሉቃ 3:16፤ ዮሀ 1:20፥ 27.
13:28 ማቶ 27:22-23፤ ማር 15:13-14፤ ሉቃ 23:21-23፤ ዮሀ 19:15.
13:29 ማቶ 27:57-61፤ ማር 15:42-47፤ ሉቃ 23:50-56፤ ዮሀ 19:38-42.
13:31 ሀዋ 1:3.
13:33 ማዝ 2:7.
13:34 እሳ 55:3.
13:35 ማዝ 16:10.
13:41 እብራ 1:5.
13:47 እሳ 42:6፤ 49:6.
13:51 ማቶ 10:14፤ ማር 6:11፤ ሉቃ 9:5፤ 10:11.