15
የሩሳላመ ሺቁዋ
1 እስ እስ አሳት ይሁዳፐ አንፆከ ብድ፥ “ሙሰ ዎጋꬆ ህንተ ቃፃረቶና እፅኮ አታናዉ ዳንዳኤከታ” ግድ አማነይሳታ ታማርሶ ዶምዶሶና። ሌወ 12:3. 2 ሄስ ጳዉሎሳነ ባርናባሳ ኤንታራ ዳሮ ፓላማናዳነ ካጫናዳ ኦꬅስ። ሄሳ ግሾ፥ አንፆከን ደእያ እስ እስ አሳት ጳዉሎሳራነ ባርናባሳራ የሩሳላመ ብድ ሀዋረታራነ ጭማታራ ጋሄትድ ሄ ኦዳ ብላናዉ ቆፋይ ቃሸትስ።
3 ዎሳ ኬꬃይ ኤንታ ኪትን ብዶሶና። ኤንቲ ስሮፍንቀ ሳማረራ አꬍሸ አይሁደ ግዶናይሳት ፆሳኮ ዋንድ ስምዳኮ ኦድዶሶና። ሄስ አማነይሳታ ኡባ ዳሮ ኡፋይስስ። 4 ኤንቲ የሩሳላመ ጋክዳ ዎደ ዎሳ ኬꬃይ፥ ሀዋረትነ ጭማት ኤንታ ሞክዶሶና። ፆሳይ ባንታራ ኦꬅዳባ ኡባ ኦድዶሶና። 5 ሽን ፋርሳወታ ባጋፈ አማንዳ እስ እስ አሳት ደንድ ኤቅድ፥ “አይሁደ ግዶናሽን አማንዳ አሳት ቃፃረታናዉነ ሙሰ ህገ ናጋናዉ በሴስ” ያግዶሶና።
6 ሀዋረትነ ጭማት ሄሳ ዞረታናዉ ሺቅዶሶና። 7 ዳሮ ዞረትዳፐ ጉየ፥ ጰፅሮስ ደንድ ኤቅድ፥ “ታ እሻቶ፥ አይሁደ ግዶናይሳት ዎንገላ ቃላ ታ ዶናፐ ስእድ አማናና መላ ካሰትድ ታና ፆሳይ ህንተ ግዶፈ ዶርዳይሳ ህንተ ኤሬታ። ሀዋ 10:1-43. 8 አሳ ዎዛና ኤርያ ፆሳይ ጌሻ አያና ኑስ እምዳይሳዳ ኤንታዉካ እምድ ቱማይስ። ሀዋ 2:4፤ 10:44. 9 አማኖን ኤንታ ዎዛና ጌሽዳ ግሾ ኑ ግዶንነ ኤንታ ግዶን ዱማተꬅ ዎꬅቤና። 10 ሄሳ ግሾ፥ ኑ አዋትነ ኑኒ ቶካናዉ ዳንዳእቦና ቃምባራ አማነይሳታ ሞርገን ዎꬅድ ሀእ አይስ ህንተ ፆሳ ፓጨቲ? 11 ጎዳ የሱስ ክርስቶሳ አꬎ ኬሀተꬃን ኤንቲ አትዳይሳዳ ኑካ አትዳይሳ አማኖስ” ያግስ።
12 አሳይ ስእ ግድ፥ ባርናባስነ ጳዉሎስ አይሁደ ግዶና አሳ ግዶን ባንታ ባጋራ ፆሳይ ኦꬅዳ ማላታታነ ኦራꬃባ ኡባ ኦድሽን ስኦሶና።
13 ኤንቲ ሃሳያ ኦንግዳፐ ጉየ ያይቆብ፥ “እሻቶ፥ ታ ገይሳ ስእተ። 14 ፆሳይ አይሁደ ግዶናይሳታ ግዶፈ ባ አሰ ዶራናዉ ኮይድ ኤንታና ኮይሮ ዋትድ ቆፕዳኮ ስሞን ኦድስ። 15 ናበታ ቃላይ ሀይሳራ እስኖ። ጌሻ ማፃፋን፥
16 “ ‘ሀይሳፈ ጉየ፥ ታኒ ስማና፥
ኩንድዳ ዳዊታ ካዎተꬃ ደንꬃና።አሞ 9:11-12.
ላለትዳ ኬꬃካ ዛራ ኤሳና።
17 አትዳ አሳ ኡባይ ታኮ ያና፥
ታኒ ፄግዳ አይሁደ ግዶና አሳ ኡባይ ታና ኮያና።
18 በንፐ ዶማዳ ሄስ ኤረታና መላ ኦꬅዳ
ፆሳይ፥ ታኒ ያጋይስ’ ያጌስ።
19 “ሄሳ ግሾ፥ ታ ቆፋይ ፆሳኮ ስምያ አይሁደ ግዶናይሳታ ኑኒ ዋይሶናኮ ሎኦ። 20 ሽን ኤንቲ ኤቃስ ያርሸትድ ቱንዳባ ሞና መላ፥ ላይማቶና መላ፥ ባዉታ ሞና መላነ ሱꬅ ኡዮና መላ ኤንታዉ ኑኒ ዳብዳበ ፃፋናዉ ኮሼስ። ከሳ 34:15-17፤ ሌወ 17:10-16፤ 18:6-23. 21 ሙሰ ህገይ በንፐ ዶምድ ሳምባታን ሳምባታን አይሁደ ዎሳ ኬꬃታን ናባበትሸ ካታማ ኡባን ሳባከቴስ” ያግስ።
22 ሄሳፈ ጉየ፥ ሀዋረትነ ጭማት ዎሳ ኬꬃ አሳ ኡባራ እስፈ ባንታ ግዶፈ ጉꬃ አሳታ ዶርድ ጳዉሎሳራነ ባርናባሳራ አንፆከ የዳናዉ ቆፋ ቃችዶሶና። ኤንቲ ዳሮ ቦንቸትዳ ናምኡ አሳታ ባርሳባሳ ጌተትያ ይሁዳነ ስላሰ ዶርዶሶና። 23 ሀይሳዳ ጌተትድ ፃፈትዳ ዳብዳበ ኤንታ ቦላ የድዶሶና፦ “ኑኒ ሀዋረትነ ጭማት ህንተ እሻት፥ አንፆከን፥ ሶረንነ ክልቀን ደእያ አይሁደ ግዶና እሻታስ ኑ ሳሮꬁዋ ኪቶስ።
24 “ኑኒ ኪቶና አሳት ኑ ግዶፈ ብድ፥ ‘ህንተ ቃፃረታናዉነ ህግያ ናጋናዉ በሴስ’ ግድ፥ ህንተና ዋይስዳይሳነ ይሎይዳይሳ ስእዳ። 25 ኑኒ ዶስያ ባርናባሳነ ጳዉሎሳ ዶረትዳ አሳታራ እስፈ ህንተኮ ኪታናዉ እስ ዎዛናን ኑ ቆፋ ቃችዳ። 26 ኤንቲ ኑ ጎዳ የሱስ ክርስቶሳ ግሾ ባንታ ደኡዋ አꬅድ እምዶሶና። 27 ሄሳ ግሾ፥ ኑኒ ፃፍዳይሳ ኤንቲ ባንታ ዶናን ጉጅድ ህንተዉ ኦዳና መላ ይሁዳነ ስላሰ ኪትዳ።
28 “ሀ ኮሸይሳታፐ አትሽን፥ ሀራ ቶሆ ህንተና ቶሶና መላ ኑነ ጌሻ አያናይ ኦዳ ቃችዳ። 29 ኤቃስ ያርሸትድ ቱንዳባ ሞፕተ፥ ሱꬁ ኡዮፕተ፥ ባዉታ ሞፕተ፥ ላይማቶፕተ። ሀ ኡባፈ ህንተ ሁጵያ ናግኮ ህንተ ሎኦባ ኦꬄታ። ህዛ፥ ሳሮ ደእተ” ያግዶሶና።
30 ሄሳ ግሾ፥ ኪተትዳይሳት ሞይዘትድ አንፆከ ብድ አማንያ አሳ ሺሽድ፥ ዳብዳበ እምዶሶና። 31 ኤንቲ ሄ ምንꬅያ ዳብዳብያ ናባብዳ ዎደ ኡፋይትዶሶና። 32 ቃስ ይሁድነ ስላሰይ ባንታ ሁጰን ናበ ግድያ ግሾ አማነይሳታ ሎይꬅ ዞርድ ምንꬅዶሶና። 33 ኤንቲ አንፆከን ጉꬃ ጋላስ ኡትዳፐ ጉየ እሻት ሎኦራ ሞይዝን ባንታና ኪትዳይሳታኮ ስምዶሶና። 34 *እስ እስ ማፃፋታን ፓይዶ 34 ባዋ። [ሽን ስላሰይ ያን አታናዉ ኮይስ]።
35 ቃስ ጳዉሎስነ ባርናባስ ሀራ ዳሮ አሳታራ እስፈ ጎዳ ቃላ ታማርስሸነ ዎንገላ ኦድሸ አንፆከን ጋምእዶሶና።
ጳዉሎሳነ ባርናባሳ ሻከተꬃ
36 ጉꬃ ጋላሳፐ ጉየ ጳዉሎስ ባርናባሳኮ፥ “ኑኒ ጎዳ ቃላ ኦድዳ ካታማ ኡባን አማነይሳት ዋንድ ደእያኮ ጉየ ስምሸ ፆሞስ በኦስ” ያግስ። 37 ባርናባስ ማርቆሳ ጌተትያ ዮሃንሳ ባንታራ ኤፋናዉ ኮይስ። 38 ሽን ጳዉሎስ ማርቆሳ ባንታራ ኤፋናዉ ኮይቤና። ጋሶይካ፥ እ ጵንፍለን ሻከትድ ኤንታራ ኦꬃናዉ ብቤና። ሀዋ 13:13. 39 ኤንታ ግዶን ኢታ ኦሽ ከይን እሶይ እሱዋፈ ሻከትዶሶና። ባርናባስ ማርቆሳ ኤክድ ማርካበራ ቆጵሮሳ ብስ። 40 ሽን ጳዉሎስ ስላሰ ዶርስ፤ አማነይሳት ጳዉሎሳ ፆሳ አꬎ ኬሀተꬃስ ሀዳራ እምዳፐ ጉየ፥ እ ከይድ ብስ። 41 ያትድ፥ ዎሳ ኬꬃታ ምንꬅሸ ሶረራነ ክልቅያራ አꬍስ።