1 ጳዉሎስ ዳርበነ ልስፅራ ብስ። ያን ፅሞትዮሳ ጌተትያ አማንያ አስ ደኤስ። እያ አይያ አማንያ አይሁደ ማጫስ፥ እያ አዋይ ግርከ አስ። 2 ልስፅራንነ እቆንዮነን ደእያ አማነይሳት ፅሞትዮሳባ ሎይꬅድ ማርካትዶሶና። 3 ጳዉሎስ ፅሞትዮሳ ባራ ኤፋናዉ ኮይድ፥ እያ አዋይ ግርከ አስ ግድዳይሳ ሄ በሳን ደእያ አይሁደ ኡባይ ኤርያ ግሾ እያ ቃፃርስ። 4 ኤንቲ ካታማታራ ብሸ የሩሳላመን ደእያ ሀዋረትነ ጭማት ዎꬅዳ ህግያ አማነይሳት ናጋና መላ ኤንታዉ ኦድሸ አꬍዶሶና። 5 ሄሳ ግሾ፥ ዎሳ ኬꬃት አማኖን ምንሸ፥ ታይቦንካ ጋላስ ጋላስ ዳር ዳር ብዶሶና።

6 ኢሰን ቃላ ኦዶና መላ ጌሻ አያናይ ኤንታ ድግዳ ግሾ፥ ፕርገራነ ጋላትያ ቢታራ አꬍዶሶና። 7 ኤንቲ ሚሰ ዛዋ ጋክዳ ዎደ ብታነ ባናዉ ኮይዶሶና። ሽን የሱሳ አያናይ ኤንታ ድግስ። 8 ሄሳ ግሾ፥ ኤንቲ ሚሰ ማታራ አꬍሸ ፅሮኣዳ ዎꬍዶሶና። 9 ጳዉሎስ ቃማ ቆንጨꬃን እስ ማቀዶነ አስ ባኮ፥ “ማቀዶነ ፕናዳ ኑና ማዳርክ” ያግሸ ኤቅድ ዎስሽን በእስ። 10 ቆንጨꬃ እ በእዳፐ ጉየ ኤለስድ ኑኒ ማቀዶነ ባናዉ ኮይዳ። አይስ ጊኮ፥ ዎንገላ ያን ደእያ አሳስ ኦዳናዉ ፆሳይ ኑና ፄግዳይሳ ኤርዳ።

11 ፅሮኣዳፐ ደንድድ ማርካበን ገልድ ሳሞትራቀ ብዳ፥ ዎንተꬃ ጋላስ ናጱለ ብዳ። 12 ያፐ ደንድድ ማቀዶነ ቢታን ደእያ ፍልጵስዩሳ ካታማ ብዳ። ፍልጵስዩስ ሮመ አሳይ ደእያ ካታማ። ኑኒ ሄ ካታማን ጉꬃ ጋላስ ኡትዳ።

13 ሳምባታ ጋላስ ካታማፐ ጋፃን ሻፋ ዶናን አይሁደት ፆሳ ዎስያ በሲ ደኤይሳ ኤርድ ያ ብዳ። ሄ በሳን ሺቅዳ ማጫሳስ ቃላ ኦድዳ።

14 ኑና ስእያ አሳፐ እስ ሊድያ ጌተትያ ትያትሮና ካታማፐ ይዳ፥ ፆሳ አማንዳ ዞኦ አፍላ ዛልእያ፥ ማጫስያ ደአዉሱ። ጳዉሎስ ኦደይሳ እያ ስአና መላ ፆሳይ እ ዎዛና ዶይስ። 15 ሊድያ ባ ሶ አሳራ እስፈ ፃማቀትዳፐ ጉየ ኑኮ፥ “ህንተ ታና ጎዳ ቱማ አማናሱ ጊኮ ታ ሶ የꬍተ” ጋዳ ምንꬃዳ ዎሳሱ።

16 ኑኒ ፆሳ ዎስያ በሳ ብሽን ኢታ አያናይ እ ቦላ ደእድ ማሮꬅያ እስ ጌላኦ ጋꬍንዶይ ኑራ ጋሄታሱ። እያ ካያዳ ዳሮ ሚሸ ባ ጎዳታስ ኤሀዉሱ። 17 ጳዉሎሳነ ኑና ካላዳ፥ “ሀይሳቲ ኡባፈ ቦላ ፆሳ አይለታ! ኤንቲ ህንተ አታና ኦገ ኦደይሳታ” ጋዳ ዋሳሱ።

18 ኡባ ጋላስ ሄሳዳ ጋዉሱ። ሽን ጳዉሎስ ይሎትድ ጉየ ስሚድ፥ ሄ አያና፥ “የሱስ ክርስቶሳ ሱንꬃን ኔኒ ኢፐ ከያ” ግድ ኪትስ። ኢራካ ኢታ አያናይ ኢፐ ከይ አግስ።

19 ሽን እ ጎዳት ባንታዉ ሚሸ ደምያ ኦገይ ꬋይዳይሳ በእድ፥ ጳዉሎሳነ ስላሰ ኦይክድ፥ ዳባባ ዳይናታ ስን ጎች ኤፍዶሶና። 20 ዳይናታ ስን ኤንታ ኤፍድ፥ “ሀይሳቲ አይሁደ አስ ግድሸ ኑ ካታማ አሳ ዳሮ ዋይሶሶና። 21 ኑኒ ሮመ ቢታ አስ ግድሸ ኤካናዉነ ኦꬃናዉ ዎጋ ግዶናባ ታማርሶሶና” ያግዶሶና።

22 አሳይ እስ ባጋ ግድድ፥ ጳዉሎሳ ቦላነ ስላሰ ቦላ ደንድዶሶና። ዳይናት ኤንታ ማኡዋ ቃርድ ፃምአን ሾጫና መላ ኪትዶሶና። 23 ኤንታ ዳሮ ዋꬍዳፐ ጉየ፥ ቃሾ ኬꬅ ገልስዶሶና። ቃሾ ኬꬃ ናገይስካ ኤንታ ምንꬅ ናጋና መላ ኪትዶሶና። 24 ቃሾ ኬꬃ ናገይስ ሄ ኪታ ኤክድ፥ ጳዉሎሳነ ስላሰ ቃሾ ኬꬃስ ቆልአ ገልስስ። ኤንታ ቶሁዋ ዱፅስ።

25 ሽን ግድ ብላሄ ግድያ ዎደ ጳዉሎሳራነ ስላሰራ ዎስሸነ ማዝሙረ የፅሸ ፆሳ ጋላቶሶና። ቃሾ ኬꬃን ደእያ ሀራ አሳትካ ኤንቲ ግያባ ስኦሶና። 26 ቆፖና ቃሾ ኬꬃ ባሶይ ቃፃና ጋካናዉ ቢታ ቃፆይ ሀንስ። ሄ ሳተንካ ፐንገ ኡባይ ዶየትስ፤ ቃሸትዳ አሳ ኡባ ሳንꬃላታይ ብርሸት ዎꬍስ። 27 ቃሾ ኬꬃ ናገይስ ꬍስኮፈ ባርክዳ ዎደ ቃሾ ኬꬃ ፐንገ ኡባይ ዶየትዳይሳ በእድ ቃሾ አሳይ ከስ ኤክ ብዳባ ዳንን ባና ዎꬋናዉ ማሸ ኤክስ። 28 ሽን ጳዉሎስ ቃላ ꬎቁ ኦꬅድ “ኑ ኡባይ ሀይሳን ደእያ ግሾ ኔኒ ነና ቆሆፓ” ያግስ።

29 ቃሾ ኬꬃ ናገይስ ፆምፐ ዎስ ኤክድ ኤለስድ ጋꬅ ዎፅስ። ኮኮርሸ ጳዉሎሳ ስንꬃንነ ስላሰ ስንꬃን ጉፋንስ። 30 ኤንታ ካረ ከስድ፥ “ታ ጎዳቶ፥ ታኒ አታናዉ አይ ኦꬃናዉ በሲ?” ያግስ።

31 ጳዉሎሳራነ ስላሰራ እያኮ፥ “ጎዳ የሱስ ክርስቶሳ አማና፤ ኔራነ ነ ሶ አሳራ አታና” ያግዶሶና። 32 ኤንቲ እያስነ እያ ሶን ደእያ ኡባስ ጎዳ ቃላ ኦድዶሶና። 33 ቃማ ሄ ሳተንካ ቃሾ ኬꬃ ናገይስ ኤንታ ኤፍድ ኤንታ ማዱንꬃ ሜጭስ። ኤለስድ ባ ሶ አሳ ኡባራ ፃማቀትስ። 34 ጳዉሎሳነ ስላሰ ባ ሶ ኤፍድ ኤንታዉ ካꬅ አꬅስ። እ ባ ሶ አሳ ኡባራ ፆሳ አማንዳ ግሾ ኡፋይትስ።

35 ሳእ ዎንትን ዳይናት፥ “ሄ አሳታ ብላ” ያግድ ዎታዳረታ ሀላቃታ እያኮ ኪትዶሶና። 36 ቃሾ ኬꬃ ናገይስ፥ “ህንተ ብለታና መላ ዳይናት ኪትዶሶና። ህዛ፥ ከይድ ሳሮ ቢተ” ያግድ ሄ ኪታ ጳዉሎሳስ ኦድስ።

37 ሽን ጳዉሎስ፥ “ኑኒ ሮመ አስ *ሮመ አስ፦ ጳዉሎስ ሮመ አስ ያግድ ባና ፄግዳይ ሄ ዎደ አይሁደ ቢታ ሃረይ ሮመ ካዎተꬃ ግድዳ ግሾሳ። ሄ ዎደ ሮመ ቢታን ደእያ አሳይ ፕርድ ባይና ጋራፈቶኮና። ግድሽን ኤንቲ ኑና ፕርድ ባይና አሳ ስንꬃን ዋꬍድ፥ ቃሾ ኬꬃን የግዶሶና። ሀእ ኑና ጌማን ከይድ ቦ ጎና? ሀነና፥ ኤንቲ ባንታ ሁጰን ይድ ኑና ከሶ” ያግስ።

38 ዎታዳረ ሀላቃት ዳይናታስ ሄሳ ኦድን፥ ጳዉሎሳራነ ስላሰራ ሮመ ቢታ አሰ ግድዳይሳ ስእዳ ዎደ ያይዶሶና። 39 ሄሳ ግሾ፥ ዳይናት ይድ ኤንታኮ፥ “ኑኒ ህንተና ቆህዳ” ግዶሶና። ቃሾ ኬꬃፈ ካረ ኤንታ ከስድ፥ ካታማፐ ከይድ ባና መላ ዎስዶሶና። 40 ጳዉሎሳራነ ስላሰራ ቃሾ ኬꬃፈ ከይድ ሊድያ ሶ ብዶሶና። ያን አማነይሳታራ ጋከትድ ኤንታ ምንꬅድ ከይድ ብዶሶና።