1 ጳዉሎሳራነ ስላሰራ አምፍጶልሳራነ አጶሎናራ አꬍድ ተሰሎንቀ ብዶሶና። ያን አይሁደ ዎሳ ኬꬅ ደኤስ። 2 ጳዉሎስ ካሰይሳዳ ያ ገልስ። ሄሳን ሄꬑ ሳምንታ ፆሳ ቃላፐ አሳስ ኦድስ። 3 ክርስቶስ ዋየ ኤካናዉነ ሀይቆፐ ደንዳናዉ በሰይሳ ኤንታዉ ቆንጭስድ ኦድሸ፥ “የሱሲ ሀ ታኒ ህንተዉ ኦደይስ ክርስቶሳ” ያግስ። 4 ኤንታፈ እሶት እሶት ኦዳይ ቱማ ግደይሳ ማእድ ጳዉሎሳራነ ስላሰራ እስፍዶሶና። ሄሳዳካ፥ ፆሳ ጎይንያ ዳሮ ግርከ አሳይነ ዳሮ ቦንቸትዳ ማጫሳትካ ኤንታራ እስፍዶሶና።

5 ሽን አይሁደት ቃናትድ እስ እስ ኦሶይ ባይና ኢታ አሳታ ኦገፐ ሺሽዶሶና። ካታማን ቡቀꬅ ከስዶሶና፤ ጳዉሎሳነ ስላሰ አሳስ አꬅድ እማናዉ ኮይድ ያሶና ኬꬃ ተቅዶሶና። 6 ጳዉሎስነ ስላ ኤንታዉ በንቶና እፅን፥ ያሶናነ እስ እስ አማነይሳታ ካታማ ሀላቃታኮ ጎች ኤፍድ፥ “ሀይሳቲ ቢታ ኡባ ቡቀይሳት ሀእ ኑኮ ይዶሶና። 7 ያሶን ኤንታ ባ ሶን ዎꬅስ። ሀይሳቲ፥ ‘የሱሳ ጌተትያ ሀራ ካዎይ ደኤስ’ ግድ ቄሳረ ኪታ መንꬆሶና” ያግድ ꬎቁ ግዳ ቃላን ኦድዶሶና።

8 ሺቅዳ አሳይነ ካታማ ሀላቃት ሄሳ ስእድ ሀናናባ ꬋይዶሶና። 9 ሀላቃት ያሶናነ ሀራታ ዋሰራ ብልዶሶና።

10 አማነይሳት ጳዉሎሳነ ስላሰ ቃማራ ቤርያ የድዶሶና። ቤርያ ጋክድ፥ አይሁደ ዎሳ ኬꬅ ገልዶሶና። 11 ቤርያ አሳይ ተሰሎንቀ አሳፐ አꬍዳ ሱረታ። ኤንቲ ቃላ ኩመꬃ ዎዛናፐ ኤክዶሶና፤ ጳዉሎስ ግዳይስ ቱማ ግደይሳ ሻክ ኤራናዉ ጋላስ ጋላስ ጌሻ ማፃፋታ ፕልጎሶና። 12 ሄሳ ግሾ፥ ኤንታፈ ዳሮት፥ ግርከታፐካ ቦንቸትዳ ዳሮ ማጫሳትነ ዳሮ አደት አማንዶሶና።

13 ሽን ተሰሎንቀን ደእያ አይሁደት ጳዉሎስ ፆሳ ቃላ ቤርያንካ ኦድዳይሳ ስእዳ ዎደ ቤርያ ይድ አሳ ቡቅዶሶና። 14 ሄሳፈ ጉየ፥ አማነይሳት ኤለስድ ጳዉሎሳ አባ ማት የድዶሶና። ሽን ስላሰይነ ፅሞትዮስ ቤርያን አትዶሶና። 15 ጳዉሎሳ ሞይዝዳ አሳት አቴና ጋꬅዶሶና። ሄ አሳት ስላሰይነ ፅሞትዮስ ባንታዉ ዳንዳኤትዳ መላ ኤለስድ ባኮ ያና መላ ጳዉሎስ ኪትዳ ኪታ ኤክድ ቤርያ ስምዶሶና።

16 ጳዉሎስ አቴናን ስላሰነ ፅሞትዮሳ ናግሸ፥ ካታማን ኤቅ ኩምዳይሳ በእድ ይሎትስ። 17 ሄሳ ግሾ፥ አይሁደ ዎሳ ኬꬃን አይሁደታራነ ፆሳ ጎይንያ አይሁደ ግዶና አሳራ ቃስ ባራ ጋሄትያ አሳራ ኡባ ጋላስ ፓላሜስ። 18 ኤፕቆሮሰነ እስቶይከ ጌተትያ ጩጋታፐ እስ እስ ኤራንቾት ጳዉሎሳራ ፓላምዶሶና። ኤንታፈ እሶት እሶት፥ “ሀ ዮያማይ አይ ኦዳናዉ ኮዪ?” ያግዶሶና።

ሀራት ጳዉሎስ የሱሳባነ ሀይቆፐ እ ደንድዳይሳ ባንታዉ ኦድዳ ግሾ፥ “ኦራꬃ ፆሳታባ ኦድያ ዳኔስ” ያግዶሶና።

19 ጳዉሎሳ ኦይክድ አርዮስፓጎሳ ጌተትያ ሺቆ በሳ ኤፍድ፥ “ሀ ኔኒ ታማርስያ ኦራꬃባይ አይበኮ ኑና ኤርስኪ? 20 አይስ ጊኮ፥ ኔኒ ኑስ ኦራꬃባ ኦዳሳ፤ ህዛ ሄስ አይበኮ ኑኒ ኤራናዉ ኮዮስ” ያግዶሶና። 21 አቴና አሳ ኡባይነ ያን ደእያ እማꬃ አሳይ ኦራꬃባ ኦደቶናነ ስኦና ፔኦኮና።

22 ጳዉሎስ አርዮስፓጎሳ ስንꬃን ኤቅድ፥ “አቴና አሳቶ፥ ፆሳታስ ኡባባን ህንተ ዳሮ ያየይሳ ታኒ በአይስ። 23 ታኒ ህንተ ካታማራ ዩያሸ ህንተ ጎይንያ በሳታ በእያ ዎደ፥ ‘ኤረቶና ፆሳስ’ ጌተትድ ፃፈትዳ ያርሾ በሳ ደማስ። ሀ ህንተ ኤሮናሽን ጎይነይሳ ታኒ ህንተዉ ኦዳይስ። 24 ሳአነ ሳአን ደእያ ኡባባ መꬍዳ ፆሳይ፥ ሳሎነ ሳአ ጎዳይ፥ አስ ኬፅዳ ኬꬃን ዴና። 1 ካዎ 8:27፤ እሳ 42:5፤ ሀዋ 7:48. 25 እ ደኦ፥ ሸምፖነ ኡባባ አሳ ኡባስ እምያ ግሾ ፓጭ ደእያ አሳዳ አሳ ማደ ኮየና። 26 ፆሳይ አሳ ኮቸ ኡባ እስ አድያፈ መꬍድ ቢታ ኡባን ዎꬅስ። ያትድ ኤንቲ ዳና ዎድያስነ በሳስ ዛዋ እሚስ። 27 እ ሄሳ ኦꬅዳይ አስ እያ ኮያና መላነ ፕልግድ ደማና መላሳ። ሀንኮካ እ ኑፐ ጌምቤና። 28 ህንተፈ እስ እስ የፀይሳት፥ ‘ኑኒ እያ ናይታ’ ግዳይሳዳ፥ ‘ኑኒ እያን ፓፃ ደኦስ፥ ቃፆስ።’ 29 ህዛ፥ ኑኒ ፆሳ ናይታ ግድያ ግሾ፥ ‘ፆሳይ አሳ ሂላተꬃንነ ቆፋን ዎርቃፈ ዎይኮ ብራፐ ዎይኮ ሹቻፈ ኦሰትዳባ ዳኔስ’ ያግድ ቆፓናዉ በሰና። 30 ሄሳ ግሾ፥ ፆሳይ በን ዎደ አሳይ ኤሮና ኦꬅዳይሳ አግድ አꬍስ። ሽን ሀእ ኡባ በሳን ደእያ አሳይ ናጋራፐ ስማና መላ ኪቴስ። 31 አይስ ጊኮ፥ ፆሳይ ባ ዶርዳ አድያን ሳአን ደእያ አሳ ኡባ ቦላ ፅሎ ፕርዳ ፕርዳናዉ ቃማ ጊግስ ዎꬅስ። እያ ሀይቆፐ ደንꬅድ ሄሳ አሳ ኡባስ ቱማይስ” ያግስ።

32 ኤንታፈ እስ እስ አሳት ሀይቆፐ ደንዶባ ጳዉሎሳፐ ስእድ፥ እያ ቦላ ቀልቅስዶሶና። ሽን ሀራት፥ “ኑኒ ሄሳ ኔፐ ጉጅድ ስአናዉ ኮዮስ” ያግዶሶና። 33 ሄሳ ግሾ፥ ጳዉሎስ ኤንታ ግዶፈ ከይስ። 34 ሽን እስ እስ አደት ጳዉሎሳራ ጋከትድ አማንዶሶና። ኤንታ ግዶፈ አርዮስፓጎሳን ሺቁዋን ደእያ ድዮናስዮሳ ጌተትያ አደይ፥ ዳማርሶ ጌተትያ እስ ማጫስያነ ሀራት ደኦሶና።