1 ሄሳፈ ጉየ፥ ጳዉሎስ አቴናፐ ከይድ፥ ቆሮንቶሳ ብስ። 2 ያን ጳንፆሳን የለትዳ እስ አይሁደ አድያ አቅላ ደምስ። አይሁደ አሳ ኡባይ ሮመፐ ከያና መላ ካዎይ ቃላዉድዮስ ኪትዳ ግሾ ጉꬃ ዎደፐ ካሰ እ ባ ማቸ ጵርስቅላራ ፃለፐ ይስ። ጳዉሎስ ኤንታራ ጋሄታናዉ ብስ። 3 እያ ኦሶይ ኤንታይሳዳ ዱንካነ ስኮ ግድያ ግሾ፥ ኤንታራ ኡትድ እስፈ ኦꬅስ። 4 ጳዉሎስ ሳምባታ ኡባን አይሁደታነ ግርከታ አማንꬃናዉ አይሁደ ዎሳ ኬꬃን ፓላሜስ።

5 ስላሰይነ ፅሞትዮስ ማቀዶነፐ ይዳ ዎደ ጳዉሎስ ባ ኩመꬃ ዎድያ እምድ አይሁደታስ የሱሲ እ፥ ክርስቶሳ ግድ ቃላ ኦድስ። 6 ሽን ኤንቲ ጳዉሎሳ እፅድ እያ ጫይን ጳዉሎስ ባ ማኡዋፐ ባና ቆቆፍሸ፥ “ህንተ ጎመይ ህንተና ኦይኮ፤ ታኒ ሄሳን ደእከ። ህዛፐ ጉየ፥ ታኒ አይሁደ ግዶና አሳኮ ባይስ” ያግስ።

7 ያፐ ከይድ ፆሳ ጎይንያ ትቶስ ዮስፆሳ ጌተትያ ኡራ ሶ ብስ። ዮስፆሳ ኬꬃይ አይሁደ ዎሳ ኬꬃ ማታን ደኤስ። 8 አይሁደ ዎሳ ኬꬃ ሀላቃይ ቃርስጶስ ባ ሶ አሳ ኡባራ ጎዳ አማንስ። ቆሮንቶሳ አሳታፐካ ዳሮት ፆሳ ቃላ ስእዳ ዎደ አማንድ ፃማቀትዶሶና።

9 ጎዳይ እስ ቃማ ጳዉሎሳስ ቆንጭድ፥ “ያዮፋ፤ ኦዳ፥ ስእ ጎፓ። 10 ታኒ ኔራ ደአይስ። ታዉ ሀ ካታማን ዳሮ አስ ደእያ ግሾ ነና ቆህድ ኢታባን የጋና አስ ኦንካ ባዋ” ያግስ። 11 ሄሳ ግሾ፥ ጳዉሎስ ፆሳ ቃላ አሳ ታማርስሸ እስ ላይꬅነ ኡሱፑን አጌና ኤንታራ ኡትስ።

12 ጋልዮስ አካያ ቢታ አይስያ ዎደ አይሁደት እስፈ ጳዉሎሳ ቦላ ደንድድ ፕርዳ ኬꬅ እያ ኤፍድ፥ 13 “ሀ አደይ ህግያ እፅድ፥ አሳይ ፆሳ ጎይናና መላ ኦꬄስ” ያግዶሶና።

14 ጳዉሎስ ኦደታና ሀንሽን፥ ጋልዮስ አይሁደታኮ፥ “አይሁደቶ፥ ሄስ ኢታ ኦሶ ዎይኮ ናቆ ግድያኮ ታኒ ህንተባ ዳንዳአዳ ስአናዉ በሴስ። 15 ሽን ቃላስ፥ ሱንꬃስነ ህንተ ህግያስ ህንተ ፓላምያባ ግድኮ ህንተ፥ ህንተዉ ብልተ፤ ሄሳ ታኒ ፕርድከ” ያግስ። 16 ያትድ፥ ኤንታ ፕርዳ ኬꬃፈ ካረ ከስስ። 17 ሄሳፈ ጉየ፥ ግርከ አሳ ኡባይ አይሁደ ዎሳ ኬꬃ ሀላቃ ሶስተኔሳ ኦይክድ ፕርዳ ኬꬃ ስንꬃን ዋꬍዶሶና። ሽን ጋልዮስ ሄሳ ፓፃባ ግቤና።

18 ጳዉሎስ ዳሮ ጋላስ ቆሮንቶሳን ኡትዳፐ ጉየ አማንያ አሳ ሳሮꬅድ፥ ጵርስቅልራነ አቅላራ ማርካበን ሶረ ብስ። ሽን እ ባናፐ ስን ባዉ ጋሶይ ደእያ ግሾ ክንክራ ካታማን ባ ሁጵያ ቡሉሰትስ። ታይቦ 6:18. 19 ኤንቲ ኤፈሶና ጋክዳ ዎደ ጳዉሎስ ጵርስቅሎነ አቅላ ያን አግስ። ሽን ባዉ አይሁደ ዎሳ ኬꬅ ገልድ አይሁደታራ ኦደትስ። 20 ኤንቲ ባንታራ ዳሮ ዎደ ኡታና መላ ጳዉሎሳ ዎስዶሶና ሽን እ እፅስ። 21 ኤንታፈ ሻከትሸ፥ “ታኒ ያ ባልያ የሩሳላመን ቦንቻናዉ በሴስ። ሽን ፆሲ ጊኮ ህንተኮ ስማ ያና” ያግድ ኤፈሶናፐ ማርካብያን ብስ። 22 ቅሳረ ጋክዳ ዎደ የሩሳላመ ብድ ዎሳ ኬꬃ አሳ ሳሮꬅዳፐ ጉየ አንፆከ ብስ።

23 ያን ጉꬃ ዎደ ጋምእዳፐ ጉየ አማንያ አሳታ ኡባ ምንꬅሸ ጋላትያራነ ፕርገራ አꬍስ።

24 እስክንድረን የለትዳ እስ አጵሎሳ ጌተትያ አይሁደ አስ ኤፈሶና ብስ። እ ኦዳ ኤርያ አስነ ፆሳ ቃላ ዳሮ ኤርያ አስ። 25 ጎዳ ኦግያካ ታማርስ፥ አያናን ፁገትድ የሱሳባ ሱረ ታማርሴስ። ግዶሽን፥ ዮሃንሳ ፅንቃትያ ፃላላ ኤሬስ። 26 እ አይሁደ ዎሳ ኬꬃን ያዮና ታማርሴስ። ጵርስቅላነ አቅል እ ኦደይሳ ስእዳ ዎደ ባንታራ ሶ እያ ኤፍድ ፆሳ ኦግያ ካሰይሳፈ ጌሽድ እያዉ ኦድዶሶና።

27 አጵሎስ አካያ ባናዉ ኮይን ኤፈሶናን ደእያ አማንያ አሳይ እያ ቆፋ ኤክድ አካያን ደእያ አማነይሳት እያ ሞካና መላ ኤንታዉ ዳብዳበ ፃፍዶሶና። እ ያ ጋክዳ ዎደ ፆሳ አꬎ ኬሀተꬃ ባጋራ የሱስ ክርስቶሳ አማንዳይሳታ ዳሮ ማድስ። 28 አይስ ጊኮ፥ የሱሲ፥ እ፥ ክርስቶሳ ግደይሳ አይሁደታስ ፆሳ ቃላፐ ቆንጭስድ ደርያ ስንꬃን ምንꬅ ኦድድ ኤንታ ላꬅስ።