1 አጵሎስ ቆሮንቶሳን ደእሽን፥ ጳዉሎስ ቆሞ ባጋራ አꬍድ ኤፈሶና ብስ። ያን እስ እስ አማንያ አሳታ ደምስ። 2 ኤንታኮ፥ “ህንተ አማንዳ ዎደ ጌሻ አያና ኤክደቲ?” ያግድ ኦይችስ።

ኤንቲ፥ “አካይ፥ ኤክቦኮ፤ ሀር አቶሽን፥ ጌሻ አያን ደእያባካ ስእቦኮ” ያግዶሶና።

3 ጳዉሎስ ኤንታኮ፥ “ያትን፥ አይብን ፃማቀትደቲ?” ያግስ።

ኤንቲ፥ “ኑኒ ዮሃንሳ ፅንቃተን ፃማቀትዳ” ያግድ ዛርዶሶና።

4 ጳዉሎስ፥ “ዮሃንስ ባፐ ጉየራ ያ የሱስ ክርስቶሳን አሳይ አማናና መላ አሳስ ኦድሸ፥ ናጋራፐ ስሞ በሲያ ፅንቃተን ፃማቅስ” ያግስ። ማቶ 3:11፤ ማር 1:4፥ 7-8፤ ሉቃ 3:4፥ 16፤ ዮሀ 1:26-27.

5 ኤንቲ ሄሳ ስእዳ ዎደ ጎዳ የሱስ ክርስቶሳ ታማረ ግዳናዉ ፃማቀትዶሶና። 6 ጳዉሎስ ባ ኩሽያ ኤንታ ቦላ ዎꬅዳ ዎደ ጌሻ አያናይ ኤንታ ቦላ ዎꬍን፥ ዱማ ዱማ ዶናን ኦደትዶሶና፤ ቃስ ትንብተ ኦድዶሶና። 7 ሄ በሳን ታማነ ናምአ ግድያ አሳት ደኦሶና።

8 ጳዉሎስ አይሁደ ዎሳ ኬꬅ ገልድ፥ ፆሳ ካዎተꬃባ ያዮና ፓላምሸነ ሎይꬅ ቆንጭስሸ ኤንታራ ሄꬑ አጌና ጋካናዉ ጋምእስ። 9 ሽን ኤንታፈ እሶት እሶት ꬉበ ግድድ ዳሮ አሳ ስንꬃን ጎዳ ኦግያ ጫይድ አማኖና እፅዶሶና። ጳዉሎስ አማነይሳታ ኤንታፈ ሻክ ኤክድ ፅራኖሳ ጌተትያ ትምርተ ኬꬃን ኡባ ጋላስ ኤንታ ታማርስስ። 10 ጳዉሎስ ናምኡ ላይꬅ ጋካናዉ ቃላ ኦድስ። ሄሳ ግሾ፥ ኢሰን ደእያ አሳ ኡባይ፥ አይሁደትነ አይሁደ ግዶናይሳት ጎዳ ቃላ ስእዶሶና።

11 ፆሳይ ጳዉሎሳ ኩሸን ዎልቃማ ማላታታ ኦꬅስ። 12 ሄሳ ግሾ፥ አሳይ እያ አሳተꬃ ቦችዳ ማራበ ዎይኮ ማኦ ሀርጋንቾታስ ኤፎሶና። ኤንትካ ፓፆሶና፤ ቱና አያናት ኤንታፈ ከዮሶና።

13 ቱና አያናታ ከስሸ ዩይያ አይሁደታፐ እሶት እሶት፥ “ጳዉሎስ ሳባክያ የሱሳ ሱንꬃን ከይተ ግድ ህንተና ኪቶስ” ያግድ፥ ቱና አያናት ኦይክዳ አሳታ ቦላ ጎዳ የሱሳ ሱንꬃ ፄግዶሶና። 14 ካህነ ሀላቃ አስቀዋ ጌተትያ እስ አይሁደ አድያስ ሄሳ ኦꬅያ ላፑን ናይት ደኦሶና።

15 ሽን ቱና አያናይ ኤንታኮ፥ “ታኒ የሱሳካ ጳዉሎሳካ ኤራይስ፥ ሽን ህንተ ኦናንቴ?” ያግስ።

16 ቱና አያን ኦይክዳ አደይ ኤንታ ቦላ ጉፕ ዎꬍድ፥ ኤንታ ማዱንፅስድ፥ ሄ ኬꬃፈ ካሎ ባቃታና ጋካናዉ ዎልቃምስ። 17 ኤፈሶናን ደእያ አይሁደትነ አይሁደ ግዶናይሳት ኡባይ ሄሳ ስእድ ዳሮ ያይዶሶና። ጎዳ የሱሳ ሱንꬃይ ዳሮ ቦንቸትስ። 18 አማነይሳታፐ ዳሮት ባንታ ኦꬅዳ ኢታ ኦሱዋ ፓፅሸነ ቆንጨን ኦድሸ ዮሶና። 19 ማሮታፐ ዳሮት ባንታ ማፃፋታ ሺሽድ አሳ ኡባ ስንꬃን ፁግዶሶና። ሄ ማፃፋታ ጋትያ ታይቦይ እሻታሙ ሙኩሉ ብራ ሳንትመ *ብራ ሳንትመ፦ ማቶሳ 26:15 ፄልተ። ግድስ። 20 ሄሳዳ ሀንድ ፆሳ ቃላይ ድጭሸነ ዳልግሸ ብስ።

21 ሄስ ሀንዳፐ ጉየ ጳዉሎስ፥ “ታኒ የሩሳላመ ባ ስማዳ ሮመ ባናዉ በሴስ” ያግድ ማቀዶነራነ አካያራ አꬍድ የሩሳላመ ባናዉ ቆፋ ቃችስ። 22 ቃስ ባና ማደይሳታፐ ናምአታ ፅሞትዮሳነ ኤራስፆሳ ማቀዶነ ኪትድ፥ ባዉ ኢሰን ጉꬃ ዎደ ጋምእስ።

23 ሄ ዎደ ጎዳ ኦግያ ግሾ ኤፈሶናን ዎልቃማ ካች ከይስ። 24 እስ ብራ ኦꬅያ ድመፅሮሳ ጌተትያ ኡራይ አርፀምስ ኤቃ ኬꬃ ምስልያ ብራፐ ኦꬅድ ዳሮ ዎ ደሜስ። 25 ሄሳ ግሾ፥ ሄሳ መላ ኦሶ ኦይሳታ እስፈ ሺሽድ፥ “አሳዉ፥ ኑ ዱረተꬃይ ሀ ኦሱዋን ግደይሳ ህንተ ኤሬታ። 26 ሀይስ ጳዉሎስ፥ ‘አሳ ኩሸን ኦሰትዳይሳት ፆሳታ ግዶኮና’ ያግድ፥ ኤፈሶናንነ ጉꬃ ቢታታፐ አትሽን፥ ኩመꬃ ኢሰ ኡባን ደእያ ዳሮ አሳ ኦድ አማንꬅዳይሳነ ባለꬅዳይሳ ህንተ በእደታነ ስእደታ። 27 መቶ ግድዳይ፥ ኑ ኦሶይ ካተይሳ ፃላላ ግዶናሽን፥ ኢሰነ ቢታ ኡባን ደእያ አስ ጎይንያ ግታ ፆሰ አርፀምስ ኬꬃይ ቦንቸቶና አተይሳነ እ ግታተꬃይ ኩንዳናይሳ” ያግስ።

28 አሳይ ሄሳ ስእዳ ዎደ ሸነን ፁገትድ፥ “ኤፈሶና አርፀምሳ ግታ” ያግድ ዋስዶሶና። 29 ሄ ዋሶይ ካታማ ኡባ ጋክስ። ጳዉሎሳራ ሄመትያ ማቀዶነ አሳታ፥ ጋዮሳነ አርስፅሮኮሳ ኦይክድ ጎችሸ ካሳ በሳ ዎፅዶሶና። 30 ጳዉሎስ አሳይ ሺቅዳ በሳ ገላናዉ ኮይስ፥ ሽን አማነይሳት እያ ድግዶሶና። 31 ኢሰ ቢታ ሀላቃታፐ ጳዉሎሳ ላገ ግድዳ እሶት እሶት ጳዉሎሳኮ ኪትድ፥ “ካሳ በሳ ቆንጨን ከያዳ በንቶፋ” ግድ እያ ዎስዶሶና።

32 ሺቅዳ አሳስ ሀናናባይ ꬋይስ፤ ዳርያ ባጋ አሳይ ሀር አቶሽን አይስ ሺቅዳኮ ኤሮና ግሾ፥ እሶይ እስባስ ዋስያ ዎደ ሀንኮይ ሀራባስ ዋሴስ። 33 አይሁደት እስክንድረ ጌተትያ አድያ አꬅድ በስን፥ እስ እስ አሳይ እ ጋናባ ኦድድ እያ ስን አꬅዶሶና። እ አሳይ ስእ ጋና መላ ባ ኩሸን ማል በስድ፥ አሳስ ሞተታናዉ ኤቅስ። 34 ሽን እስክንድረይ አይሁደ አስ ግድዳይሳ አሳይ ኤርዳ ዎደ ናምኡ ሳተ ግዳናይሳ መላ ኡባይ እስ ቃላን፥ “ኤፈሶና አርፀምሳ ግታ” ያግድ ዋስዶሶና።

35 ዉርሰꬃን፥ ካታማ ፃፈይ አሳ ስእ ኦꬅድ፥ “ኤፈሶና አሳዉ፥ ኤፈሶና ካታማይ ግታ አርፀምስ ኤቃ ኬꬅነ ሳሎፐ ዎꬍዳ እ ሹቻ ምስልያ ናገይ ኤፈሶና አሳ ግደይሳ ኤሮናይ ኦኔ? 36 ሀይሳ ካሽ ግያ አስ ባይና ግሾ፥ ህንተ ስእ ጋናዉነ ድርግድ አይኮ ኦꬆና አጋናዉ በሴስ። 37 ህንተ፥ ሀ አሳታ ኤቃ ኬꬃ ሚሸ ካይሶቶናሽን ዎይኮ ኑ ፆሳታ ጫይቦናሽን ጮ ሀ አሳታ ኦይክድ ኤህደታ። 38 ሄሳ ግሾ፥ ድመፅሮስነ እያራ ደእያ ኦሳንቾት አሳ ሞታናዉ ኮይኮ፥ ፕርዳ ኬꬃይ ዶያ ደኤስ፤ ዳይናትካ ደኦሶና፤ ኤንቲ ሞታናዉ ዳንዳኦሶና። 39 ሽን ህንተ ሀራ ኦዳ ኮይኮ፥ ሻንጎ ሺቆን ኦዳይ በኤቶ። 40 ሄሳ ግዶና እፅኮ ሀች ሀንዳባስ ሮመ ካዎተꬃይ ኑና ኦይቻና። ሀ ቡቀꬃስ ጋሶይ ባይና ግሾ፥ ኑኒ ጋሶ ኦዳናዉ ዳንዳኦኮ” 41 ያግድ ሺቁዋ ላልስ።