1 ዋሶይ ዶችዳፐ ጉየ፥ ጳዉሎስ አማንያ አሳታ ፄግስድ ኤንታ ዞርዳፐ ጉየ፥ ሳሮꬅድ ማቀዶነ ባናዉ ከይስ። 2 ሄ ቢታራ አꬍሸ ቃላ ኦድሸ አሳ ዳሮ ምንꬅዳፐ ጉየ ግርከ ቢታ ብስ። 3 እ ያን ሄꬑ አጌና ኡትድ፥ ማርካበራ ሶረ ባናዉ ቆፕድ ደእሽን፥ አይሁደት ባና ዎꬋናዉ ኮየይሳ ኤርድ ማቀዶነራ ጉየ ስማናዉ ኮይስ።

4 ጳዉሎሳ ሞይዝዳይሳት ቤርያፐ ጳርሁሳ ናኣ ሶጳፅሮሳ፥ ተሰሎንቀፈ አርስፅሮኮሳነ ስኮንዱሳ፥ ዳርበፈ ጋዮሳ፥ ኢሰፐ ትክቆሳ፥ ፅሮፍሞሳነ ፅሞትዮሳ። 5 ሄሳት ስን ብድ ኑና ፅሮኣዳን ናጎሶና። 6 ኑኒ ኡይꬃ ባልያ ቦንችዳፐ ጉየ፥ ፍልጵስዩሳፐ ማርካበራ ደንድድ፥ እቻሻንꬆ ጋላሳን ኤንታ ፅሮኣዳን ጋክድ ያን ላፑን ጋላስ ጋምእዳ።

7 ሳምንታፈ ኮይሮ ጋላሳን ኑኒ ኡይꬃ መንꬃናዉ ሺቅድ ደእሽን፥ ጳዉሎስ ዎንተ ባናዉ ቆፕዳ ግሾ፥ ኤንታዉ ቃላ ኦድሸ ግድ ብላሄ ጋካናዉ ኦዳ አዱስስ። 8 ኑኒ ሺቅድ ኡትዳ ፖቅያን ዳሮ ፖኦይ ደኤስ። 9 ኤዉፅኮሳ ጌተትያ እስ ናአተꬃይ ማስኮተ ቦላ ኡትድ፥ ባና ዶግድ ꬍስክስ። ጳዉሎስ ኦዳ አዱስዳ ዎደ ኤዉፅኮስ ꬍስኮ ኤይድ ሄꬓንꬆ ፖቅያፐ ኩንድድ ሀይቅዳይሳ አሳይ ደንꬅስ። 10 ሽን ጳዉሎስ ዎꬍድ፥ እያ ቦላ ጉፋንስ። እያ እድምድ፥ “እ ሀይቅቤና፥ ህርጎፍተ” ያግስ። 11 ሄሳፈ ጉየ፥ ፑደ ፖቅያ ቦላ ከይድ ኡይꬃ መንꬅድ ምስ። ሳአይ ዎንታና ጋካናዉ አሳስ ኦድዳፐ ጉየ ደንድድ ብስ። 12 ሄ ፓፅዳ ናአተꬃ ሶ ኤፍድ ዳሮ ኡፋይትዶሶና።

13 ሽን ጳዉሎስ ባና ያፐ ሞካና መላ ኑስ ኦድዳ ግሾ፥ ካሰትድ ማርካብያኮ ብድ፥ አሶሳ ባናዉ ደንድዳ። አይስ ጊኮ፥ እ ቶሆን ባናዉ ቆፕዳ ግሾ ኑና ሄሳꬆ ኪትስ። 14 እ ኑራ አሶሳን ጋሄትን ማርካብያን እያ ኤክድ ምፅልነ ብዳ። 15 ዎንተꬃ ጋላስ ያፐ ደንድድ ማርካበን ክዮሳ ስንꬃን ደእያ በሳ ጋክዳ፤ ቃስ ዎንተꬃ ጋላስ ሳሞሳ ፕንድ ካልያ ጋላስ ምልፀ ጋክዳ። 16 ጳዉሎስ ኢሰን ዳሮ ጋምኦና ኤፈሶና ማታራ አꬋናዉ ቆፕስ። ባዉ ዳንዳኤትኮ ጳንፀቆስፀ ባልያ ጋላስ የሩሳላመ ጋካናዉ ኤሶቴስ።

17 ጳዉሎስ ምልፀፐ ኤፈሶና ኪትድ ዎሳ ኬꬃ ጭማታ ፄግስስ። 18 ዎሳ ኬꬃ ጭማት እያኮ ይን፥ ኤንታኮ ሀይሳዳ ያግስ፦ “ታኒ ኢሰ ገልዳ ኮይሮ ጋላሳፐ ዶምዳ ህንተራ ደእዳ ዎደ ኡባን ዋና ደእዳኮ ህንተ ኤሬታ። 19 አይሁደት ዱላትድ ታ ቦላ መቶ ጋꬅኮካ ታኒ አሽከተꬃንነ ዳሮ አፉꬃን ጎዳስ ኦꬃስ። 20 ዳባባንካ ህንተ ኬꬃን ኬꬃን ህንተና ታማርስሸ ህንተና ማድያባፐ እስባካ ፓጭሳብከ። 21 ታኒ አይሁደታስነ አይሁደ ግዶናይሳታስ ናጋራፐ ፆሳኮ ስማና መላነ ኑ ጎዳ የሱሳ አማናና መላ ማርካታስ።

22 “ያን ታና አይብ ጋካኔኮ ኤርከ፥ ሽን ሀእ ታኒ ጌሻ አያናስ ኪተታዳ የሩሳላመ ባይስ። 23 ጌሻ አያናይ ቃሾይነ ዋየይ ታና ናገይሳ ካታማ ኡባን ታዉ ማርካትስ። 24 ሽን ታ ዎꬃ ፖላናዉነ ጎዳ የሱስ ክርስቶሳፐ ኤክዳ ኦሱዋ፥ ፆሳ አꬎ ኬሀተꬃ ዎንገላ ማርካተይሳ ፖላናዉ ታ ሸምፕዉ ፓꬆናባዳ ታይባስ። 2 ፅሞ 4:7.

25 “ታኒ ሀእካ ፆሳ ካዎተꬃ ማርካታሸ ህንተ ኡባ ግዶን ዩያስ። ህዛፐ ጉየ፥ ህንተፈ ኦንካ ታና በኦናይሳ ኤራይስ። 26 ሄሳ ግሾ፥ ህንተፈ እስ ኡራይ ꬋይኮካ ታ ኦይሸቶናይሳ ሀች ህንተዉ ጌሻዳ ኦዳይስ። 27 አይስ ጊኮ፥ ፆሳይ ኦꬃናዉ ቆፕዳባ ኡባ ህንተዉ አይብባካ አሾና ኦዳስ።

28 “ባ ናኣ ሱꬃን ዎዝዳ ፆሳ ዎሳ ኬꬃ ናግተ። ጌሻ አያናይ ህንተና ሀላቃ ኦꬅድ ዶርዳ ዉድያስነ ህንተ ሁጵያስ ናገትተ። 29 ታኒ ብዳፐ ጉየ፥ ዉድያስ ቃቶና ዎዛና ምኖ ሱꬉመት ህንተ ግዶ ገላናይሳ ታኒ ኤራይስ። 30 አማነይሳታ ባንታ ጌዶ ካለꬃናዉ ዎርዶ ታማርስያ አሳት ህንተ ግዶፈ ደንዳና። 31 ሄሳ ግሾ፥ ታኒ ሄꬑ ላይꬅ ቃማነ ጋላስ አፉꬃን ህንተና ሁጰን ሁጰን ምንꬅዳይሳ ቆፕሸ ናገትተ።

32 “ሀእካ ህንተና ምንꬃናዉነ ጌሻ አሳራ ላትሳናዉ ዳንዳእያ ፆሳስነ እያ አꬎ ኬሀተꬃ ቃላስ ህንተና ሀዳራ እማይስ።

33 “ታኒ ኦደ ብራ ዎይኮ ዎርቃ ዎይኮ አፍላ አሞታብከ። 34 ታኒ ታ ኩሸን ኦꬃዳ ታናነ ታራ ደኤይሳታ ኮሽዳባ ማድዳይሳ ህንተ፥ ህንተ ሁጰን ኤሬታ። 35 ህንተ ሀይሳዳ ዳቡርድ ኦꬅሸ ዳቡራንቾታ ማዳናይሳነ ጎዳ የሱሲ፥ ‘ኤከይሳፈ እመይስ አንጀትዳይሳ’ ግዳ ቃላ ህንተ ቆፓናዉ በሰይሳ ታኒ ህንተና ኡባባን በሳስ” ያግስ።

36 ጳዉሎስ ሄሳ ኦድ ኦንግድ ኤንታ ኡባራ ጉልባትድ ፆሳ ዎስስ። 37 ኤንቲ ኡባይካ ጳዉሎሳ እድምድ ዬክድ ዬርዶሶና። 38 እ ዛሪድ፥ “ታና በኤከታ” ያግዳ ቃላይ ኤንታ ዳሮ አዛንꬅስ። ኤንቲ ማርካብያ ጋካናዉ እያ ሞይዝዶሶና።