1 ኑኒ ኤፈሶና ጭማታፐ ሻከትዳ መላ ቆሳ ብዳ። ዎንተꬃ ጋላስ ሮዳ ጋክድ ያፐ ጳፃራ ብዳ። 2 ስሮፍንቀ ፕንያ ማርካበ ደምድ እያን ገልድ ባናዉ ደንድዳ። 3 ኑኒ ቆጵሮሳ በአናዉ ዳንዳእያ ሶ ይድ፥ ቆጵሮሳ ሀድርሳ ባጋ አግድ ሶረ ብዳ። ማርካበይ ባ ጫና ያን ዎꬃናዉ ኮይዳ ግሾ ፅሮሳ ብዳ። 4 ያን አማንያ አሳታ ደምድ ኤንታራ ላፑን ጋላስ ኡትዳ። ጳዉሎስ የሩሳላመ ቦና መላ ኤንቲ እያዉ አያናን ኦድዶሶና። 5 ኑኒ ኤንታራ ኡትያ ዎደይ ዉርን ከይድ ብዳ። ኤንቲ ኡባይ ባንታ ማጫሳታራነ ባንታ ናይታራ እስፈ ካታማፐ ካረ ከስድ ኑና ሞይዝዶሶና። ኑኒ አባ ዶናን ጉልባትድ ፆሳ ዎስዳ። 6 ሄሳፈ ጉየ፥ ዎል ሳሮꬅድ ኑ ማርካብያን ገልዳ፤ ኤንቲ ባንታ ሶ ስምዶሶና።

7 ኑኒ አባ ኦግያ ኦንግድ፥ ፅሮሳፐ ጳፀለማሳ ጋክዳ። ያን አማንያ አሳታ ሳሮꬅድ፥ ኤንታ ማታን እስ ጋላስ ፔእዳ። 8 ዎንተꬃ ጋላስ ከይድ፥ ቅሳረ ብዳ። ሳባክያ ፍልጶሳ ሶ ጋክድ እያ ማታን ኡትዳ። እ የሩሳላመን ካሰ ዶረትዳ ላፑናታፐ እሱዋ። ሀዋ 6:5፤ 8:5. 9 ፍልጶሳስ ናበ ግድዳ ኦይዱ ጌላኦ ናይት ደኦሶና።

10 ኑኒ ኡንደና ጋላስ ያን ኡትድ ደእሽን ትንብተ ኦድያ እስ አጋቦሳ ጌተትያ አደይ ይሁዳፐ ቅሳረ ይስ። ሀዋ 11:28. 11 ኑኮ ይድ ጳዉሎሳ ሳቅያ ኤክድ ባ ኩሽያነ ባ ቶሁዋ ቃችድ፥ “ጌሻ አያናይ ሀ ሳቅያ ጎዳ፥ የሩሳላመን አይሁደት ሀይሳዳ ቃችድ፥ አይሁደ ግዶና አሳስ አꬅድ እማና ያጌስ” ያግስ።

12 ኑኒ ሄሳ ስእዳ ዎደ ኑነ ያን ደእያ አሳት ጳዉሎስ የሩሳላመ ቦና መላ ዎስዳ። 13 ሽን ጳዉሎስ ዛሪድ፥ “ህንተ ሀይሳዳ ዬክሸ አይስ ታ ዎዛና ሹግሴቲ? ታኒ፥ ጎዳ የሱሳ ሱንꬃ ግሾ ቃሸተꬃ ፃላላ ግዶናሽን የሩሳላመን ሀይቃናዉካ ጊገታስ” ያግስ።

14 ኑ ዞርያ እ ኤኮና እፅን፥ “ጎዳ ሸነይ ሀኖ” ያግድ ስእ ግዳ።

15 ያን ጉꬃ ዎደ ጋምእዳፐ ጉየ ጊገትድ የሩሳላመ ባናዉ ከይዳ። 16 ቅሳረን ደእያ አማንያ አሳታፐ ጉꬃት ኑራ ብዶሶና። ኤንቲ ኑኒ ሸምፓና በሲ ምናሶና ጌተትያ ቆጵሮሳ አድያ ሶ ኤፍዶሶና። ምናሶን ኮይሮ አማንዳ አሳፐ እሱዋ።

17 ኑኒ የሩሳላመ ጋክዳ ዎደ አማንያ አሳት ኑና ኡፋይሳን ሞክዶሶና። 18 ዎንተꬃ ጋላስ ጳዉሎስነ ኑኒ ያይቆባራ ጋሄታናዉ ብዳ። ዎሳ ኬꬃ ጭማት ኡባትካ ያን ደኦሶና። 19 ጳዉሎስ ኤንታ ሳሮꬅዳፐ ጉየ አይሁደ ግዶና አሳ ግዶን ባ ባጋራ ፆሳይ ኦꬅዳባ ኡባ ኤንታዉ ኦድስ።

20 ኤንቲ ሄሳ ስእዳ ዎደ ፆሳ ጋላትድ ጳዉሎሳኮ ሀይሳዳ ያግዶሶና፦ “ኑ እሻዉ፥ አይሁደታ ግዶን አፑን ሙኩላት ፆሳ አማንዳኮ ነ በኣሳ፤ ኤንቲ ኡባይካ ህግያ ምንꬅ ናጎሶና። 21 ኔኒ አይሁደ ግዶናይሳታ ቢታን ደእያ አይሁደ ኡባይ ባንታ ናይታ ቃፃሮና መላ፥ አይሁደታ ዎጋ ካሎና መላነ ሙሰ ህግያ እፃና መላ ኔኒ ታማርሰይሳ የሩሳላመን ደእያ አይሁደት ስእዶሶና። 22 ያትን አይብ ሎኦ? ኔኒ ይዳይሳ ዳሮት ስአና።

23 “ሄሳ ግሾ፥ ኑኒ ነዉ ኦደይሳ ስአ፤ ጋሶይ ደእያ ኦይዱ አሳት ኑ ማታን ደኦሶና። ታይቦ 6:13-21. 24 ኤንታ ኤካዳ ኤንታራ ጌያ፤ ቃስ ኤንቲ ባንታ ሁጵያ ሜደታና መላ ኤንታዉ ሚሸ እማ። ኤንቲ ካሰ ነባ ስእዳይስ ቱማ ግዶናይሳነ ኔኒ ነ ሁጰንካ ህገ ናግያ አስ ግደይሳ ኡባይ ኤራና።

25 “ሽን አማንዳ አይሁደ ግዶና አሳታ ግድኮ፥ ኤንቲ ኤቃስ ያርሸትዳባ ሞና መላ፥ ሱꬁ ኡዮና መላ፥ ባዉታ ሞና መላነ ላይማቶና መላ፥ ኑኒ ኦዳ ቃችድ፥ ኤንታዉ ዳብዳበ ፃፍዳ” ያግዶሶና። ሀዋ 15:29.

26 ሄሳፈ ጉየ፥ ጳዉሎስ ዎንተꬃ ጋላስ አሳታ ኤክድ፥ ኤንታራ ጌይስ። እ ባንታ ጌይያ ጋላሳይ አዉደ ፖለትያኮ ኤርሳናዉነ ባንታ ያርሹዋ አዉደ ያርሻነኮ ኤርሳናዉ ፆሳ ኬꬅ ገልስ።

27 ላፑን ጋላሳይ ዉራና ሀንሽን፥ ኢሰፐ ይዳ አይሁደት ፆሳ ኬꬃን ጳዉሎሳ በእድ፥ አሳ ኡባ ደንꬅድ ጳዉሎሳ ኦይክዶሶና። 28 “እስራኤለ አሳዉ፥ ኑና ማድተ፤ ሀ ኡራይ፥ ኑ ደርያ፥ ኑ ህግያነ ሀ ፆሳ ኬꬃ እፃና መላ አሳ ኡባ ታማርሴስ። ሄስካ ግዶና እፅን አይሁደ ግዶናይሳታ ፆሳ ኬꬅ ገልስድ፥ ሀ ጌሻ በሳ ቱንስስ” ያግድ ዋስዶሶና። 29 ኤንቲ ሄሳ ግዳይ ካሰ ኤፈሶና ፅሮፍሞሳ ጳዉሎሳራ ካታማን በእዳ ግሾ ሀእ ጳዉሎስ ፆሳ ኬꬅ እያ ኤክ ገልዳባ ኤንታዉ ዳንስ። ሀዋ 20:4.

30 ካታማ ኡባይ ቡቀትስ፤ አሳ ኡባይ ሺቅድ ጳዉሎሳ ኦይክድ ፆሳ ኬꬃፈ ካረ ጎችዶሶና። ፆሳ ኬꬃ ፐንገት ኤለስድ ጎርደትዶሶና። 31 አሳይ ጳዉሎሳ ዎꬋና ሀንሽን፥ “የሩሳላመ ካታማይ ኩመꬅ ቡቀትስ” ግያ ኦዳይ ሮመ ሻላቃኮ ጋክስ። 32 ሻላቃይ ዎታዳረታነ ማቶ ሀላቃታ ኤክድ ዎፅሸ ይስ። አሳይ ሻላቃነ ዎታዳረታ በእዳ ዎደ ጳዉሎሳ ዋይሳ አጋግዶሶና።

33 ሄ ዎደ ሻላቃይ ሺቅድ፥ ጳዉሎሳ ኦይክድ፥ ናምኡ ሳንꬃላታን ቃሸታና መላ ኪትስ። ያትድ፥ እ ኦነኮነ አይ ኦꬅዳኮ አሳ ኦይችስ። 34 አሳፐ ባጋይ እስባ ግድ ዋስያ ዎደ፥ ሀራት ሀራባ ግድ ዋሴስ። ዋሶይ ዳርዳ ግሾ፥ ሻላቃይ ቱማ ሻካናዉ ዳንዳኤቶና እፅን፥ ዎታዳረት ጳዉሎሳ ባንታ ደእያሶ ኤፋና መላ ኪትስ። 35 ጳዉሎስ የꬍ ከይያ ደꬃ ጋክያ ዎደ አሳ ሱገꬃ ግሾ ዎታዳረት እያ ቶክዶሶና። 36 ዳሮ አሳይ፥ “እ ሀይቆ!” ያግድ ዋስሸ ካሎሶና።

37 ዎታዳረት ጳዉሎሳ ባንታ ደእያሱዋ ገልሳና ሀንሽን፥ ጳዉሎስ ሻላቃኮ፥ “ታኒ ነዉ እስባ ኦዶ?” ያግስ።

እ ጳዉሎሳኮ፥ “ኔኒ ግርከ ዶና ኤራይ? 38 ኔኒ ሀይሳፈ ስን ቡቀꬅ መꬍድ ሸምፖ ዎꬍዳ ኦይዱ ሙኩሉ አሳታ ኤክድ ባዞ ገልዳ ግብፀ ኡራ ግድኪ?” ያግስ።

39 ሽን ጳዉሎስ፥ “ታኒ፥ ክልቅያን ደእያ ኤረትዳ ተርሰሴ ካታማን የለትዳ አይሁደ አስ። ሀያና ታና ኦድሳርኪ?” ያግስ።

40 ሻላቃይ እያኮ፥ “ኦዳ” ያግን ጳዉሎስ ደꬃ ቦላ ኤቅድ፥ አሳይ ስእ ጋና መላ ባ ኩሽያን ማልስ። አሳይ ስእ ግን እብራወꬆ ዶናን ሀይሳዳ ያግስ፦