1 “ታ እሻቶ፥ ታ አዋቶ፥ ታኒ ሀእ ህንተዉ እምያ ዛሩዋ ስእተ።” 2 ጳዉሎስ ኤንታዉ እብራወꬆ ዶናን ኦደይሳ ስእድ ካሰይሳፈ አꬅድ ስእ ግዶሶና። እ ካልድ፥

3 “ታኒ ክልቅያን ደእያ ተርሰሴ የለታዳ ሀ ካታማን ድጫስ። ታ አስታማረይካ ጋማልያለ፤ ታኒ ኑ አዋታ ህግያ ምንꬃ ታማርዳ፥ ሀች ህንተ ኡባይ ሀነይሳዳ ፆሳስ ምሸትያ አይሁደ አስ። ሀዋ 5:34-39. 4 ታኒ ሀ ኦግያ ካልያ ማጫታነ አደታ ኦይካዳ ቃሾ ኬꬃን የጋሸነ ኤንታ ዎꬍሳና ጋካናዉ ዋየ በስዳ አስ። ሀዋ 8:3፤ 26:9-11. 5 ሄሳዳካ፥ ካህነ ሀላቃይነ ሻንጎ ኡባይ ታባ ማርካታናዉ ዳንዳኤስ። ታኒ ዳማስቆን ደእያ ኤንታ እሻታስ ኤንታፈ ዳብዳበ ኤካዳ ያን ደእያ አሳት ቃሸትድ ሴረታና መላ የሩሳላመ ኤንታ ኤሀናዉ ያ ባስ።

6 “ታኒ ባዳ ዳማስቆ ማትዳ ዎደ ሴታ ጋላስ ቆፖና ሳሎፐ ግታ ፖኦይ ታ ዩሹዋን ፖእስ። 7 ታኒ ሳአን ኩንዳ ደእሽን፥ ‘ሳኦላ፥ ሳኦላ፥ ታና አይስ የደꬃይ?’ ግያ ቃላ ስአስ። 8 ታኒ ዛራዳ፥ ‘ጎዳዉ፥ ኔኒ ኦኔ?’ ያጋስ። እ ዛሪድ፥ ‘ታኒ፥ ኔኒ ጎድያ ናዝረተ የሱሳ’ ያግስ። 9 ታራ ደኤይሳት ፖኡዋ በእዶሶናፐ አትሽን፥ ታዉ ኦደይሳ ቃላ አኬክቦኮና።

10 “ታኒ፥ ‘ጎዳዉ፥ ታ አይ ኦꬆ?’ ያጋስ።

“ጎዳይ ታኮ፥ ‘ደንዳዳ ዳማስቆ ባ። ኔኒ ኦꬃና መላ ፆሳይ ኦꬃናዉ ቆፕዳባ ኡባይ ያን ነዉ ኦደታና’ ያግስ። 11 ሄ ዎልቃማ ፖኡዋ ጋሶን ታ አይፈይ ቆቅን፥ ታራ ደእያ አሳት ታ ኩሽያ ኦይክድ፥ ታና ጎችን ዳማስቆ ጋካስ።

12 “ዳማስቆን ደእያ አይሁደ ኡባይ ዳሮ ቦንችያ እስ ሀናንያ ጌተትያ አደይ፥ ኑ ህግያ ቦንቸይስነ ፆሳ ምንꬅ ዎሰይስ ደኤስ። 13 ሀናን ታኮ ይድ፥ ታ ማታን ኤቅድ፥ ‘ታ እሻዉ ሳኦላ፥ ፄላ’ ያግስ። ኤለሳዳ ታኒ እያ ፄላ አጋስ።

14 “እ ታኮ፥ ‘ኑ አዋታ ፆሳይ ኔኒ እያ ሸንያ ኤራና መላ፥ እያ ፅሎ ናኣ በአና መላነ እያ ዶናፐ ቃላ ስአና መላ ካሰትድ ነና ዶርስ። 15 ኔኒ በእዳባነ ስእዳባ አሳ ኡባ ስንꬃን እያዉ ማርካታና። 16 ሀእ አይስ ጋምአይ? ደንዳዳ ፃማቀታ፤ እያ ሱንꬃ ፄጋዳ ነ ናጋራፐ ሜጨታ’ ያግስ።

17 “ታኒ ጉየ የሩሳላመ ስማዳ ፆሳ ኬꬃን ዎስሽን፥ ታዉ ቆንጨꬅ በንትስ። 18 ቆንጨꬃን ጎዳይ ታኮ፥ ‘ነ ታዉ ማርካትያ ማርካተꬃ አሳይ ኤኮና ግሾ ኤለሳዳ የሩሳላመፐ ከያ’ ያግሽን ታኒ በአስ።

19 “ታኒ፥ ‘ጎዳዉ፥ አይሁደ ዎሳ ኬꬃ ኡባን ነና አማነይሳታ ኦይካዳ ዋꬍዳይሳነ ቃሾ ኬꬃን የግዳይሳ ኤንቲ ኤሮሶና። 20 ኤንቲ ነ ማርካ እስፅፋኖሰ ዎꬍያ ዎደ ታኒ ሄ ኦዳን እስፋስ። ቃስ ኤንታ ማታን ኤቃዳ እያ ዎይሳታ ማኡዋ ናጋይስ’ ያግስ። ሀዋ 7:58.

21 “ጎዳይ ታኮ፥ ‘ታኒ ነና አይሁደ ግዶና አሳኮ ሃሆሶ ኪትያ ግሾ ደንዳዳ ባ’ ” ያግስ።

22 ጳዉሎስ ሄ ቃላ ኦድድ ኦንጋና ጋካናዉ አሳይ እ ገይሳ ስኦሶና። ሄሳፈ ጉየ፥ ባንታ ቃላ ꬎቁ ኦꬅድ፥ “ሀይሳ ቢታፈ ꬋይሳ! እ ዳናዉ በሰና” ያግዶሶና።

23 ኤንቲ ዎጫምሽን፥ ባንታ ማኡዋ ቦላ ሆልሽንነ ባና ቦላ ላልሽን፤ 24 ሻላቃይ በእድ ዎታዳረት ጳዉሎሳ ባንታ ደእያሱዋ ኤፋና መላ ኪትስ። ቃስ አሳይ አይስ ሄሳዳ ዎጫምዳኮ ኤራናዉ ኮይድ ጳዉሎሳ ልሶን ጋራፍድ ፕልጋና መላ ኤንታ ኪትስ። 25 ሽን ዎታዳረት ጳዉሎሳ ዳፎን ምንꬅ ቃችድ ጋራፋና ሀንያ ዎደ ጳዉሎስ ባ ማታን ኤቅዳ ማቶ ሀላቃኮ፥ “ሮመ አስ ፕርድ ባይና ጋራፈይስ ህንተዉ ዎጌ?” ያግስ።

26 ማቶ ሀላቃይ ሄሳ ስእዳ ዎደ ሻላቃኮ ብድ፥ “ሀ አደይ ሮመ አስ። ኔኒ አይ ኦꬃናዉ ቆፓይ?” ያግድ ኦይችስ።

27 ሻላቃይ ጳዉሎሳኮ ሺቅድ፥ “ኔኒ ሮመ አሴ? አነ ታዉ ኦዳ” ያግስ።

ጳዉሎስ፥ “ኤ” ያግስ።

28 ሻላቃይ ዛሪድ፥ “ታኒ ሀ ጋደተꬃ ዳሮ ሚሸን ሻማስ” ያግስ።

ሽን ጳዉሎስ፥ “ታ ሀ ጋደተꬃ የለተꬃን ደማ ኤካስ” ያግስ።

29 ሄሳ ግሾ፥ ጳዉሎሳ ፕልጋናዉ ቆፕዳይሳት ኢራ እያፐ ሻከትዶሶና። ሻላቃይ ሮመ አስ ሳንꬃላታን ቃችዳይሳ ኤርዳ ዎደ ያይስ።

30 ዎንተꬃ ጋላስ ሻላቃይ፥ አይሁደት ጳዉሎሳ አይስ ሞትዳኮ ጌሽ ኤራናዉ ኮይስ። ካህነ ሀላቃትነ ሻንጎይ ኡባይ ሺቃና መላ ኪትስ፤ ቃስ ጳዉሎሳ ቃሾፐ ብልስድ ኤንታ ስንꬃን ኤስስ።