1 ጳዉሎስ ሺቁዋ ጫድ ፄልድ፥ “ታ እሻቶ፥ ታኒ ሀች ጋካናዉ ፆሳ ስንꬃን ታ ደኦ ኡባን ሎኦ ዎዛናን ደአስ” ያግስ። 2 ካህነ ሀላቃይ ሀናን፥ ጳዉሎሳ ዶናን ባቃና መላ እያ ማታን ኤቅዳይሳታ ኪትስ። 3 ሄ ዎደ ጳዉሎስ እያኮ፥ “ላ ሀ ቦቅንተ ትይዳ ጎዳ ዳነይሶ፥ ፆሳይ ነና ባቃና። ኔኒ ታ ቦላ ህግያꬆ ፕርዳናዉ ኡታዳ ደአሸ ህገይ ባይና ታና ባቃና መላ ኪታይ?” ያግስ። ማቶ 23:27-28.

4 ጳዉሎሳ ማታን ኤቅዳይሳት እያኮ፥ “ነ ፆሳ ካህነ ሀላቃ ጫያይ?” ያግዶሶና።

5 ጳዉሎስ፥ “ታ እሻቶ፥ እ ካህነ ሀላቃ ግድዳይሳ ታኒ ኤራብከ፤ አይስ ጊኮ ፆሳ ቃላን፥ ‘ነ ደርያ አይሰይሳ ቦላ ኢታ ቃላ ሃሳዮፓ’ ጌተትድ ፃፈትስ” ያግስ። ከሳ 22:28.

6 ሽን ጳዉሎስ ሄ በሳን ደእያ አሳፐ ባጋት ሳዱቃወታ፥ ባጋት ፋርሳወታ ግደይሳ በእድ፥ “ታ እሻቶ፥ ታኒ ፋርሳወነ ፋርሳወ ናአ፤ ‘ሀይቅዳይሳት ሀይቆፐ ደንዳና’ ጋዳ ታኒ ኡፋይሳን ናግያ ግሾ ኤንቲ ታ ቦላ ፕርዶሶና” ያግድ ኦድስ። ሀዋ 26:5፤ ፍልጵ 3:5.

7 ጳዉሎስ ሄሳ ግዳ ዎደ ፋርሳወታ ግዶንነ ሳዱቃወታ ግዶን ኦሽ ከይን ሻከትዶሶና። 8 አይስ ጊኮ፥ ሳዱቃወት፥ “ሀይቅዳ አስ ደንደና፤ ኪታንቾይካ አያንካ ባዋ” ያጎሶና። ሽን ፋርሳወት ናምአይካ ደኤይሳ አማኖሶና። ማቶ 22:23፤ ማር 12:18፤ ሉቃ 20:27. 9 ግታ ካች ከይስ፤ ፋርሳወታ ባጋ ግድዳ ህገ አስታማረት ደንድ ኤቅድ፥ “ሀ ኡራ ቦላ አይብ ባላካ ደምቦኮ፤ እያዉ አያን ዎይኮ ኪታንቾይ ሃሳዮና አገና” ያግድ ፓላምዶሶና።

10 ኦሻይ ዳርን አሳይ ጳዉሎሳ ሻቀረꬆና መላ ግድ፥ ሻላቃይ ባ ዎታዳረት ዎꬍድ ኤንታ ግዶፈ እያ ኤለስ ከስድ ባንታ ደእያሱዋ ኤፋና መላ ኪትስ።

11 ሄ ቃማ ጎዳይ ጳዉሎሳ ማታን ኤቅድ፥ “ጳዉሎሳ፥ ኔኒ ታዉ የሩሳላመን ማርካትዳይሳዳ ሮመንካ ማርካታናዉ በሴስ፤ ምና፤ አይኮይ ባዋ” ያግስ።

12 ዎንተꬃ ጋላስ አይሁደት፥ “ጳዉሎሳ ዎꬎና ደእሸ ሞኮ ኡዮኮ” ግድ ጫቅዶሶና። 13 ጳዉሎሳ ቦላ ሄሳ ማቀትዳ አሳት ኦይታማፐ ዳሮሶና። 14 ኤንቲ ካህነ ሀላቃታኮነ ደርያ ጭማታኮ ብድ፥ “ኑኒ ጳዉሎሳ ዎꬎና ደእሸ ካꬅ ግያባ ሞኮ ግድ ጫቀትዳ። 15 ህዛ፥ ህንተነ ሻንጎይ እያባ ጌሽድ ፕልግያባይ ደእያ ዳንስድ፥ ጳዉሎሳ ህንተኮ ኤሀና መላ ሻላቃ ኦይችተ። ኑኒ እ ሀ ሺቁዋ ጋካናፐ ስን እያ ዎꬋናዉ ጊግድ ኡትዳ” ያግዶሶና።

16 ሽን ጳዉሎሳ ምቸ ናአይ ሄ ማቁዋ ስእዳ ዎደ፥ ብድ ዎታዳረት ደእያሱዋ ገልድ፥ ጳዉሎሳስ ኦድስ። 17 ጳዉሎስ ማቶ ሀላቃታፐ እሱዋ ፄግድ፥ “ሀ ናአይ ሻላቃስ ኦድያባይ ደእያ ግሾ እያ ሻላቃኮ ኤፋ” ያግስ።

18 ማቶ ሀላቃይ ናኣ ሻላቃኮ ኤፍድ፥ “ቃሾ ኬꬃን ደእያ ጳዉሎስ ታና ባኮ ፄግድ፥ ሀ ናአይ ነዉ ኦድያባይ ደእያ ግሾ፥ እያ ኔኮ ኤሀና መላ ታና ዎስስ” ያግስ።

19 ሻላቃይ ናኣ ኩሽያ ኦይክድ፥ ዱማ ካረ ከስድ፥ “ኔኒ ታዉ ኦዳናባይ አይቤ?” ያግድ ኦይችስ።

20 ናአይ ሻላቃኮ፥ “አይሁደት ጳዉሎሳባ ካሰፐ ምንꬅ ፕልጋናዉ ኮይዳባ ዳንስድ ኔኒ ዎንቶ እያ ሺቁዋ ኤሀና መላ ነና ዎሳናዉ ዞረታ ቃችዶሶና። 21 ሽን ኔኒ ኤንቲ ግያባ ስኦፓ። አይስ ጊኮ፥ ኦይታማፐ ዳርያ አሳት ጳዉሎሳ ዎꬎና ደእሸ ‘ካꬅ ሞኮ፥ ሃ ኡዮኮ’ ግድ ጫቀትድ፥ ቆሰትድ እያ ናጎሶና። ሀእ ነ ግያባ ፃላላ ስአናዉ ናጎሶና” ያግስ።

22 ሻላቃይ ዛሪድ፥ “ሀ ኦዳ ነ ታዉ ኦድዳይሳ ሀራ ኦደስካ ኦዶፓ” ያግድ ኪትድ ናኣ ጉየ የድስ።

23 ሻላቃይ ማቶ ሀላቃታፐ ናምአታ ፄግድ፥ “ቃማፈ ሄꬑ ሳተን ቅሳረ ባናዉ፥ ናምኡ ፄቱ ዎታዳረታ፥ ላፑን ታሙ ፓራ አሳታነ ናምኡ ፄቱ ቶራንቾታ ጊግስተ። 24 ደርያ አይስያ ፍልክሳኮ ጳዉሎሳ ሳሮ ጋꬃናዉ ቶጋ መሄ ጊግስተ” ያግድ ኤንታ ኪትስ። 25 ሻላቃይ ፍልክሳስ ሀይሳዳ ግያ ዳብዳበ ፃፍስ፦

26 “ቃላዉድዮሳ ሉስዮሳፐ ደርያ አይስያ ቦንቾ ፍልክሳስ፥ ሳሮይ ነዉ ግዶ። 27 አይሁደት ሀ ኡራ ኦይክድ ዎꬋና ሀንሽን፥ እ ሮመ ቢታ አስ ግዶይሳ ኤራዳ ዎታዳረታራ ጋካዳ እያ አሻስ። 28 ኤንቲ እያ አይስ ሞትያኮ ኤራናዉ ኮያዳ ኤንታ ሺቁዋን እያ ሺሻስ። 29 ኤንቲ ባንታ ህግያስ እያ ሞትዳይሳፈ አትሽን፥ እያ ዎꬍስያባ ዎይኮ ቃሽስያባ ግዶናይሳ ታ ደማስ። 30 ኤንቲ ሀ ኡራ ቦላ ማቀትዳ ዝግርሳይ ታና ጋክን፥ ታኒ ኤለሳዳ እያ ኔኮ የዳስ። እያ ሞተይሳት ነ ስንꬃን ብድ ሞታና መላ ኪታስ” ያግስ።

31 ሄሳ ግሾ፥ ዎታዳረት ኪተትዳይሳዳ ጳዉሎሳ ኤክድ፥ ቃማ አንትጳፅርሳ ጋꬅዶሶና። 32 ዎንተꬃ ጋላስ ፓራ አሳት እያራ ባና መላ ኦꬅድ ቶሆ አሳት ጉየ ስምዶሶና። 33 ቶጋይ ቅሳረ ጋክድ ዳብዳብያ ደርያ አይሰይሳስ እምድ፥ ጳዉሎሳ እያ ስን አꬅዶሶና። 34 ደርያ አይሰይስ ዳብዳብያ ናባብዳፐ ጉየ፥ “ጳዉሎሳ፥ ነ አዉ አዉራጃ አሴ?” ግድ እያ ኦይችስ። እ ክልቅያ አስ ግዶይሳ ኤርዳ ዎደ፥ 35 “ታኒ ነባ ነና ሞተይሳት ያ ዎደ ስአና” ያግስ። ዎታዳረት ጳዉሎሳ ሄሮዲሳ ጋꬎን ናጋና መላ ኪትስ።