1 እቻሹ ጋላሳፐ ጉየ ካህነ ሀላቃይ፥ ሀናን፥ ጭማታራነ ፀርፀሉሳ ጌተትያ እስ ፃባቃራ ቅሳረ ብስ። ኤንቲ ደርያ አይሰይሳ ቦላ ጳዉሎሳ ሞትዶሶና። 2 ጳዉሎስ ፄገትድ ገልዳ ዎደ፥ ፀርፀሉስ እያ ሀይሳዳ ያግድ ሞትስ፦

“ቦንቾ ፍልክሳ፥ ኑኒ ነ ባጋራ ዳሮ ሳሮተꬃ ደምዳ፥ ነ ሎኦ አይሱዋን ኑ ቢታይ ዳሮ ላመትስ። 3 ቦንቾ ፍልክሳ፥ ኑኒ አዉንካ አዉደ ግድን ዳሮ ጋላታን ሄሳ ኤኮስ። 4 ታኒ ነና ጋምእሶናሽን ኔኒ ነ ኬሀተꬃን ኑባ ቃንꬃን ስአና መላ ነና ዎሳይስ። 5 ሀ ኡራይ ꬉበ ግድድ ቢታ ኡባን ደእያ አይሁደታ ግዶን ቡቀꬅ መꬍድ ናዝራወታ ባጋ አሳ ካለይሳ ግዶይሳ ኤርዳ። 6 ሀር አቶሽን፥ ፆሳ ኬꬃ ቱንሳና ሀንሽን ኑኒ እያ ኦይክዳ፤ ኑ ህግያዳ እያ ቦላ ፕርዳናዉ ቆፕዳ። 7 ሽን ሻላቃ ሉስዮስ ይድ፥ ዎልቃን ኑ ኩሸፐ እያ ዎꬅ ኤክስ። 8 እያ ሞተይሳት ኔኮ ያና መላ ኪትስ። ኔኒ ነ ሁጰን ሀ ኡራ ፕልጋዳ ኑኒ እያ ሞትያ ሞቱዋ ኡባ ኤራናዉ ዳንዳኣሳ” ያግስ።

9 አይሁደትካ፥ “ሀ ኦዳይ ቱማ” ግድ እያ ቆፋ ማእዶሶና።

10 ደርያ አይሰይስ ጳዉሎሳ ኦዳ ግድ ማልስ። ጳዉሎስ ሀይሳዳ ግድ ዛርስ፦ “ኔኒ ዳሮ ዎደፐ ዶማዳ፥ ሀ አሳስ ፕርዳሸ ደኤይሳ ኤራዳ ታ ኦዳስ ኡፋይሳን ዛሮ እማይስ። 11 ታኒ የሩሳላመ ጎይናናዉ ከይን ታማነ ናምኡ ጋላሳፐ አꬎናይሳ ኔኒ ነ ሁጰን ኤራናዉ ዳንዳኣሳ። 12 አይሁደት ታና ፆሳ ኬꬃን ግድን አይሁደ ዎሳ ኬꬃን ግድን ካታማን ግድን ኦደራካ ፓላምሽን ዎይኮ አሳ ሺሻዳ ማቅሽን እስ አስካ ደምቤና። 13 ሀእካ ኤንቲ ታና ሞትያባስ ማርካ ደማናዉ ዳንዳኦኮና።

14 “ሽን ታኒ ሀይሳ እስባ አማናይስ፤ ታኒ ህገን ደእያባነ ናበት ፃፍዳ ኡባባ አማናዳ፥ ኑ አዋታ ፆሳ፥ ኤንቲ ዎርዶ ግያ ኦግያን ጎይናይስ። 15 ኤንቲ ባንታ ሁጰን አማነይሳ መላ ፅሎትነ ናጋራንቾት ሀይቆፐ ደንዳናይሳ ታካ አማናይስ። 16 ሄሳ ግሾ፥ ታኒ ፆሳ ስንꬃንነ አሳ ስንꬃን ኡባ ዎደ ሎኦ ካህ ታዉ ዳና መላ ምናይስ።

17 “ታኒ የሩሳላመፐ ከዮሳፐ ዳሮ ላይꬃፈ ጉየ ታ ቢታ ማንቆታስ ማደ እማናዉነ ያርሾ ያርሻናዉ የሩሳላመ ባስ። ሀዋ 21:17-28. 18 ታኒ ፆሳ ኬꬃን ሄሳ ኦꬃዳ ጌሻ ዎጋ ፖላ ስምን ታና ደምዶሶና። ሄ ዎደ ታራ አስ ባዋ፥ ኦሽካ ከይቤና። 19 ሽን ኢሰፐ ይዳ እስ እስ አይሁደት ሄሳን ደኦሶና፤ ኤንቲ ታ ቦላ ኦዳ ኮይኮ ይድ ታና ነ ቦላ ሞታናዉ ዳንዳኦሶና። 20 ዎይኮ ታኒ ሻንጉዋ ስን ሺቅዳ ዎደ ኦꬅዳ ባል ደእኮ ሀይሳቲ ነ ስንꬃን ደኤይሳት ኦዶና። 21 ታኒ ኤንታ ግዶን ኤቃዳ፥ ‘ሀይቅዳይሳት ደንዳና ጋዳ ዋሳዳ ኦድዳ ግሾ ሀች ህንተ ስንꬃን ታ ቦላ ፕርዶሶና’ ጋስ፤ ሄሳፈ ሀራባ ኦꬃብከ” ያግስ። ሀዋ 23:6.

22 ሽን ፍልክስ ፆሳ ኦግያባ ጌሽ ኤርዳ ግሾ፥ “ታኒ ህንተ ኦዳ ሻላቃ ሉስዮስ ያ ዎደ ፕርዳና” ያግድ ሞይዝስ። 23 ፍልክስ ቃስ ጳዉሎሳ ቃቾና ናጋና መላነ እያ ዳቦታፐ ኦንካ እያ ኦይቻናዉ ይሽን ድጎና መላ ማቶ ሀላቃ ኪትስ።

24 ጉꬃ ጋላሳፐ ጉየ፥ ፍልክስ አይሁደ ባጋ ግድዳ ባ ማቸ ድሩስላራ ይድ ጳዉሎሳ ኪት ኤህስድ የሱስ ክርስቶሳን አማኖባ እያፐ ስእስ። 25 ጳዉሎስ ፅሎተꬃባ፥ ባ ሁጰ ሃሮባነ ያናዉ ደእያ ፕርዳባ ኦድሽን፥ ፍልክስ ያይድ፥ “ኔኒ ሀእስ ባ፤ ታዉ እንጀትዳ ዎደ ነና ፄግሳና” ያግስ። 26 ሄ ዎደ ጳዉሎሳፐ ዎꬋፈ ኤካናዉ ቆፕድ፥ እያ ዛር ዛር ፄግስድ እያራ ኦደቴስ።

27 ናምኡ ላይꬃፈ ጉየ፥ ፍልክሳ በሳ ጶርቅዮስ ፍስፆስ ኤክስ። ፍልክስ አይሁደታ ኡፋይሳናዉ ኮይድ ጳዉሎሳ ብሎና አጋግስ።