1 ፍስፆስ ካዎትዳ ሄꬑ ጋላሳፐ ጉየ ቅሳረፐ የሩሳላመ ብስ። 2 ያን ካህነ ሀላቃትነ አይሁደታ ካለይሳት ጳዉሎሳ ሞትዶሶና። 3 ጳዉሎሳ የሩሳላመ ኤህሽን ኦገን ቆሰትድ እያ ዎꬋናዉ ኤንታዉ እንጀታና መላ ባንታና ማዶ ግድ ፍስፆሳ ዎስዶሶና። 4 ፍስፆስ ኤንታኮ፥ “ጳዉሎስ፥ ቅሳረን ቃሾ ኬꬃን ደኤስ፤ ታኒ ታ ሁጰንካ ኤለሳዳ ጉየ ስማና ሀናይስ። 5 እ ባልዳባይ ደእኮ ህንተ ግዶን አዋተይሳት ታራ ቅሳረ ብድ እያ ሞቶና” ያግድ ዛርስ።

6 ፍስፆስ ኤንታ ማታን ሆስፑን ዎይኮ ታሙ ጋላሳ መላ ጋምእዳፐ ጉየ ቅሳረ ብስ። ዎንተꬃ ጋላስ ፕርዳ ኦይደን ኡትድ ጳዉሎሳ ኤሀና መላ ኪትስ። 7 እ ይን የሩሳላመፐ ይዳ አይሁደት እያ ዩሹዋን ኤቅድ ኤንቲ ላꬃናዉ ዳንዳኦና ዳሮ ዴፆ ሞቶ እያ ቦላ ሺሽዶሶና። 8 ጳዉሎስ ዛሪድ፥ “ታኒ አይሁደ ህግያ ግድን ፆሳ ኬꬃ ዎይኮ ሮመ ካዋ ቄሳረ ናቃብከ” ያግስ።

9 ሽን ፍስፆስ አይሁደታ ኡፋይሳናዉ ኮይድ ጳዉሎሳኮ፥ “የሩሳላመ ባዳ ሀ ሞቱዋባ ያን ታ ስንꬃን ፕርደታናዉ ኮያይ?” ያግድ ኦይችስ።

10 ሽን ጳዉሎስ፥ “ታኒ ፕርደታናዉ በሲያ ቄሳረ ፕርዳ ኬꬃን ኤቃ ክቻስ። ኔኒ ሎይꬃ ኤረይሳዳ ታኒ አይሁደታ አይብንካ ናቃብከ። 11 ህዛ፥ ታኒ ናቅዳባይ ዎይኮ ሀይቆስ ጋꬅያባ ኦꬅዳባ ግድኮ ሀይቆፐ ታና አሻ ጊከ። ሽን ኤንቲ ታና ሞትያ ሞቶይ መላ ግድዳፐ ጉየ ኦንካ ታና ኤንታዉ አꬅድ እማናዉ ዳንዳኤና። ቄሳረይ ታባ ፕርዶ ጋዳ ኦይቻይስ” ያግስ።

12 ሄ ዎደ ፍስፆስ ባ ዞራንቾታራ ዞረትድ፥ “ኔኒ ቄሳረይ ታባ ፕርዶ ጋዳ ኦይቻዳሳ፤ ቄሳረኮ ባሳ” ያግድ ዛርስ።

13 ጉꬃ ጋላሳፐ ጉየ ካዎይ አግርጵነ ባርንቀይ ፍስፆሳ ሳሮꬃናዉ ቅሳረ ብዶሶና። 14 ያን ኤንቲ ዳሮ ጋላስ ጋምእን፥ ፍስፆስ ካዋስ ጳዉሎሳባ ሀይሳዳ ያግድ ኦድስ፤ “ፍልክስ ብሎና አግድ ብዳ እስ አደይ ሀይሳን ደኤስ። 15 ታኒ የሩሳላመ ብዳ ዎደ ካህነ ሀላቃትነ አይሁደ ጭማት እያ ቦላ ፕርዳና መላ ታና ዎስድ እያባ ታዉ ኦድዶሶና። 16 ታኒ፥ ‘ሞተትዳ ኡራይ ባና ሞተይሳታ ስንꬃን ኤቅድ ባ ሞትዳባስ ዛሮ እሞናሽን፥ ኦና ግድኮካ አꬍድ እመተይስ ሮመ ህገ ግደና’ ያጋዳ ኤንታዉ ዛራስ።

17 “ሄሳ ግሾ፥ ኤንቲ ሀይሳን ሺቅዳ ዎደ ታኒ ጋምኦና ዎንተꬃ ጋላስ ፕርዳ ኬꬃ ገላዳ ጳዉሎሳ ኤሀና መላ ኪታስ። 18 እያ ሞተይሳት እያ ማታን ኤቅድ፥ ኢታባን እያ ሞቶና አጎኮና ጋዳ ታኒ ቆፕዳይሳ መላ እያ ሞትቦኮና። 19 ሽን ኤንቲ ባንታ ሀይማኖተባነ ጳዉሎስ፥ ‘ፓፃ ደኤስ’ ግያ እስ ሀይቅዳ የሱሳ ጌተትያ አድያባ እያራ ፓላሞሶና። 20 ሀ ኦዳይ ታና ሻካናዉ መትዳ ግሾ፥ ጳዉሎስ የሩሳላመ ብድ፥ ያን ፕርደታናዉ ኮያኮ ጋዳ እያ ኦይቻስ። 21 ሽን ጳዉሎስ ባ ኦዳ ቄሳረይ እያባ በአና ጋካናዉ ቃሾ ኬꬃን ጋምአናዉ ኦይችስ። ታኒ እያ ቄሳረኮ የዳና ጋካናዉ እ ቃሸታና መላ ኪታስ” ያግስ።

22 ሄሳ ግሾ፥ አግርጵ ፍስፆሳኮ፥ “ታኒ ታ ሁጰንካ ሄ ኡራይ ግያባ ስአናዉ ኮያይስ” ያግስ።

ፍስፆስ እያኮ፥ “ኔኒ ዎንቶ እ ግያባ ስአና” ያግስ።

23 ዎንተꬃ ጋላስ አግርጵነ ባርንቀይ ግታ ቦንቾን ሻላቃታራነ ካታማን ደእያ ግታ አሳታራ ይድ ፕርዳ ኬꬅ ገልዶሶና። ፍስፆስ ጳዉሎሳ ፄግስድ ኤህስ። 24 ፍስፆስ፥ “ካዋዉ አግርጳ፥ ሀይሳን ኑራ ደእያ አሳዉ፥ አይሁደት የሩሳላመንካ ሀይሳንካ ዋስድ፥ ‘እ ህዛፐ ጉየ ፓፃ ዳናዉ በሰና’ ያግድ፥ ታና ዎስዳ ኡራ ሀይሳ በኤታ። 25 ሽን እያ ሀይቆስ ጋꬅያባ አይብባካ ታኒ ደማብከ። እ ባ ሁጰን፥ ‘ቄሳረይ ታባ ፕርዶ ያጋዳ ኦይቻይስ’ ግዳ ግሾ፥ ቄሳረኮ እያ የዳናዉ ቆፋ ቃቻስ። 26 ታኒ እያባ ታ ጎዳ ቄሳረስ ፃፋናዉ ግድያ ጋሶይ አይብካ ባዋ። ሄሳ ግሾ፥ እያባ ህንተ በእኮ ታ ፃፍያባይ በንታነኮ ጋዳ ህንተ ስን ኡባራካ ካዋዉ፥ አግርጳ፥ ነ ስን እያ ኤሀስ። 27 አይስ ጊኮ፥ ቃሸትዳ አስ ቦላ ዳይናስ አꬅያ ዎደ እ አይስ ሞተትዳኮ ቆንጭሶና አገይስ ታዉ ኤያተꬅ ዳኔስ” ያግስ።