1 አግርጵ ጳዉሎሳኮ፥ “ኔኒ ነባ ኦዳናዉ ዳንዳኣሳ” ያግስ። ሄ ዎደ ጳዉሎስ ባ ኩሽያ ደንꬅድ ሀይሳዳ ያግስ፦

2 “ካዋዉ፥ አግርጳ፥ አይሁደት ታና ሞትዳባስ ዛሮ እማናዉ ሀች ነ ስንꬃን ኤቃሸ ታ ቃዳይ ሎኦ ጋዳ ቆፓይስ። 3 ኔኒ አይሁደ ዎጋነ ፓላማ ሎይꬃዳ ኤርያ ግሾ ታና ሳለቶና ስአና መላ ነና ዎሳይስ።

4 “ታኒ ናአተꬃፈ ዶማዳ ታ አሳ ግዶንነ የሩሳላመን ደእዳ ታ ደኡዋ አይሁደ ኡባይ ኤሮሶና። 5 ታኒ ኮይሮፐ ዶማዳ፥ ኑ ሀይማኖተ ህግያ ምንꬅድ ናግያ ፋርሳወታ ያራፐ ግደይሳ ኤንቲ ማርካታናዉ ኮይኮ ኤሮሶና። ሀዋ 23:6፤ ፍልጵ 3:5. 6 ሀእካ ታኒ ፆሳይ ኑ አዋታስ እማና ግዳ ኡፋይሳ ናግያ ግሾ ሞተታዳ ሀይሳን ኤቃስ። 7 ቃስ ታማነ ናምኡ ኑ አዋታ ሼሻይ ፆሳ ቃማነ ጋላስ ምንꬅድ ጎይንሸ ፆሳይ እማና ግዳይሳ ኤካናዉ ኡፋይሳን ናጎሶና። ካዋዉ አግርጳ፥ አይሁደት ታና ሞተይ ታኒ ኡፋይሳን ሄሳ ናግያ ግሾሳ። 8 አይሁደቶ፥ ፆሳይ ሀይቅዳይሳታ ደንይሳ አይስ አማነከቲ?

9 “ካሰ ታኒ ታ ሁጰንካ ናዝረተ የሱሳ ሱንꬃ ተቃናዉ ዳንዳኤትዳባ ኡባ ኦꬃናዉ በሴስ ጋዳ ቆፓስ። ሀዋ 8:3፤ 22:4-5. 10 ታኒ የሩሳላመን ኦꬅዳይ ሀይሳ። ካህነ ሀላቃታፐ ማታ ኤካዳ ፆሳ አሳታፐ ዳሮታ ቃሽሳስ። ኤንታ ዎꬍያ ዎደካ ኤንታ ሀይቁዋ ዶሳስ። 11 ዳሮ ዎደ አይሁደ ዎሳ ኬꬃ ኡባን ኤንቲ ሴረታና መላነ የሱሳ ጫይድ ካዳና መላ ኡንኤꬃስ። ታኒ ዎግ ባይና ኤንታ ሀንቀታዳ ሀር አቶሽን፥ ሀራ ቢታ ካታማታ ጋካናዉ ኤንታ ጎዳስ።

12 “ታኒ ሀ ኦዳስ ካህነ ሀላቃታፐ ማታነ ኪታ ኤካዳ ዳማስቆ ባይስ። 13 ካዋዉ፥ ታኒ ሴታ ጋላስ ኦገን ደእሽን አዋ ፖኦፐ ዳሮ አꬍያ ፖኦይ ታ ዩሹዋንነ ታራ በይሳታ ዩሹዋን ሳሎፐ ፖእስ። 14 ኑኒ ኡባይካ ሳአን ኩንድዳ ዎደ እብራወꬆ ዶናን፥ ‘ሳኦላ፥ ሳኦላ፥ ታና አይስ ጎዳይ? ኔኒ፥ ነና ጫድያ ብራታ ፃምአ ቃክኮ ነና ቆሃሳ’ ያግድ ታዉ ኦድሽን ስአስ።

15 “ታኒ፥ ‘ጎዳዉ፥ ኔኒ ኦኔ?’ ያጋስ።

“ጎዳይ፥ ‘ታኒ፥ ኔኒ ጎድያ የሱሳ፤ 16 ሽን ደንዳ ኤቃ። ሀች ኔኒ ታና በእዳይሳንነ ስንꬃፈ ታ ነዉ በሳናይሳ ሀራታስ ማርካታና መላ ታ ኦሳንቾ ኦꬃዳ ነና ሹማናዉ ነዉ በንታስ። 17 እስራኤለ አሳታፐነ ታኒ ነና ኤንታኮ ኪትያ አይሁደ ግዶናይሳታፐ ነና አሻና። 18 ኔኒ ኤንታ አይፍያ ዶያና፥ ꬉማፐ ፖኦኮ፥ ፃላሄ ኩሸፐ ፆሳኮ ኤንታ ዛራና። ኤንቲ ታናን አማንድ ናጋራ አቶተꬃ ኤካና። ፆሳይ ዶርዳ አሳ ግዶን ባንታ ላታ ደማና’ ያግስ።

19 “ካዋዉ አግርጳ፥ ሄሳ ግሾ፥ ታዉ ሳሎፐ በንትዳ ቆንጨꬃስ ኪተታናይሳ እፃብከ። 20 ሽን ታኒ ኮይሮታዳ ዳማስቆን ሄሳፈ ጉየ የሩሳላመንነ ይሁዳ ቢታ ኡባን ደኤይሳትነ አይሁደ ግዶናይሳት ባንታ ናጋራፐ ፆሳኮ ስማና መላነ ናጋራፐ ስሙዋ በሲያ ኦሶ ኦꬃና መላ ቃላ ኦዳስ። ሀዋ 9:20፥ 28-29. 21 ሄሳ ግሾ፥ አይሁደት ታና ፆሳ ኬꬃን ኦይክድ ዎꬋናዉ ኮይዶሶና። 22 ሀች ጋካናዉ ፆሳ ማደይ ታፐ ሻከትቤና፤ ያንያ ግሾ፥ ጉꬃስነ ግታስ ማርካታሸ ሀይሳን ኤቃስ። ናበትነ ሙሰይ ሀናና ግድ ኦድዳይሳፈ ሀራ እስባካ ታኒ ኦድዳባይ ባዋ። 23 ሄስካ፥ ‘ክርስቶስ ዋየ ኤካናዉ በሴስ፤ ቃስ ሀይቆፐ ኮይሮ ደንድድ አይሁደታስነ አይሁደ ግዶናይሳታስ አቶተꬃ ፖኦ ኦዳናዉ በሴስ’ ግዳይሳ” ያግስ።

24 ጳዉሎስ ሄሳ ያግድ ዛርሽን፥ ፍስፆስ ባ ቃላ ꬎቁ ኦꬅድ፥ “ጳዉሎሳ፥ ነ ጎያዳሳ፤ ነ ዳሮ ትምርተይ ነና ጎሻተꬃስ ጋꬅስ” ያግስ።

25 ሽን ጳዉሎስ፥ “ቦንቾ ፍስፆሳ፥ ታኒ ቱማባነ በሲያባ ኦዳይስፐ አትሽን፥ ጎያብከ። 26 ታኒ ቆንጨን ኦድያ ኦዳ ካዎይ ኤሬስ። ሀ ኦዳይ ጌማን ኦሰትቦና ግሾ እሶይካ እያፐ ጌሞናይሳ ታኒ ጌሻዳ ኤራይስ።

27 “ካዋዉ አግርጳ፥ ኔኒ ናበታ አማናሳ ግድኪ? ኔኒ አማነይሳ ታኒ ኤራይስ” ያግስ።

28 ካዎይ አግርጵ፥ ጳዉሎሳኮ፥ “ሀ ጉꬃ ሳተን ታና ክርስታነ ኦꬃናዉ ኮያይ?” ያግስ።

29 ጳዉሎስ፥ “ዳሮ ዎደ ግድን ጉꬃ ዎደ ነ ፃላላ ግዶናሽን ሀች ታና ስእያ ኡባይ ሀ ቃሹዋፐ አትሽን፥ ታ መላ ግዳና መላ ፆሳ ዎሳይስ” ያግስ።

30 ሄሳፈ ጉየ፥ ካዎይ ፍስፆስ፥ ባርንቀይነ ኤንታራ ኡትዳ ኡባይካ ደንድዶሶና። 31 ያፐ ከይድ ብሸ እሶይ እሱዋራ፥ “ሀ ኡራይ ሀይቆስ ዎይኮ ቃሾስ ጋꬅያባ አይኮካ ኦꬅቤና” ያግድ ኦደትዶሶና። 32 አግርጵ ፍስፆሳኮ፥ “ሀ ኡራይ ‘ቄሳረይ ታባ ፕርዶ’ ጎናኮ ብለታናዉ ዳንዳኤስ ሽን” ያግስ።