1 ኑኒ ማርካበን ፃለ ባናዉ ቆፋ ቃችዳ ዎደ አዉግስፆሳ ዎታዳረታ ጌተተይሳታፐ እስ ዩልዮሳ ጌተትያ ማቶ ሀላቃስ ጳዉሎሳነ ሀራ ጉꬃ ቃሾ አሳታ አꬅድ እያዉ እምዶሶና። 2 ኢሰ ጋፃን ደእያ ቢታታ ብያ አድራምፅዮነ ማርካበን ገልድ ደንድዳ። ማቀዶነ አስ ግድዳ ተሰሎንቀ አርስፅሮኮስ ኑራ ደኤስ።

3 ዎንተꬃ ጋላስ ኑኒ ስዶና ጋክሽን፥ ዩልዮስ ጳዉሎሳስ ኬህድ ባ ላገታኮ ብድ ኮሽያባን ማዳና መላ ኤንታኮ እያ የድስ። 4 ያፐ ደንድድ ስንꬃራ ኑ ቦላ ጫርክያ ግሾ ሃꬃን ተቀትዳ ቢታ፥ ቆጵሮሳን ዘምፕድ አꬍዳ። 5 ክልቅያነ ጵንፍለ ማታን ደእያ አባ ፕንድ ሊቀን ደእያ ሙራ ጋክዳ። 6 ያን ማቶ ሀላቃይ ፃለ ብያ እስክንድረ ማርካበ ደምድ፥ እያን ኑና ገልስስ።

7 ኑኒ ዳሮ ጋላስ ሎዳራ ብድ፥ ዳሮ መቶን ቃንዶሳ ካታማ ማት ጋክዳ። ያራ ባናዉ ኑና ጫርኮይ ድግን ሳልሞናራ አꬍድ ሃꬃን ተቀትዳ ቢታ፥ ቃርፄሳን ዘምፕድ አꬍዳ። 8 ዳሮ መቶን ጋፃ ጋፃ ኦይክድ ላሳ ካታማ ማታን ደእያ አባ ዶናን “ማርካበይ ዎፑ ግድ ሸምፕያ በሲ” ጌተትያ በሳ ጋክዳ።

9 ኑኒ ያን ዳሮ ዎደ ጋምእዳፐ ጉየ ፆም ብለትዳ ግሾ ህዛፐ ማርካበን ቡስ መትያ ግሾ ጳዉሎስ ኤንታ ዞርስ። 10 “አሳዉ፥ ኑ ቡሳን ግታ ቦሽነ ዳሮ ቆሆይ ደኤይስ ታዉ በንቴስ፤ ቆሆይ ጫና ቦላነ ማርካብያ ቦላ ፃላላ ግዶናሽን ኑ ደኡዋ ቦላካ ጋካና” ያግስ። 11 ሽን ማቶ ሀላቃይ ጳዉሎስ ግዳይሳፈ አꬅድ ማርካብያ ላገይስነ ማርካብያ ጎዳይ ገይሳን አማንስ። 12 ሄ አባ ዶናን ደእያ ካታማይ ባልጎ አጌና አꬃናዉ ኤንታዉ እንጀቶና ግሾ፥ ዳርያ አሳት ባንታዉ ዳንዳኤትኮ ፍንቀ ካታማ ጋክድ ባልጎ አጌና ያን አꬃናዉ ዞረትዶሶና። ፍንቀይ ፑደሀ-ዉሎሀፐነ ዱገሀ-ዉሎሀፐ ግዶን አባ ዶናን ደእያ ካታማ።

13 ካዉሻ ዱገሀ ጫርኮይ ሎዳራ ጫርክዳ ዎደ ባንታ ቆፕዳይሳዳ ሀንዳባ ኤንታዉ ዳንን ደንድድ፥ ማርካበይ ቃፆና መላ ኦይክያ ብራታ ፑደ ኤክድ ቃርፄሳ ማታራ አꬍዶሶና። 14 ሽን ዳሮ ጋምኦና “አዉራቅስ” ጌተትያ ዎልቃማ ጎተይ ሃꬃን ተቀትዳ ቢታፈ ዱገ ኤንታ ቦላ ደንድስ። 15 ሄ ጎተይ ማርካብያ ሱግድ ኤፎና ድግዳ ግሾ ጫርኮይ ማርካብያ ባ ዶስዳ ሶ ኤፍስ።

16 ኑኒ ዩሾይ አባን ተቀትዳ ቢታ፥ ቄዳን ዘምፕድ ብሸ ዳሮ መቶተትድ ማርካብያ ዎጎሉዋ አሻናዉ ዳንዳእዳ። 17 ኤንቲ ዎጎሉዋ ፑደ ከስዳፐ ጉየ ዎዶሩዋን ማርካብያ ቦላ ፃፅድ፥ ምንꬅ ቃችዶሶና። ሱርትሳ ጌተትያ ሻፍያን ባንታና ዶምኤꬃና ግድ ህርግድ፥ ማርካብያ ሻራ ዎꬍስድ ማርካብያ ጮ የድ አግዶሶና።

18 ጎተይ ዎልቃምሸ ብን ዎንተꬃ ጋላስ ጫናፐ ባጋ አባን ሆሎ ኦይክዶሶና። 19 ሄꬓንꬆ ጋላስ ማርካብያ ሚሽያ ኤክድ ባንታ ኩሸን ሆልዶሶና። 20 ኑኒ ዳሮ ጋላስ አዋ አይፈነ ፆልንቶ በኦና ግሾነ ዎልቃማ ኡሾይ ኑ ቦላ ኡሽዳ ግሾ ስንꬃፈ ኑኒ ሸምፖራ አታና ግድ ቆፕቦኮ።

21 ሄ ዎደ ኤንቲ ዳሮ ጋላስ ካꬅ ሞና ጋምእዳ ግሾ ጳዉሎስ ኤንታ ግዶን ደንድ ኤቅድ፥ “አሳዉ፥ ህንተ ታ ዞርያ ኤክድ ቃርፄሳፐ ደንዶና አግዳኮ ሀ መቶይነ ቆሆይ ኑና ጋከና። 22 ሽን ታኒ ህንተና ያዮፍተ ጋዳ ዞራይስ፤ አይስ ጊኮ፥ ሀ ማርካበይ ꬋያናፐ አትሽን፥ ህንተፈ እስ አሳ ሸምፖይካ ꬋየና። 23 ዝነ ቃማ ታ እያባ ግድዳይስነ ታ ጎይንያ ፆሳይ ኪትዳ ኪታንቾይ ታ ማታን ኤቅድ፥ 24 ‘ጳዉሎሳ፥ ያዮፋ፤ ኔኒ ሮመ ቢታ ካዋ ቄሳረ ስንꬃን ኤቃናዉ በሴስ። ሄኮ ፆሳይ ነ ግሾ ኔራ ብያ አሳ ኡባ ሸምፑዋ አሽስ’ ያግስ። 25 ሄሳ ግሾ፥ አሳዉ፥ ያዮፍተ። ሄ ኪታንቾይ ታዉ ኦድዳይስ ሀናናይሳ ታኒ አማናይስ። 26 ሽን ጫርኮይ ኑና ኤፍድ እስ ዩሾይ አባን ተቀትዳ ቢታ ጋፃን ሆላና” ያግስ።

27 ታማነ ኦይዳንꬆ ቃማን አድረ አባን ኑና ጫርኮይ ገደነ ሃ ሱግሽን፥ ግድ ብላሄ ግድያ ዎደ ማርካብያን ኦይሳታስ ቢታኮ ማትዳባ ዳንስ። 28 ኤንቲ ጪሞተꬃ ኤራናዉ ኮይድ ዎዶሮ ፄራን ዴፅያባ ቃችድ አባን የግን፥ አባይ ሆስፑን ታሙ ዋꬋ ግድስ። ጉꬅ ጋምእድ፥ ዛር የግን ኡሱፑን ታሙ ዋꬋ ግድስ። 29 ኤንቲ አባ ጋፃን ደእያ ሹቻን ዶምኤቶና መላ ያይድ፥ ማርካበይ ቦና መላ ኦይክያ ኦይዱ ብራታታ ማርካብያፐ ጉየራ አባን የግድ፥ ሳእ ዎንታና መላ ፆሳ ዎሶሶና። 30 ማርካብያን ኦይሳት ማርካብያፐ ባቃታናዉ ኮይድ፥ ማርካበይ ቦና መላ ኦይክያ ብራታታ ማርካብያፐ ስንꬃ ባጋራ አባን የግያ ዳንን ዎጎሉዋ አባን የግዶሶና። 31 ጳዉሎስ ማቶ ሀላቃኮነ ዎታዳረታኮ፥ “ሀይሳቲ ማርካብያን ሸምፕ ኡቶና እፅኮ ህንተ አታናዉ ዳንዳኤከታ” ያግስ። 32 ሄሳ ግሾ፥ ዎታዳረት ዎጎሎይ ቃሸትዳ ዎዶሩዋ ቃንፅድ የድ አግዶሶና።

33 ሳአይ ዎንታና ሀንሽን ኡባይ ካꬅ ማና መላ ጳዉሎስ አሳኮ፥ “ህንተ ካꬅ ሞና ናግሸ ሀችራ ታማነ ኦይዱ ጋላስ ጋምእደታ። 34 ሄሳ ግሾ፥ ጉꬃ ካꬅ ህንተ ማና መላ ታኒ ህንተና ዎሳይስ። ህንተ ጋሽትሳና መላ ጉꬃ ካꬅ ማናዉ ኮሼስ፤ ሀር አቶሽን ህንተ ሁጰ ብናናፐ እሶይካ ꬋየና” ያግስ። 35 ጳዉሎስ ሄሳ ግድ ኡይꬅ ኤክድ ኡባ ስንꬃን ፆሳ ጋላትስ፤ ኡይꬃ መንꬅድ ሙሱ ዶምስ። 36 ኡባይ ምነትድ ባንታዉ ካꬅ ኤክድ ምዶሶና። 37 ኑኒ ማርካብያን ደኤይሳት ናምኡ ፄታነ ላፑን ታማነ ኡሱፑና። 38 ኤንቲ ምድ ካልዳ ዎደ ጫና ግስትያ አባን የግድ ማርካብያ ዴፁዋ ካዉሽዶሶና። 39 ሳአይ ዎንትዳ ዎደ ማርካብያ ኦሳንቾት አዉ ቢታ ጋክዳኮ ኤሮናሽን፥ አባ ጋፃን ደእያ ሻፈነ ስልሞ በእዶሶና። ባንታዉ ዳንዳኤትኮ ማርካብያ ሄ ሻፍያኮ ሺሻናዉ ቆፕዶሶና። 40 ያትድ፥ ማርካበይ ቦና መላ ኦይክያ ብራታታ ብርሽድ አባን የግዶሶና። ሄ ዎደ ላግያ ምꬃ ቃችያ ዎዶሩዋ ብርሽዶሶና። ሄሳፈ ጉየ፥ ጫርኮይ ማርካብያ ስን ሱጋና መላ ማርካብያ ኤፍያ ሻራ ስንꬃ ባጋራ ꬎቁ ኦꬅድ ቡሱ ዶምዶሶና። 41 ሽን ማርካበይ ሻፈ ዶረን ዶምኤትድ ምተትስ። ማርካብያስ ስንꬃ ባጋይ ፁጉንድ ሻፍያ ጫድ ኦይክድ ቃፆና እፅን፥ ጉየ ባጋይ ዙልያ ሱገꬃን መቀረተꬅ ኦይክስ።

42 ዎታዳረት ቃሾ አሳፐ እሶይካ ሃꬃ ዋꬍድ ከስ ኤኮና መላ ኤንታ ዎꬋናዉ ዞረትዶሶና። 43 ሽን ማቶ ሀላቃይ ጳዉሎሳ አሻናዉ ኮይድ ዎታዳረታ ዞረታ እፅስ። ሃ ዋꬎ ኤርያ ኡባይ ማርካብያፐ ሃꬃን ጉፕ ጉፕ ዎꬍድ ካሰትድ ጋፃ ከያና መላ ኪትስ። 44 አትዳይሳት ሳንቃ ቦላነ፥ ማርካብያ መኡዋ ቦላ ከያና መላ ኪትስ። ሄሳዳ ሀንድ ኡባይ ጋፃ ሳሮራ ከይዶሶና።