28
ጳዉሎስ ዩሾይ አባን ተቀትዳ ቢታ ማልታን
1 ኑኒ ጋፃ ሳሮ ከይዳ ዎደ ጋክዳ በሳይ ዩሾይ አባን ተቀትዳ ቢታ፥ ማልታ ግደይሳ ኤርዳ። 2 ማልታ አሳይ ኑስ ዳሮ ኬሀ ኬህዶሶና። እር ቡክያ ግሾነ ሜግያ ግሾ ታማ ኤꬅድ ኑና ኡባ ሞክዶሶና። 3 ጳዉሎስ ዳሮ አፍራ ሺሽድ ታማን ዎꬅሽን፥ ሾሽ ሴላ ግሾ ከይድ እያ ኩሽያ ቦላ ፃፀትድ እያ ዱክስ። 4 ማልታ አሳይ ሾሽ ጳዉሎሳ ኩሸን ፃፀትዳይሳ በእዳ ዎደ እሶይ እሱዋኮ፥ “ቱማ ሀ ኡራይ ሸምፖ ዎꬍዳ አስ፤ ሀር አቶሽን አባፈ እ አትንካ ፆሳ ፕርዳፈ *ፆሳ ፕርዳፈ፦ ሄ ዎደ ሄ ቢታን ዱማ ዱማ ማጫ ፆሳት ደኦሶና። ኤንታፈ እስንያ ኢታ ኦꬅያ አሳ ፕርድያሮ። እያ ፕርዳ ፆሲ ጌተታ ፄገታሱ። አትድ ፓፃ ዳናዉ ዳንዳእቤና” ያግዶሶና። 5 ሽን ጳዉሎስ ባ ኩሽያፐ ሾሻ ዉፃርክድ፥ ታማን የግስ፤ እያ አይኮካ ቆህቤና። 6 ኤንቲ፥ “እያ አሳተꬃይ ክፄስ፥ ዎይኮ አኬኮና ኩንድድ ሀይቄስ” ግድ እያ ናጎሶና። ሽን ዳሮ ዎደ ናግድ እያ አሳተꬃን አይብካ ዱማትዳባይ ꬋይን፥ “ሄስ ፆሰ” ያግድ ባንታ ቆፋ ላምዶሶና። 7 ሄ ሄራን ዩሾይ አባን ተቀትዳ ቢታ ሀላቃ፥ ፑፕልዮሳ ጌተተይሳስ ጋደይ ደኤስ፤ ሄꬑ ጋላስ ጋካናዉ እ ኑና ሲቆን ሞክስ። 8 ፑፕልዮሳ አዋይ ቆፆ፥ ምሻነ ኡሎ ኡትሶን ሀርገትድ ዝንእድ ደኤስ። ጳዉሎስ እያ ሶ ገልድ እያዉ ፆሳ ዎስስ፤ ባ ኩሽያ እያ ቦላ ዎꬅድ ፓꬅስ። 9 ሄሳፈ ጉየ፥ ዩሾይ አባን ተቀትዳ ቢታ፥ ማልታን ደእያ ሀርግያ ሀራ አሳትካ ይድ ፓፅዶሶና። 10 ኤንቲ ኑና ዳሮ ቦንቾ ቦንችዶሶና፤ ኑኒ ማርካበን ባናዉ ደንድዳ ዎደ ኦገስ ኮሽያባ ኑስ እምዶሶና።
ጳዉሎስ ሮመ ጋክስ
11 ሄꬑ አጌናፐ ጉየ፥ ማልታን ባልጎ አꬅድ ማርካበን ገልድ እስክንድረ ባናዉ ደንድዳ። ሄ ማርካብያ ቦላ ድዮስቆሮሳ ጌተትያ መንተ ኤቃታ ምስለይ ደኤስ። 12 ስራኩሰ ካታማ ገልድ ያን ሄꬑ ጋላስ ኡትዳ። 13 ያፐ ደንድድ ረግዩመ ካታማ ጋክዳ። እስ ጋላሳፐ ጉየ፥ ዱገሀ ባጋ ጫርኮይ ጫርክን፥ ዎንተꬃ ጋላስ ፑትዮላ ካታማ ጋክዳ። 14 ያን ኑኒ እስ እስ አማንያ አሳታ ደምን፥ ባንታራ ሳምንታ ጋምአና መላ ኑና ዎስዶሶና። ሄሳፈ ጉየ፥ ሮመ ብዳ።
15 ሮመን ደእያ አማንያ አሳት ኑባ ስእድ፥ አፍዮሳ ግያን፥ ሄꬑ እማꬃ ኬꬅ ጋካናዉ ኑና ሞካናዉ ይዶሶና። ጳዉሎስ ኤንታ በእዳ ዎደ ፆሳ ጋላትድ ምነትስ።
16 ኑኒ ሮመ ገልዳ ዎደ ጳዉሎስ ባና ናግያ ዎታዳርያራ ባርካ ደኦ ጌተትስ።
17 ሄꬑ ጋላሳፐ ጉየ፥ ጳዉሎስ አይሁደታ ሀላቃታ ባኮ ፄግስስ። ኤንቲ ሺቅዳ ዎደ ኤንታኮ፥ “ታ እሻቶ፥ ታኒ ኑ አሳ ዎይኮ ኑ አዋታ ዎጋ ቦላ አይብ ቆሆካ ኦꬃብከ፥ ሽን ታና የሩሳላመን ቃችድ ሮመ አሳስ አꬅድ እምዶሶና። 18 ኤንቲ ታ ሞቱዋ በእድ ሀይቆስ ጋꬅያባ ታ ቦላ አይብባካ ደምቦና ግሾ ታና ብላናዉ ቆፕዶሶና። 19 ሽን አይሁደት ሄሳ እፅዳ ዎደ፥ ‘ታባ ቄሳረይ ፕርዶ’ ያጋስፐ አትሽን፥ ታኒ ታ ደርያ ሞትያባይ ደእን ግደና። ሀዋ 25:11. 20 ታኒ ህንተና ፄግስዳይ ህንተና በአናዉነ ህንተዉ ሀይሳ ኦዳናሳ። ታኒ ሀ ሳንꬃላታን ቃሸትዳይ እስራኤለ አሳይ ናግያ ኡፋይሳ ግሾሳ” ያግስ።
21 አይሁደ ሀላቃት ጳዉሎሳኮ፥ “ኑስ ይሁዳፐ ነባ ፃፈትዳ ዳብዳበይ ጋክቤና። ያፐ ይዳ አሳታፐ እሶይካ ነባ ኢታ ኦድዳይ ባዋ። 22 ሽን ሀ ነ ካልያ አማኑዋ ዱማ ዱማ በሳን አሳይ እፀይሳ ኑኒ ኤርያ ግሾ ነ ቆፋ ስአናዉ ኮዮስ” ያግዶሶና።
23 ኤንቲ ባንታ ያና ጋላስ ጳዉሎሳስ ቃፃርድ፥ ሄ ጋላስ ዳርድ እ ደእያሱዋ ይዶሶና። እ ዎንታፈ ኦማርስ ጋካናዉ ፆሳ ካዎተꬃባ ኤንታዉ ማርካትስ። ቃስ ኤንቲ የሱሳባ አማናና መላ ሙሰ ህግያፈነ ናበታ ማፃፋፐ ቆንጭስድ ኤንታ ታማርስስ። 24 እሶት እሶት ጳዉሎስ ግዳይሳ አማንዶሶና፥ ሽን ሀራት አማንቦኮና። 25 ኤንቲ ባንታ ግዶን ኦዳ ማኦና እፅዳ ዎደ ጳዉሎስ እስባ ግዳፐ ጉየ ብዶሶና። እ ሀይሳዳ ያግስ፦ “ጌሻ አያናይ ኑ አዋታስ ናብያ እሳያሳ ዶናን ኦድዳይስ ቱማ።
26 “ ‘ኔኒ ሄ አሳኮ ባዳ፥
ህንተ ስስ ስኤታ፥ ሽን ህንተዉ ገለና፤
ህንተ በኦ በኤታ፥ ሽን ደመከታ። እሳ 6:9-10.
27 አይስ ጊኮ፥ ሀ ደርያ ዎዛናይ ሙምስ፤
ኤንታ ሀይꬃይ ቱልስ፤
ኤንታ አይፈይካ ጎዘትስ።
ሄስ ባይነኮ፥ ኤንቲ ባንታ አይፍያን በእድ፥
ባንታ ሀይꬃን ስእድ፥ ባንታ ዎዛናን አኬክድ፥
ታኮ ስማናሽን፤
ታካ ኤንታ ፓꬃናሽን’ ያጋ” ያግስ።
28 “ህዛ፥ ሀይስ ፆሳ አቶተꬃ ኪታይ አይሁደ ግዶናይሳታስ ግደይሳ ኤሬታ። ኤንትካ ስአና” ያግስ።
29 ጳዉሎስ ሄሳ ግዳፐ ጉየ፥ አይሁደት ባንታ ግዶን ዳሮ ፓላምሸ ከይድ ብዶሶና።
30 ጳዉሎስ ከራ ኬꬃን ናምኡ ላይꬅ ኩመꬅ ደእስ፤ ያን ደእሸ ባኮ ያ ኡባ ሞኬስ። 31 ያሽ ባይናነ ኦንካ ድጎናሽን ፆሳ ካዎተꬃባ ሳባክስ፤ ጎዳ የሱስ ክርስቶሳባ ቆንጭስድ ታማርሴስ።