ጳዉሎስ ሮመ አሳስ
ፃፍዳ ኪታ
ጋꬃ ቆፋ
ሀዋርያ ጳዉሎሳ ኪታይ ሮመ አሳስ ፃፈትዳይ፥ ጳዉሎስ ሮመን ደእያ ዎሳ ኬꬃ በአናዉ ቆፕዳ ግሾ፥ እ ብያ ዎደ ኤንቲ ጊግድ ናጋና መላ ኦꬃናሳ። ጳዉሎሳ ቆፋይ ሮመን ደእያ አማነይሳታራ ጉꬃ ዎደ ኦꬅዳፐ ጉየ፥ ኤንቲ እያ ማድን እስፔነ ባናሳ። ሮመ ኪታን አማኖባ እ ኤርዳይሳ፥ አማንያ አሳይ ሄ ትምርትያ ኦሶን ፔሻና መላ ቆንጭስድ ፃፍስ።
ጳዉሎስ ሮመን ደእያ አማንያ አሳ ኮይሮ ሳሮꬅ ስሚድ፥ ካልድ ኤንታዉ ዎሰይሳ ኦዴስ። ኢያ ኪታስ ጉልአ ቆፋይ፥ “ዎንገላን ፆሳ ፅሎተꬃይ ቆንጭስ፤ ሄ ፅሎተꬃይ ኮይሮፐ ዉርሰꬅ ጋካናዉ አማኖን ቆንጭስ” ግድ ኦዴስ (1:17)።
ሄሳፈ ጉየ፥ ሄ ቆፋ ዳልግስድ ፃፌስ። አይሁደታ ግድን አይሁደ ግዶና አሰ ግድን፥ ኡባይ ናጋር ሃርን ደእዳ ግሾ፥ ኤንቲ ፆሳራ ስገታናዉ ኮሼስ። አሳይ ፆሳራ ስገታናዉ ዳንዳኤይ የሱስ ክርስቶሳ አማኖና። ኤንቲ ፆሳራ መꬍያ ኦራꬃ ጋሄተꬃ አይፈይ፥ ኦራꬃ ደኦ ግደይሳ ጳዉሎስ ዳልግስድ ኦዴስ። አማንያ አስ ፆሳራ ሳሮ ደኤስ፤ ቃስ ፆሳ አያና ባጋራ ናጋራፐነ ሀይቆ ዎልቃፈ ከስ ኤኬስ። ሸምፖ 5-8 ጋካናዉ ጳዉሎስ ፆሳ ህገይነ አማንያ አሳ ደኦን ኦꬅያ ፆሳ አያና ዎልቃ ቆፋይ አይበኮ ኦዴስ። ሄሳፈ ካልድ፥ ጳዉሎስ፥ “ፆሳይ አሳ ናአስ ቆፕዳ ቆፋ ግዶን አይሁደትነ አይሁደ ግዶና አሳይ ዋንድ እስፈ ዋፀታናዉ ዳንዳኢ?” ግያ ኦይሻስ ዛሮ እማናዉ ባፀትስ።
ቃስ አይሁደት የሱሳ ኤኮና እፅዳይ ፆሳ ቆፋ ግደይሳ ኦዴስ። ሄስ ሀንዳይ የሱስ ክርስቶሳ ባጋራ ቆንጭስዳ አꬎ ኬሀተꬃ ግዶን አሳ ዛረ ኡባ ሀጳና መላሳ። ግዶሽን፥ አይሁደት የሱሳ ኤካና ዎደይ ያናይሳ ጳዉሎስ አማኔስ። ዉርሰꬃን ጳዉሎስ አማኖ ደኦ ዋንድ ዳናዉ በሲያኮ ኦዴስ። ፆሳስ ኦꬃናባ፥ አማንያ አሳት ባንታ ቢታስነ ባንታ ግዶን እሶይ እሱዋስ አዋተꬃን ኦꬃናባነ ካሃ ጋሶን መትያ ኦይሸታባ ቆንጭስድ ኦዴስ።
ማፃፋ አይፈ ቆፋታ
ገሎ ቆፋ (1:1-15)
ሮመ ኪታ ሁጰ ቆፋ (1:16-17)
አሳ ናአስ አቶተꬅ ኮሼስ (1:18—3:20)
ፆሲ አሰ አሽያ ኦገ (3:21—4:25)
ክርስቶሳን በንትያ ኦራꬃ ደኦ (5:1—8:39)
ፆሲ እስራኤለስ ቆፕያ ቆፋ (9:1—11:36)
አማንያ አሳ ዱሳ (12:1—15:13)
ኩሻ ቆፋነ ሳሮꬆ (15:14—16:27)
1
1 የሱስ ክርስቶሳ አይለ ግድዳ፥ ሀዋረ ግዳና መላ ፄገትዳይሳፈነ ፆሳ ዎንገላ ሳባካና መላ ዶረትዳ ጳዉሎስ ኪትዳ ኪታ።
2 ፆሳይ ዳሮ ዎደፐ ስን ባ ናበታ ባጋራ እማና ያግዳ ፆሳ ዎንገላይ ጌሻ ማፃፋታን ፃፈትስ። 3 ሄ ዎንገላይ አሾን ዳዊታ ሼሻፐ የለትዳ፥ ፆሳ ናኣ፥ ኑ ጎዳ የሱስ ክርስቶሳባ። 4 ቃስ እ ባ ጌሻ አያናን ሀይቆፐ ደንድድ፥ ፆሳ ናኣ ግደይሳ ግታ ዎልቃን በስስ። 5 እያ ባጋራ አይሁደ ግዶና አሳ ኡባይ፥ አማንድ ኪተታና መላ ክርስቶሳ ሱንꬃ ግሾ፥ ፆሳይ አꬎ ኬሀተꬅነ ሀዋረተꬃ ማታ ኑስ እሚስ። 6 የሱስ ክርስቶሳስ ግዳና መላ ፄገትዳ አሳታፐ ባጋት ህንተና።
7 ሮመን ደእያ፥ ፆሳይ ሲቀይሳታስነ እያ ጌሻ ደረ ግዳና መላ ዶርዳይሳታስ።
ፆሳ ኑ አዋፐነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።
ጋላታ ዎሳ
8 ኡባፈ ኮይሮታዳ፥ ህንተ አማኖይ ቢታ ኡባን ስኤትዳ ግሾ፥ የሱስ ክርስቶሳ ባጋራ ህንተ ግሾ ታ ፆሳ ጋላታይስ። 9 ታኒ እያ ናኣ ዎንገላባ ኩመꬃ ዎዛናን ኦድያ ፆሳይ፥ ታኒ ታ ዎሳን ኡባ ዎደ ህንተና ቆፐይሳስ እ ማርካ። 10 ዉርሰꬃን፥ ፆሳ ሸነ ግድኮ፥ ታኒ ህንተኮ ባናዉ ኦገይ ታዉ እንጀታና መላ ኡባ ዎደ ዎሳይስ። 11 ታኒ ህንተዉ አያና እሙዋ ሻካናዉነ ህንተና በአናዉ ላሞታይስ። 12 ሄስካ፥ ታኒ ህንተ አማኑዋን፥ ቃስ ህንተ ታ አማኑዋን ምነታና መላሳ።
13 ታ እሻቶ፥ ታኒ አይሁደ ግዶና አሳፐ አይፈ ደምዳይሳዳ፥ ህንተፈካ አይፈ ደማናዉ ህንተኮ ባናዉ ቆፓስ፥ ሽን ድገታስ። ሀዋ 19:21. 14 ታማርዳ አሳስነ ታማርቦና አሳስ ቃስ ጭንጫታስነ ኤያታስ ታዉ አጮይ ደኤስ።
15 ሄሳ ግሾ፥ ሮመን ደእያ ህንተዉካ ዎንገላ ኦዳናዉ አሞታይስ።
ዎንገል ፆሳ ዎልቃ
16 እያ አማንያ ኡባ፥ ኮይሮትድ አይሁደታ፥ ካልድ አይሁደ ግዶናይሳታ አሻናዉ ዎንገላይ ፆሳ ዎልቃ ግድያ ግሾ፥ ታ ዎንገላን ዬላትከ። ማር 8:38. 17 ፅሎይ አማኖን ደኦን ዳና ጌተትድ ጌሻ ማፃፋን ፃፈትስ። ዎንገላን ፆሳ ፅሎተꬃይ ቆንጭስ፤ ኮይሮፐ ዉርሰꬅ ጋካናዉ፥ አሳይ ፅለይ አማኖና። እብራ 2:4.
አሳ ኢታተꬅ
18 ቱማይ ኤረቶና መላ ባንታ ኢታ ኦሶን ካምያ አሳ ቦላነ ናጋራ ኡባ ቦላ፥ ፆሳ ሀንቆይ ሳሎፐ ዎꬌስ። 19 ፆሳይ ኤንታዉ ቆንጫናዉ በሲያባ ቆንጭስዳ ግሾ፥ ኤንቲ ፆሳባ ኤሮሶና። 20 አላመይ መቶሳፐ ዶምድ፥ አሳስ በንቶና ፆሳ ካንዶይ፥ ሄስካ እያ መርና ዎልቃይነ ፆሳተꬃይ እያ መተꬃን ቆንጭድ ደእያ ግሾ፥ አሳይ ባንታ ኢታተꬃስ ጋሶያባይ ባዋ።
21 ኤንቲ ፆሳ ኤርሸ፥ እያ ቦንችቦኮናነ ጋላትቦኮና። ኤንታ ቆፋይ ማዶናባ ግድስ፤ ኤንታ አኬኮና ዎዛናይ ꬉምስ።ኤፈ 4:17-18. 22 ኤንቲ ባንታና ጭንጫታ ጎሶና፥ ሽን ኤያታ። 23 ኤንቲ ሀይቆና ፆሳ ጎይናናይሳ አግድ፥ ሀይቅያ አሳ መꬎን፥ ካፎታ መꬎን፥ ዶአታ መꬎንነ ኡሎራ ጎሸትያባታ ዳንስድ ኦꬅዳ ምስለታ ጎይንዶሶና። ዛረ 4:16-18.
24 ሄሳ ግሾ፥ ኤንቲ እሶይ እሱዋራ ቦርሶባ ኦꬅድ፥ ባንታ አሳተꬃ ካዉሻና መላ ፆሳይ ኤንታ ዎዛናይ አሞትያ ቱና ኦሶስ ኤንታ የግ አግስ። 25 ሄስ ሀንዳይ ኤንቲ ፆሳ ቱማ ዎርዶን ላምዳ ግሾነ መꬍዳ ፆሳ አግድ፥ መተꬅ ጎይንዳ ግሾሳ። ፆሳይ መርናዉ ጋላተትዳይሳ። አምንእ።
26 ሄሳ ግሾ፥ ፆሳይ ኤንታና ኤንታ ቦርሶ አሙዋስ የግ አግስ። ኤንታ ማጫሳይ ባንታዉ በሲያ አደራ ጋሄተꬅ አግድ፥ በሶናባ ሀንድ ማጫስ ማጫሳራ ጋሄትዶሶና። 27 ሄሳዳካ፥ አደት ባንታዉ በሲያ ማጫሳራ ጋሄተꬅ አግድ፥ አደይ አደራ ጋሄትዶሶና። አደት እሶይ እሱዋራ አሞን ፁገትድ፥ ቦርሶባ ኦꬅዶሶና። ባንታ ኦꬅዳ ናጋራስ በሲያ ፕርዳ ኤክዶሶና።
28 ኤንቲ ፆሳ ኤርሸ፥ ሀር አቶሽን እያባ ቆፓናዉ ኮዮና እፅዳ ግሾ፥ በሶናባ ኦꬃና መላ ፆሳይ ኤንታና ፓꬆና ቆፋስ አꬅድ እሚስ። 29 ኤንታን ጌላተꬅ፥ ኢታተꬅ፥ ዪቀይ፥ ገነይ፥ ቃናተይ፥ ሸምፖ ዎꬎይ፥ ፓላም፥ ጭሞይነ ኢታ አሞይ ኩምስ። ኤንቲ ዝግረይሳታ፥ 30 አሳ ሱንꬅ ኢሰይሳታ፥ ፆሳ እፀይሳታ፥ ጫየይሳታ፥ ኦቶረይሳታ፥ ጬቀተይሳታ፥ ኢታባ ኦꬃናዉ ኮየይሳታነ ባንታ አየስነ አዋስ ኪተቶናይሳታ፥ 31 አኬኮናይሳታ፥ ጫቆ መንይሳታ፥ ሲቆይ ባይናይሳታ፥ ቃይ ባይናይሳታ። 32 ሀይሳታ መላ ኦይሳታስ ሀይቆይ በሴስ ግያ ፆሳ ህግያ ኤርሸ፥ ሀይሳታ ኦꬆሶና። ኤንቲ ባንታዉ ኦሶ ፃላላ ግዶናሽን፥ ኦꬅያ ሀራታካ ናሾሶና።