1 ሄሳ ግሾ፥ ነኖ ሀራታ ቦላ ፕርደይሶ፥ ኔኒ ጋሶያባይ ባዋ። ኔኒ ሀራታ ቦላ ፕርዳሸ፥ ሄ ኔኒ ፕርድያ ኡራ መላ ኦꬅኮ፥ ኔኒ፥ ነ ቦላ ፕርዳሳ። ማቶ 7:1፤ ሉቃ 6:37. 2 ሄሳ መላ ኦሶ ኦይሳታ ቦላ ፆሳይ ፅሎ ፕርዳ ፕርደይሳ ኑ ኤሮስ። 3 ነኖ፥ ሄሳ መላ ኦሶ ኦይሳታ ቦላ ፕርደይሶ፥ ኤንቲ ኦይሳ መላ ኦይሶ፥ ኔኒ ፆሳ ፕርዳፈ አታናባ ዳኒ? 4 ዎይኮ ፆሳ ኬሀተꬃ፥ ገንጫነ ዳንዳአ ዳሮተꬃ ካꬋዬ? ፆሳይ ነዉ ኬህዳይ ነና ናጋራፐ ዛራናዉ ግደይሳ ኤርክዬ?

5 ሽን ህንተዉ ሹቻ ዎዛንነ ስኦና ሀይꬅ ደኤስ። ሄሳ ግሾ፥ ፆሳ ሀንቆይነ ፅሎ ፕርዳይ ቆንጭያ ጋላስ፥ ነ ቦላ ፕርዳይ ዳራና መላ ኦꬃሳ። 6 ፆሳይ እሱዋስ እሱዋስ እያ ኦሱዋ መላ እማና። ማዝ 62:12፤ ሌም 24:12. 7 ሎኦ ኦሶን ምንድ፥ ጋላታ፥ ቦንቾነ ꬋዮና ደኡዋ ኮየይሳታስ ፆሳይ መርና ደኡዋ እማና። 8 ሽን ባንታና ሲቀይሳታ፥ ቱማ እፀይሳታነ ኢታባ ኦꬃናዉ ኮየይሳታ ቦላ ፆሳ ሀንቆይነ ፕርዳይ ያና። 9 ኢታባ ኦꬅያ አሳ ኡባ፥ ኮይሮትድ አይሁደታ፥ ካልድ አይሁደ ግዶና አሳ መቶይነ ዋየይ ጋካና። 10 ሽን ፆሳይ ሎኦ ኦሶ ኦꬅያ ኡባስ፥ ኮይሮትድ አይሁደታስ፥ ካልድ አይሁደ ግዶናይሳታስ ጋላታ፥ ቦንቾነ ሳሮተꬃ እማና። 11 ፆሳይ ሶምኦ በእድ አሰ ሻከና። ዛረ 10:17.

12 ህገይ ባይና ናጋራ ኦꬅዳ ኡባይ ህገይ ባይና ꬋያና። ህገይ ደእሽን፥ ናጋራ ኦꬅዳ ኡባይ ህገን ፕርደታና። 13 ፆሳ ስንꬃን ፅለይሳት ህገ ናገይሳታፐ አትሽን፥ ህገ ስሳ ፃላላ ስኤይሳታ ግዶኮና። 14 ህገይ ባይና አይሁደ ግዶና አሳይ መꬎን ህገይ ኪተይሳ ኦꬆሶና። ኤንታዉ ፃፈትዳ ህገይ ባይና እፅኮካ ኤንቲ ባንታ ዎዛናን ህግያ ኤሮሶና። 15 ኤንታ ሀኖታይ፥ ህገ ኪታይ ኤንታ ዎዛናን ፃፈትዳይሳ በሴስ። ቃስ ኤንታ ካሀይ ኤንታ ቦላ ማርካቴስ። ኤንታ ቆፋይ እስ እስ ቶሆ ኤንታና ባላ ጌስ፤ እስ እስ ቶሆ ኤንታና ልከ ጌስ። 16 ታ ታማርስዳ ዎንገላ መላ ፆሳይ የሱስ ክርስቶሳ ባጋራ አሳ ዎዛናን ጌምዳ ቆፋ ፕርድያ ዎደ ሄስ ኤረታና።

17 ሽን ነ ነና አይሁደ ጋሳ፤ ህገን ዘምፓሳ፤ ፆሳን ጬቃሳ። 18 ነ ኦꬃና መላ ፆሳይ ኮይያባይ አይበኮ ኤራሳ። ህግያ ታማርዳ ግሾ፥ ቱማ ግድያባ ዶራናዉ ኤራሳ። 19 ኔኒ ቆቀታ ካለይሳ፥ ቃስ ꬉማን ደኤይሳታስ ፖኦ ግደይሳ ሻካ ኤራሳ። 20 ኔኒ ህግያፈ ደምዳ ኤራተꬃንነ ቱማተꬃን ኤያታ ኤርሰይሳነ ዮጋታ ታማርሰይሳ ግደይሳ ኤራሳ። 21 ያትን፥ ነ ሀራታ ታማርሰይስ ነ ነና አይስ ታማርስኪ? ኔኒ፥ “ካይሶቶፓ” ጋሸ፥ ኔኒ ነ ሁጰን ካይሶታዬ? 22 ኔኒ፥ “ላሞፋ” ጋሸ፥ ኔኒ ነ ሁጰን ላማዬ? ኔኒ ኤቃ እፃሸ፥ ኤቃይ ደእያ ኬꬃ ቦንቃዬ? 23 ኔኒ ፆሳ ህግያን ጬቀታሳ፥ ሽን ህግያስ ኪተቶና እፃዳ ፆሳ ዬላያይ? 24 ጌሻ ማፃፋን፥ “ህንተ ጋሶን ፆሳ ሱንꬃይ አይሁደ ግዶና አሳታን ጫየቴስ” ጌተትድ ፃፈትስ። እሳ 59:7-8.

25 ነ ህገስ ኪተትኮ፥ ነ ቃፃረተꬃስ ማደይ ደኤስ፥ ሽን ኔኒ ህግያስ ኪተቶና እፅኮ ነ ቃፃረተꬃይ ቃፃረትቦና መላ ግዴስ። 26 አይሁደ ግዶና አስ ቃፃረቶና ደእሸ፥ ህግያስ ኪተትኮ፥ ፆሳይ እያ ቃፃረትዳ መላ ታይበኔ? 27 ህንተ፥ አይሁደ አሳት፥ ህንተዉ ፃፈትዳ ህገይነ ቃፃሮይ ደእሽን፥ ህንተ ህገስ ኪተቶና እፅኮ፥ አይሁደ ግዶና አሳይ ቃፃረቶና እፅኮካ ህገስ ኪተትድ፥ ህንተ ቦላ ፕርዳና። *ህንተ ቦላ ፕርዳና፦ ኤንታ ሀኖታይ ዎይኮ ኤንታ ኪተተꬃይ ህንተ ቦላ ፕርዳና።

28 ህዛ፥ ሱንꬃን አይሁደ ግድዳ ኡባይ ቱማ አይሁደ ግደና። ቃስ ካረ አሳተꬃ ቃፃሮይ ቱማ ቃፃሮ ግደና። 29 ሽን ቱማ አይሁደተꬅ ጋꬃ ባጋን አይሁደ ግደይሳ። ቱማ ቃፃረተꬅ ፆሳ አያናን ኦሰትያ ዎዛና ቃፃረተꬃፈ አትሽን፥ ፃፈትዳ ህግያን ኦሰትያ አሳተꬃ ቃፃሮ ግደና። ሄ ኡራይ ጋላታ ፆሳፈ ኤኬስፐ አትሽን፥ አሳፐ ግደና። ዛረ 30:6.