1 ህንተኖ፥ አሳይ ማዶ ኦይችያ ቦንቸትዳ እስራኤለ ሀላቃቶ፥ ህንተኖ፥ ፅዮነን እንጀን ደኤይሳቶ፥ ሳማረ ካታማን ህርግ ባይና ኡትዳይሳቶ፥ ህንተና አየ! 2 አነ ካልነ ካታማ ብድ በእተ። ያፐ ግታ ሀማታ ካታማነ ፍልስፄመ ካታማ ጌተ ዎꬍተ። ኤንቲ ህንተ ናምኡ ካዎተꬃታፐ አꬎና? ኤንታ ቢታይ ህንተ ቢታፈ ዳልጊ? 3 ህንተ፥ “ኢታ ጋላስ ኤለ ዬና” ግድ፥ ኢታ ኦሶ ኦይሳቶ፥ 4 ዛለፐ ኦሰትዳ አርሳን ዝንኤይሳቶ፥ እንጀን ኡትዳይሳቶ፥ ዶርሳ ዉድያፐ አንቃራታነ ሚዛ ዎድያፐ ጋታርመንꬁዋ መይሳቶ፥ 5 ዳዊቲዳ የꬃ ሚሸ ህንተዉ ጊግስድ፥ ዱማ ዱማ የꬅ የፀይሳቶ፥ 6 ዎይነይ ኡሻ ከረራ ጋነይሳቶ፥ አልኦ ሽቶን ትየተይሳቶ፥ ዮሰፋ ኮቻታ ꬋዩዋን አዛኖናይሳቶ፥ ህንተና አየ! 7 ሄሳ ግሾ፥ ኮይሮ ድኤታናይ ህንተና፤ ሄ ዎደ ህንተ እንጀ ዱሳይ አታና።

8 ጎዳይ፥ ኡባፈ ዎልቃማ ፆሳይ ሀይሳዳ ያግድ፥ ባናን ጫቅስ፦ “ታኒ ያይቆባ ኦቶሩዋ እፃስ፤ ኤንታ ሚፃካ ሻተታስ፤ ታኒ ካታማነ ካታማን ደእያ ኡባ ኤንታ ሞርከታስ አꬃዳ እማና” ያጌስ።

9 እስ ኬꬃን ታሙ አስ አትኮ፥ ኤንትካ ሀይቃና። 10 ሀይቅዳይሳታ ዳቦታፐ እሶይ አሀ ሞጋናዉ ሶፐ ከስ ኤፍሸ፥ ሄ ኬꬃን ቆሰትዳ ኡራኮ፥ “ኔራ አትዳ ሀራ አስ ደኢ?” ያግድ ኦይቻና። እ ዛሪድ፥ “ባዋ” ያጋና። ኦይቸይስ ዛሪድ፥ “ሀይዛ፥ ሀይዛ! ጎዳ ሱንꬃ ኑኒ ፄጋናዉ ኮሸና” ያጋና።

11 ጎዳ ኪታን፥ ግታ ኬꬃት ላለታና፤ ላፋ ኬꬃት መቀረታና። 12 ፓራት ዛላ ቦላ ጋላባናዉ ዳንዳኦና? ዎይኮ ጎሻንቾይ ቦር ዋፅድ፥ አባ ጎያናዉ ዳንዳኢ? ሽን ህንተ ሱረ ፕርዳ ጪየ፥ ፅሎተꬃ ጫሞ ኦꬅደታ። 13 ህንተ ሎዶባራ ካታማ ፆንዳ ግሾ ኡፋይተታ፤ ህንተ፥ “ኑኒ ቃርናይማ ካታማ ኑ ምኖተꬃን ኦይክዳ” ግድ ጬቀተታ።

14 “ህንተኖ፥ እስራኤለ አሳዉ፥ ታኒ ህንተ ቦላ ሀራ ካዎተꬅ ደንꬃና፤ ኤንቲ ህንተና ሀማታ ፕኑዋፐ ዶምድ፥ አራባ ዛንጋራ ጋካናዉ ኡንኤꬃና” ያጌስ ጎዳይ፥ ኡባፈ ዎልቃማ ፆሳይ።