ጳዉሎስ ቆላስያሳ አሳስ
ፃፍዳ ኪታ
ጋꬃ ቆፋ
ጳዉሎስ ቆላስያሳ አሳስ ፃፍዳ ኪታይ ፃፈትዳይ፥ ጉꬃ ኢሰን፥ ኤፈሶናፐ ዶሎሀ ባጋራ ደእያ ቆላስያሳ ካታማን ደእያ ዎሳ ኬꬃሳ። ሄ ዎሳ ኬꬃ ኤስዳይ ጳዉሎሳ ግዶና እፅኮካ፥ ሮመ ቢታን ኢሰ ዋና ካታማ ግድዳ ኤፈሶናፐ ዎንገላ ኦድያ አሳ ኪተይ እያ ግድያ ግሾ፥ ቆላስያሳስካ እያዉ አዋተꬅ ደኤስ። ቆላስያሳ ዎሳ ኬꬃን፥ “ፆሰ ኤራናዉነ ኩመꬃ አቶተꬅ ደማናዉ አስ ኡባይ አያና ዎልቃታነ ማታታ ጎይናናዉ ኮሼስ” ግያ ዎርዶ አስታማረት ደኤይሳ ጳዉሎስ ስእስ። ሄ አስታማረት ታማርስያ ሀራባይ ቃስ፥ “አስ ኡባይ ቃፃሮ ዳንያ ዎጋታስ ሃረታናዉነ ካꬃ ዎጋ ኡባ ናጋናዉ ኮሼስ” ያጎሶና።
ጳዉሎስ ሀ ኪታ ፃፍዳይ፥ ቱማ አማኖ ትምርትያ ታማርስድ፥ ኤንታ ዎርዶ ትምርትያ ላላናሳ። እ ዛርዳ ዛሮታፐ እሶይ፥ “የሱስ ክርስቶሲ ኩመꬃ አቶተꬅ እሜስ፤ ሀራ ሀይማኖተትነ ኦሶት እያፐ ሃሶሶና” ያጌስ። ፆሳይ ክርስቶሳ ባጋራ አላምያ መꬍስ፤ ቃስ እያ ባጋራ ዛሪድ ባኮ ኤሀና። ሀ አላምያስ አቶተꬃ ኡፋይስ ደኤይ ክርስቶሳ አማኖና። ሄሳ ግሾ፥ ጳዉሎስ ሀ ግታ ትምርተይ አማንያ አሳ ደኦን ዋንድ ኦሶን ፔአናዉ በሲያኮ ኦዴስ። ሀ ኪታይነ ኤፈሶና አሳስ ፃፍዳ ኪታይ፥ ባንታ ኦይክዳ ቆፋንነ ኪታን ዎል ዳኖሶና። ሀ ናምኡ ማፃፋታ ግዶን ደእያ ዱማተꬃይ፥ ኤፈሶናን ክርስቶስ ዎሳ ኬꬃስ ሁጰ፥ ቆላስያሳን ክርስቶስ መተꬃስ ሁጰ።
ሀ ኪታ ጳዉሎሳፐ ኤክድ ቆላስያሳ ጋꬃናዉ ብዳ ትክቆሳራ እስፈ ደኤይ አናስሞሳ ግደይሳ ኤርሶይ ማድያባ። አይስ ጊኮ፥ ጳዉሎስ አናስሞሳ ጌተትያ ባ ኦሳንቹዋባ ፍልሞናስ ሀራ ኪታ ፃፍስ።
ማፃፋ አይፈ ቆፋታ
ገሎ ቆፋ (1:1-8)
ጋላታ ዎሳ (1:3-8)
ክርስቶስ ኦነ (1:9—2:19)
ክርስቶሳን ደእያ ኦራꬃ ደኦ (2:20—4:6)
ኩሻ ቆፋነ ሳሮꬆ (4:7-18)
1
1 ፆሳ ሸነን ክርስቶስ የሱሳ ሀዋረ ግድዳ ጳዉሎስነ ኑ እሻ ፅሞትዮስ፥ 2 ቆላስያሳ ካታማን ደእያ ክርስቶሳን ጌሻታስነ አማነትዳ አሳስ ፃፍዳ ኪታ።
ፆሳ ኑ አዋፐ አꬎ ኬሀተꬃይነ ሳሮተꬃይ ህንተዉ ግዶ።
ጋላታ ዎሳ
3 ኑኒ ህንተዉ ዎስያ ዎደ ፆሳ ኑ ጎዳ፥ የሱስ ክርስቶሳ አዋ ኡባ ዎደ ጋላቶስ። 4 ኑኒ ክርስቶስ የሱሳን ደእያ ህንተ አማኑዋነ ጌሻታ ኡባስ ደእያ ህንተ ሲቁዋ ስእዳ። 5 ሄሳ ህንተ ኦꬅዳይ ህንተ ኡፋይሳይ ሳሎን ህንተዉ ናገትዳ ግሾሳ። ህንተ ቱማ ኪታ ግድዳ ዎንገላ ኮይሮ አማንዳ ዎደ ሄ ኡፋይሳ ስእደታ። 6 ህንተ ሄ ዎንገላ ስእዳ ዎደነ ፆሳ አꬎ ኬሀተꬃ ቱማ ሻክ ኤርዳ ዎደፐ ዶምድ ህንተ ግዶን ሀንዳይሳዳ ቢታ ኡባን ድጭሸነ አይፍሸ ደኤስ።
7 ህንተ ሄሳ ኑራ እስፈ ክርስቶሳስ ኦꬅያ አማነትዳ፥ ዶሰትዳ ኤጳፍራፐ ታማርደታ። ቆላ 4:12፤ ፍልሞ 23. 8 እ ሄሳ ቦላ ጉጅድ አያናይ ህንተዉ እምዳ ሲቁዋባ ኑስ ኦድስ።
9 ሄሳ ግሾ፥ ኑኒ ህንተባ ስእዳ ጋላሳፐ ዶምድ፥ ፆሳይ ባ ሸንያ ህንተና በሳና መላነ፥ ጌሻ አያናይ እምያ ኤራተꬃንነ ጭንጫተꬃ ኡባን ህንተና ኩንꬃና መላ ኡባ ዎደ ህንተዉ ፆሳ ዎሶስ። 10 ሄሳዳካ፥ ህንተ፥ ጎዳይ ኮየይሳዳ ዳና መላ፥ ኡባ ዎደ እያ ኡፋይሳና መላ፥ ሎኦ ኦሶ ኡባን ህንተ አይፈ አይፋና መላነ ፆሳ አꬅድ ኤርሸ ድጫና መላ ፆሳ ዎሶስ።
11 ፆሳ ቦንቾ ዎልቃይ ህንተ ኡባባ ገንጫናዳነ ዳንዳአናዳ ባ ምኖተꬃ እምድ ህንተና ኡፋይሶ። 12 ቃስ ጌሻታ ፖኦ ካዎተꬃ ላታና መላ ህንተና ኦꬅዳ አዋ ጋላትተ። 13 እ ኑና ꬉማ ዎልቃፈ አሽድ ባ ዶስያ ናኣ ካዎተꬃኮ ኤህስ። 14 እያን ዎዘትድ እያ ሱꬃን ናጋራ አቶተꬅ ደምዳ። ኤፈ 1:7.
15 ክርስቶስ በንቶና ፆሳስ ቱማ ሌምሶ። እ መተꬃ ኡባፈ ባይራ። 16 ኡባባይ እያ ባጋራ መትስ። በንትያባትነ በንቶናባት፥ ዎልቃትነ ጎዳት፥ ሃረይሳትነ ማታ አዋት፥ ሳሎንነ ሳአን ደእያ ኡባይ እያዉነ እያ ባጋራ መትስ። 17 እ ኡባባፐ ካሰ ደኤስ። ኡባባይ እያን ባ በሳን በሳን ኦይከትድ ደኤስ። 18 እ ባ አሳተꬅ ግድዳ ዎሳ ኬꬃስ ሁጰ። እ ኡባፈ ቦላ ግዳናዉ ሀይቆፐ ደንዶን ስንነ ባይራ። ኤፈ 1:22-23.
19 ፆሳይ ባ ኩመꬃ ፆሳተꬃራ እያን ዳናዉ ኮይስ። 20 ቃስ ማስቃልያ ቦላ ጉስዳ ባ ናኣ ሱꬃን ሳሮተꬅ መꬍድ ሳሎንነ ሳአን ደእያ ኡባ እያ ባጋራ ባራ ስገꬅስ።ኤፈ 2:16.
21 ሀይሳፈ ካሰ ህንተ ቆፋ ኢታተꬃይ ህንተና ፆሳፈ ሻክስነ እያራ ሞርከ ኦꬅስ፤ ህንተ ኦሶይካ ኢታ። 22 ሽን ሀእ ክርስቶስ አሾን ሀይቅዳ ሀይቁዋ ባጋራ ፆሳይ ህንተና ባራ ስገꬅድ፥ ጌሻታ፥ ቦረይ ባይናይሳታነ ፅሎታ ኦꬅስ። 23 ህንተ፥ ህንተ አማኑዋን ቃፆና ምንድነ ፃጵድ ዳናዉ በሴስ። ህንተ ዎንገላ ቃላ ስእዳ ዎደ ኤክዳ ኡፋይሳ ምንꬅ ኦይክተ። ሄ ዎንገላይ ህንተ ስእዳይሳነ ቢታ ኡባን ሳባከትዳይሳ። ታ፥ ጳዉሎስካ ሀ ዎንገላስ ኦሳንቾ ግዳስ።
ጳዉሎሳ ሀዋረተꬃ ኦሶ
24 ታኒ ህንተ ግሾ ሀእ ኤክያ ዋያን ኡፋይታይስ። ክርስቶስ እያ አሳተꬅ ግድዳ ዎሳ ኬꬃስ ኤክዳ ዋይያ ታኒ ታ አሹዋን ፖላይስ። 25 ፆሳ ቃላ ህንተዉ ፖላዳ ኦዳና መላ ታዉ እመትዳ ማታን ዎሳ ኬꬃስ ኦሳንቾ ግዳስ። 26 ሀ ቃላይ ካሰ አꬍዳ ዎድያን የለተꬃ ኡባፈ ጌምድ ደእስ። ሽን ሀእ ፆሳይ ሀ ፁራ አማንያ ኡባስ ቆንጭስስ። 27 ፆሳይ አይሁደ ግዶና አሳ ግዶን ሀ ፁራ ቦንቾ ዱረተꬃ ቆንጭስስ። እካ ቦንቾ ኡፋይስ ግድዳ ህንተ ግዶን ደእያ ክርስቶሳ።
28 ሄሳ ግሾ፥ እስ እስ አስ ክርስቶሳን ኩመꬃ አስ ኦꬅድ ሺሻናዉ ጭንጫተꬃ ኡባን አሳ ታማርሶንነ ዞረን ክርስቶሳባ ሳባኮስ። 29 ፆሳይ ባ ግታ ዎልቃን ታናን ኦꬅያ ግሾ፥ ሀእ ጋካናዉ እያ ዎልቃን ባፀታይስነ ዳቡራይስ።