1 ታ እሻቶ፥ ታ ዶሰይሳቶ፥ ታ ላሞተይሳቶ፥ ታና ኡፋይሰይሳቶ፥ ታና ግታየይሳቶ፥ ህዛ፥ ጎዳን ምንድ ኤቅተ።

2 ኤዎዳነ ስንፅካ፥ ህንተ ናምአይ፥ እስ ቆፋን፥ ምችዳ ጎዳን ዳናዳ ታኒ ህንተና ዞራይስ። 3 ታራ ኦꬅያ አማንይሶ፥ ኔኒ ሀ ማጫሳታ ማዳና መላ ታ ነና ዎሳይስ። ሀ ማጫሳት ታራ፥ ቀለምንፆሳራነ ኤንታ ሱንꬃይ ፆሳ ደኦ ማፃፋን ፃፈትዳ ሀራታራ እስፈ ዎንገላ ኡባ በሳ ጋꬃናዉ ዳቡርዶሶና።

4 ጎዳራ ህንተ ደእያ ደኡዋን ኡባ ዎደ ኡፋይትተ። ታኒ ሄሳ ጉጃዳካ ኦዳይስ፤ ኡፋይትተ።

5 አስ ኡባይ ህንተ አሽከተꬃ ኤሮ፤ ጎዳይ ማታን ያና። 6 ህንተ ፆሳ ዎስያ ዎደ ኡባን እያ ጋላትሸ፥ ህንተና ኮሽያባ ኡባስ ዎስተፐ አትሽን፥ አይብባስካ ህርጎፍተ። 7 አሳ ኤራተꬃ ኡባፈ አꬍያ ፆሳ ሳሮተꬃይ፥ ህንተ ዎዛናነ ህንተ ቆፋ ጎዳ የሱስ ክርስቶሳ ባጋራ ናጋና።

8 ዉርሰꬃን፥ ታ እሻቶ፥ ህንተ ዎዛናን ሎኦባነ ጋላትስያባ ቆፕተ። ቱማ ግድያባ ኡባ፥ ቦንቾባ ኡባ፥ ቆሆ ግዶናባ ኡባ፥ ጌሻባ ኡባ፥ ሲቆባ ኡባነ ኡፋይስያባ ኡባ ቆፕተ። 9 ህንተ ታፐ ታማርዳባ፥ ኤክዳባ፥ ስእዳባነ በእዳባ ኡባ ኦꬅተ። ሳሮተꬅ እምያ ፆሳይ ህንተራ እስፈ ግዳና።

10 ዳሮ ዎደፐ ጉየ፥ ህንተ ታባ ዛሪድ ቆፓናዉ ዶምዳ ግሾ ታኒ ጎዳን ዳሮ ኡፋይታይስ። ሄሳ ጉሳይ፥ ታዉ ቆፓናዉ ህንተዉ እንጀቶና እፅዳይሳፈ አትሽን፥ ታዉ ቆፋ አግበከታ። 11 ታኒ ሄሳ ታና መትዳ ግሾ ጊከ፤ ታዉ ደእያባይ ግዳና ጉሱ ታማራስ። 12 ታኒ መቶተትድ ደእያ ዱስ ኤራይስ፤ ቃስ ዱረትድ ደእያ ዱስካ ኤራይስ። አዉን ግድን ቃስ አይ ዎደካ ታኒ ካሎነ ኮሻ፥ ፓጨነ ፓላሀ ታማራስ። 13 ክርስቶስ ታዉ እምያ ዎልቃን ኡባባ ኦꬃናዉ ዳንዳአይስ።

14 ግድኮካ፥ ህንተ ታ መቱዋ ታራ ኤክዳይሳን ሎኦ ኦꬅደታ። 15 ፍልጵስዩሳ አሳቶ፥ ዎንገላ ኮይሮ ኦዳናዉ ታኒ ማቀዶነፐ ከይያ ዎደ እምያባንካ ኤክያባንካ ህንተ ዎሳ ኬꬃፈ አትሽን፥ ሀር ታና ማድቦናይሳ ህንተ ኤሬታ። 2 ቆሮ 11:9. 16 ተሰሎንቀን መቶይ ጋክዳ ዎደካ ታና ዛር ዛሪድ ማድደታ። ሀዋ 17:1. 17 ታኒ፥ ህንተፈ እሞታ ኤካናዉ ኮያዳ ግዶናሽን፥ እሞፐ ያ አንጁዋ ህንተ ኤካና መላሳ።

18 ታኒ፥ ህንተ እምዳ ኡባነ ግድድ ፓላሄይሳ ኤካስ። ህንተ የድዳ ኡባ ኤጳፍራድቱሳፐ ኤካስ፤ ኮሽያባ ኡባይ ታዉ ደኤስ። ህንተ ታዉ የድዳ እሞይ ፆሳስ ሳዎ ቶንኩ ግያ፥ እ ዶስያ፥ እ ኡፋይትያ ያርሾ መላ። ከሳ 29:18. 19 ታ ፆሳይ ባ ቦንቾ ዱረተꬃፈ፥ ክርስቶስ የሱሳ ባጋራ ህንተዉ ኮሽያባ ኡባ እማና። 20 ኑ አዋ ፆሳስ መርናፐ መርና ጋካናዉ ቦንቾይ ግዶ። አምንእ።

21 ክርስቶስ የሱሳ ባጋራ ፆሳባ ግድዳ ኡባ ሳሮ ጊተ። ታራ ደእያ እሻት ህንተና ሳሮ ጎሶና። 22 ፆሳባ ግድዳ አሳ ኡባይ፥ ኡባፈ አꬅድ ካዋ ቄሳረ ኬꬃን ደኤይሳት ህንተና ሳሮ ጎሶና።

23 ጎዳ የሱስ ክርስቶሳ አꬎ ኬሀተꬃይ ህንተራ ግዶ።