1 ዉርሰꬃን፥ ታ እሻቶ፥ ህንተ ጎዳባ ግድያ ግሾ፥ ኡፋይትተ። ታኒ ካሰ ፃፍዳይሳ ዛራዳ ፃፋናይስ ታና ዋይሰና፥ ሽን ህንተና ባላፐ ናጋና።

2 ኢታባ ኦꬅያ ካናታፐ፥ ቃስ ቃፃረታናዉ ኮሼስ ግያ ኢታ አሳታፐ ናገትተ። 3 ኑኒ ፆሳ ጌሻ አያናን ጎይንያ ግሾነ ኑ ደኡዋን ክርስቶስ የሱሳን ጬቀትያ ግሾ፥ ቱማ ቃፃሮ ቃፃረትዳይሳታ። ኑኒ ካረ አሳተꬃ ቦላ ኦሰትያባን ጬቀቶኮ።

4 ታ ካረ አሳተꬃን ጬቀታናዉ ኮሽኮ ታ ዳሮባን ጬቀታናዉ ዳንዳአይስ። አይ አስካ ባ ካረ አሳተꬃን ጬቀትያባይ ባዉ ደኤስ ግድ ቆፕኮ፥ ታኒ እያፐ ዳሮ አꬋዳ ጬቀትያባይ ደኤስ። 5 ታኒ የለትዳ ሳምንታራ ቃፃረታስ። ታኒ የለታን እስራኤለ፤ ታኒ ብንያመ ኮቸ፤ ታኒ ዋላክ ባይና አይሁደ አሰ። አይሁደ ህገ ናጎን ግድኮ ታኒ ፋርሳወ። ሀዋ 23:6፤ 26:5፤ ሮመ 11:1. 6 አይሁደ አማኑዋስ ምሸተꬃን ግድኮ ታኒ ዎሳ ኬꬃ የደꬃስ። እስ አስ ህገ ናግድ ፅልያባ ግድኮ፥ ታናን ቦረይ በንትቤና። ሀዋ 8:3፤ 22:4፤ 26:9-11.

7 ሽን ካሰ ታና ማዴስ ጋዳ ቆፕዳባ ኡባ፥ ክርስቶሳ ግሾ ጋዳ ማዶናባ ኦꬃዳ ታይባስ። 8 ሄሳ ፃላላ ግዶናሽን፥ ታኒ ታ ጎዳ ክርስቶስ የሱሳ ኤረይስ ሀራባ ኡባፈ ዳሮ አꬍያ ግሾ፥ ሄ ኡባ ዎይ ባይናባዳ ታይባስ። ታኒ እያ ግሾ ኡባባ ꬋያስ። ክርስቶሳ ደማናዉ ኡባባ ዎራ ሆለትዳ ቡረዳ ታይባይስ። ታኒ የሱሳራ እስኖ ግዳስ። 9 ታኒ ህገስ ኪተታዳ ደምያ ታ ሁጰ ፅሎተꬅ ታዉ ባዋ። ክርስቶሳ አማንን በንትያ ፅሎተꬃይ፥ ፆሳ ማታፐ ያ ፅሎተꬃይ ሀእ ታዉ ደኤስ። 10 ታኒ ክርስቶሳነ እያ ደንዶ ዎልቃ ኤራናዉ ኮያይስ። ታኒ እያ መቱዋ እያራ ሻከታናዉነ እያ ሀይቁዋን እያ ዳናናዉ አሞታይስ። 11 ሄሳዳካ፥ ሀይቆፐ ደንዳዳ መርናዉ ደኦን ዳናይሳ ኡፋይስ ኦꬃይስ።

12 ታኒ ሀእ ጋፃ ጋካስ ዎይኮ ታናን ባል ባዋ ጊከ። ሽን ክርስቶስ የሱሲ ታና ኦይክዳ ግሾ ታኒ ታ ስንꬃን ደእያ ዎይቱዋ ኦይካናዉ ዎፃይስነ ቡተታይስ። 13 ታ እሻቶ፥ ታኒ ሄሳ ደማስ ጋዳ ቆፕከ፥ ሽን ታኒ እስባ ኦꬃይስ። ታፐ ጉየራ ደኤይሳ ዶጋዳ ስንꬃን ደኤይሳ ኦይካናዉ ዛቱራይስ። 14 ሄሳ ግሾ፥ ታኒ ጋፃ ጋካናዉ ዎፃይስ። ፆሳይ ክርስቶስ የሱሳ ባጋራ ሳሎ ደኡዋስ ፄግዳ ዎይቱዋ ኤካናዉ ዳቡራይስ።

15 ህዛ፥ ኑኒ አያናን ጋሽትዳ ኡባይ ሄሳ ቆፓናዉ በሴስ። ህንተፈ ባጋታስ ዱማትያ ቆፍ ደእኮ፥ ሄሳካ ፆሳይ ህንተዉ ቆንጭሳና። 16 ግድኮካ፥ ኑኒ ሀኖ ጋካናዉ ደእዳ ደኡዋን፥ አነ ስን ቦስ።

17 ታ እሻቶ፥ ታና ዳንተ፤ ሄሳዳካ፥ ኑ ሌምሱዋ ካልያ አሳታ አኬክድ በእተ። 2 ቆሮ 4:16፤ 11:1. 18 ታኒ ሄሳ ህንተዉ ካሰ ዳሮ ቶሆ ኦዳስ፥ ሽን ሀእካ ዛራዳ አፉꬃን ኦዳይስ። ክርስቶሳ ማስቃልያስ ባንታና ሞርከ ኦꬅዳ ዳሮ አሳት ደኦሶና። 19 ኤንታ ዉርሰꬃይ ꬋዮ፤ ኤንታ ኡሎይ ኤንታዉ ፆሰ። ዬላታናዉ በሲያባን ኤንቲ ጬቀቶሶና፤ ቃስ ሀ ሳአባ ፃላላ ቆፖሶና። 20 ኑ ቢታይ ሳሉዋና። ሳሎፐ ይድ ኑና አሽያ ጎዳ የሱስ ክርስቶሳ ናጎስ። 21 ክርስቶስ ኡባባ ባ ማታፐ ጋርሳን ኦꬃናዉ ዳንዳእያ ባ ዎልቃን ኑ ዳቡራንቾ አሳተꬃ ላምድ ባ ቦንቾ አሳተꬃ ዳንሳና።