1 ናቡካዳናፆር ካዎትዳ ናምአንꬆ ላይꬃን አሙሆ አሙህስ። ሄ አሙሆይ እያ ዳጋንꬅን፥ ꬍስኮይ እያ ኤኮና እፅስ። 2 ሄሳ ግሾ፥ እ አሙህዳ አሙሁዋ እያዉ ኦዳና መላ ማሮት፥ ብታንቾት፥ ሙሩነይሳትነ ፆልንቶ ታይበይሳት ያና መላ ካዎይ ኪትስ። ኤንቲ ይድ እያ ስንꬃን ኤቅዶሶና። 3 ካዎይ ኤንታኮ፥ “ታና ዳጋንꬅያ አሙሆ አሙሀስ፤ ሄ አሙሆይ አይበኮ ኤራናዉ ኮያይስ” ያግስ።

4 ፆልንቶ ታይበይሳት ሶረ ዶናን፥ “ካዋዉ፥ መርናዉ ካዎታ! ነ አሙሁዋ ኑስ ነ አይለታስ ኦዳ፤ ኑ ነዉ እያ ብርሸꬃ ኦዳና” ያግዶሶና።

5 ካዎይ ኤንታኮ፥ “ህንተ ሀ አሙሁዋነ እያ ብርሸꬃ ታና ኤርሶና እፅኮ፥ ታ ህንተና ቃንፃና፤ ህንተ ኬꬃይ ቡረ የግያ በሲ ግዳናይሳ ታ ህንተዉ ምንꬃዳ ኦዳይስ። 6 ሽን ህንተ አሙሁዋነ እያ ብርሸꬃ ታዉ ኦድኮ፥ እሞታ፥ ዎይቶነ ዳሮ ቦንቾ ታፐ ደማና። ሄሳ ግሾ፥ አነ አሙሁዋነ እያ ብርሸꬃ ታና ኤርስተ” ያግስ።

7 ኤንቲ ዛሪድ፥ “ካዎይ አሙሁዋ ኑስ ባ አይለታስ ኦዶ፤ ኑ እያ ብርሸꬃ ኤርሳና” ያግዶሶና።

8 ካዎይ ዛሪድ፥ “ታ ምኖ ቆፋ ህንተ ኤርያ ግሾ ዎደ አዱሳናዉ ህንተ ኮየይሳ ታ ኤራይስ። 9 ህንተ አሙሁዋ ታዉ ኦዶና እፅኮ፥ እስ ፕርድ ህንተና ናጌስ። ሀኖታይ ላመታና ግድ ህንተ ኡፋይስ ኦꬅያ ግሾ ታዉ ዎርዶነ ገነ ቃላ ኦዳናዉ ማቀትደታ። ሄሳ ግሾ፥ አሙሁዋ ታዉ ኦድተ። ያትኮ፥ ህንተ እያ ብርሸꬃ ኤርሳናዉ ዳንዳኤይሳ ታ ኤራና” ያግስ።

10 ፆልንቶ ታይበይሳት ዛሪድ፥ “ካዎይ ኦይችያ ኦይሻ ዛራናዉ ዳንዳእያ እስ አስካ ቢታን ባዋ። አይ ግታነ ዎልቃማ ካዎይ ማሮታ፥ ብታንቾታነ ፆልንቶ ታይበይሳታ ሄሳ መላባ ኦይችድ ኤረና። 11 ካዎይ ኦይችዳ ኦይሾይ ዴፆ፤ አሳ ግዶን ዶና ፆሳታፐ አትሽን፥ ሄሳ ካዋስ ቆንጭሳናዉ ዳንዳኤይ ባዋ” ያግዶሶና።

12 ካዎይ ዳሮ ይሎትድ፥ ባብሎነን ደእያ ጭንጫታ ኡባ ዎꬋናዳ ኪትስ። 13 ጭንጫታ ዎꬋናዉ አዋጆይ ከይስ፤ ዳነላነ እያ ላገታ ዎꬋናዉ አስ ኪተትስ።

14 ካዋ ናገይሳታ ሀላቃይ አርዮክ፥ ባብሎነን ደእያ ጭንጫታ ዎꬋናዉ ከይያ ዎደ ዳነል እያ ጭንጫተꬃንነ ሂላን ኦድስስ። 15 እ ካዋ ናገይሳታ ሀላቃ አርዮካ፥ “ካዎይ ሀይሳ መላ ኢታ አዋጆ አይስ ከስዴ?” ግድ ኦይችስ። አርዮክ ሀኖታ ዳነላስ ኦድስ። 16 ዳነል ካዋኮ ገልድ፥ አሙሁዋ ብርሸꬃ ኤርሳናዉ ባዉ ዎደይ እመታና መላ ዎስስ።

17 ሄሳፈ ጉየ ዳነል ባ ሶ ስሚድ፥ ባ ሄꬑ ላገታስ፥ አናንያስ፥ ምሳኤላስነ አዛርያስ ሀኖታ ኦድስ። 18 ኤንቲ ባብሎነን ደእያ ሀንኮ ጭንጫታራ እስፈ ሀይቆናዳ፥ ሳሎ ፆሳይ ማሮታ ኦꬅድ፥ ሀ ፁራ ኤንታዉ ቆንጭሳናዳ ዎሳና መላ ኤንታዉ ኦድስ።

19 ሄ ቃማ ፁራይ ዳነላስ ቆንጭስ። ዳነል ሳሎ ፆሳ ሀይሳዳ ያግድ ጋላትስ፤

24 ሄሳፈ ጉየ፥ ዳነል ባብሎነን ደእያ ጭንጫታ ዎꬍሳናዉ ካዉዋፐ ኪታ ኤክዳ፥ አርዮካኮ ብድ፥ “ጭንጫታ ዎꬎፓ፤ ታና ካዋኮ ገልሳ፤ ታኒ እያ አሙሁዋ ብርሸꬃ እያ ኤርሳና” ያግስ።

25 አርዮክ ኤለስድ ዳነላ ካዋኮ ገልስድ፥ ካዋኮ፥ “ይሁዳፐ ድኤትድ ይዳ አሳፐ ካዋ አሙሁዋ ብርሸꬃ ኤርሳናዉ ዳንዳእያ አሰ ደማስ” ያግስ።

26 ካዎይ ብልፃሶራ ጌተትያ ዳነላ፥ “ታ አሙህዳ አሙሁዋነ እያ ብርሸꬃ ታና ኤርሳናዉ ዳንዳአይ?” ግድ ኦይችስ።

27 ዳነል ሀይሳዳ ያግድ ዛርስ፦ “ካዋዉ፥ ነ ኦይችዳ ፁራ ቆንጭሳናዉ ዳንዳእያ ጭንጫ አስ፥ ማሮይ፥ ብታንቾይነ፥ ሙሩንያ አስ ባዋ። 28 ሽን ፁራ ቆንጭስያ እስ ፆሲ ሳሎን ደኤስ። ዉርሰꬃ ዎደታን ሀናናባ እ፥ ነና በስስ። ነ አርሳን ዝንአዳ፥ ነ በእዳ አሙሆይነ ቆንጨꬃይ ሀይሳ።

29 “ካዋዉ፥ ነ አርሳን ዝንአዳ፥ ስንꬃፈ ያናባ ቆፓዳሳ። ሄ ዎደ ፁራ ቆንጭስያ ፆሳይ ስንꬃፈ ሀናናባ ነና በስስ። 30 ሀ ፁራይ ታዉ ቆንጭዳይ፥ ታ ሀራ አሳፐ ጭንጫ ግድዳ ግሾ ግደና። ሽን ኔኒ ካዎይ፥ አሙሁዋ ብርሸꬃ ኤራናዳነ ነ ሁጰን ስመረትያ ቆፋ አኬካና መላሳ።

31 “ካዋዉ፥ ነ ዳሮ ግታ፥ ጶልያነ ፄላናዉ ያሽያ ምስለይ ነ ስንꬃን ኤቅዳይሳ በአዳሳ። 32 ሄ ምስልያ ሁጰይ፥ ዋላህ ባይና ዎርቃፈ፥ እያ ትራይነ ኩሸት ብራፐ፥ ኡሎይነ ዎድረት ናሰ ብራታፐ፥ 33 ሱይለይ ብራታፐነ ቶሆ ያቻ ባጋይ ብራታፐ ባጋይ ቢታፈ መትስ። 34 ኔኒ ምስልያ ፄልያ ዎደ፥ እስ ሹች አሳ ኩሸይ ቦቾና ꬎቆለትድ፥ ብራታፐነ ቢታፈ መትዳ ምስልያ ቶሆ ያቻ ቦላ ዎꬍድ ጋጭስ። 35 ሄ ዎደ ብራት፥ ኡርቅ፥ ናሰ ብራታይ፥ ብርነ ዎርቀይ ኡባይ ጋጨትድ፥ ቦነን ዉዱማን ደእያ ሱላ መላ ግድን፥ አይኮይካ አቶናሽን ጫርኮይ ፕትድ ኤፍስ። ሽን ምስልያ ቦላ ዎꬍዳ ሹቻይ ዙማ ግድድ ሳኣ ኩምስ።

36 “አሙሆይ ሀይሳ፤ ሀእ ብርሸꬃ ኑኒ ነዉ ኦዳና። 37 ካዋዉ፥ ኔኒ ካዎታ ካዎ። ሳሎ ፆሳይ ነዉ ካዎተꬅነ ዎልቃ፥ ምኖተꬅነ ቦንቾ እሚስ። 38 ኔኒ ቢታ ኡባ ሃራናዳ ኦꬅስ፤ አሰ፥ ዶአነ ሳሎ ካፎ ነ ኩሸን ዎꬅስ። ሄሳ ግሾ፥ ዎርቃ ሁጰይ ነና።

39 “ኔፐ ጉየ፥ ምኖተꬃን ነና ጋኮና ሀራ ካዎተꬅ ደንዳና። ካልድ፥ ቢታ ኡባ ሃርያ፥ ናሰ ብራታ ግድያ፥ ሄꬓንꬆ ካዎተꬅ ደንዳና። 40 ዉርሰꬃን ኡባ ጋጭድ ሊቅስያ ብራታዳ ምንዳ ኦይዳንꬆ ካዎተꬅ ደንዳና። ብራት ኡባ ጋጭድ ሊቅሰይሳዳ እ፥ ባፐ ካሰ ደንድዳ ካዎተꬃታ ጋጭድ ሊቅሳና።

41 “ቶሆትነ ቶሆ ብራት ባጋይ ብራታፐ፥ ባጋይ ቢታፈ መትዳይሳ ነ በእዳይሳዳ፥ ሄ ካዎተꬃይ ሻከትዳ ካዎተꬅ ግዳና። ብራት ቢታራ ዋላከትን፥ ኔኒ በእዳይሳዳ ባጋይ ብራታዳ ምኖ ግዳና። 42 ቶሆ ብራት ባጋይ ብራታ፥ ባጋይ ቢታ ግድዳይሳዳ፥ ሀ ካዎተꬃስ ባጋይ ምኖ፥ ባጋይ ሹጎ ግዳና። 43 ብራት ቢታራ ዋላከትን ኔኒ በእዳይሳዳ ሄ ናምኡ ባጋ አሳይ ገሎንነ ኤኮን ዋላከታና። ሽን ብራት ቢታራ ዋላከታናዉ ዳንዳኦናይሳዳ ኤንቲ እስኖ ግድድ ጋምአናዉ ዳንዳኦኮና።

44 “ሄ ካዎታ ላይꬃን፥ ሳሎ ፆሳይ ኩንዶና፥ ሀራ አሳስ አꬍድ እመቶና ካዎተꬃ ኤሳና። ሄ ኤቅዳ ካዎተꬃይ፥ ሄ ካዎተꬃታ ኡባ ጋጭድ ꬋይሳና፤ ሽን እ መርናዉ ኤቅድ ዳና። 45 አሳ ኩሸይ ቦቾና ዙማፐ ꬎቆለትድ፥ ዎꬍድ፥ ብራታፐ፥ ናሰ ብራታፐ፥ ቢታፈ፥ ብራፐነ ቢታፈ መትዳ ምስልያ ጋጭዳ ሹቻ ብርሸꬃይ ሄ ካዎተꬃ።

“ግታ ፆሳይ ስንꬃፈ ሀናናባ ካዋ በስስ። አሙሆይ ቱማ፤ ብርሸꬃይካ አማነትዳይሳ” ያግድ ዛርስ።

46 ሄሳፈ ጉየ፥ ካዎይ ናቡካዳናፆር ዳነላ ቦንችድ፥ ጉፋንስ፤ አሳይ እያ ስንꬃን ያርሾ ያርሻና መላነ እፃነ ጩይሳና መላ ኪትስ። 47 ካዎይ ዳነላ፥ “ቱማ ነ ፆሳይ ፆሳታ ፆሰ፥ ካዎታ ጎዳነ ፁራ ቆንጭስያ ፆሰ። ኔኒ ሀ ፁራ ቆንጭሳናዉ ዳንዳእዳይ ሄሳ ግሾሳ” ያግስ።

48 ሄሳፈ ጉየ፥ ካዎይ ዳነላ አꬅድ ቦንችስ፤ ዳሮነ አልኦ እሞታታ እያዉ እሚስ። ባብሎነ ቢታ ሃርያ አሰ ኦꬅስ፤ ባብሎነን ደእያ ጭንጫታ ኡባ ቦላ ሀላቃ ኦꬅድ ሹምስ። 49 ዳነል ኦይሻን፥ ካዎይ ስድራቃ፥ ምሳቃነ አብዳናጎ ባብሎነ ቢታ አይሰይሳታ ኦꬅድ ሹምስ፤ ሽን ዳነል ካዎ ኬꬃን ጋምእስ።