1 ካዎይ ናቡካዳናፆር አዱሳተꬃይ ኡሱፑን ታሙ ዋꬋ፥ ጎምፓይ ኡሱፑን ዋꬋ ግድያ ምስለ ዎርቃፈ መꬍድ፥ ባብሎነ ቢታን ዱራ ደምባን ኤስስ። 2 ሄ ምስልያ አንጅሳናዉ ያና መላ፥ ካዎ ሞርናታ፥ ሹማታ፥ ቢታ አይሰይሳታ፥ ካዋ ዞረይሳታ፥ ሚሸ ኬꬃን ኦይሳታ፥ ፕርዳ ዳይናታ፥ ህገ ኤራንቾታነ አዉራጃ ሹማታ ፄግስ። 3 ሄ ዎደ ካዎ ሞርናት፥ ሹማት፥ ቢታ አይሰይሳት፥ ካዋ ዞረይሳት፥ ሚሸ ኬꬃን ኦይሳት፥ ፕርዳ ዳይናት፥ ህገ ኤራንቾትነ አዉራጃ ሹማት ሺቅድ፥ ካዎይ ናቡካዳናፆር ኤስዳ ምስልያ ስንꬃን ኤቅዶሶና። 4 ሄ ዎደ አዋጅያ አደይ ባ ቃላ ꬎቁ ኦꬅድ፥ ሀይሳዳ ያግስ፦ “ህንተኖ፥ አሳዉ፥ ካዎተꬃቶ፥ ዱማ ዱማ ዶና ኦደተይሳቶ፥ 5 ኡባይ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ዎደ፥ ካዎይ ናቡካዳናፆር ኤስዳ ዎርቃ ምስልያስ ጉፋንድ ጎይንተ። 6 ምስልያ ስንꬃን ጉፋንድ ጎይኖና ኦንካ፥ ሄ ሳትያን ኤፅያ እቶነ ታማን ሆለታና” ያግስ።

7 ሄሳ ግሾ፥ አሳይ፥ ካዎተꬃትነ ዱማ ዱማ ዶና ኦደትያ ኡባይ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእዳ ዎደ ቢታን ጉፋንድ፥ ካዎይ ናቡካዳናፆር ኤስዳ ዎርቃ ምስልያስ ጎይንዶሶና።

8 ሄ ዎደ ባብሎነ አሳታፐ እሶት እሶት አይሁደታ ሞትዶሶና። 9 ኤንቲ ካዋ ናቡካዳናፆራኮ ሀይሳዳ ያግዶሶና፤ “ካዋዉ፥ መርናዉ ካዎታ። 10 ካዋዉ፥ ነ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ኦንካ ጉፋንድ፥ ዎርቃ ምስልያስ ጎይናና መላ፥ 11 ቢታን ጉፋንድ ጎይኖና አስ ደእኮ፥ እቶነ ታማን ሆለታና መላ አዋጆ ከሳዳሳ። 12 ሽን ካዋዉ፥ ኔኒ ባብሎነ ቢታን ሹምዳ አይሁደት፥ ስድራቅ፥ ምሳቅነ አብዳናጎይ ነ ኪታ እፅዶሶና። ነ ፆሳታስ ኦꬆኮና፤ ቃስ ነ ኤስዳ ዎርቃ ምስልያካ ጎይኖኮና” ያግዶሶና። 13 ናቡካዳናፆር ሄሳ ስእዳ ዎደ፥ ይሎ ኤፅድ፥ ስድራቃ፥ ምሳቃነ አብዳናጎ ኤሀና መላ ኪትስ፤ ኤንታ ካዋ ስን ኤህዶሶና። 14 ናቡካዳናፆር ኤንታ ሀይሳዳ ያግስ፦ “ስድራቃ፥ ምሳቃ፥ አብዳናጎ፥ ህንተ ታ ፆሳታስ ኦꬅቦናይስነ ታ ኤስዳ ዎርቃ ምስልያ ጎይንቦናይስ ቱሜ? 15 ሀእ ሞይዘ፥ ሱሱልኤ፥ ማስንቆ፥ ዲꬅ፥ ዛየነ ሀራ የꬃ ሚሸ ግርስ ስእያ ዎደ ታ ኤስዳ ምስልያስ ጉፋንድ ጎይንኮ ሎኦ። ሽን ህንተ ጎይኖና እፅኮ፥ ኤለስድ ኤፅያ እቶነ ታማን ሆለታና። አይ ፆስካ ህንተና ታ ኩሸፐ አሸና” ያግስ።

16 ስድራቅ፥ ምሳቅነ አብዳናጎይ ዛሪድ፥ “ካዋዉ፥ ናቡካዳናፆራ፥ ሀይሳስ ኑ ነዉ ዛሮ እማናዉ በሰና። 17 ካዋዉ፥ ኑ ኤፅያ እቶነ ታማን ሆለትያኮካ፥ ኑ እያዉ ኦꬅያ ፆሳይ ታማፐ ኑና አሻናዉ ዳንዳኤስ። ቃስ ካዋዉ፥ እ ኑና ነ ኩሸፐ አሻና። 18 ሽን ካዋዉ፥ እ ኑና አሾና እፅኮካ፥ ኑኒ ነ ፆሳታስ ኦꬆናይሳነ ነ ኤስዳ ዎርቃ ምስልያ ጎይናናይሳ ኤራ” ያግዶሶና።

19 ሄ ዎደ ናቡካዳናፆር ስድራቃ፥ ምሳቃነ አብዳናጎ ቦላ ይሎ ኤፅን፥ እያ ሶምኦይ ላመትስ። ታማይ ካሰ ኤፀይሳፈ ላፑን ኩሸ አꬍድ ኤፃና መላ ኪትስ። 20 ስድራቃ፥ ምሳቃነ አብዳናጎ ቃችድ፥ ኤፅያ እቶነ ታማን ሆላና መላ፥ ባ ኦላንቾታ ግዶፈ ምኖ አሳታ ኪትስ። 21 ኤንቲ ባንታ አፍላራ፥ ሱርያራ፥ ሁጰ ፃꬃራነ ሀራ ማኦ ኡባራ ደእሽን፥ ኤፅያ እቶነ ታማን ሆልዶሶና። 22 ካዋ ኪታይ ዳሮ ኤሶ ግድዳ ግሾነ እቶነ ታማይ ካሰፐ አꬍድ ኤፅያ ግሾ፥ ስድራቃ፥ ምሳቃነ፥ አብዳናጎ ታማን ሆልዳ፥ ምኖ አሳታ ታማ ላጮይ ዎꬍስ። 23 ሀ ሄꬑ ቃሸትዳ አሳት፥ ስድራቅ፥ ምሳቅነ አብዳናጎይ፥ ኤፅያ እቶነ ታማን ዎꬍዶሶና።

24 ሄሳፈ ጉየ፥ ካዎይ ናቡካዳናፆር ማላለትድ፥ ኤሶን ደንድ ኤቅድ፥ “ኑ ቃችድ ኤፅያ እቶነ ታማን የግዳ አሳት ሄꬓ ግዶኮናዬ?” ያግድ ባና ዞረይሳታ ኦይችስ።

ኤንቲ፥ “ካዋዉ፥ ኤ፥ ቱማ ሄꬓ” ያግድ ዛርዶሶና።

25 ካዎይ ዛሪድ፥ “ቃሾፐ ብርሸትድ፥ ታማ ግዶን ያነ ሃነ ሄመትያ፥ ታማይ አይኮካ ቦቾና ኦይዱ አሳታ በአይስ፤ ኦይዳንꬆይ ፆሳታ ናአ ዳኔስ” ያግስ።

26 ናቡካዳናፆር ኤፅያ እቶነ ታማ ማታ ሺቅድ፥ ባ ቃላ ꬎቁ ኦꬅድ፥ “ኡባፈ ꬎቃ ፆሳ ኦሳንቾቶ፥ ስድራቃ፥ ምሳቃ፥ አብዳናጎ፥ ከይድ ሃ ዪተ!” ያግድ ፄግስ። ስድራቅ፥ ምሳቅነ አብዳናጎይ ታማ ግዶፈ ከይዶሶና። 27 ካዉዋፐ ጋርሳራ ቢታ አይሰይሳት፥ ሞርናት፥ ሹማትነ ካዋ ዞረይሳት ኤንታኮ ሺቅዶሶና። ታማይ ኤንታ አሳተꬃ ቦችቦናይሳ፥ ኤንታ ሁጰ ብናናፐ እሶይካ ፁገትቦናይሳ፥ ኤንታ ማኦይካ ሜተትቦናይሳነ ታማ ፔኖይ ኤንታ ቦላ ባይናይሳ በእዶሶና።

28 ሄሳፈ ጉየ፥ ናቡካዳናፆር ሀይሳዳ ያግስ፦ “ስድራቃ፥ ምሳቃነ አብዳናጎ ፆሳይ ጋላተቶ። እ፥ ባ ኪታንቹዋ ኪትድ፥ ባናን አማነትዳ፥ ባ አይለታ አሽስ። ኤንቲ ካዋ ኪታ እፅድ፥ ባንታ ፆሳፈ አትሽን፥ ሀራ ፆሰ ጎይናናፐ ሀይቃናዉ ዶስዶሶና። 29 ሄሳ ግሾ፥ ሀራ አይ ፆስካ ሀይሳዳ ኦꬅድ አሰ አሾና ግሾ፥ ስድራቃ፥ ምሳቃነ አብዳናጎ ፆሳ ቶችድ ኦደትያ አይ አስካ፥ ዎይኮ አይ ካዎተꬅካ፥ ዎይኮ ዱማ ዱማ ዶናን ኦደትያ አይ ኮቻይካ ቃንፀታና መላ ኤንታ ኬꬃይካ ላለትድ፥ ፕቶ ዶረ ግዳና መላ ታኒ ኪታስ” ያግስ።

30 ካዎይ ስድራቃ፥ ምሳቃነ አብዳናጎ ባብሎነ ቢታን ꬎቁ ꬎቁ ኦꬅድ ሹምስ።