5
ካዋ ብልፃሶራ ግብራ
1 እስ ጋላስ ካዎይ ብልፃሶር ሙኩሉ ግድያ ባ ሹማታስ ግብራ ጊግስድ፥ ኤንታራ እስፈ ዎይነ ኡሻ ኡይስ። 2 ብልፃሶር ዎይነ ኡሻ ኡይድ ማꬆትዳ ዎደ፥ እያ አዋይ ናቡካዳናፆር የሩሳላመን ደእያ ፆሳ ኬꬃፈ ኤህዳ ዎርቃፈነ ብራፐ ኦሰትዳ ኡሻ ሚሸታ ኤሀና መላ ኪትስ። እ ሄሳ ኦꬅዳይ እ፥ እያ ሹማታስ፥ እያ ማቸትነ እያ ላገꬆት ኡሻ ሄ ሚሸታን ኡያናዉ ኮይዳ ግሾሳ። 3 ኤንቲ የሩሳላመን ደእያ ፆሳ ኬꬃፈ ኤህዳ ዎርቃፈ ኦሰትዳ ኡሻ ሚሸታ ካዋስ ኤህዶሶና። ያትን ካዎይ፥ እያ ሹማት፥ እያ ማቸትነ እያ ላገꬆት ሄ ሚሸታን ትገትዳ ዎይነ ኡሻ ኡይዶሶና። 4 ኤንቲ ሄ ዎይነ ኡሻ ኡይሸ፥ ዎርቃፈ ብራፐ፥ ናሰ ብራታፐ፥ ብራታፐ፥ ምꬃፈነ ሹቻፈ ኦሰትዳ ፆሳታ ጋላትዶሶና።
5 ሄ ዎደ ቆፖና ደእሽን፥ አሳ ኩሸ ብራት ከይድ፥ ፆምፐ ዎꬅያ ኮጫ ስንꬃን፥ ሜሸትዳ ካዎ ጋꬎ ጎዳ ቦላ ፃፍዶሶና። ሄ ኩሸይ ፃፍያ ዎደ ካዎይ በእስ። 6 ሄ ዎደ እያ ሶምኦይ ላመትድ፥ ብዶ ግድስ፤ ያሻን እያ ጋደይ ኮኮርስ፤ እያ ጉልባታይ እፅስ።
7 ካዎይ ባ ቃላ ꬎቁ ኦꬅድ፥ ሙራንቾታ፥ ማሮታነ ፆልንቶ ፓይደይሳታ ኤሀና መላ ኪትስ። እ፥ ባብሎነ ጭንጫታኮ ሀይሳዳ ያግስ፦ “ሀ ፁፍያ ናባብድ፥ እያ ብርሸꬃ ታዉ ኦድያ ኦንካ፥ ኦቻ ቴራ ዳንያ ማኡዋ ማአና፤ *ኦቻ ቴራ ዳንያ ማኡዋ ማአና፦ ሀ ማኦይ ዳሮ አልኦነ በን ዎደ ካዎት ማእያ ማኦ። እያ ቆን ዎርቃ አꬃና፤ እ፥ ታ ካዎተꬃ ሃርያ ሄꬓንꬆ አስ ግዳና” ያግስ።
8 ባብሎነ ጭንጫት ኡባይ እያ ስን ይዶስና፤ ሽን ኤንታፈ ኦንካ ሄ ፁፍያ ናባባናዉ ዎይኮ እያ ብርሸꬃ ኦዳናዉ ዳንዳእቤና። 9 ካዎይ ብልፃሶር ካሰይሳፈ አꬍድ ዳጋምን፥ እያ ሶምኦይ ካሰይሳፈ አꬍድ ብዶ ግድስ። እያ ሹማት ሀንያባ ꬋይዶሶና።
10 እያ አይያ፥ ካዋነ እያ ሹማታ ፓላማ ስአዳ፥ ኤንቲ ግብራ ምያ ኬꬃ ገላዳ፥ ሀይሳዳ ያጋሱ፦ “ካዋዉ፥ መርናዉ ካዎታ! ሀ ቆፋን ዳሮ ዳጋሞፋ፤ ነ ሶምኦይ ላመቶፎ። 11 ጌሻ ፆሳታ አያን እያ ቦላ ደእያ፥ እስ አስ ነ ካዎተꬃ ግዶን ደኤስ። እያዉ ኤራተꬅ፥ አኬክነ ጭንጫተꬅ ደኤስ። ካሰ ነ አዋይ፥ ካዎይ ናቡካዳናፆር እያ፥ ማሮታ፥ ሙራንቾታ፥ ብታንቾታነ ፆልንቶ ፓይደይሳታ ሀላቃ ኦꬅድ ሹምስ። 12 እ፥ ሎኦ አያን፥ ኤርነ አኬክ ደእያ አሰ። እ አሙሆ ብርሻናዉ፥ ቃንእሸ ኦዳናዉነ ፁራ ቆንጭሳናዉ ዳንዳኤስ። ካዎይ ብልፃሶራ ግድ ሱንꬅዳ ዳነላ ፄጋ። እ ነዉ ፁፍያ ብርሸꬃ ኦዳና” ያጋሱ።
13 ሄ ዎደ ዳነላ ካዋኮ ኤህን፥ ካዎይ እያኮ ሀይሳዳ ያግስ፦ “ዳነል ነኔ? ታ አዋይ፥ ካዎይ ይሁዳፐ ድእድ ኤህዳይሳታፐ እሶይ ነኔ? 14 ፆሳታ አያን ነናን ደኤይሳ፥ ኤር፥ አኬክነ ጭንጫተꬅ ነዉ ደኤይሳ ታ ስአስ። 15 ሀ ፁፍያ ናባባናዉነ እያ ብርሸꬃ ታዉ ኦዳናዉ ሙራንቾትነ ጭንጫት ይዶሶና፤ ሽን ኤንቲ ታዉ ብርሸꬃ ኦዳናዉ ዳንዳእቦኮና። 16 ኔኒ ብርሸꬃ ኦዳናዉነ ዴፆ ኦይሻ ኡባ ዛራናዉ ዳንዳኤይሳ ታ ስአስ። ህዛ ነ ሀ ፁፍያ ናባባናዉነ እያ ብርሸꬃ ታዉ ኦዳናዉ ዳንዳእኮ፥ ኦቻ ቴራ ዳንያ ማኡዋ ማይዛና፤ ነ ቆን ዎርቃ አꬃና፤ ኔኒ፥ ካዎተꬃ ሃርያ ሄꬓንꬆ አሰ ግዳና።”
17 ዳነል ካዋስ ዛሪድ፥ “ነ እሞይ ነዉ ግዶ፤ ነ ዎይቱዋ ሀራ አሳስ እማ። ግዶሽን፥ ታኒ ፁፍያ ካዋስ ናባባና፤ ብርሸꬃካ ኦዳና።”
18 “ካዋዉ፥ ኡባፈ ꬎቃ ፆሳይ ነ አዋ ናቡካዳናፆራስ ካዎተꬅ፥ ግታተꬅ፥ ቦንቾነ ቴማ እሚስ። 19 እያ ግታተꬃ ጋሶን ደረይ፥ ካዎተꬃትነ ዱማ ዱማ ዶናን ኦደትያ ኮቻት እያዉ ያሻን ኮኮርዶሶና። እ ዎꬋናዉ ኮየይሳ ዎꬌስ፤ አሻናዉ ኮየይሳ አሼስ፤ ሹማናዉ ኮየይሳ ሹሜስ፤ ካዉሻናዉ ኮየይሳ ካዉሼስ። 20 ሽን እ ኦቶርትዳ ዎደነ እያ ዎዛናይ ሙምዳ ዎደ፥ ባ አራታፐ ዎꬍስ፤ እያ ቦንቾይካ ቃረትስ። 21 አሳ ግዶፈ ጎደትስ፤ እያ ካሀይ ላመትን ዶአ ግድስ። ቦራዳ ማታ ምሸ ደምባ ሀረታራ እስፈ ደእስ። እያ አሳተꬃይ ሳሎ አካን ላክስ። ሄስ ሀንዳይ፥ ኡባፈ ꬎቃ ፆሳይ አሳ ናይታ ካዎተꬃ ኡባ ሃረይሳነ ባ ኮይዳይሳስ እመይሳ እ ኤራና መላሳ።
22 “ሽን ብልፃሶራ፥ ኔኒ እያ ናአይ፥ ሀ ኡባ ኤራሸ ነ ነናተꬃ ካዉሻባካ። 23 ቃስ ሳሎ ጎዳ ቦላ ኦቶርታዳ፥ ነናተꬃ ꬎቁ ꬎቁ ኦꬃዳሳ። እያ ኬꬃፈ ቦንቀትድ ይዳ ዎርቃ ሚሸታን ኔኒ፥ ነ ሹማት፥ ነ ማቸትነ ነ ላገꬆት፥ ዎይነ ኡሻ ኡይደታ። ቃስ ፄላናዉ፥ ስአናዉነ ኤራናዉ ዳንዳኦና ብራፐ፥ ዎርቃፈ፥ ናሰ ብራታፐ፥ ብራታፐ፥ ምꬃፈነ ሹቻፈ ኦሰትዳ ፆሳታ ጋላትደታ። ነ ደኡዋነ ነ ኦግያ ባ ኩሸን ኦይክዳ ፆሳ ቦንቻባካ። 24 ሄሳ ግሾ፥ ኩሸ ብራት እያፐ ኪተትን፥ ሀ ፁፈይ ፃፈትስ።
25 “ፁፈይ፥
‘ማነ፥ ማነ፥ ተቀል፥ ፓረስ’ ያጌስ።
26 “አራምከ ዶናን እያ ብርሸꬃይ ሀይሳ።
ማነ፦ (ታይበትስ) ‘ፆሳይ ነ ካዎታ ላይꬃ ታይብድ ዉራናዳ ኦꬅስ’ ጉሱ።
27 ተቀል፦ (ማዛነትስ) ‘ምዛነን ማዛነታዳ፥ ካዉያዳ በንታዳሳ’ ጉሱ።
28 ፓረስ፦ (ሻከትስ) ‘ነ ካዎተꬃይ ሻከትድ ሜዶናስነ ፋርሰስ እመትስ’ ” ጉሱ።
29 ሄ ዎደ፥ ብልፃሶራ ኪታን፥ ኦቻ ቴራ ዳንያ ማኡዋ ዳነላ ማይዝዶሶና፤ እያ ቆን ዎርቃ አꬅዶሶና፤ ቃስ ካዎተꬃ ሃርያ ሄꬓንꬆ አስ ግዳና መላ አዋጅዶሶና።
30 ሄ ዎደ ቃማ ሞርከት ገልድ፥ ባብሎነ ካዋ ብልፃሶራ ዎꬍዶሶና። 31 እያ ካዎተꬃ፥ ላይꬅ ኡሱፑን ታማነ ናምአ ግድዳ ሜዶና አደይ ዳርዮስ ኤክስ።