1 ካዎይ ዳርዮስ ባ ካዎተꬃ ኡባ ግዶን ባፐ ጋርሳራ ቢታ ሃርያ ፄታነ ላታሙ አሳታ ሹማናዉ ቆፕስ። 2 ካዋስ አይብካ ፓጮና መላ ሹማታ አዋተꬃን ፄላና መላ ሄꬑ አሳታ ሀላቃ ኦꬅድ ዶርስ፤ ዶረትዳይሳታፐ እሶይ ዳነላ። 3 ዳነል ኦሶ ኦꬃናዉ ባዉ ደእያ ዱማ ኤራን ሀራ ሀላቃታፐነ ሹማታፐ አꬍድ በንትስ። ሄሳ ግሾ፥ ካዎይ እያ ባ ኩመꬃ ካዎተꬃ ቦላ ሹማናዉ ቆፕስ።

4 ቢታ ሹማትነ ሀላቃት ዳነላ ሞታናዉ፥ እ አይስያ አይሱዋ ቦላ ባላ ደማናዉ ኮይዶሶና። ሽን እ፥ ባና ናግያነ አማነትዳ አስ ግድያ ግሾ፥ እያ ሞታናዉ እያ ቦላ አይ ባላካ ደምቦኮና። 5 ዉርሰꬃን ኤንቲ፥ “እያ ፆሳ ህግያ ባጋራ ግዶና እፅኮ፥ ሀራ ባጋራ ዳነላ ሞትያባ ደሞኮ” ያግዶሶና።

6 ሄሳፈ ጉየ፥ ቢታ ሹማትነ ሀላቃት እስፈ ካዋኮ ብድ፥ ሀይሳዳ ያግዶሶና፦ “ካዋዉ ዳርዮሳ፥ መርናዉ ካዎታ! 7 ኑኒ ነ ካዎተꬃ ኦሶ ኦꬅያ ሀላቃት፥ ሹማት፥ አይሰይሳት፥ ዞረይሳትነ ቢታ ሃረይሳት ኡባይ ዞረትዳ እስ ዞረይ ደኤስ። ሄስካ ሀስታሙ ጋላስ ጋካናዉ፥ አይ አስካ ካዋ ዎሳናፐ አትሽን፥ ሀራ አይ አስ ዎይኮ አይ ፆሰ ዎሶናዳ፥ ኔኒ አዋጆ ከሳና መላሳ። ሄ አዋጁዋ ኤኮናይ ጋሞ ኦላን የገታና መላ ኔኒ ኪታ። 8 ህዛ ካዋዉ፥ ሀ አዋጆይ ሻረቶና ሜዶናነ ፋርሰ ህገዳ ምኖነ ላመቶናይሳ ግዳና መላ ፓራማ” ያግዶሶና። 9 ሄሳ ግሾ፥ ካዎይ ዳርዮስ አዋጁዋ ፃፍድ ፓራምስ።

10 ዳነል አዋጆይ ፓራመትድ ከይዳይሳ ኤርዳ ዎደ ባ ሶ ብስ፤ ፖቀ ቦላ ደእያ ክፍልያ ገልስ። ሄ ክፍልያ ማስኮተይ የሩሳላመ ባጋ ስሚድ ዶየትድ ደእሽን፥ ካሰ ዎሰይሳዳ ጉልባትድ፥ ባ ፆሳ ጋላትሸ፥ እስ ጋላሳን ሄꬑ ቶሆ ዎሴስ።

11 ሄ አሳት እስፈ ብድ፥ ዳነል ባ ፆሳ ዎስሽንነ ባ ጎዳ ማዶ ኦይችሽን ደምዶሶና። 12 ኤንቲ ካዋኮ ብድ፥ “ካዋዉ፥ ሀስታሙ ጋላሳታ ግዶን ነ አትሽን፥ ሀራ አይ አሰ ዎይኮ አይ ፆሰ ዎስያ ኦንካ ጋሞ ኦላን የገታና መላ አዋጆ ከሳብኪ?” ያግዶሶና።

ካዎይ ዛሪድ፥ “ኤ አዋጃይ ከይስ፤ ሻረቶና ሜዶናነ ፋርሰ ህገዳ ምንዳይሳ” ያግስ።

13 ኤንቲ፥ “ካዋዉ፥ ሄኮ ይሁዳፐ ድኤትድ፥ ይዳ አሳፐ እሶይ፥ ዳነል፥ ነዉ ግድን ነ ፓራማዳ ከስዳ ነ አዋጁዋካ ኪተተና። እ ሀእ ጋካናዉ ጋላሳን ሄꬑ ቶሆ ባ ፆሳ ዎሴስ” ያግዶሶና።

14 ካዎይ ሄሳ ስእዳ ዎደ ዳሮ አዛንስ፤ ዳነላ አሻናዉ ቆፕድ፥ አው ዉላና ጋካናዉ እያ አሻና ኦገ ኡባ ኮይስ። 15 ሄ ዎደ አሳት እስፈ ካዋኮ ብድ፥ “ካዋዉ፥ ሜዶናነ ፋርሰ ህግያዳ፥ ካዎይ አዋጅዳ አዋጆይ ዎይኮ ኪታይ ላመቶናይሳ ኤራ” ያግዶሶና።

16 ካዋ ኪታን፥ ዳነላ ኤህድ፥ ጋሞ ኦላን የግዶሶና። ካዎይ ዳነላኮ፥ “ነ ኡባ ዎደ ጎይንያ ፆሳይ ነና አሾ” ያግስ። 17 ኤንቲ ሹቹ ኤህድ፥ ኦላ ዶና ጎርድዶሶና። ኦንካ ዳነላ ቦላ ኦሰትዳባይ ላመቶና መላ፥ ካዎይ ባ ማታመነ ባ ሞርናታ ማታመ ሹቻ ቦላ ዎꬅስ። 18 ካዎይ ባ ጋꬎ ስሚድ፥ ካꬅ ሞናነ ኡፋይስያባ ባኮ ሺሾና፥ ꬍስኮ ꬋይድ አቅስ።

19 ካዎይ ዎንታ ጉራ ደንድድ፥ ኤለስድ ጋሞ ኦላኮ ብስ። 20 እ አዛንሸ ያ ጋክድ፥ “ደኦ ፆሳ አይልያዉ፥ ዳነላ፥ ኔኒ ኡባ ዎደ ጎይንያ ነ ፆሳይ፥ ነና ጋሞታፐ አሻናዉ ዳንዳእዴ?” ያግድ ፄግስ።

21 ዳነል ዛሪድ፥ “ካዋዉ፥ መርናዉ ካዎታ! 22 ታ ፆሳይ ባ ኪታንቹዋ ኪትድ፥ ጋሞታ ዶና ጎርድስ፤ ኤንቲ ታና ቦችቦኮና። ታኒ እያ ስንꬃን ፅሎ፤ ቃስ ካዋዉ፥ ነ ስንꬃንካ ባላ ኦꬃብከ” ያግስ።

23 ካዎይ ዳሮ ኡፋይትድ፥ ዳነላ ኦላፈ ከሳና መላ ኪትስ። ዳነል ኦላፈ ከይስ፤ እ ባ ፆሳን አማነትዳ ግሾ፥ እያ አሳተꬃ ቦላ ቆሆይ በንትቤና። 24 ካዎይ ዳነላ ሞትዳ አሳታ ኤሀና መላ ኪትስ። ኤንቲ ኦይከትድ፥ ባንታ ማቸታራነ ባንታ ናይታራ ይድ፥ ኡባይ ጋሞ ኦላን የገትዶሶና። ኤንቲ ኦላ ዉርሰꬃ ጋኮና ደእሽን፥ ጋሞት ጉፕ ኤክድ፥ ኤንታ መቀꬃ መንረꬅ አግዶሶና።

25 ካዎይ ዳርዮስ አሳስ፥ ካዎተꬃታስነ ዱማ ዱማ ዶናን ኦደትያ ኮቻታስ ሀይሳዳ ያግድ ፃፍስ፦

“ሳሮይ ህንተዉ ግዶ!

26 “ታ ካዎተꬃን ደእያ አሳ ኡባይ ዳነላ ፆሳ ያያና መላነ ኮኮራና መላ ታኒ አዋጆ ከሳስ።

28 ዳነል ዳርዮሳ ካዎተꬃ ዎደነ ፋርሰ ካዋ ቅሮሳ ካዎተꬃ ዎደ ኡባን እንጀትን ደእስ።