1 ባብሎነ ካዎይ ብልፃሶር ካዎትዳ ኮይሮ ላይꬃን፥ ዳነል ባ አርሳን ዝንእድ፥ አሙሆነ ቆንጨꬅ በእስ። ባ አሙሁዋን በእዳ አይፈ ቆፋታ ፃፍስ።

2 ዳነል ሀይሳዳ ያግስ፦ “ሳሎፐ ይዳ ኦይዱ ጫርኮት ግታ አባ ቡቅሽን ታ ቃማ ቆንጨꬃን በአስ። 3 እሶይ እሱዋፈ ዱማ ግድዳ ኦይዱ ግታ ዶአት አባፈ ከይዶሶና። ቆን 13:1፤ 17:8.

4 “ኮይሮ ዶአይ ጋሞ ዳኔስ፤ እያዉ አርጋንꬃ ቀፈይ ደኤስ። ታ በእሽን፥ እያ ቀፈይ ሾደትን፥ ሳአፐ ደንድድ፥ አሳዳ ናምኡ ቶሆን ኤቃናዳ ኦሰትስ፤ እያዉ አሳ ዎዛን እመትስ።

5 “ናምአንꬆ ዶአይ እስ ባጋ ꬎቁ ግድ ኤቅዳ ባባንꬅ ጌተትያ ዶአ ዳኔስ። ሄ ዶአይ ሄꬑ ጋይለ መቀꬅ ባ ዶናን ባርድ፥ ባ አቻን ሳፅድ ኦይክስ። እካ፥ ‘ደንዳ፤ ካላና ጋካናዉ አሾ ማ’ ጌተትስ።

6 “ሄሳፈ ካላዳ፥ ማሄ ዳንያ ሀራ ዶአ በአስ። እያ ዞኮን ካፎ ቀፈ ዳንያ ኦይዱ ቀፈት ደኦሶና። እያዉ ኦይዱ ሁጰት ደኦሶና፤ እያዉ ሃሮ ማት እመትስ።

7 “ሄሳፈ ጉየ፥ ቃማ ቆንጨꬃን ያሽያ፥ ዳጋንꬅያነ ዳሮ ምኖ ግድዳ ኦይዳንꬆ ዶአ በአስ። እያዉ ግታ ብራታ አች ደኤስ። እ ባናን ጋሄትያ ኡባ ኤንታን መንረꬅድ ሜስ፤ አትዳይሳታ ባ ቶሁዋን የረꬄስ። ካሰ ታ በእዳ ዶአታ ኡባፈ እ ዱማቴስ፤ እያዉ ታሙ ካጨይ ደኤስ። ቆን 12:3፤ 13:1. 8 ታኒ ሄ ካጨታባ ቆፕሽን፥ ኤንታ ግዶፈ ሀራ እስ ጉꬃ ካጨይ ከይሽን በአስ። ሄ ካጨይ ሀንኮ ካጨታፐ ሄꬓታ ꬎቆልድ ሆልስ። ሄ ቃጭያስ አሳ አይፈ ዳንያ አይፈይነ ኦቶሮን ኦደትያ እንፃርስ ደኤስ። ቆን 13:5-6.

9 “ታኒ ሄሳ በእሽን፥ አራታት ኡተꬃስ ጊግዶሶና። መርናዉ ደኤይስ ባ አራታን ኡትስ፤ እያ ማኦይ ሻቻዳ፥ እያ ሁጰ ብናናይ ሙቃዳዳ ቦꬁ። እያ አራታይነ አራታ ገርቶይ ታማዳ ሎጬስ። ቆን 20:4፤ 1:14. 10 እያ አራታ ግዶፈ ታማ ሻፍ ፑልትድ፥ ከዬስ። ሙኩሉ ቶሆ ሙኩላን ታይበተይሳት እያዉ ኦꬆሶና፤ ታሙ ሙኩሉ ቶሆ ታሙ ሙኩላን ታይበተይሳት እያ ስንꬃን ኤቆሶና። ፕርድ ዶመትስ፤ ማፃፋት ዶየትዶሶና። ቆን 5:11፤ 20:12.

11 “ካጨይ ኦደትያ ኦቶሮ ቃላ ታኒ ስእዳ ግሾ፥ እያ ጫዳ ፄላስ። ታኒ በእሽን ዶአይ ሀይቅድ፥ ኤፅያ ታማን የገትድ፥ ꬋይስ። 12 ሀንኮ ሄꬑ ዶአታ ማታይ ኤከትስ፤ ሽን ኤንቲ ጉꬃ ዎደ ደኦን ዳና መላ ኤንታዉ እመትስ።

13 “ታኒ፥ ቃማ ቆንጨꬃን፥ አሳ ናአ ዳነይስ ሳሎፐ ሻራራ ይሽን በአስ። መርናዉ ደኤይሳኮ ሺቅን፥ እያ ስን አꬅዶሶና።ማቶ 24:30፤ 26:64፤ ማር 13:26፤ 14:62፤ ሉቃ 21:27፤ ቆን 1:7፥ 13፤ 14:14. 14 እያዉ ማት፥ ቦንቾይነ ካዎተꬅ እመትስ፤ ደረይ፥ ካዎተꬃትነ ዱማ ዱማ ዶናን ኦደትያ ኡባይ ሃረትዶሶና። እያ ማታይ መርናዉ ሻረቶና ማታ፤ እያ ካዎተꬃስ ዛው ባዋ።

15 “ታኒ፥ ዳነል፥ ታ በእዳባን ዳጋማስ፤ ቆንጨꬃይ ታና ህርግስስ። 16 ታኒ ያን ኤቅዳይሳታፐ እሱዋኮ ሺቃዳ፥ ሀ ኡባስ ቱማ ብርሸꬃይ አይበኮ ኦይቻስ። እ ታዉ እያ ብርሸꬃ ኡባ ሀይሳዳ ያግድ ኦድስ፦ 17 ‘ሀ ኦይዱ ግታ ዶአት ሳአን ስንꬃፈ ደንዳና ኦይዱ ካዎተꬃታ። 18 ሽን ኡባፈ ꬎቃ ፆሳ ጌሻት እያ ካዎተꬃ ኤክድ፥ መርናዉ ባንታባ ኦꬃና፤ መርናዉ ካዎተꬃ ኤንቲ ላታና’ ያግስ።

19 “ሄሳፈ ጉየ፥ ታኒ ሀራ ዶአታ ኡባፈ ዱማ ግድዳ ያሽያ ኦይዳንꬆ ዶኣስ ደእያ ቱማ ብርሸꬃ ኤራናዉ ኮያስ። ሄ ዶኣስ ብራታ አችነ ናሰ ብራታ ፁጉንꬅ ደኤስ፤ እ ባናን ጋሄትያ ኡባ መንረꬅድ ሜስ፤ አትዳይሳ ባ ቶሁዋን የረꬄስ። 20 ሄ ዶኣ ሁጰን ደእያ ታሙ ካጨታባነ ጉየፐ ከይድ፥ ኤንታፈ ሄꬓታ ꬎቆልድ የግዳ ጉꬃ ካጭያባ ኤራናዉ ኮያስ። ሄ ጉꬃ ቃጭያስ አይፈይነ ኦቶሮ ቃላ ኦደትያ እንፃርስ ደኤስ። ሄ ካጨይ ሀንኮታፐ አꬍድ ያሼስ። 21 ታኒ በእያ ዎደ ሄ ካጨይ ጌሻታራ ኦለትድ፥ ኤንታ ፆንስ። 22 ሄስ ሀንዳይ፥ መርናዉ ደኤይስ ያና ጋካናዉነ ኡባፈ ꬎቃ ፆሳ ጌሻታስ ፕርዳና ጋካናሳ፤ ኤንቲ ካዎተꬃ ላትያ ዎደይ ጋክስ። ቆን 20:4.

23 “እ ብርሸꬃ ታዉ ሀይሳዳ ያግድ ኦድስ፤ ‘ኦይዳንꬆ ዶአይ ሀ ሳአን ስንꬃፈ ደንዳና ኦይዳንꬆ ካዎተꬃ። ሄ ካዎተꬃይ ሀራ ካዎተꬃ ኡባፈ ዱማ፤ እ፥ ቢታ ኡባ ማና፥ የꬋናነ መንረꬃና። 24 ታሙ ካጨት ሀ ካዎተꬃፈ ደንዳና ታሙ ካዎታ። ሄሳፈ ጉየ፥ ካሰ ታሙ ካዎታፐ ዱማ ግድዳ ሀራ ካዎይ ደንዳና። እ፥ ኤንታፈ ሄꬑ ካዎታ ፆንድ ሃራና። ቆን 17:12. 25 እ፥ ኡባፈ ꬎቃ ፆሳ ቦላ ኦቶሮን ኦደታና፤ ኡባፈ ꬎቃ ፆሳ ጌሻታ ኡንኤꬃና። ቃስ ዎደታነ ህግያ ላማናዉ አሞታና። ዎደይ፥ ዎደትነ ዎደ ባጋይ ጋካናዉ፥ ጌሻት እያ ማታፐ ጋርሳን ሃረታና። 26 ሽን ፕርድ ዶመታና፤ እያ ማታይ ኩመꬅ ኤከታና፤ እ መርናዉ ꬋያና። 27 ሳሎፐ ጋርሳን ደእያ ካዎተꬃታ ማታይ፥ ዎልቃይነ ግታተꬃይ፥ ኡባፈ ꬎቃ ፆሳ ጌሻታስ እመታና። እያ ካዎተꬃይ መርናዉ ዳና፤ ቢታ ሃረይሳት እያዉ ኪተታና፤ እያ ጎይናና’ ” ያግስ። ቆን 20:4፤ 22:5.

28 ታ ቆንጨꬃባይ ሀይሳን ዉርስ። ታኒ፥ ዳነል፥ ታ ቆፋን ዳሮ ዳጋማስ፤ ታ ሶምኦይ ብዶ ግድስ። ሽን ኡባባ ታኒ ታ ዎዛናን ዎꬃስ።