1 ብልፃሶር ካዎትዳ ሄꬓንꬆ ላይꬃን፥ ታኒ፥ ዳነል፥ ካሰ በእዳ ቆንጨꬃፈ ሀራ ቆንጨꬅ በአስ። 2 ሄ ቆንጨꬃን፥ ኤላማ ቢታን፥ ሱሳ ካታማን፥ ኡባላ ሻፋ ማታን ኤቃዳ ታና ደማስ። 3 ሄ ሻፋ ማታን ናምኡ አዱሳ ካጨት ደእያ ዶርስ ኤቅስ። ናምኡ ካጨታፐ እሶይ ጉየፐ ዶልስ፤ ሽን ኮይሮ ዶልዳይሳፈ አዱሰ። 4 ሄ ዶርሳይ ባ ካጭያን ቃይጫናዉ፥ ዉሎሀ፥ ፑደሀነ ዱገሀ ባጋ ኮልሽን በአስ። እያራ ኤቀታናዉነ እያ ዎልቃፈ ከስ ኤካናዉ አይ መሄይካ ዳንዳእቤና። እ፥ ባ ኮይዳባ ኦꬄስ፤ ያትድ ግታ ግድስ።

5 ታኒ ሀ ቆንጨꬃባ ቆፕሽን፥ እስ ዴሽ ዉሎሀ ባጋፈ ከይድ፥ ቢታ ካንꬅድ፥ ቶሆይ ሳአ የꬎና ይስ። እያ ናምኡ አይፈታፐ ግዶን እስ ግታ ካጨይ ደኤስ። 6 እ፥ ዳሮ ይሎራ፥ ሻፋ ማታን ታኒ በእዳ ናምኡ ካጨራ ደእያ ዶርሳኮ ይስ። 7 እ፥ ዳሮ ይሎትድ፥ ታ በእሽን፥ ዶርሳ ካጨት ናምአይ መቃና ጋካናዉ፥ ኢታ ዶምኤ ዶምእስ። ዶርሳይ እያራ ኤቀታናዉ ዎልቅ ꬋይስ፤ ዴሻይ እያ ሳአን የግድ የꬍድ ኤቅስ። ዴሻ ዎልቃፈ ሄ ዶርሳ አሽያባይ ባዋ። 8 ሄ ዴሻይ ዳሮ ዎልቃምስ፤ ሽን እያ ዎልቃይ ዳርሸ ብን፥ እያ ግታ ካጨይ መቅስ። እያ በሳን ኦይዱ ግታ ካጨት ቢታ ኦይዱ ባጋ ስሚድ ድጭዶሶና።

9 ሀ ኦይዱ ካጨታፐ እሱዋ ቦላ ሀራ ጉꬃ ካጨይ ዶልድ፥ ዱገሀ፥ ዶሎሀነ እስራኤለ ቢታኮ ስሚድ ዎልቃራ ድጭስ። 10 እ፥ ብድ ሳሎን ደእያ ኦላንቾታ ጋካናዉ ድጭድ፥ ሳሎ ፆልንቶታፐ ጉꬃታ ሳአን የግድ ኤንታ የꬍስ።ቆን 12:4. 11 ሳሎ ቶራ ሞጮና ግድዳ ፆሳራ ባና ልክሳና ጋካናዉ ꬎቁ ꬎቁ ግስ። እያዉ ጋላስ ጋላስ ያርሸትያ ያርሹዋ ድግስ፤ እያ ኬꬃካ ቱንስስ። 12 ናጋራ ጋሶን ኦላንቾትነ ጋላስ ጋላስ ያርሸትያ ያርሾይ ሄ ካጭያስ እመትስ። ቱም ሳአን ሆለትስ፤ ሄ ካጨይ ኦꬅያባ ኡባይ እያዉ እንጀትስ።

13 ሄሳፈ ጉየ፥ እስ ጌሻ ኪታንቾይ፥ ሀራ ጌሻ ኪታንቹዋራ ኦደትሽን ታኒ ስአስ። እሶይ እሱዋ፥ “ጋላስ ጋላስ ያርሸትያ ያርሹዋባ፥ ꬋዮ ኤህያ ማካላተꬃባ፥ ሳሎ ኦላንቾትነ ፆሳ ኬꬃይ የትሸ ዳናባ ኦድያ፥ ቆንጨꬃይ አዉደ ፖለታኔ?” ያግድ ኦይችስ።

14 እ ዛሪድ፥ “ናምኡ ሙኩሉነ ሄꬑ ፄቱ ዎንታነ ኦማርስ ጋካናዉ ጋምአና፤ ሄሳፈ ጉየ፥ ፆሳ ኬꬃይ ጌያና” ያግድ ኦድሽን ስአስ።

15 ታኒ፥ ዳነል፥ ሀ ቆንጨꬃ በአሸነ እያ ብርሸꬃ ኤራናዉ ቆፓሸ ደእሽን፥ እስ አሰ ዳንያባይ ታ ስንꬃን ኤቅዳይሳ በአስ። 16 ኡባላ ሻፋፐ፥ “ጋብሬላ፥ ሀ አድያስ ሀ ቆንጨꬃ ብርሸꬃ ኦዳ” ግያ ግርስ ስአስ።

17 እ፥ ይድ ታ ማታን ኤቅዳ ዎደ፥ ታኒ ዳጋማዳ፥ ሳአን ኩንዳስ። እ ታኮ፥ “አሳ ናአዉ፥ ሀ ቆንጨꬃይ ዉርሰꬃ ዎድያባ ኦደይሳ አኬካ” ያግስ።

18 እ ታራ ኦደትያ ዎደ፥ ታኒ ሳአን ታ ሶምኡዋራ ጉፋናዳ፥ ታና ባላ አጋስ። እ ታና ሳኣፐ ደንꬅድ፥ ታ ቶሁዋን ኤስስ። 19 እ ታኮ፥ “ሀ ቆንጨꬃይ ዉርሰꬃ ዎድያባ በሲያ ግሾ፥ ጎዳ ሀንቆ ጋላሳን ሀናናዉ ደእያባ ታ ነዉ ኦዳና። 20 ኔኒ በእዳ ናምኡ ካጨራ ደእያ ዶርሳይ፥ ሜዶናነ ፋርሰ ካዎታ ሌምሶ። 21 ዴሻይ ግርከ ካዋ ሌምሶ፤ እያ ናምኡ አይፍያፐ ግዶን ደእያ ግታ ካጨይ ግርከ ካዋ። 22 ካጨ መቅን እያ በሳን ዶልዳ ኦይዱ ካጨት እያ ካዎተꬃፈ ሻከትድ ከያና ኦይዱ ካዎተꬃታ ሌምሶ። ሽን ኤንታ ዎልቃይ ኮይሮ ካዋ ዎልቃ ጋከና።

23 “ኤንታ ካዎተꬃ ዉርሰꬃን፥ ኤንታ ናጋራይ ዛዋ ጋክያ ዎደ፥ ኢታነ ጭምያ ካዎይ ደንዳና። 24 እ ዳሮ ምኖ ግዳና፤ ሽን ባ ዎልቃን ግደና። እ ዳጋንꬅያ ꬋዮ ꬋይሳና፤ እ ኦꬅያባ ኡባይ እያዉ እንጀታና። እ ምኖ አሳታነ ጌሻ አሳታ ꬋይሳና። 25 እ ጭምያ ግሾ እያዉ እንጀታና፤ እ ባና ኡባፈ ꬎቁ ꬎቁ ኦꬃና። ኤንቲ ሳእ ሳሮ ግድ ደእሽን፥ ኤንታፈ ዳሮታ ዎꬋና። እ ሀላቃታ ሀላቃራ ኤቀታና፥ ሽን እ፥ አስ ቦቾና ባዉ ꬋያና።

26 “ነዉ ኦደትዳ ናምኡ ሙኩሉነ ሄꬑ ፄቱ ዎንታነ ኦማርሳ ቆንጨꬃይ ቱማ። ሽን ሀ ቆንጨꬃይ ዳሮ ዎደፐ ጉየ ፖለታናዉ ደእያ ግሾ፥ ማታመ እያ ቦላ ዎꬃዳ ጎርዳዳ ናጋ” ያግስ።

27 ታኒ ዳነል፥ ዳሮ ዳቡርዳ ግሾ፥ ሳከታዳ ዳሮ ጋላስ ዝንአስ። ሄሳፈ ጉየ ደንዳዳ፥ ካዋ ኦሶስ ባስ። ሀ ቆንጨꬃን ታኒ ዳሮ ዳጋማስ፤ አኬካናዉ ዳንዳአብከ።