1 ሜዶና አስ ግድዳ አርፀክስሳ ናአይ፥ ዳርዮስ ባብሎነን ካዎትስ። 2 እ ካዎትዳ ኮይሮ ላይꬃን፥ ታኒ ዳነል፥ ጌሻ ማፃፋታ ናባባሸ፥ ናበይ ኤርምያስ ኦድዳይሳዳ፥ የሩሳላመይ ላፑን ታሙ ላይꬅ ላለትድ ጋምአናዉ ደኤይሳ አኬካስ። ኤርም 25:11፤ 29:10. 3 ሄሳ ግሾ፥ ካዮ ማኦ ማአዳ፥ ብዶ ታ ሁጰን ቆላዳ፥ ፆማሸነ ዎሳሸ ታ ጎዳ ፆሳኮ ታ ሶምኡዋ ዛራስ።

4 ታ ናጋራ ፓፃሸ፥ ጎዳ፥ ታ ፆሳ ሀይሳዳ ያጋዳ ዎሳስ፦ “አቤት ጎዳዉ፥ ዎልቃማነ ያሽያ ፆሳዉ፥ ነና ዶሰይሳታስነ ነዉ ኪተተይሳታስ ነ መርና ሲቁዋነ ጫቁዋ ናገይሶ፥ 5 ኑ ናጋራ ኦꬅዳ ባልዳ። ኑ ኢታባ ሀንዳ፤ ማካልዳ፤ ነ ኪታፐነ ነ ህግያፈ ካረ ከይዳ። 6 ኑ ካዎታስ፥ ኑ ሀላቃታስ፥ ኑ አዋታስነ ቢታን ደእያ አሳ ኡባስ ነ ሱንꬃን ትንብተ ኦድዳ ነ ናበታ ስኦና እፅዳ።

7 “አቤት ጎዳዉ፥ ነ ፅሎ፤ ሽን ኑኒ ሀች ዬላ ማእዳ። ይሁዳንነ የሩሳላመን ደእያ አሳ ኡባይ ነዉ አማነቶና እፅን፥ ነ ሃሆ ቢታንነ ማታ ቢታን ላልዳ እስራኤለ አሳ ኡባይ ዬላትዳ። 8 አቤት ጎዳዉ፥ ኑኒ፥ ኑ ካዎት፥ ኑ ሀላቃትነ ኑ አዋት ነና ናቅዳ ግሾ ዬላ ማእዳ። 9 ሽን ኑ እያ ቦላ ማካልኮካ፥ ጎዳይ ኑ ፆሳይ ማርያነ አቶ ግያ ፆሲ። 10 ኑኒ ኑ ጎዳ፥ ኑ ፆሳ፥ ኪተትቦኮ፤ ቃስ ባ ናበታ ባጋራ እምዳ እያ ህግያ ናግቦኮ። 11 እስራኤለ አሳ ኡባይ ነ ህግያ መንꬅድ፥ ካረ ከይዶሶና፤ ነዉ ኪተትቦኮና።

“ኑ ነ ቦላ ናጋራ ኦꬅዳ ግሾ፥ ፆሳ አይልያ ሙሰ ህገ ማፃፋን ፃፈትዳ ባደꬃይነ ፕርዳይ ኑ ቦላ ጋክስ። 12 ቃስ ኑ ቦላነ ኑና ካለይሳታ ቦላ ግታ መቶ ኤሀናዉ ነ ኦድዳ ቃላ ኑ ቦላ ፖላዳሳ። የሩሳላመ ቦላ ጋክዳ መቱዋ መል ሳሎፐ ጋርሳን ሀራ ቢታ ቦላ ጋክቤና። 13 ሙሰ ህግያን ፃፈትዳይሳዳ፥ ሀ ꬋዮ ኡባይ ኑ ቦላ ጋክስ። ኑኒ ኑ ናጋራፐ ስምቦኮ፤ ነ ቱማ ስእቦኮ፤ ነና፥ ጎዳ፥ ኑ ፆሳ ማሮታ ኦይችቦኮ። 14 ጎዳይ ሀ ꬋዩዋ ኑ ቦላ ኤሀናዉ ጉየ ግቤና። ጎዳይ፥ ኑ ፆሳይ ባ ኦꬅያባ ኡባን ፅሎ፥ ሽን ኑ እያዉ ኪተቶና እፅዳ።

15 “አቤት ጎዳዉ፥ ኑ ፆሳዉ፥ ካሰ ነ አሳ፥ ነ ምኖ ኩሽያን ግብፀፈ ከሳዳ፥ ሀች ጋካናዉ ነ ሱንꬃ ፄግሳዳሳ፤ ኑኒ ናጋራ ኦꬅዳ፤ ባልዳ። 16 አቤት ጎዳዉ፥ ኔኒ ካሰ ነ ፅሎ ኦሶ ኡባ ኦꬅዳይሳዳ፥ ሀእ ነ ሀንቁዋነ ነ ጋዱዋ ነ ካታማፐ፥ የሩሳላመፐ፥ ነ ጌሻ ዙማፐ ደንꬃ። ኑኒ ኦꬅዳ ናጋራይነ ኑ አዋት ኦꬅዳ ባላይ የሩሳላመነ ነ አሳ ኑ ዩሹዋን ደእያ ኡባ ስንꬃን ካዉሽስ።

17 “ህዛ ኑ ፆሳዉ፥ ታኒ ነ አይለይ ዎስያ ዎሳነ ማጋኑዋ ስአ። ጎዳዉ፥ ነ ሱንꬃ ግሾ ጋዳ፥ ሀ ላለትዳ ነ ኬꬃ፥ ነ ኬሀ አይፍያን ፄላ። 18 አቤት ታ ፆሳዉ፥ ነ ሀይꬃ ኑኮ ዛራ፤ ነ አይፍያ ዶያዳ፥ ነ ሱንꬃይ ፄገትዳ ካታማ ꬋዩዋ በአ። ኑኒ፥ ነና ዎሰይ፥ ኑ ፅሎተꬃ ግሾ ግዶናሽን፥ ነ ግታ ማሮተꬃ ግሾሳ። 19 አቤት ጎዳዉ፥ ስአ! አቤት ጎዳዉ፥ አቶ ጋዳ! አቤት ጎዳዉ፥ ነ ኦሱዋ ቆንጭሳ! ነ ካታማይነ ነ አሳይ ነ ሱንꬃን ፄገትዳ ግሾ፥ አቤት ታ ፆሳዉ፥ ነ ሱንꬃ ግሾ ጋምኦፋ።”

20 ታኒ ዎሳሸ፥ ታ ናጋራነ ታ አሳ እስራኤለ ናጋራ ፓፃሸነ ታ ፆሳ ጌሻ ዙማባ፥ የሩሳላመባ ጎዳ፥ ታ ፆሳስ ኦዳሸ ጋምአስ። 21 ታኒ ዎሳ ቦላ ደእሽን፥ ካሰ ቆንጨꬃን ታ በእዳ ጋብሬለይ፥ ታኮ ኤሶን ፕራꬍሸ፥ ኦማርሳ ያርሾ ያርሽያ ዎደ ፑቱ ግስ። ሉቃ 1:19፥ 26. 22 እ ሀይሳዳ ያግድ፥ ታዉ ኦድስ፦ “ዳነላ፥ ታ ነዉ ኤራነ አኬካ እማናዉ ሀእ ያስ። 23 ኔኒ ቡሮ ዎሳ ዶምዳ ዎደ ነ ዎሳ ዛሮይ እመትስ፤ ታ ሄሳ ነዉ ኦዳናዉ ያስ። ፆሳይ ነና ዳሮ ዶሴስ። ሄሳ ግሾ፥ ታ ኦደይሳ ቆፓ፤ ቆንጨꬃ አኬካ።

24 “ፆሳይ ነ አሳስነ ነ ጌሻ ካታማስ ቃችዳ ዎደይ፥ ላፑን ቶሆ ላፑን ታሙ ላይꬅ። ሄ ዎደ ናቆይ ዉራና፤ ናጋራ ኦሶይ አታና፤ ቆሆይ አቶ ጌተታና፤ መርና ፅሎተꬅ ካዎታና፤ ቆንጨꬅነ ትንብተይ ፖለታና *ቆንጨꬅነ ትንብተይ ፖለታና፦ እብራወꬆ ዶናን ቆንጨꬃይነ ትንብተይ ቱማ ግደይስ አታመታና ጌስ። ኡባፈ ጌሻ በሳይ ትየታና።

25 “ሀይሳ ኤራ፤ አኬካ። የሩሳላመ ኦራꬃናዉነ ኬፃናዉ ኪት ከይዳ ጋላሳፐ ብድ ትየትዳ ሀላቃይ ያና ጋካናዉ፥ ላፑን ቶሆ ላፑናነ ኡሱፑን ታማነ ናምኡ ቶሆ ላፑን ላይꬅ አꬋና። ሄ ዎደ የሩሳላመ ካታማይ ኦራፃና፤ ኦገትነ ዩሾ ግምበት ኦሰታና፤ ሽን ግምበትያ ዎደይ፥ መቶ ዎደ ግዳና። 26 ኡሱፑን ታማነ ናምኡ ቶሆ ላፑን ላይꬃፈ ጉየ ትየትዳይስ ሀይቃና፤ እያዉ አይኮይካ አትቤና። ያና ሀላቃ ኦላንቾት ካታማነ ፆሳ ኬꬃ ላላና። ሄ ካታማ ዉርሰꬃይ ድኦዳ አኬኮና ያና። ሄ ዎደፐ ብድ ዉርሰꬅ ጋካናዉ ኦልነ ꬋዮይ አዋጀትስ። 27 ላፑን ላይꬃ ግዶን፥ ሄ ሀላቃይ አሳራ ምኖ ጫቆ ጫቀታና። ሄ ላፑን ላይꬃታ ባጋ ዛዋን ያርሾነ እሞታ ድጋና። አዋጀትዳ ፕርዳይ፥ እያ ቦላ ትገታና ጋካናዉ፥ እ ꬋዮ ኤህያ ቱናተꬃ ፆሳ ኬꬃን ኤሳና”ዳነ 11:31፤ 12:11፤ ማቶ 24:15፤ ማር 13:14. ያግስ።