1 ፋርሰ ካዎይ ቅሮስ ካዎትዳ ሄꬓንꬆ ላይꬃን፥ ብልፃሶራ ጌተትያ ዳነል ሀራ ቆንጨꬅ በእስ። ሄ ቆንጨꬃይ ቱማ፤ ቆንጭዳባይ ዎልቃማ ኦላባ። ሄ ቆንጨꬃ ኤራና መላ አኬክ እያዉ እመትስ።

2 ሄ ዎደ ታኒ፥ ዳነል፥ ሄꬑ ሳምንታ ዬካስ። 3 ሄꬑ ሳምንታይ ዉራና ጋካናዉ ካꬅ ማብከ፤ አሾይ ዎይኮ ዎይነ ኡሽ ታ ዶናኮ ሺቅበና፤ ታ ሁጵያ ትየታብከ 4 ኮይሮ አጌናን ላታማነ ኦይዳንꬆ ጋላሳን፥ ግታ ፀግሮሳ ሻፋ ማታን ኤቃስ። 5 ታኒ ፄልያ ዎደ ሊኖ ማኦ ማእዳ እስ አድያ በአስ። እ ባ ፄሳን አፌዛ ዎርቃፈ ኦሰትዳ ዳንጮ ዳንጭስ። 6 እያ አሳተꬃይ ጶልያ አልኦ ሹቹ ዳኔስ፤ እያ ሶምኦይ ዎልአንꬃ መላ ዎልአሜስ፤ እያ አይፈይ ታማ ላጮ ዳኔስ፤ እያ ኩሸይነ እያ ቶሆይ ቁሸትዳ ናሰ ብራታዳ ፖኤስ፤ እያ ቃላይ ዳሮ አሳ ግርሳዳ ኮሽሜስ።

7 ሀ ቆንጨꬃ ታኒ፥ ዳነል ታርካ በአስ። ታራ ደእያ አሳይ በእቦኮና፤ ኤንቲ ዳሮ ዳጋምዳ ግሾ ባቃትድ ቆሰትዶሶና። 8 ታኒ ሀ ግታ ቆንጨꬃ በአሸ፥ ታርካ አታስ። ታዉ ዎልቅ እፅን ዳቡራስ፤ ታ ሶምኦይ ቡላትስ። 9 ታኒ እያ ኮሽንቻ ስእዳ ዎደ ሳአን ታ ሶምኡዋራ ጉፋናዳ፥ ታና ባላ አጋስ።

10 ሄሳፈ ጉየ፥ እስ ኩሸይ ታና ቦችስ፤ ታኒ ኮኮራሽን፥ ታ ኩሽያንነ ታ ጉልባታን ታና ደንꬅድ ኤስስ። 11 እ ታኮ፥ “ዳሮ ዶሰትዳ ዳነላ፥ ታኒ ነዉ ኦድያ ቃላ ሎይꬃዳ አኬካ፤ ደንዳ ኤቃ። ታኒ ኪተታዳ ኔኮ ያስ” ያግስ። እ ታኮ ሀይሳዳ ግን፥ ታኒ ኮኮራሸ ደንዳ ኤቃስ።

12 ቃስካ፥ “ዳነላ፥ ያዮፋ! ኔኒ አኬካ ደማናዉ ቆፓዳ፥ ነ ፆሳ ስንꬃን ነናተꬃ ካዉሽዳ ኮይሮ ጋላሳፐ ዶምድ፥ ነ ዎሳይ ስኤትስ፤ ታ ነዉ ዛሮ ኤካዳ ያስ። 13 ሽን ፋርሰ ካዎተꬃ ሀላቃ ግድዳ አያናይ ላታማነ እስ ጋላስ ታና ተቅስ። ታኒ፥ ታርካ ፋርሰ ካዎተꬃ ሀላቃራ ያን አትዳ ግሾ፥ ኪታንቾታ ሀላቃታፐ እሶይ፥ ምካኤል፥ ታና ማዳናዉ ይስ። ቆን 1:13-15. 14 ሀ ቆንጨꬃይ ስንꬃፈ ሀናናባ በሲያ ግሾ፥ ታኒ ኔኮ ይዳይ፥ ዉርሰꬃ ጋላሳን ነ አሳ ቦላ ሀናናዉ ደእያባ ነዉ ቆንጭሳናሳ” ያግስ።

15 እ ሄሳ ታዉ ኦድያ ዎደ፥ ታኒ ሳአን ጉፋናዳ፥ ጋናባ ꬋያስ። 16 ሄሳፈ ጉየ፥ አሰ ዳንያ እሶይ ታ መተርሻ ቦችስ፤ ታ ዶናይ ዶየትን፥ ኦደተꬅ ዶማስ። ታ ስንꬃን ኤቅዳይሳኮ፥ “ታ ጎዳዉ፥ ሀ ቆንጨꬃይ ታና ዳሮ ዳጋንꬅዳ ግሾ ዳሮ ዳቡራስ። 17 ታኒ ነ አይለይ፥ ኔራ፥ ታ ጎዳራ ዋናዳ ኦደታናዉ ዳንዳአይና? ታ ዎልቃይ ዉርስ፤ ሸምፓናዉካ ታዉ እፀትስ” ያጋስ።

18 ሄ አሰ ዳንያ እሶይ ናምአንꬆ ታና ቦችድ፥ ታዉ ዎልቃ እሚስ። 19 እ ታኮ፥ “ዳሮ ዶሰትዳ አድያዉ ያዮፋ! ሳሮይ ነዉ ግዶ። ምና፤ ፃላ” ያግስ።

እ ሄሳ ግድ ታና ምንꬅን፥ ታኒ ምናዳ፥ “ታ ጎዳዉ፥ ኔኒ ታና ምንꬅዳ ግሾ ታዉ ኦዳ” ያጋስ።

20 እ ዛሪድ፥ “ታኒ ኔኮ አይስ ይዳኮ ነ ኤራይ? ሀእ ታ ስማዳ ፋርሰ ሀላቃ ግድዳ አያናራ ኦለታናዉ ባና፤ ታኒ ቢኮ ግርከ ሀላቃ ግድዳ አያናይ ያና። 21 ሽን ቱማ ማፃፋን ፃፈትዳባ ታኒ ነዉ ኦዳና። ታኒ ኤንታራ ኦለትያ ዎደ፥ ህንተ ሀላቃ ምካኤላፐ አትሽን፥ ታና ማድያ ሀር ባዋ።”