1 “ሜዶና አስ ግድዳ ዳርዮስ፥ ካዎትዳ ኮይሮ ላይꬃን፥ ታኒ እያ ማዳናዉነ ምንꬃናዉ እያ ምየን ኤቃስ።”

2 “ህዛ ታ ነዉ ቱማ ኦዳይስ። ሀራ ሄꬑ ካዎት ፋርሰ ቢታን ካዎታና፤ ኤንታፈ ጉየ ካዎትያ ኦይዳንꬆ ካዎይ፥ ሀንኮታፐ አꬍዳ ዱረ ግዳና። እ ባ ዱረተꬃ ጋሶን ዎልቃ ደምያ ዎደ፥ አሳ ኡባይ ግርከ ካዎተꬃራ ኦለታና መላ ደንꬃና።

3 “ሄሳፈ ጉየ፥ ዎልቃን ሃርያ ምኖ ካዎይ ደንድድ፥ ባ ኮይዳባ ኡባ ኦꬃና። 4 እ ዎልቃን ምንዳ ዎደ እያ ካዎተꬃይ ላለትድ፥ ኦይዱ በሳን ሻከታና። እያ ኮቻት እያ ካዎተꬃ ላቶኮና፤ ካዎተꬃይ እ ካሰ አይሰይሳዳ ዎልቃማ ግደና፤ እያ ካዎተꬃይ እያፐ ኤከትድ፥ ሀራታስ እመታና።

5 “ዱገሀ ቢታ ካዎይ ምኖ ግዳና፤ ሽን እያ ሹማታፐ እሶይ እያፐ ዳሮ ምንድ፥ ሄ ግታ ካዎተꬃ ሃራና። 6 ጉꬃ ላይꬃፈ ጉየ፥ ዱገሀ ቢታ ካዎይነ ፑደሀ ቢታ ካዎይ ባንታ ግዶን ዳቦተꬃ ጫቆ ጫቀታና። ዱገሀ ቢታ ካዋ ናእያ ፑደሀ ቢታ ካዋ ገላና፤ ሽን እ ዎልቃይ ምነና፤ ቃስ እካ እያ ዎልቃይካ ዳሮ ዎደ ጋምኤና። ሄ ዎደ፥ ኢራ እስፈ፥ እዮ ማደይሳት፥ እ ናአይነ እ አዝናይ፥ ኡባይ አꬍድ እመታና።

7 “ጉꬃ ዉደፐ ጉየ፥ እ ዳቦታፐ እሶይ ዱገሀ ቢታን ካዎታና። ፑደሀ ቢታ ካዋ ቦላ ደንዳና፤ እያ ሚፃ መንꬅ ገልድ እያ ፆናና። 8 ቃስ ኤንታ ፆሳታ፥ ምስለታነ ብራፐነ ዎርቃፈ ኦሰትዳ ሚሸታ ኤክድ፥ ግብፀ ኤፋና። ጉꬃ ዎደስ ፑደሀ ቢታ ካዋ ኦላናዉ ደንደና። 9 ፑደሀ ቢታ ካዎይ ዱገሀ ቢታ ካዋ ቦላ ደንዳና፤ ሽን ባ ይዳ ኦግያራ ጉየ ስማና።

10 “ፑደሀ ቢታ ካዋ አደ ናይት ኦላስ ጊግድ፥ ዳሮ ኦላንቾታ ሺሻና። ኤንታራ ጋሄትያባ ኡባ ሜጭድ ኤፍያ ዎልቃማ ድኦዳ ካንꬅድ አꬋና፤ ዛር ኦልድ ዱገሀ ካዋ ሚፃ ጋካናዉ ባና። 11 ሄ ዎደ ዱገሀ ቢታ ካዎይ ዳሮ ሀንቀትድ፥ ፑደሀ ቢታ ካዋ ኦላናዉ ደንዳና። ፑደሀ ቢታ ካዎይ ሺሽዳ ዳሮ ኦላንቾታራ ኦለትድ፥ ኤንታ ፆናና። 12 ዳሮ ኦላንቾታ ድእዳፐ ጉየ፥ ኦቶሮን ፑነታና። ዳሮ ሙኩሉ አሳ ዎꬋና፤ ሽን እያ ፆኖይ እያራ ጋምኤና።

13 “ፑደሀ ቢታ ካዎይ ካሰይሳፈ አꬍያ ሀራ ኦላንቾታ ጊግሳና። ጉꬃ ላይꬅ ጋምእዳፐ ጉየ፥ ኩመꬃ ኦላ ሚሸ ኦይክዳ፥ ኦላንቾታ ኤክድ ኦላስ ከያና። 14 ሄ ዎደ ዳሮ አሳይ ዱገሀ ቢታ ካዋ ቦላ ደንዳና። ቆንጨꬃይ ፖለታና መላ ነ አሳፐ እስ እስ ማካላንቾት ደንዳና፥ ሽን ኤንቲ ፆኖኮና። 15 ፑደሀ ቢታ ካዎይ ዱገሀ ቢታ ይድ፥ ዩሾይ ግምበትዳ እስ ካታማ ኦልድ ኦይካና። ዱገሀ ቢታ ካዋ ኦላንቾት ዎልቃ ꬋያና፤ ሀር አቶሽን፥ ኤንታፈ ምኖ ኦላንቾትካ ኤንታራ ኤቀታናዉ ዳንዳኦኮና። 16 እያራ ኤቀታናዉ ዳንዳኤይ ባይና ግሾ ፑደሀ ቢታ ካዎይ ባ ኮይዳባ ኡባ ኦꬃና። እ ዶረትዳ ቢታን ምን ኤቅድ፥ እያ ꬋይስያ ዎልቃ ደማና። 17 እ ባ ካዎተꬃን ደእያ ዎልቃ ኡባ ኤክድ ያናዉ ሀልቻና፤ ዱገሀ ቢታ ካዉዋራ ዳቦተꬃ ጫቆ መꬋና። ሄ ካዎተꬃ ꬋይሳናዉ ሀልችድ፥ ባ ናእዉ እያዉ እማና፥ ሽን እያ ሀልቾይ ፖለተና። 18 ባ ሶምኡዋ ዩሾይ አባን ተቀትዳ ቢታታኮ ዛሪድ፥ ኤንታፈ ዳሮታ ኦልድ ባዉ ኤካና። ሽን እስ ቶራ ሞጮናይ እያ ፆንድ እያ ኦቶሩዋ ጊሻና፤ እያ ኦቶሮ ኦዳ እያ ቦላ ዛራና። 19 ፑደሀ ቢታ ካዎይ ባ ቢታ፥ ባ ሚፃኮ ስማና። ሽን እ ꬉበትድ ኩንዳና፤ እያ ናምአንꬆ ኦንካ በኤና።

20 “እያ በሳን ካዎትያ ሀራ ካዎይ ባ ካዎተꬃ ቦንቹዋ ናጋናዉ ጊራ ጊርስያ አሰ ካዎተꬃ ግዶ ኪታና። ግዶሽን፥ ጉꬃ ዎደፐ ጉየ፥ ቆንጨን ዎይኮ ኦላን ግዶናሽን፥ እ ጮ ሀይቅድ ꬋያና።

21 “እያ በሳን እስ ካትዳ አስ ደንዳና፤ ሽን ኤንቲ እያዉ ካዎተꬃ ቦንቾ እሞኮና። አሳይ ሳእ ሳሮ ግድ ኡትዳሽን፥ ጭምድ ካዎተꬃ ኦይካና። 22 ዳሮ ኦላንቾት እያ ስንꬃፈ ፕተትድ ꬋያና፤ ጫቆ ሀላቃይካ ሀይቃና። 23 እያራ ጫቁዋ ጫቅ ስሚድ፥ ባ ኦꬅያባ ጭሞን ኦꬃና፤ ጉꬃ አሳታ ፃላላራ እ ምናና። 24 አሳይ ሳእ ሳሮ ግድ ኡትዳሽን፥ ሄ ቢታን እ፥ ዳሮ ዱረ ግድዳ እስ ባጋ ኦይካና። ካሰ እያ አዋይ ዎይኮ እያ ማይዛይ ኦꬅቦናባ ኦꬃና፤ እ ድእድ ሺሽዳ ዱረተꬃነ አቁዋ ባና ካለይሳታስ ግሻና። እ ሚፃታ ላላናዉ ሀልቻና፤ ሽን ሄስ ሀናናይ ጉꬃ ዎደሳ። 25 ባ ዎልቃ ምንꬅድ፥ ዳሮ ኦላንቾታራ ዱገሀ ቢታ ካዋ ቦላ ደንዳና። ዱገሀ ቢታ ካዎይ ዳሮነ ዎልቃማ ኦላንቾታራ ኦላስ ደንድድ፥ እያራ ኦለታና። ሽን እያ ቦላ ኤንቲ ማቅዳ ማቁዋ ጋሶን፥ እ ኤንታራ ኤቀታናዉ ዳንዳኤና። 26 ካዉዋራ እስ ጋይታን መይሳት እያ ꬋይሳና፤ እያ ኦላንቾት ፕተታና፤ ዳሮት ኦላን ሀይቃና። 27 ሀ ናምኡ ካዎት ባንታ ዎዛናን ኢታ ቆፋ ኦይክድ፥ እስፈ እስ ጋይታ ቦላ ኡታና፤ እሶይ እሱዋ ጭማናዉ ዎርዶ ኦደታና። ሽን ቃመትዳ ዎደይ ቡሮ ጋክቦና ግሾ ኤንቲ ኦꬃና ግድ ቆፕያባይ ኤንታዉ እንጀተና። 28 ፑደሀ ቢታ ካዎይ ዳሮ ዱረተꬃራ ባ ቢታ ስማና። ሽን እ ባ ዎዛናን ጌሻ ጫቁዋ እፃና። ጌሻ ጫቁዋ ቆሀናዉ እያ ቦላ እስባ ኦꬅድ፥ ባ ቢታ ስማና።

29 “ቃመትዳ ዎደይ ጋክን፥ እ ዛሪድ ዱገሀ ቢታ ቦላ ደንዳና፥ ሽን እያዉ ካሰይሳዳ እንጀተና። 30 ክፅማፐ ያ ኦላ ማርካበት እያ ዳጋንꬃና። ጉየ ስሚድ፥ ጌሻ ጫቁዋ ቦላ ሀንቀታና። ቃስ ያፐ ስሚድ፥ ጌሻ ጫቁዋ አግዳይሳታራ ዳቦታና።

31 “እያ ኦላንቾት ፆሳ ኬꬃነ እያ ዩሹዋ ቱንሳና፤ ጋላስ ጋላስ ያርሸትያ ያርሹዋ ድጋና። ያትድ፥ ꬋዮ ቱናተꬃ ያን ኤሳና። ዳነ 9:27፤ 12:11፤ ማቶ 24:15፤ ማር 13:14. 32 እ ጫቆ ቃላ መንይሳታ፥ ጭሞ ቃላን ባ ባጋ ዛራና፤ ሽን ባንታ ፆሳ ኤርያ አሳይ ምናናነ እያራ ኤቀታና።

33 “አሳ ግዶን ደእያ ጭንጫት ዳሮ አሳ ታማርሳና። ሽን ጉꬃ ዎደን ሄ አሳት ማሻን ሀይቃና፥ ታማን ፁገታና፥ ድኤታና ዎይኮ ቦንቀታና። 34 ሄ መቱዋ ግዶን ደእሸ፥ ኤንቲ ጉꬃ ማዶ ደማና፤ ዳሮ አሳይ ኤንታ ባጋ ዳንድ፥ ኤንታኮ ስማና፤ ሽን ቱማ ዎዛናፐ ግደና። 35 ጭንጫታፐ እሶት እሶት ꬉበታና። ቃመትዳ ዎደይ ቡሮ ጋክቦና ግሾ፥ ኤንቲ ሄሳዳ ሀንድ፥ ዉርሰꬃ ዎደይ ጋካናዉ፥ ፓጨትድ ከያና፥ ጌያናነ ቦረይ ባይናይሳታ ግዳና።”

36 “ካዎይ ባና ሎእዳባ ኦꬃና፤ ባና ፆሳታ ኡባፈ ꬎቁ ኦꬅድ ግታያና፤ ፆሳታ ፆሳ ቦላ ካሰ ስኤትድ ኤሮና ኢታ ቃላ ኦደታና። ሀናናዉ ደእያባይ ሀናናዉ በሲያ ግሾ፥ ፆሳ ሀንቆይ ፖለታና ጋካናዉ እ ኦꬅያባ ኡባይ እያዉ እንጀታና። 2 ታሰ 2:3-4፤ ቆን 13:5-6. 37 እ፥ ባ ማይዛታ ፆሳታ ዎይኮ ማጫሳይ ዶስያ ፆሳታ ካꬋና። እ ባና ኡባፈ አꬅድ ꬎቁ ኦꬅያ ግሾ፥ ሀራ ፆሳታ ኤከና። 38 እ ኤንታ ቦንቾ አግድ ሚፃታ ፆሳ ቦንቻና፤ እያ ማይዛት ኤሮና ፆሰ፥ ዎርቃ፥ ብራ፥ አልኦ ሹችነ ሎኦ እሞታ እምድ ቦንቻና። 39 እማꬃ ፆሳን ማደትድ፥ እ ምኖ ሚፃታ ቦላ ደንዳና። ቃስ እያ ማታ ኤርያ አሳ ዳሮ ቦንቻና። እ ኤንታ፥ አሳ ቦላ ሹማና፤ ቢታ ዎይቶ ኦꬅድ ኤንታዉ ሻክ ሻክ እማና።

40 “ዉርሰꬃ ዎደይ ጋክን፥ ዱገሀ ቢታ ካዎይ ደንድድ፥ ፑደሀ ቢታ ካዋ ኦላና። ሽን ፑደሀ ቢታ ካዎይ ፓራ ጋረታ፥ ፓራ አሳታነ ዳሮ ማርካበታ ኤክድ፥ እያ ቦላ ጎተዳ ያና። ዳሮ ቢታ ኦይክድ፥ ድኦዳ ሜጭድ ኤፋና። 41 እ ጌሻ ቢታ ቦላ ደንዳና፤ ዳሮ ቢታት እያ ኩሸን ኩንዳና። ሽን ኤዶመይ፥ ሞአበይነ አሞነፐ ዳርያ ባጋይ እያ ኩሸፐ አታና። 42 እ ዳሮ ቢታታ ቦላ ደንድያ ዎደ፥ ግብፀይካ እያፐ ከስ ኤከና። 43 ግብፀ ዎርቃ፥ ብራነ ዱረተꬃ ኡባ፥ ባ ኩሸን አꬃና። ሊበነ ቶጰ አሳይ እያዉ ሃረታና። 44 ሽን ዶሎሀ ባጋፈነ ፑደሀ ባጋፈ ያ ኦዳይ፥ እያ ዳጋንꬃና። ሀንቆ ኤፅ ከይድ፥ ዳሮታ ዎꬋናነ ꬋይሳና። 45 እ ባ ካዎታ ዱንካንያ አባፈነ ሎኦ ጌሻ ዙማፐ ግዶን ቶካና። ሽን እ፥ ዉርሰꬃን ባዉ ꬋያና፤ እያ ማድያ ኦንካ በንተና።”