1 ህንተ ላታናዉ ብያ ቢታን ህንተ ኦꬃና መላ ታ ህንተና ታማርሳና መላ ጎዳይ፥ ህንተ ፆሳይ ታና ኪትዳ ኪታይ፥ አዋጆይነ ህገይ ሀይሳ። 2 ነ ላይꬃይ አዱቃና መላ ነ፥ ነ ናይትነ ነ ናይታ ናይት ጎዳ ነ ፆሳ ያይተ፤ ታ ሀች ነዉ እምያ ጎዳ አዋጅያነ ህግያ ነ ላይꬃ ኡባን ናጋ። 3 ነኖ፥ እስራኤለ ስአ፤ ኡባባይ ነዉ እንጀታና መላነ ጎዳይ ነ አዋታ ፆሳይ፥ ነዉ ግዳይሳዳ ማꬅነ ኤስ ጎግያ ቢታን ነ ዳራና መላ ሀ ህገታ ስአ፤ ምንꬃዳ ናጋ።

4 ነኖ፥ እስራኤለ ስአ፤ ጎዳይ ኑ ፆሳይ እስ ፆሲ። 5 ነ ጎዳ፥ ነ ፆሳ ነ ኩመꬃ ዎዛናፐ፥ ነ ኩመꬃ ሸምፑዋፈነ ነ ኩመꬃ ዎልቃፈ ዶሳ። 6 ሀች ታ ነና ኪትያ ሀ ኪታ ነ ዎዛናን ዎꬃ። 7 ኤንታ ኔኒ ነ ናይታ ታማርሳ፤ ኔኒ ነ ሶን ኡትያ ዎደ፥ ኦገ ሄመትያ ዎደ፥ ዝንእያ ዎደነ ደንድያ ዎደ ኤንታባ ሃሳያ። 8 ማላ ኦꬃዳ ነ ኩሸን ኤንታ ቃቻ፤ ቃስ ነ ሶምኦን ማላዳ ዎꬃ። 9 ነ ፐንገ ዝዝገታ ቦላነ ነ ድርሳ ፐንግያ ቦላ ኤንታ ፃፋ።

10 ጎዳይ፥ ነ ፆሳይ ነዉ እማና ግድ ነ አዋታስ አብራሃመስ፥ ይሳቃስነ ያይቆባስ ጫቅዳ፥ ነ ኬፃቦና ግታነ ሎኦ ካታማት ኩምዳ ቢታ ነዉ እማና። 11 ኔኒ ሺሻቦና ዱረተꬃን ኩምዳ ኬꬃታ፥ ነ ቦካቦና ሃꬃ ኦላታ፥ ነ ቶካቦና ዎይነነ ሻማሆ ነዉ እምያ ዎደ፥ ኔኒ ማዳ ካልዳ ዎደ፥ 12 ነና ግብፀ አይለተꬃ ቢታፈ ከስዳ፥ ጎዳ ዶጎና መላ ናገታ። 13 ጎዳ፥ ነ ፆሳ ያያ፤ እያ ፃላላ ጎይና፤ እያ ሱንꬃን ጫቃ። 14 ነ ዩሾን ደእያ አሳይ ጎይንያ ሀራ ፆሳታ ጎይኖፋ። 15 ነ ግዶን ደእያ ጎዳይ፥ ነ ፆሳይ ቃናትያ ፆሱ። እያ ሀንቆይ ነ ቦላ ኤፃና፤ እ ነና ቢታ ቦላፈ ፕትድ ꬋይሳና። 16 ማሳሀን ህንተ እያ ፓጭዳይሳዳ ጎዳ ህንተ ፆሳ ፓጮፕተ። 17 ጎዳይ፥ ህንተ ፆሳይ ህንተና ኪትዳ እያ ኪታ፥ እያ ዎጋነ እያ አዋጁዋ ምንꬅድ ናግተ። 18 ነዉ ኡባባይ እንጀታና መላ ጎዳ ስንꬃን ነ ሱረባነ ሎኦባ ኦꬃ። ሄሳ ኦꬅኮ፥ ነዉ እማናዉ ጎዳይ ነ አዋታስ ጫቅዳ፥ ሄ ሎኦ ቢታ ነ ላታና። 19 ጎዳይ ግዳይሳዳ ኔኒ፥ ነ ሞርከታ ኡባ ነ ስንꬃፈ ጎዳና።

20 ዎደፐ ነ ናይት፥ “ጎዳይ፥ ኑ ፆሳይ ህንተና ኪትዳ ሀ ዎጋ፥ አዋጅያነ ህግያ ብርሸꬃይ አይቤ?” ያግድ ህንተና ኦይችያ ዎደ፥ 21 ነ ኤንታዉ ሀይሳዳ ያጋዳ ዛራና፤ “ኑኒ ግብፀ ቢታን ግብፀ ካዋ አይለታ፥ ሽን ጎዳይ ባ ምኖ ኩሽያን ኑና ግብፀፈ ከስስ። 22 ጎዳይ ኑ ፄልሽን፥ ግብፀ ቢታ ቦላ፥ ግብፀ ካዋ ቦላነ እያ ሹማታ ኡባ ቦላ ግታነ ያሽያ ማላታታነ ማላልስያባታ ኦꬅስ። 23 ሽን እ ኑ ማይዛስ እማና ግድ ጫቅዳ ቢታ ኑስ እማናዉ ኑና ግብፀፈ ከስስ። 24 ያትድ ሀች ህንተ በኤይሳዳ ኑስ ኡባ ዎደ ሎኦ ግዳና መላነ ኑኒ ደኦን ዳና መላ፥ ጎዳይ፥ ሀ አዋጆታ ኡባ ኑን ናጋና መላነ ጎዳስ ኑ ፆሳስ ያያና መላ ኪትስ። 25 እ ኑና ኪትዳይሳዳ፥ ጎዳ፥ ኑ ፆሳ ስንꬃን ሀ ኪታ ኡባ ምንꬅድ ናግኮ፥ ሄስ ኑስ ፅሎተꬅ ግዳና” ያግተ።