1 ጎዳይ፥ ነ ፆሳይ ነ ላታናዉ ብያ ቢታ ነና ገልስያ ዎደነ ኔፐ ዎልቃማነ ምንያ ላፑን ካዎተꬃታ፥ ሄሳትካ ህተታ፥ ገርገሰታ፥ አሞረታ፥ ካናነታ፥ ፓርዘታ፥ ህወታነ ያቡሰታ ነ ስንꬃፈ ጎድያ ዎደ፥ 2 ጎዳይ ነ ፆሳይ ነ ኩሸን አꬅድ እምን፥ ነ ኤንታ ፆንያ ዎደ፥ ኤንታ ኩመꬅ ꬋይሳ። ኤንታራ አይብባካ ጫቆፋ፤ ኤንታዉ ቃቶፋ። 3 ኤንታራ ኤከቶፋ፤ ገለቶፋ። ነ ማጫ ናይታ ኤንታ አደ ናይታስ እሞፋ ዎይኮ ኤንታ ማጫ ናይታ ነ አደ ናይታስ ኤኮፋ። 4 ኤንቲ ነ ናይታ ታና ካለይሳ አግድ ሀራ ኤቃታ ጎይናና መላ ኦꬃና። ሄ ዎደ ጎዳ ሀንቆይ ነ ቦላ ኤፃና፤ ነና ኤለስድ ꬋይሳና። 5 ሄሳ ግሾ፥ ኤንታ ያርሾ በሳ ላልተ፤ ጎይንያ ሹቻ ኤቃታ መንረꬅተ። አሼራ ጌተትያ ኤቃ ምስልያ ትንቸረꬅተ፤ ኩሸን ኦሰትዳ ምስለታ ታማን ፁግተ። 6 ኔኒ፥ ነ ጎዳ ፆሳስ ጌሻ ደረ። ጎዳይ፥ ነ ፆሳይ ነና ባዉ ዱማ አስ ኦꬅድ ቢታ ቦላ ደእያ አሳ ኡባፈ ነና ዶርስ።

7 ጎዳይ ህንተና ዶስዳይነ ዶርዳይ ህንተ ሀራ አሳፐ ታይቦን ዳርዳ ግሾ ግደና። ህንተ ሀራ አሳ ኡባፈ ታይቦን ጉꬃ። 8 ሽን ጎዳይ ህንተና ዶስዳ ግሾነ ህንተ ማይዛታስ ጫቅዳ ጫቁዋ ናግዳ ግሾ፥ እ ህንተና አይለተꬃ ቢታፈ፥ ግብፀ ካዋ ኩሸፐ፥ ባ ዎልቃማ ኩሽያን ከስስነ ዎዝስ። 9 ሄሳ ግሾ፥ ጎዳይ፥ ህንተ ፆሳይ ፆሴ ግደይሳ ኤርተ። እ ባና ዶሰይሳታስነ ባ ኪታ ናገይሳታስ ሙኩሉ የለተꬅ ጋካናዉ፥ ባ ሲቁዋ ናግያ አማነትያ ፆሲ። 10 ሽን እ ባና እፀይሳታ ሴራናዉነ ꬋይሳናዉ ጉየ ጌና። 11 ሄሳ ግሾ፥ ታኒ ሀች ነዉ እምያ ኪታ፥ አዋጁዋነ ህግያ ናጋ።

12 ነ ሀ ኪታ ስአዳ ምንꬅ ናግኮ፥ ጎዳይ፥ ነ ፆሳይ ህንተ ማይዛታስ ጫቅዳይሳዳ ባ ሲቆ ጫቁዋ ነዉ ናጋና። 13 እ ነና ዶሳና፤ ነና አንጃና፤ ነ ታይቡዋ ዳርሳና። ቃስ እ ነዉ እማናዉ ነ ማይዛታስ ጫቅዳ ቢታን ነ ኡሎ አይፍያ፥ ቢታ አይፍያ፤ ካꬃ፥ ዎይንያ፥ ዛይትያ፥ መሄ ማራታነ ዶርሳ ማራታ ዳርስድ ነና አንጃና። 14 ነ ሀራ አሳፐ አꬋዳ አንጀትዳይሳ ግዳና። አደይ ዎይኮ ማጭ ዎይኮ ነ መሄይ ማይነና። 15 ጎዳይ ሀርገ ኡባፈ ነና ናጋና። ነኒ ግብፀ ቢታን ኤርያ ኢታ ሀርግያ ነ ቦላ ኤሄና፥ ሽን እ ነና እፅያ ኡባ ቦላ ሄ ሀርግያ ኤሀና። 16 ጎዳይ፥ ነ ፆሳይ ነዉ አꬅድ እምያ አሳ ኡባ ቃቶና ꬋይሳ። ሄስ ነዉ ፅሄ ግዳና ግሾ፥ ኤንታ ፆሳታ ጎይኖፋ።

17 ኔኒ፥ ነ ዎዛናን፥ “ሀ ካዎተꬃት ታፐ ምኖሶና፤ ያትን፥ ታ ኤንታ ዋታዳ ጎዳዳ ከሳኔ?” ጋናዉ ዳንዳኣሳ። 18 ሽን ኤንታዉ ያዮፋ። ጎዳይ፥ ነ ፆሳይ፥ ግብፀ ካዋ ቦላነ ግብፀ ቢታ ኡባ ቦላ ኦꬅዳይሳ አኬካ። 19 ጎዳይ፥ ነ ፆሳይ ነና ግብፀፈ ከስያ ዎደ ኦꬅዳ ግታ ጋዶታ፥ ማላታታ፥ ማላልስያባታ፥ እያ ዎልቃማ ኩሽያነ እያ ምጨትዳ ቀስያ ነ፥ ነ አይፈን በአዳሳ። ሀች ነ ያይያ አሳ ኡባ ቦላ ጎዳይ፥ ነ ፆሳይ ሄሳዳ ኦꬃና። 20 ቃስ ኔፐ ባቃትድ ቆሰትዳይሳት ꬋያና ጋካናዉ ጎዳይ፥ ነ ፆሳይ ኤንታ ግዶን ካዠ የዳና። 21 ሄሳ ግሾ፥ ነ ኤንታዉ ያዮፋ፤ ኔራ ደእያ ጎዳይ፥ ነ ፆሳይ፥ ግታነ ያሽያ ፆሲ። 22 ጎዳይ፥ ነ ፆሳይ ሄ ካዎተꬃታ ጉꬃራ ጉꬃራ ጎድድ፥ ነ ስንꬃፈ ꬋይሳና። ነ ኤንታ ኡባ እስ ቶሆ ꬋይሳካ፤ ሄሳ ነ ኦꬅኮ፥ ቢታን ደእያ ዶአት ዳርድ ነና ዋይሳና። 23 ሽን ጎዳይ፥ ነ ፆሳይ ኤንታ ነ ኩሸን አꬅድ እማና፤ ኤንቲ ꬋያና ጋካናዉ እ ኤንታ ዳጋንꬃና። 24 ኤንታ ካዎታ ነ ኩሸን አꬅድ እማና። ነ ኤንታ ሱንꬃ ሳሎፐ ጋርሳን ቁቻዳ ꬋይሳና። ኦንካ ኔራ ኤቀትድ ዳንዳኤና፤ ነ ኤንታ ꬋይሳና።

25 ኩሸን ኦሰትዳ ኤንታ ኤቃ ምስለታ ታማን ፁጋ። ሄ ምስለታ ቦላ ደእያ ብራ ዎይኮ ዎርቃ አሞቶፍተ፤ ነባ ኦꬃዳ ኤኮፋ። ሄስ ጎዳስ፥ ነ ፆሳስ ቱና ግድያ ግሾ፥ እያፐ ነ ኤክኮ ነዉ ፅሄ ግዳና። 26 ኤንቲ ባንታ ሁጰን ቃንገትዳይሳታ ግድያ ግሾ፥ ነ ሄ ቱና ኤቃታ ነ ሶ ገልሳዳ፥ ኤንታ መላ ባደትዳይሳታ ግዶፓ። ኤንታ ኩመꬅ እፃ፤ ሻተታ።