1 ህንተ ደኦን ዳና መላ፥ ህንተ ታይቦይ ዳራና መላነ ጎዳይ ካሰ ህንተ ማይዛታስ እማና ግድ ጫቅዳ ቢታ ገልድ፥ ህንተ ላታና መላ ሀች ታ ህንተና ኪትያ ኪታ ኡባ ምንꬅድ ናግተ። 2 ጎዳይ፥ ነ ፆሳይ ነዉ እምዳ ኪታ ነ ናግያኮነ ናጎናኮ፥ ነ ዎዛና ቆፋ ኤራናዉ ነና ፓጫናዉነ ነና አዳ ኦꬃናዉ ኦይታሙ ላይꬅ ኩመꬅ ነና መላ ቢታን ዋት ካለꬅዳኮ አኬካ። 3 አዳተꬅ ኤርሳናዉ ነና ኮሻይስስ፤ ያትድ ነ ዎይኮ ነ ማይዛት ኤሮና ማና ነና ሙዝስ። ሄሳ እ ኦꬅዳይ አስ ጎዳ ዶናፐ ከይያ ቃላ ኡባናፐ አትሽን፥ ካꬃ ፃላላን ደኦናይሳ ነና ታማርሳናሳ። 4 ሀ ኦይታሙ ላይꬃታ ግዶን ነ ማእዳ ማኦይ ዉርቤና፤ ነ ቶሆይ ክፅቤና። 5 አስ ባ ናአ ሴረይሳዳ ጎዳይ፥ ነ ፆሳይ ነና ሴሮይሳ አኬካ።

6 እያዉ ያያሸነ እያ ቦንቻሸ ጎዳ ነ ፆሳ ኪታ ናጋ። 7 ጎዳይ ነ ፆሳይ ነና ዛንጋራፐነ ደርያፐ ጎግያ ሻፋትነ ፑልቶት ደእያ ሎኦ ቢታ ገልሳናዉ ኤህስ። 8 ሄ ቢታይ ግስተይነ ባንግ፥ ዎይነይነ ባላሰይ፥ ኦሮማነይ፥ ሻማሆ ዛይተይነ ኤስ ኩምዳ ቢታ። 9 ሄ ቢታይ አይኮይካ ፓጮና ህንተ ካልድ ምያ ቢታ። ሄ ቢታይ ብራት ሹቻዳ ገላ ግድዳ ቢታ። ዙማፐ ማዳበ ብራታ ቦክድ ኤክያ ቢታ። 10 ነ ማዳ ካልዳ ዎደ ነው እ እምዳ ሎኦ ቢታ ግሾ፥ ጎዳ ነ ፆሳ ጋላታ። 11 ታ ሀች ነና ኪትያ እያ ኪታ፥ እያ ህግያነ እያ አዋጁዋ ናጎና እፃዳ፥ ጎዳ ነ ፆሳ ዶጎና መላ ናገታ። 12 ነ ማዳ ካልያ ዎደ፥ ሎኦ ኬꬅ ኬፃዳ እያን ደእያ ዎደ፥ 13 ነ መሄይነ ዶርሳይ ዳርያ ዎደ፥ ነዉ ብርነ ዎርቅ ዳጋየትያ ዎደ፥ ነዉ ደእዳባይ ኡባይ ዳርያ ዎደ፥ 14 ሄ ዎደ፥ ነ ዎዛናይ ኦቶርቶና መላ፥ ግብፀ አይለተꬃ ኬꬃፈ ነና ዎዝዳ ጎዳ፥ ነ ፆሳ ዶጎና መላ ናገታ። 15 እ ነና ኢታ ሾሻይነ ኮርነይ ኩምዳ፥ ሃꬅ ባይና፥ ግታነ ያሽያ መላ ቢታራ ነና ካለꬅዳይሳ ዶጎፓ። እ ነዉ መላ ቢታን ዛላፈ ሃ ꬉስስ። 16 ነ ማይዛት ኤሮና ማና እ ነና መላ ቢታን ሙዝስ። ዉርሰꬃን ነዉ ኡባባይ እንጀታና መላ ነና አዳ ኦꬃናዉነ ፓጫናዉ ሄሳ ኦꬅስ። 17 ኔኒ፥ “ታ ዎልቃይነ ታ ኩሸ ምኖተꬃይ ሀ ዱረተꬃ ታዉ ኤህስ” ጎና መላ ናገታ። 18 ሽን ነ ዱረታና መላ ነዉ ዎልቃ እምዳይ ጎዳ፥ ነ ፆሳ ግደይሳ አኬካ። እ ሄሳ ኦꬅዳይ፥ ሀች ነ በኤይሳዳ፥ ነ ማይዛታራ ጫቅዳ ጫቁዋ ምንꬃናሳ።

19 ሽን ህንተ ጎዳ ህንተ ፆሳ አግድ፥ ሀራ ፆሳታ ካልኮ፥ ኤንታዉ ሆክኮነ ጎይንኮ፥ ህንተ ቱማ ꬋያናይሳ ታ ሀች ማርካታይስ። 20 ጎዳይ፥ ህንተ ፆሳይ ሀራ ካዎተꬃታ ህንተ ስንꬃፈ ꬋይስዳይሳዳ ህንተ እያዉ ኪተቶና እፅኮ ህንተናካ ꬋይሳና።