1 ነኖ፥ እስራኤለ ስአ፤ ኔፐ ግታትያነ ዎልቃምያ ካዎተꬃታ፥ ግምበይ ሳሎ ጋክዳ ግታ ካታማታ ላታናዉ ሀች ዮርዳኖሰ ፕናሳ። 2 ሄ ቢታን ደእያ አሳይ ምኖነ አዱሰ። ኔኒ፥ “ኦንካ ኤንታራ ኤቀታናዉ ዳንዳኦና አናቀ ኮቻታ” ግሽን ስአዳሳ። 3 ሽን ምያ ታማዳ ኔፐ ስንꬃራ በይ ጎዳ፥ ነ ፆሳ ግደይሳ ሀች ኤራ። እ ኤንታ ꬋይሳናነ ነ ስንꬃን ኤንታ ካዉሻና። ጎዳይ ነዉ ግዳይሳዳ ነ ኤንታ ጎዳዳ ከሳናነ ኤለሳዳ ꬋይሳና።

4 ጎዳይ፥ ነ ፆሳይ ኤንታ ነ ስንꬃፈ ጎድዳፐ ጉየ፥ ነ ዎዛናን፥ “ታኒ ፅሎ ግድያ ግሾ፥ ሀ ቢታ ታ ላታና መላ ጎዳይ ታና ኤህስ” ጎፓ። ጎዳይ ኤንታ ነ ስንꬃፈ የደꬅድ ከስዳይ ኤንቲ ኢታ ግድያ ግሾሳ። 5 ነ ኤንታ ቢታ ላታናዉ ይዳይ ነ ፅሎነ ሱረ ግድያ ግሾ ግደና። ሽን ጎዳይ፥ ነ ፆሳይ ኤንታ ነ ስንꬃፈ ጎድዳይ ሀ ካዎተꬃት ኢታ ግድያ ግሾነ በን ነ ማይዛታስ አብራሃመስ፥ ይሳቃስነ ያይቆባስ ጫቅዳ ጫቁዋ ናጋናሳ። 6 ህዛ ነ ሄሳ አኬካ። ጎዳይ፥ ነ ፆሳይ ሀ ሎኦ ቢታ ነና ላትሰይ ነ ፅሎተꬃ ግሾሳ ግደና፤ ነኒ ዎዛን ሙምዳ አስ።

7 ጎዳ፥ ህንተ ፆሳ መላ ቢታን ዋትድ ይሎይዳኮ ዶጎፕተ። ህንተ ግብፀ ቢታፈ ከይዳ ጋላሳፐ ዶምድ፥ ሀች ሀ በሳ ጋካናዉ ጎዳ ቦላ ማካልደታ። 8 ኮሬባ ዙማ ቦላ ጎዳይ ህንተና ꬋይሳናዉ ደንዳና ጋካናዉ ህንተ ጎዳ ይሎይደታ። 9 ጎዳይ ህንተራ ጫቅዳ ጫቆይ ፃፈትዳ ሎቸ ሹቻታ ኤካናዉ ታኒ ዙማ ቦላ ከይዳ ዎደ፥ ያን ካꬅ ሞናነ ሃ ኡዮና ኦይታሙ ጋላስነ ኦይታሙ ቃማ ጋምአስ። 10 ሄሳፈ ጉየ፥ ፆሳ ብራን ፃፈትዳ ናምኡ ሎቸ ሹቻታ ጎዳይ ታዉ እሚስ። ህንተ ዙማ ፃጶን ሺቅዳ ዎደ ታማ ግዶን ጎዳይ ህንተዉ እምዳ ኪታት ሄ ሎቸ ሹቻ ቦላ ፃፈትድ ኡትዶሶና። 11 ኦይታሙ ጋላሳፐነ ቃማፈ ጉየ፥ ጎዳይ ባ ጫቆ ቃላይ ፃፈትዳ ናምኡ ሎቸ ሹቻታ ታዉ እሚስ። 12 ሄሳፈ ጉየ፥ ጎዳይ ታኮ፥ “ኤለሳዳ ሀይሳፈ ዱገ ዎꬋ፤ ኔኒ ግብፀፈ ከስዳ ነ አሳይ ቱንስ፤ ኤንቲ ታ ኪታ ኤሶን አግድ፥ ኩሸን ኦሰትዳ ኤቃ ጎይናናዉ ስምዶሶና” ያግስ።

13 ቃስካ ጎዳይ ታኮ፥ “ታኒ ሀ አሳ በአስ፤ ኤንቲ ቱማ ዎዛና ሙመ አስ። 14 ህዛ ታ ኤንታ ꬋይሶና መላነ ኤንታ ሱንꬃ ቢታ ቦላፈ ቁቾና መላ ታና ድጎፋ። ታ ነና ኤንታፈ ምኖነ ዳርያ ካዎተꬅ ከሳና” ያግስ።

15 ታኒ ጫቆ ቃላይ ፃፈትዳ ናምኡ ሎቸ ሹቻታ ታ ኩሸን ኦይካዳ ዙማ ቦላፈ ዎꬋስ፤ ሄ ዎደ ታማ ላጮይ ዙማ ቦላ በንቴስ። 16 ሄ ዎደ ጎዳ፥ ህንተ ፆሳ ቦላ ህንተ ናጋራ ኦꬅዳይሳ በአስ። ህንተ ማራ ምስለን ኦሰትዳ ዎርቃ ኤቃ ጊግስደታ። ጎዳይ፥ ህንተና ኪትዳ ኦግያፐ ኤሶን ሀራ ሶ ስምደታ። 17 ታኒ ታ ኩሸን ኦይክዳ ናምኡ ሎቸ ሹቻታ ሆላዳ ህንተ በእሽን መንꬃስ። 18 ሄሳፈ ጉየ፥ ጎዳ ይሎያናዉ ህንተ እያ ስንꬃን ኢታ ኦሶ ኦꬅድ፥ ናጋራ ኦꬅዳ ግሾ፥ ካሰይሳዳ ኦይታሙ ጋላስነ ኦይታሙ ቃማ ጎዳ ስንꬃን ጉፋናዳ ጋምአስ፤ ሄ ዎደ ታ ካꬅ ማብከ፤ ሃ ኡያብከ። 19 ጎዳይ ህንተ ቦላ ይሎትድ ꬋይሳናዉ ደንድዳ ግሾ ታኒ ያያስ። ሽን ጎዳይ ዛሪድ ታና ስእስ። 20 ቃስ ጎዳይ ይሎትድ አሮናካ ꬋይሳናዉ ኮይስ፤ ሽን ታኒ ሄ ዎደ አሮናስ ዎሳስ። 21 ታኒ ህንተ ናጋራን ኩምዳ ሄ ማራ ምስልያ ኤካዳ፥ ታማን ፁጋስ። እያ ትንቸረꬃ ጋጫዳ ꬊለ ከሳስ፤ ሄ ꬊልያ ዙማፐ ጎግያ ሃꬃራ የዳስ።

22 ቃስ ህንተ ታበራን፥ ማሳሀንነ ቅብሮት-ሀታዋን ጎዳ ይሎይደታ። 23 ጎዳይ ህንተኮ፥ “ብድ፥ ታኒ ህንተዉ እምዳ ቢታ ላትተ” ያግድ፥ ቃደስ-ባርነፈ የድዳ ዎደካ ህንተ ጎዳ፥ ህንተ ፆሳ ኪታ እፅድ ማካልደታ። እያዉ አማነትበከታ ዎይኮ እያ ቃላስ ኪተትበከታ። 24 ታኒ ህንተና ኤርዳ ዎድያፐ ዶምድ፥ ህንተ ጎዳስ ማካልደታ።

25 ጎዳይ ህንተና ꬋይሳና ግዳ ግሾ፥ ታኒ ኦይታሙ ጋላስነ ኦይታሙ ቃማ ጎዳ ስንꬃን ጉፋናዳ ጋምአስ። 26 ታኒ ጎዳ ፆሳኮ ሀይሳዳ ያጋዳ ዎሳስ፤ “አቤት ኡባ ሃርያ ጎዳዉ፥ ኔኒ ነ ግታ ዎልቃን ዎዝዳነ ነ ምኖ ኩሸን ግብፀፈ ከስዳ፥ ነ ላታ ግድዳ ነ አሳ ꬋይሶፋ። 27 ነ አይለታ፥ አብራሃመ፥ ይሳቃነ ያይቆባ ቆፓ፤ ኤንታ ዎዛና ምኖተꬃ፥ ኤንታ ኢታተꬃነ ኤንታ ናጋራ ታይቦፓ። 28 ሄስ ሀኖና አትኮ፥ ኔኒ ኑና ያፐ ከስዳ ግብፀ አሳይ፥ ‘ጎዳይ ኤንታዉ እማና ግዳ ቢታ ገልሳናዉ ዳንዳእቦና ግሾነ ኤንታ እፅዳ ግሾ፥ መላ ቢታን ዎꬋናዉ ኤንታ ከስስ’ ያጋና። 29 ግዶሽን፥ ሀ አሳይ ኔኒ ነ ግታ ዎልቃንነ ነ ምጨትዳ ቀሰን ግብፀፈ ከስዳ ነ ላታ ግድዳ ነ አሳ” ያጋስ።