1 ሄ ዎደ ጎዳይ ታኮ፥ “ኮይሮይሳ መላ ናምኡ ሎቸ ሹቻታ ጊግሳዳ ታኮ ዙማ ቦላ ከያ። ቃስ እያ ዎꬃናዉ ምꬃፈ ታቦተ ኦꬃ። 2 ታኒ ካሰ ነ መንꬅዳ ሹቻታ ቦላ ደእያ ቃላታ ሀ ሹቻታ ቦላ ፃፋና፤ ነ ኤንታ ታቦትያ ግዶን ዎꬃ” ያግስ።

3 ታኒ ሶቃላ ምꬃፈ ታቦተ ኦꬃስ። ካሰይሳ መላ ናምኡ ሎቸ ሹቻታ ጊግሳስ፤ ሄ ሹቻታ ታ ኩሸን ኦይካዳ ዙማ ቦላ ከያስ። 4 ህንተ ዙማ ፃጶን ሺቅዳ ጋላስ፥ ታማ ግዶፈ ጎዳይ ህንተዉ ኦድዳ ቃላታ፥ ሄስካ ታሙ ኪታታ፥ ካሰ ፃፍዳይሳታ ሄ ሹቻታ ቦላ ጎዳይ ፃፍድ ኤንታ ታዉ እሚስ። 5 ሄሳፈ ጉየ፥ ታኒ ዙማ ቦላፈ ዎꬋዳ፥ ጎዳይ ታና ኪትዳይሳዳ፥ ሄ ሹቻታ ታ ኦꬅዳ ታቦትያ ግዶን ዎꬃስ፤ ሀእካ ኤንቲ ያን ደኦሶና።

6 እስራኤለ አሳይ ባኣሮታ በንያቃናፐ ደንድድ፥ ሙሰራ ብዶሶና። አሮን ያን ሀይቅድ ሞገትስ፤ እያ ናአይ አላዛር እያ ላትድ፥ እያ በሳን ካህነ ሀላቃ ግድስ። 7 ኤንቲ ያፐ ጉድጎዳ ጌተትያ በሳ ብዶሶና፤ ያፐ ቃስ ጎግያ ሃꬃት ደእያ ዮፅባታ ጌተትያ በሳ ብዶሶና። 8 ሄ ዎደ ጎዳ ጫቆ ታቦትያ ቶካና መላ፥ ጎዳ ስንꬃን ኤቅድ እያ ሀጋዛና መላነ ሀች ጋካናዉ ኤንቲ ኦይሳ መላ ጎዳ ሱንꬃን አንጃና መላ ሌወ ኮቻ ጎዳይ ባዉ ዱማይስ። 9 ሄሳ ግሾ፥ ሌወ ኮቻስ ኤንታ እሻታ ግዶን ግሾይ ዎይኮ ላት ባዋ፤ ጎዳይ፥ ህንተ ፆሳይ ኤንታዉ ግዳይሳዳ ኤንታ ላታይ ጎዳ።

10 ታኒ ካሰይሳዳ ኦይታሙ ጋላስነ ኦይታሙ ቃማ ዙማ ቦላ ጋምአስ። ጎዳይ ዛሪድ ታ ዎሳ ስእድ ህንተና ꬋይሳናዉ ኮይቤና። 11 ጎዳይ ታኮ፥ “ታኒ ኤንታ አዋታስ እማና ጋዳ ጫቅዳ ቢታ ኤንቲ ገላና መላነ ላታና መላ ሀ አሳ ካለꬃ” ያግስ።

12 ነኖ፥ እስራኤለ፥ ጎዳይ ኔፐ ኮየይ ሀይሳ፤ ጎዳ፥ ነ ፆሳ ያያ፤ እያ ኦግያ ኡባን ባ፤ እያ ዶሳ፤ ነ ኩመꬃ ዎዛናፐነ ነ ኩመꬃ ሸምፑዋፈ ጎዳ ነ ፆሳስ ኦꬃ። 13 ነዉ እንጀታና መላ ታ ሀች ነዉ እምያ ጎዳ ኪታታነ አዋጆታ ናጋ።

14 ሳሎይነ ሳሎፐ ቦላራ ደእያ ሳሎት፥ ቃስ ሳእነ ሳአን ደእያ ኡባይ ጎዳ፥ ነ ፆሳባ ግደይስ ቱማ። 15 ግዶሽን፥ ጎዳይ ህንተ ማይዛታን ኡፋይትድ፥ ኤንታ ሲቅስ፤ ሀች ህንተ በኤይሳዳ ኤንታፈ ጉየን ኤንታ ሼሽ ግድዳ ህንተና ካዎተꬃታ ኡባፈ አꬅድ ዶርስ። 16 ሄሳ ግሾ፥ ህንተ ዎዛና ቃፃርተ፤ ህዛፐ ህንተ ዎዛና ምንꬆፍተ። 17 ጎዳይ፥ ህንተ ፆሳይ ፆሳታ ፆስነ ጎዳታ ጎዳ። እ ግታ ፆሲ፤ እ ዎልቃማነ ያሽያ ፆሲ። እ ሶምኦ በእድ ፕርደና፤ ዎꬋፈ ኤከና። 18 እ ይኦታስነ አምኤታስ ሱረ ፕርዴስ፤ በታንቹዋ ሲቅድ፥ እያዉ ካꬅነ ማኦ እሜስ። 19 ህንተካ በታንቾታ ሲቅተ፤ ህንተ ህንተ ሁጰን በተ አስ ግድድ ግብፀን ደእደታ። 20 ጎዳ፥ ነ ፆሳ ያያ፤ እያዉ ኦꬃ፤ እያራ ኦይከታ፤ እያ ሱንꬃን ጫቃ። 21 ኔኒ ነ አይፈን በእዳ ግታነ ያሽያ ማላልስያባታ ነዉ ኦꬅዳይ፥ እ ነ ጋላታ፤ ነ ፆሳ። 22 ግብፀ ቢታ ዎꬍዳ ህንተ ማይዛት ኩመꬅ ላፑን ታማ፤ ሀእ ጎዳይ፥ ህንተ ፆሳይ ህንተና ሳሎ ፆልንቶታዳ ዳርስስ።