1 ህዛ ጎዳ፥ ነ ፆሳ ዶሳ፤ እያ አዋጁዋ፥ ዎጋ፥ እያ ህግያነ እያ ኪታ ኡባ ዎደ ናጋ። 2 ህንተ ናይት በኦናባነ ኤሮናባ ግድኮካ፥ ህንተ ሀች ጎዳ ሴራ፥ እያ ግታተꬃ፥ እያ ዎልቃማ ኩሽያነ ምጨትዳ ቀስያ በእዳይሳ አኬክተ። 3 ህንተ እ ኦꬅዳ ማላታታነ ግብፀ ካዋ ቦላነ እያ ቢታ ኡባ ቦላ ኦꬅዳ ማላልስያባታ በእደታ። 4 ኤንቲ ህንተና ካልድ ጎድዳ ዎደ፥ ጎዳይ ግብፀ ቢታ ኦላንቾታ፥ ኤንታ ፓራታነ ፓራ ጋረታ ዞኦ አባን ምትስድ፥ ሀች ጋካናዉ ኤንታ ኩመꬅ ꬋይስዳይሳ በእደታ። 5 ህንተ ሀ በሳ ጋካናዉ መላ ቢታን ጎዳይ ህንተዉ ኦꬅዳባ ህንተ ኤሬታ። 6 ሮቤላ ኮቻፈ ኤልኣባ ናይታ ግድዳ ዳታነ ቦላነ አቤሮ ቦላ ጎዳይ ኦꬅዳይሳ አኬክተ። እስራኤለ አሳ ኡባይ በእሽን፥ ቢታይ ዶየትድ፥ ኤንታ፥ ኤንታ ሶ አሳ፥ ኤንታ ዱንካንያነ ሸምፖራ ደእያ ኤንታባ ኡባ ምትስ። 7 ጎዳይ ኦꬅዳ ሀ ግታ ኦሶታ ኡባ ህንተ፥ ህንተ አይፈን በእደታ።

8 ህዛ ህንተ ምኖ ግዳና መላነ ዮርዳኖሰ ፕንድ ህንተ ኤካናዉ ብያ ቢታ ላታና መላ ታኒ ሀች ህንተና ኪትያ ኪታ ኡባ ናግተ። 9 ህንተ ኪተትኮ፥ ጎዳይ ህንተ ማይዛታስነ ኤንታ ኮቻስ እማና ግድ ጫቅዳ፥ ማꬅነ ኤስ ጎግያ ቢታን ህንተ አዱሳ ላይꬅ ዳና። 10 ነ ላታናዉ ብያ ቢታይ፥ ነ ከያዳ ይዳ ግብፀ ቢታ መላ ግደና። ግብፀን ነ ካꬅ ዘራዳ፥ ጎሻ ቢታ ኡባ አታክልተ በሳዳ ሃ ኡሻሳ። 11 ሽን ዮርዳኖሰ ፕንድ ህንተ ላታናዉ ብያ ቢታይ፥ ደረይነ ዛንጋራይ ደእያ፥ ሳሎ እራን አልያ ቢታ። 12 ሄ ቢታይ፥ ጎዳይ ነ ፆሳይ ናግያ ቢታ፤ ላይꬃ ዶመꬃፈ ብድ ላይꬃ ዉርሰꬃ ጋካናዉ ጎዳ፥ ነ ፆሳ አይፈይ እያ ቦላ ደእያ ቢታ።

13 ሄሳ ግሾ፥ ጎዳ፥ ህንተ ፆሳ ሲቅኮ፥ ህንተ ኩመꬃ ዎዛናፐነ ህንተ ኩመꬃ ሸምፑዋፈ እያ ጎይንኮ፥ ታኒ ሀች ህንተዉ እምያ ኪታ ህንተ ናግኮ፥ 14 ነ ካꬅ፥ ዎይነይ ዛይተይ ፓጮና ሺሻና መላ ቶርቸነ ስላ እራ ዎደን ዎደን ቡክሳና። 15 ጎዳይ ነ መህያስ ማታ ዳርሳና፤ ነ ማና፤ ካላና።

16 ህንተ ዎዛና ሀራ ሶ ዛሪድ፥ ሀራ ፆሳታ ጎይኖና መላነ ሆኮና መላ ናገትተ። 17 ሄሳ ህንተ ኦꬅኮ፥ ጎዳ ሀንቆይ ህንተ ቦላ ኤፃና፤ እራይ ቡኮና መላነ ካꬅ ዶሎና መላ እ ሳሉዋ ጎርዳና። ህንተ ጎዳይ ህንተዉ እምያ ሎኦ ቢታፈ ኤሶን ꬋያና።

18 ህዛ፥ ሀ ኪታታ ህንተ ዎዛናንነ ህንተ ቆፋን ዎꬅተ። ማላዳ ኤንታ ህንተ ኩሸን ቃችተ፤ ቃስ ህንተ ሶምኦን ቃችተ። 19 ህንተ ናይታ ታማርስተ። ህንተ ሶን ደእያ ዎደ፥ ኦገን ሄመትያ ዎደ፥ ዝንእያ ዎደነ ደንድያ ዎደ ኤንታዉ ኦድተ። 20 ህንተ ፐንገ ዝዝግያ ቦላነ ህንተ ድርሳ ፐንግያ ቦላ ፃፍተ። 21 ሄሳ ህንተ ኦꬅኮ፥ ጎዳይ ህንተ ማይዛታስ እማና ግድ ጫቅዳ ቢታን፥ ህንተ ላይꬃይነ ህንተ ናይታ ላይꬃይ ሳአፐ ቦላራ ደእያ ሳሎ መላ ግዳና።

22 ህንተ ጎዳ፥ ህንተ ፆሳ ዶስኮ፥ እያ ኦገ ኡባን ህንተ ቢኮ፥ እያዉ አማነትኮ፥ ታ ሀች ህንተዉ እምያ ኪታ ህንተ ምንꬅድ ናግኮ፥ 23 ጎዳይ ሀ ካዎተꬃታ ኡባ ህንተ ስንꬃፈ ጎድድ ከሳና። ህንተፈ ዳርያነ ዎልቃምያ ካዎተꬃታ ቢታ የግስድ ኤካና። 24 ቶሆን ህንተ የꬍዳ ቢታ ኡባይ ህንተባ ግዳና። ህንተ ዛዋይ ዱገሀ መላ ቢታፈ ብድ ልባኖሰ ጋካናዉነ ኤፍራፂሳ ሻፋፐ ብድ ግታ አባ ጋካናዉ ግዳና። 25 ህንተራ አይ አስካ ኤቀታናዉ ዳንዳኤና፤ ጎዳይ፥ ህንተ ፆሳይ ህንተዉ ግዳይሳዳ ህንተ ብያ ሶ ኡባን አሳይ ህንተና በእድ ዳጋማና መላነ ህንተዉ ያያና መላ ኦꬃና።

26 ሄኮ፥ ታ ሀች ህንተ ስንꬃን አንጆነ ባደꬅ ዎꬃይስ። 27 ታ ሀች ህንተና ኪትያ ጎዳ፥ ህንተ ፆሳ ኪታ ናግኮ፥ ህንተ አንጀታና። 28 ሽን ታኒ ህንተና ሀች ኪትያ ጎዳ፥ ህንተ ፆሳ ኪታ ናጎና እፅድ፥ ሀራ ፆሳታ ጎይናናዉ እያ ኦግያፐ ደሽኮ፥ ህንተ ባደታና። 29 ጎዳይ፥ ህንተ ፆሳይ ህንተ ላታናዉ ብያ ቢታ ህንተና ገልስያ ዎደ፥ ባደꬃ ጋርዛና ዙማ ቦላ፥ አንጁዋ ኤባላ ዙማ ቦላ አዋጅተ። 30 ሀ ዙማት ዮርዳኖሰ ሻፋፐ ሄፍንꬃን ኦግያፐ ዉሎሀ ባጋን፥ አራባን ደእያ ካናነታ ቢታን፥ ጋልጋላ ስንꬃን ደእያ ሞረ ምꬃ ማታን ደኦሶና። 31 ህንተ ሀእ ጎዳይ፥ ህንተ ፆሳይ ህንተዉ እምያ ቢታ ላታናዉ ዮርዳኖሰ ሻፋ ፕናና ሀኔታ። ህንተ ሄ ቢታ ኤክድ ያን ደእያ ዎደ፥ 32 ታ ሀች ህንተዉ እምያ አዋጆታነ ህግያ ኡባ ምንꬅድ ናግተ።