1 ህንተ ላታና መላ ጎዳይ፥ ህንተ አዋታ ፆሳይ ህንተዉ እምዳ ቢታን ህንተ ደእዳ ዎደ ኡባን ህንተ ኦꬃናዉ በሲያ አዋጆትነ ህገት ሀይሳታ። 2 ህንተ ላትያ ቢታን ደእያ ካዎተꬃታስ ደርያ ቦላ፥ ዙማ ቦላነ እስ እስ ምꬃ ጋርሳን ደእያ ጎይኖ በሳታ ꬋይስተ። 3 ኤንታ ያርሾ በሳታ ላልተ፤ ኤንታ ጎይኖ ሹቻ ቱሳታ መንረꬅተ። አሼራ ጌተትያ ኤንታ ኤቃ ምስልያ ታማን ፁግተ፤ ኩሸን ኦሰትዳ ኤንታ ፆሳታ ምስለታ ꬋይስተ፤ ኤንታ ሱንꬃታ ሄ በሳፈ ቁችተ።

4 ጎዳ፥ ህንተ ፆሳ ኤንቲ ባንታ ፆሳ ጎይንያ ኦገን ጎይኖፍተ። 5 ጎዳይ፥ ህንተ ፆሳይ ህንተ ኮቸ ኡባ ግዶፈ ባ ሱንꬃይ ያን ፄገታና መላ ዶርዳ በሳ ኮይተ። ሄ በሳ ህንተ ባናዉ ኮሼስ። 6 ህንተ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋ፥ ህንተ ቃንገꬃ፥ ህንተ ዶስድ እምያ እሙዋ፥ ህንተ መህያፐነ ዶርሳፈ ባይራ ሄ በሳ ኤህተ። 7 ጎዳይ፥ ህንተ ፆሳይ ህንተና አንጅዳ ግሾ፥ ሄሳን፥ ጎዳይ፥ ህንተ ፆሳይ ደእያ በሳን፥ ህንተነ ህንተ ሶ አሳይ ማና፤ ህንተ ኩሸይ ኦꬅዳባ ኡባን ህንተ ኡፋይታና።

8 ሀች ሀይሳን ህንተ እሶይ እሶይ፥ ዶስዳባ ኦይሳዳ ሄ ዎደ ኦከታ። 9 ጎዳይ፥ ህንተ ፆሳይ ህንተዉ እምያ ሸምፖ ቢታ ቡሮ ጋክበከታ። 10 ሽን ህንተ ዮርዳኖሰ ፕንድ፥ ጎዳይ ህንተ ፆሳይ እምያ ሄ ቢታ ላትድ ያን ኡታና። ህንተና ተቅዳ ሞርከታፐ እ ህንተና ሸምፕስያ ግሾ ያን ዎፑ ግድ ህንተ ዳና። 11 ሄ ዎደ ጎዳይ፥ ህንተ ፆሳይ ባ ሱንꬃይ ሄሳን ፄገታናዉ ዶርዳ ሄ በሳን፥ ታ ህንተና ኪትያባ ኡባ፥ ፁሳ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋነ ህንተ ቃንገꬃ ኡባ ያ ኤሄታ። 12 ህንተ፥ ህንተ አደ ናይትነ ህንተ ማጫ ናይት፥ ህንተ አደ አይለትነ ማጫ አይለት ህንተራ ላታ ኤክቦና ህንተ ካታማን ደእያ ሌወታራ እስፈ ያን ጎዳ፥ ህንተ ፆሳ ስንꬃን ኡፋይታና። 13 ኔኒ ፁሳ ያርሹዋ ነ ኮይዳ በሳን ጮ ያርሾና መላ ናገታ። 14 ኔኒ፥ ነ ኮቻፈ እሱዋን፥ ጎዳይ ዶርዳ በሳን፥ ነ ፁሳ ያርሹዋ ያርሻ፤ ታ ነና ኪትዳ ኡባ ያን ኦꬃ።

15 ግዶሽን ነ ደእያ በሳን አዉንካ ነ መህያፐ ጎዳይ ነና አንጅዳይሳዳ ሹካዳ ማ። ዎጋዳ ቱና ግድን ዎይኮ ቱና ግዶና አስ ኦንካ ጋራነ ገንኤ መይሳዳ ነ መህያፐ ሹካዳ ማ። 16 ሽን ሱꬅ ሃꬃዳ ሳአን ጉሳፈ አትሽን፥ ሞፓ። 17 ነ ካꬃፈ፥ ዎይንያፐነ ዛይትያፐ እምያ አስራታ፥ ነ መህያፐነ ዶርሳ ዉድያፐ እምያ ባይራ፥ ጎዳስ ቃንግዳባ ኡባነ ነ ዶሳን እምያ እሙዋ ኡባ ነ ደእያ ሄራን ሞፓ። 18 ሽን ነኒ፥ ነ አደ ናይትነ ነ ማጫ ናይት፥ ነ አደ አይለትነ ማጫ አይለት ኔራ ላታ ኤክቦና ነ ካታማን ደእያ ሌወታራ እስፈ ጎዳይ፥ ነ ፆሳይ ዶርዳ በሳን፥ ጎዳ፥ ነ ፆሳ ስንꬃን፥ ሀ ያርሾ ኡባ ማ። ነ ዳቡራዳ ሺሽዳባን ጎዳ፥ ነ ፆሳ ስንꬃን ኡፋይታ። 19 ነ ደኦ ላይꬃ ኡባን ሌወታ ቀል ጎና መላ ናገታ።

20 እ ነዉ ገልዳ ቃላዳ ጎዳይ ነ ፆሳይ ነ ዛዋ ዳልግስያ ዎደ ነና አሾ ማናዉ ኮሽያ ዎደ ነ ኮይዳ መላ ማ። 21 ሽን ጎዳይ፥ ነ ፆሳይ ባ ሱንꬃይ ያን ፄገታና መላ ዶርዳ በሳይ ነዉ ሃክኮ፥ ጎዳይ ነዉ እምዳ ነ መሄ ዎይኮ ዶርሳ ዉድያፐ ታ ነና ኪትዳይሳዳ፥ ነ ኮይዳ መላ ነ ካታማን ሹካዳ ማ። 22 ዎጋዳ ቱና ግድን ዎይኮ ቱና ግዶና አስ ኦንካ ጋራ ዎይኮ ገንኤ መይሳዳ ሞ። 23 ደኦይ ሱꬃን ደእያ ግሾ፥ ሱꬅ ደእያ አሾ ሞና መላ ናገታ፤ ሄሳ ግሾ፥ ደኦ አሾራ ጋꬃዳ ሞፓ። 24 ሱꬅ ሃꬃዳ ቢታን ጉሳፈ አትሽን፥ ሞፓ። 25 ነዉነ ኔፐ ጉየራ ያና ነ ናይታስ እንጀታና መላ ሱꬅ ሞፓ። ሄሳ ነ ኦꬅኮ ጎዳ ኡፋይሳሳ።

26 ሽን ነ ጎዳስ ዱማይዳባነ እያዉ ቃንግዳባ ኤካዳ፥ ጎዳይ ዶርዳ በሳ ባ። 27 ፁሳ ያርሾ አሹዋነ ሱꬃ ጎዳ፥ ነ ፆሳ ያርሾ በሳን ያርሻ። ሀራ ያርሾ ሱꬃ ጎዳ፥ ነ ፆሳ ያርሾ በሳ ማታን ጉሳዳ አሹዋ ማ። 28 ነዉነ ነ ናይታስ እንጀታና መላ ታ ነና ኪትያ ኪታ ምንꬃዳ ናጋ። ሄሳ ነ ኦꬅኮ፥ ጎዳ ነ ፆሳ ኡፋይስያባነ ሱረባ ኦꬃሳ።

29 ነ ላታናዉ ብያ ካዎተꬃ፥ ጎዳይ ነ ፆሳይ ነ ስንꬃፈ ꬋይስያ ዎደነ ነ ኤንታ ቢታ ላትያ ዎደ፥ 30 ኤንቲ ነ ስንꬃፈ ꬋይዳፐ ጉየ፥ ነ ኤንታ ፆሳታ ጎይናዳ፥ ፅሄን ኦይከቶና መላ ናገታ። ኔኒ፥ “ሀ ካዎተꬃት ባንታ ፆሳታ ዋትድ ጎይኖና?” ያጋዳ ካላዳ ኦይቾና መላ ናገታ። 31 ኤንቲ ባንታ ፆሳታ ጎይንያ ዎደ ጎዳይ እፅያ ኡባ ኦꬅያ ግሾ፥ ጎዳ ነ ፆሳ ነ ሄሳዳ ጎይናናዉ በሰና። ኤንቲ ሀር አቶሽን፥ ባንታ አደ ናይታነ ማጫ ናይታ ባንታ ፆሳታስ ያርሾ ኦꬅድ ታማን ፁጎሶና።

32 ህዛ ታ ነና ኪትዳባ ኡባ ኦꬃ፤ እያ ቦላ ጉጆፋ፤ እያፐ ፓጭሶፓ።