1 “ላፑንꬃ ላይꬃ ዉርሰꬃን ታልኤ አጮ ኡባ ማራ። 2 ነ አጮ ማራና ዎጋይ ሀይሳ፤ እስራኤለ ግድዳ ባ እሻስ ታልእዳ ኦንካ ሄ አጩዋ ማሮ። ጎዳ ማሮተꬃይ አዋጀትዳ ግሾ፥ እስራኤለ ግድዳ ባ እሻስ ታልእዳ ባ ታልእያ ኦይቾፎ። 3 ሀራ ቢታ አሳስ ነ ታልእዳ አጩዋ ኤካናዉ ዳንዳኣሳ፥ ሽን ነ ኮቻስ ታልእዳባ ኡባ ማራ።

4 “ነ ላታና መላ ጎዳይ፥ ነ ፆሳይ ነዉ አቆ ኦꬅድ እምያ ቢታን፥ ጎዳይ ነና አንጃና ግሾ ነ ግዶን ማንቆይ ዴና። 5 ነ ጎዳስ ነ ፆሳስ ኪተትኮ፥ ታ ሀች ነና ኪትያ ኪታ ኡባ ናግኮ፥ ነ ፖሎ አንጀታና። 6 ጎዳይ፥ ነ ፆሳይ ነዉ ኦድዳይሳዳ ነና አንጃና፤ ዳሮ ካዎተꬃት ህንተፈ ታልአና፥ ሽን ህንተ እሱዋፈካ ታልኤከታ። ቃስ ነ ካዎተꬃታ ሃራና፥ ሽን እሶይካ ነና ሃረና።

7 “ጎዳይ፥ ነ ፆሳይ ነዉ እምያ ቢታን ደእያ ካታማታፐ እሱዋን ደእያ እስራኤለ አስ ማንቅድ በንትኮ፥ እያዉ ኡሎ ምኖፋ፤ ነ ኩሽያ ሺሻ ኤኮፋ። 8 ነ ኩሽያ እያዉ ብርሻ፤ እያ ኮሽያባ ታልአ።

9 “አጮ ማርያ ላፑንꬃ ላይꬅ ማትስ” ጋዳ፥ ማንቆ እስራኤለ አስ ታልኤ ድጎፋ፤ ሄሳ መላ ኢታ ቆፍ ነ ዎዛናን ገሎፖ። ነ እያዉ ታልኦና እፅን፥ እ ፆሳኮ ዬክኮ፥ ሄስ ነዉ ናጋራ ግዳና። 10 ነ እያዉ ኬሀተꬃን እማ፤ ነ ዎዛናን አይስ እምያና ጋዳ ኡዘቶፋ። ሄሳ ነ ኦꬅኮ፥ ጎዳይ ነ ፆሳይ ነና ኦይክዳባን የꬍዳባን ኡባን አንጃና። 11 አዉደካ ግድን፥ ቢታ ቦላፈ ማንቆይ ꬋዮና ግሾ፥ ነ እስራኤለታስ፥ ማንቆታስነ መቶታንቾታስ ህንተ ኬሀ ግዳና መላ ኪታይስ።

12 አደ ግድን ማጫ ግድን፥ እስራኤለ አስ፥ አይለ ኦꬅድ ሻምኮ፥ እ ነዉ ኡሱፑን ላይꬅ ኦꬆ፤ ላፑንꬃ ላይꬃን አይለተꬃፈ ላአ ከዮ። 13 ነኒ አይለተꬃፈ እያ ከሳ የድያ ዎደ መላ ኩሸ የዶፋ። 14 ጎዳይ ነ ፆሳይ ነና አንጅዳይሳ መላ ነ መህያፐ፥ ሻልያፐነ ዎይነ ጉምኤꬃፈ ኤንታዉ ኬሀተꬃን እማ። 15 ነኒ ካሰ ግብፀ ቢታን አይለ ግድዳይሳነ ጎዳይ ነ ፆሳይ ነና ያፐ ዎዝዳይሳ ዶጎፓ። ታ ሀች ሀ ኪታ ነዉ እመይ ሄሳሳ።

16 ሽን ነ አይለይ ነናነ ነ ኬꬃ አሳ ዶስዳ ግሾነ ኔራ ደኦይ እያዉ ሎኦ ግድያ ግሾ፥ “ታኒ ነ ሶፐ ቢከ” ያግኮ፥ 17 እያ ፐንገ ኤፋዳ፥ ጎꬅ ኤካዳ፥ እያ ሀይꬃ ሉካ። ያትኮ፥ እ ነዉ መርናዉ አይለ ግዳና፤ ቃስ ማጫ አይለስካ ሄሳዳ ኦꬃ። 18 እያ ኔኒ አይለተꬃፈ ከሳዳ የድያ ዎደ ኔኒ ቆሄታስ ጋዳ ቆፖፋ። እ ሀ ኡሱፑን ላይꬃታ ግዶን አስ ኡነ ኦይሳፈ ዳኮ ዳሮ ነዉ ኦꬅስ። ሄሳ ግሾ፥ ኔኒ ኦꬅያባ ኡባን ጎዳይ፥ ነ ፆሳይ ነና አንጃና።

19 ነ መህያፐነ ነ ዶርሳ ዉድያፐ ባይራ የለትዳ አደ ኡባ ጎዳስ፥ ነ ፆሳስ ዱማያ። ነ ዱማይዳ መህያፐ ባይራ የለትዳ ቦራ ጎዮፓ፤ ነ ዶርሳ ዉድያፐ ባይራ የለትዳ ዶርሳ እክስያ ሜዶፓ። 20 ነነ ነ ሶ አሳይ ጎዳይ ዶርያ በሳን ጎዳ፥ ነ ፆሳ ስንꬃን ሄሳታ ላይꬃን ላይꬃን ማ። 21 ሽን ነ ያርሽያ መህያ ቦላ ቦርስያባይ በንትኮ፥ እ ዎበ ዎይኮ ቆቀ ዎይኮ ሀራ ኢታ ቦርስያባይ እያ ቦላ ደእኮ፥ ሄሳ ጎዳስ፥ ነ ፆሳስ ያርሾፋ። 22 ሄሳ ነ ደእያ ነ ካታማን ማ፤ ዎጋዳ ቱና ግዶና አስ ግድን ዎይኮ ቱና አስ ግድን ጋራነ ገንኤ አሾዳ ሞ። 23 ግዶሽን፥ ነ እያ ሱꬃ ሃꬃዳ ሳአን ጉሳፈ አትሽን፥ ሞፓ።