1 አቢባ አጌናን ጎዳ፥ ነ ፆሳ ፓስካ ባኣለ ቦንቻ፤ ጎዳይ፥ ነ ፆሳይ ነና አቢባ አጌናን ቃማ ግብፀፈ ከስስ። 2 ኔኒ ዶርሳፈነ መሄ ዉድያፐ ጎዳይ ባ ሱንꬃይ ፄገታና መላ ዶርዳ በሳን፥ ጎዳስ፥ ነ ፆሳስ፥ ፓስካ ያርሻ። 3 ሄ ያርሹዋ ነ ምያ ዎደ እርሾይ ገልዳ ኡይꬃራ ሞፓ። ኔኒ ግብፀ የዳዳ ኤሶን ከይያ ዎደ ኦꬅዳይሳዳ እርሾይ ገልቦና መቶ ኡይꬃ ላፑን ጋላስ ኩመꬅ ማ። ነ ደኦ ላይꬃ ኡባን ነ ግብፀፈ ከይዳ ጋላሳ ሀሳያና። 4 ነ ቢታ ኡባን ላፑን ጋላሳስ አይባ እርሾይ በንቶፎ። ቃስ ነ ኮይሮ ጋላስ ኦማርስ ያርሽዳ አሹዋፐ ዎንታስ አይብካ አቶፎ።

5 ነ ፓስካ ያርሹዋ ጎዳይ ነ ፆሳይ ነዉ እምያ ካታማ አዉንካ ጮ ሹኮፋ። 6 ጎዳይ ነ ፆሳይ ባ ሱንꬃይ ፄገታና መላ ዶርያ በሳን ነ ፓስካ ያርሹዋ ሹካ። ቃስ አው ዉልያ ዎደ ግብፀፈ ነ ከይዳ ግሾ ሄ ሳትያን ሹካ። 7 ጎዳይ፥ ነ ፆሳይ ዶርያ በሳን፥ ያን ካꬃዳ ማ፤ ያታዳ ሳእ ዎንትያ ዎደ ነ ሶ ሶ ባ። 8 ኡሱፑን ጋላስ ኩመꬅ እርሾይ ገልቦና ኡይꬃ ማ፤ ላፑንꬃ ጋላስ ጎዳ፥ ነ ፆሳ ጎይናናዉ ሺቃ፤ ሄ ጋላስ አይ ኦሶካ ኦꬆፋ።

9 ነ ካꬃ ጫካ ኦይክዳ ኮይሮ ዎድያፐ ዶማዳ፥ ላፑን ሳምንታ ኩመꬅ ታይባ። 10 ያታዳ፥ ጎዳይ፥ ነ ፆሳይ ነና አንጅዳይሳ መላ ነ፥ ነ ዶሳን እምያ እሙዋ ኤሀዳ፥ ጎዳ፥ ነ ፆሳ ሳምንታ ባኣለ ቦንቻ። 11 ሄሳን ኔኒ፥ ነ አደ ናይት፥ ነ ማጫ ናይት፥ ነ አደ አይለትነ ነ ማጫ አይለት፥ ነ ካታማን ደእያ ሌወት፥ በተ አሳይ፥ ይኦ ናይትነ ነ ግዶን ደእያ አምኤት ኡባይ፥ ጎዳይ፥ ነ ፆሳይ ባ ሱንꬃይ ፄገታና መላ ዶርያ በሳን ኡፋይትተ። 12 ኔኒ ግብፀ ቢታን አይለ ግድዳይሳ ሀሳያዳ ሀ ዎጋ ናጋ።

13 ነ ዉዱማፈ ነ ካꬃ፥ ዎይነ የꬍያ በሳፈ ነ ዎይንያ ሺሽዳፐ ጉየ፥ ላፑን ጋላስ ሻቃራ ባኣለ ቦንቻ። 14 ኔኒ፥ ነ አደ ናይትነ ማጫ ናይት፥ ነ አደ አይለትነ ማጫ አይለት፥ ነ ካታማን ደእያ ሌወት፥ በተ አሳይ፥ ይኦ ናይትነ አምኤት ኡባይ ሄ ባልያን ኡፋይትተ። 15 ጎዳይ ዶርያ በሳን ላፑን ጋላስ ጎዳ፥ ነ ፆሳ፥ ባኣለ ቦንቻ። ነ ኡፋይታና መላ ነ አይፍስዳባንነ ነ ኩሸ ኦሶ ኡባን ጎዳይ፥ ነ ፆሳይ ነና አንጃና።

16 ህንተ ቢታን ደእያ አደ ኡባይ ላይꬃን ሄꬑ ቶሆ፥ ኡይꬃ ባኣለ ዎደ፥ ሳምንታ ባኣለ ዎደነ ሻቃራ ባኣለ ዎደ ጎዳ፥ ህንተ ፆሳ ስንꬃን፥ እ ዶርያ በሳን በንቶ። ኤንቲ ጎዳ ስን ይሸ፥ መላ ኩሸ ዮፖ። 17 ጎዳይ፥ ነ ፆሳይ ነና አንጅዳይሳ መላ እሶይ እሶይ ባዉ ዳንዳኤይሳ መላ እሞ።

18 ጎዳይ፥ ህንተ ፆሳይ እምያ ካታማታን እስ እስ ኮቻስ ዳይናነ ሀላቃ ህንተዉ ሹምተ፤ ኤንቲ አሳስ ፅሎ ፕርዳ ፕርዶ። 19 ፅሎ ፕርዳ ዎቢሶፓ፤ ሶምኦ በአዳ ማዶፋ፤ ዎꬋፈ ኤኮፋ። ዎꬋፈይ ጭንጫታ አይፍያ ቆቅሴስ፥ ፅሎታ ቃላ ጌላዬስ። 20 ነ ደኦን ዳና ማላነ ጎዳይ ነ ፆሳይ ነዉ እምያ ቢታ ነ ላታና መላ ፅሎ ፕርዳ።

21 ኔኒ ጎዳ፥ ፆሳ ያርሾ በሳ ማታን አሼራ ኤቃ ምስልያ ኤሶፋ። 22 ህንተ ጎዳይ፥ ፆሳይ እፅያ ጎይኖ ሹቻ ቱሱ ነዉ ኤሶፋ።