1 ጎዳስ፥ ነ ፆሳስ፥ ቦርስያባይ ደእያ መሄ ዎይኮ ዶርሰ ያርሾ ኦꬃዳ ሺሾፓ፤ ሄስ ፆሳ ስንꬃን እፀትዳባ።

2 ጎዳይ፥ ነ ፆሳይ ነዉ እምያ ካታማታፐ አዉንካ አደ ዎይኮ ማጫ ግድን ጎዳ፥ ነ ፆሳ ስንꬃን ኢታባ ኦꬅኮነ እያ ጫቁዋ መንꬅድ በንትኮ፥ 3 ታ ኪታ አግድ፥ ሀራ ፆሳታ፥ አዋ ዎይኮ አጌና ዎይኮ ሳሎ ፆልንቶ ጎይንዳ አስ ደእኮ፥ 4 ሄሳ መላባ ህንተ ስእኮ፥ ሄ ኦዳ ምንꬅድ ፕልጋ። ህንተ ኮይን፥ ሄሳ መላ ቱናባይ እስራኤለ ግዶን ኦሰትዳይስ ቱማነ ጌሽ ግድኮ፥ 5 ሄ ኢታ ኦꬅዳ አድያ ዎይኮ ማጫስዉ ነ ካታማፐ ጋፃ ከሳዳ፥ ሹቻን ጫዳዳ ዎꬋ። 6 እስ አስ ናምኡ ዎይኮ ሄꬑ ማርክ ማርካቶና ደእሽን ሀይቆፎ፤ እስ አሳ ማርካን አይ አስካ ሀይቆፎ። 7 እያ ቦላ ማርካትዳ አሳት ኮይሮ እያ ሹቻን ጫዶ፤ ኤንታ ካልድ ሀንኮ አሳይ ጫዶ። ሄሳዳ ኦꬃዳ፥ ኢታ ነ ግዶፈ ድጋ።

8 ህንተ ስን ሺቅያ ሞቶይ ዴፆ ግድኮ፥ ሄስካ፥ ሸምፖ ዎꬎ፥ ሾቸ፥ ማዱንꬅ፥ ዱማ ዱማ ሞቶታ ጎዳይ፥ ነ ፆሳይ ዶርዳ በሳ ኤሀ። 9 ካህነ ግድዳ ሌወታኮነ ዳይናታኮ ሄ ሞቱዋ ሺሻ፤ ሄ ሞቱዋ ኤንቲ ፕርዶ። 10 ጎዳይ ዶርዳ በሳን ኤንቲ ፕርድዳይሳዳ ኦꬃ፤ ነ ኦꬃና መላ ኤንቲ ኪትያባ ኡባ አኬካዳ ኦꬃ። 11 ኤንቲ ነና ታማርስዳ ህግያዳነ ኤንቲ ኦድዳ ፕርዳዳ ኦꬃ፤ ኤንቲ ፕርድዳ ፕርዳፈ ኡሻች ዎይኮ ሀድርስ ጎፓ። 12 ጎዳስ፥ ነ ፆሳስ ኦꬅያ ዳይናስ ዎይኮ ካህንያስ ኪተቶና እፅያ አስ ደእኮ፥ ሄ ኡራይ ሀይቆ። ሄሳዳ ኦꬃዳ፥ ኢታ እስራኤለ ግዶፈ ድጋ። 13 አሳ ኡባይ ሄሳ ስእድ ያያና፤ ዛሪድ ሄሳ መላ ኢታ ኦꬅያ አስ ዴና።

14 ጎዳይ፥ ነ ፆሳይ ነዉ እምያ ቢታ ላታዳ፥ ያን ደኦ ዶምያ ዎደ፥ ነ ዩሾን ደእያ ካዎተꬃታዳ፥ “ኑካ ኑ ቦላ ካዎ ካዎꬃና” ያግኮ፥ 15 ነ ካዎꬃና ካዎይ ጎዳይ፥ ነ ፆሳይ ነዉ ዶርዳይሳ ግዳናዉ በሴስ። ሄስካ፥ ነ አሳ ግዶፈ ዶረትዳይሳ ግዶፐ አትሽን፥ ሀራ ቢታ አስ ነ ቦላ ካዎꬆፋ። 16 ጎዳይ፥ “ሄ ኦግያራ ግብፀ ስሞፕተ” ያግዳ ግሾ፥ ሄ ካዎይ ዳሮ ፓራ ሺሻናዉ በሰና፤ ባ አሳካ ፓራ ሻማና መላ ግብፀ የዶፎ። 17 እያ ዎዛና ባለꬆና መላ ካዎይ ዳሮ ማቾ ኤኮፎ፤ ዳሮ ዎርቃነ ብራ ሺሾፖ።

18 እ ባ አራታን ኡትያ ዎደ ሌወ ኮቸ ግድዳ ካህነት ናግያ ማፃፋፐ ሀ ህግያ ዱቅድ ባዉ ኤኮ። 19 እ ሀ ህግያ ቃላነ ዎጋ ናጎነ ፖሎ ኤርድ ጎዳስ፥ ባ ፆሳስ፥ ያሽ ታማራና መላ፥ ሀ ማፃፋይ እያራ ደኦ፤ እካ ሀ ማፃፋ ባ ደኦ ላይꬃ ኡባን ናባቦ። 20 እ ባ ዎዛናን፥ “ታኒ ታ ላገታፐ አꬋይስ” ግድ ባ እሻታ ቦላ ኦቶርተና። እካ ፆሳ ህግያፈ ሀድርስ ዎይኮ ኡሻች ጌና። እ ባ ካዎተꬃን አዱሳ ላይꬅ ካዎታና፤ እያ ናይት እስራኤለ ቢታን ዳሮ ላይꬅ ካዎታና።