1 ሌወ ኮቸ ግድዳ ካህነታስነ አትዳ ኤንታ ኮቻስ እስራኤለ ግዶን ላታ ቢት ባዋ። አሳይ ጎዳስ ሺሽያ ፁሳ ያርሾይ ኤንታ ግሾ ግድያ ግሾ እያ ምሸ ዳና። 2 ኤንታዉ ኤንታ እሻታ ግዶን ላት ዴና፤ ጎዳይ ኤንታዉ ግዳይሳዳ እ ኤንታ ላታ።

3 ኮርማ ዎይኮ ዶርሰ አሳይ ያርሾስ ሺሽዳይሳፈ ካህነታ ግሾይ ሀይሳ፤ ምሳይ፥ ጋጮይነ ኡሎ አሾይ ኤንታዉ እመቶ። 4 ነ ካꬃፈ፥ ዎይንያፐነ ዛይትያፐ ኮይሮ ጋክዳ አይፍያነ ነ ዶርሳ እክስያፐ ባይራ ካህነታስ እማ። 5 ሌወት ጎዳ ሱንꬃን መርናዉ ካህነ ግድድ ኦꬃና መላ ነ ኮቻ ግዶፈ ጎዳይ፥ ነ ፆሳይ ኤንታ ዶርስ።

6 እስ ሌወይ እስራኤለ ቢታን ደእያ እስ ካታማፐ ደንድድ፥ ጎዳይ ዶርያ በሳ ባናዉ ኮይኮ፥ 7 እ ብያ በሳን ደእያ ሌወት ጎዳ ስንꬃን ኤቅድ ኦይሳዳ እካ ጎዳ ባ ፆሳ ስንꬃን ኤቅድ ኦꬆ። 8 ባና ጋክያ ግሹዋ ኤክዳባ ግድኮካ፥ ካህነት ጎኤትያ ኡባ ኤንታራ ግና ሻከትድ ኤኮ።

9 ጎዳይ ነ ፆሳይ እምዳ ቢታ ነ ገልያ ዎደ ሄ ቢታን ደእያ አሳይ ኦꬅያ እፀትዳ ኦሶታ ኦꬆፋ። 10 ባ አደ ናኣ ዎይኮ ማጫ ናእዉ ያርሾስ ታማን ፁግያ ኦንካ ነ ግዶን በንቶፎ። ብት፥ ማራጨ በኤይ፥ ማሮተይ፥ ህግሸይ፥ 11 ሞይትለ በኤይ፥ ሀይቅዳ አሳ አያና ፄገይ፥ ዎይኮ ሀይቅዳ አሳ አያናራ ኦደተይ ነ ግዶን ደኦፖ። 12 ሄሳ መላባ ኦꬅያ ኦንካ ጎዳ ማታን እፀትዳ አስ። ኤንቲ ሄሳ መላ ቱና ኦꬅያ ግሾ፥ ጎዳይ ነ ፆሳይ ሄ ካዎተꬃታ ነ ስንꬃፈ ጎዳና። 13 ሽን ነኒ ጎዳ ነ ፆሳ ስንꬃን ቦረይ ባይናይሳ ግዳ። 14 ነኒ ላታናዉ ብያ ቢታን ደእያ ካዎተꬃት ሙሩነይሳታነ ብተይሳታ፤ ሽን ነ ሄሳ ኦꬆና መላ ጎዳይ ነ ፆሳይ ነና ድግስ።

15 ጎዳይ፥ ነ ፆሳይ ነ ኮቻ ግዶፈ ታ መላ ናበ ነዉ ደንꬃና። ነ እ ገይሳ ስአ። 16 ኮሬባ ዙማ ቦላ ነ ሺቅዳ ዎደ ጎዳ ነ ፆሳ ሀይሳዳ ያጋዳ ኦይቻዳሳ፤ “ታ ሀይቆና መላ ጎዳ፥ ታ ፆሳ ግርሳ ዛራዳ ስእከ፤ ሀ ዎልቃማ ታማ ዛራዳ በእከ” ያጋዳሳ።

17 ጎዳይ ታኮ፥ “ኤንቲ ቱማ ግዶሶና። 18 ታ ኤንታ ኮቻ ግዶፈ ነ መላ ናበ ኤንታዉ ደንꬃና፤ ታኒ ታ ቃላ እያ ዶናን ዎꬃና፤ እ፥ ታ ኪትያ ኡባ ኤንታዉ ኦዳና። 19 እ ታ ሱንꬃን ኦድያ ታ ቃላ ስኦና ኦናካ ታ ኦይቻና። 20 ሽን ታ ኪቶናባ ታ ሱንꬃን ኦድያ ዎይኮ ሀራ ፆሳታ ሱንꬃን ኦድያ ሄ ናበይ ሀይቆ” ያግስ።

21 ኔኒ፥ “ናበይ ኦድያ ቃላይ ፆሳፈ ግዶናይሳ ታ አይብን ሻካዳ ኤራኔ?” ያግኮ፥ 22 ሄ ናበይ ጎዳ ሱንꬃን ኦድዳ ቃላይ ፖለቶና እፅኮ፥ ሄስ ጎዳይ ኦድቦና ቃላ ግደይሳ ኤራሳ። ሄ ናበይ ኦድያ ቃላይ ዎርዶ ግድዳ ግሾ እያ ያዮፋ።