1 ጎዳይ፥ ነ ፆሳይ ነዉ እምያ ቢታን ደእያ ካዎተꬃታ ꬋይስያ ዎደነ ነ ኤንታ ጎዳዳ፥ ኤንታ ካታማታንነ ኤንታ ኬꬃታን ዱሱ ዶምያ ዎደ፥ 2 ጎዳይ፥ ነ ፆሳይ ላታ ኦꬅድ እምያ ቢታን ደእያ ካታማታፐ ሄꬑ ካታማታ ነዉ ዱማያ። 3 ጎዳይ፥ ነ ፆሳይ ነዉ ላታ ኦꬅድ እምያ ቢታ ሄꬓ ከሳዳ ሻካ። ያታዳ አሰ ዎꬍዳ ኦንካ ሄ ካታማታኮ ኤሶን ባቃትድ አታና መላ ኦገ ጊግሳ።

4 እስ አስ ካሰ ሞርከተꬅ ባይና ደእሽን፥ ኤሮና ባ ላግያ ዎꬍኮ፥ እ ሄ ካታማታፐ እሱዋኮ ባቃትድ ባ ሸምፑዋ አሾ። 5 ናምኡ አሳት ምꬅ ቃንፃናዉ ዎራ ብን፥ እሶይ ምꬃ ቃንፅሽን፥ ምꬃፈ ካልታ አይፈይ ኮለትድ ሀንኩዋ ዎꬍኮ፥ ዎꬍዳ ኡራይ ሀ ሄꬑ ካታማታፐ እሱዋኮ ባቃትድ፥ ባ ሸምፑዋ አሾ። 6 ባቃትድ አትያ ካታማይ እስን ፃላላ ግድኮ፥ ዎꬍዳ ኡራይ ኤሶን ዎፅድ ጋካናዉ ኦገይ አዱሰ ግድኮ፥ ሱꬅ ዛርያ ማታ ዳቦይ ጎድ ጋክድ፥ ይሎን ደንድድ ሀይቃናዉ በሶና ኡራ ዎꬋናዉ ዳንዳኤስ። እ ባ ላግያ ዎꬍዳይ ካሰ ሞርከተꬅ ደእያ ግሾ ግደና። 7 ህንተ ሄꬑ ካታማታ ዱማይ ዎꬃና መላ ታ ነና ኪተይ ሄሳሳ።

8 ጎዳይ፥ ነ ፆሳይ ካሰ ነ ማይዛታስ ጫቅዳይሳዳ ነ ዛዋ ዳልግስኮነ ነ ማይዛታስ እማና ግዳ ቢታ ኡባ ነዉ እምኮ፥ 9 ሀ ሄꬑ ካታማታ ቦላ ሀራ ሄꬑ ካታማታ ጉጃ። ሀች ታ ነና ኪትያ ኡባ ነ ፖልኮ፥ ጎዳ ነ ፆሳ ዶስኮነ እ ነና ታማርስዳ ኦግያን ምናዳ ደእኮ፥ ሀ ቢታይ ነዉ እመታና። 10 ሄሳ ነ ኦꬅኮ፥ ጎዳይ፥ ነ ፆሳይ ላታ ኦꬅድ ነዉ እምያ ቢታን ፅሎ አሳ ሱꬅ ጉከና፤ ነካ ሱꬅ ጉሳዳ ኦይሸታካ።

11 ሽን እስ አስ ባ ሾሩዋ እፅድ፥ ቆሰት ናግድ እያ ዎꬍድ፥ ሀ ካታማታፐ እሱዋኮ ባቃትኮ፥ 12 እ ደእያ ካታማን ደእያ ጭማት እ ባቃትዳ ካታማፐ ኤህስድ፥ ኩሸ ዛራናዉ ኮየይሳስ አꬅድ እሞ። 13 እያዉ አይባካ ቃቶፋ፤ ነዉ ኡባባይ እንጀታና መላ፥ ፅሎ ሱꬅ ጉስዳ ኡራ እስራኤለ ግዶፈ ድጋ።

14 ጎዳይ ነ ፆሳይ ነኒ ላታና መላ እምያ ቢታን፥ በን አሳይ ኤስዳ ጋደ ዛዋ ሾዶፋ።

15 እስ አስ ባላ ኦꬃናዉ እስ ማርካ ፃላል ግደና። ናምኡ ዎይኮ ሄꬑ ማርክ ማርካትን፥ ሄ ሞቶይ ፕርደታናዉ ኮሼስ።

16 እስ አስ ሀራ አስ ዎርዶን ሞትኮ፥ 17 ሞተይስነ ሞተተይስ ናምአይ ጎዳ ስንꬃን፥ ካህነታ ስንꬃንነ ዳይናታ ስንꬃን ኤቆ። 18 ዳይናት ሄ ኦዳ ምንꬅድ ፕልጎ፤ ሄ ኡራይ ባ እሻ ዎርዶን ሞተይስ ቱማ ግድኮ፥ 19 ሄ ሞተተይስ ኤካናዉ ደእያ ሴራ ሞተይስ ሴረቶ። ሄሳዳ ኦꬃዳ፥ ኢታ ኡራ ነ ግዶፈ ድጋ። 20 ሄሳዳ ኦꬅኮ፥ ሀራ አሳይ ሄሳ ስእድ ያያና፤ ሄሳ መላ ኢታ ኦሶይ ዛሪድ ኦሰተና። 21 ሄሳ መላ ኢታ ኦሶ ኦꬅዳይሳስ ቃቶፋ፤ ሸምፖ ግሾ ሸምፖ፤ አይፈ ግሾ አይፈ፤ አቻ ግሾ አቸ፤ ኩሸ ግሾ ኩሸ፤ ገዳ ግሾ ገዳ መንꬃ።