1 ነኒ ሞርከታራ ኦለታናዉ ብያ ዎደ፥ ኤንታ ፓራት፥ ፓራ ጋረትነ ኤንታ ኦላንቾት ኔፐ ዳርን በአዳ፥ ኤንታዉ ያዮፋ፤ ነና ግብፀፈ ከስዳ ጎዳይ፥ ነ ፆሳይ ኔራ ደኤስ። 2 ህንተ ኦላ ዶማናፐ ኮይሮ፥ ካህነይ ኦላንቾታ ስን አꬍድ ሀይሳዳ ያጎ፤ 3 “እስራኤለ አሳዉ፥ ስእተ፤ ሀች ህንተ፥ ህንተ ሞርከታራ ኦለታናዉ ሀኔታ። ህዛ ህንተ ዎዛናይ ዳጋሞፎ፤ ያዮፍተ፤ ኤንታ ስንꬃን ኮኮሮፕተ፤ ህርጎፍተ። 4 ጎዳይ፥ ህንተ ፆሳይ ህንተራ ብያ ግሾ፥ ህንተ ሞርከታ ኦልድ፥ ህንተዉ ፆኖ እማና” ያጎ።

5 ቶራ ሞጮናት ኦላንቾታኮ፥ “ኦራꬃ ኬꬅ ኬፅድ ገልቦና አስ ደእኮ፥ እ ኦላን ሀይቅን፥ ሀራ አስ እያ ኬꬃን ገሎና መላ እ ሶ ስሞ። 6 ዎይኮ ዎይነ ቶክድ፥ አይፈ ሞና አስ ደእኮ፥ እ ኦላን ሀይቅን፥ ሀራ አስ እያ ዎይነ አይፍያ ሞና መላ እ ሶ ስሞ። 7 ማቾ ኦይችድ ኤክቦና አስ ደእኮ፥ እ ኦላን ሀይቅን፥ ሀራ አስ እያ ማችዉ ኤኮና መላ እ ሶ ስሞ” ያጎ። 8 ቶራ ሞጮናት ጉጅድ ሀይሳዳ ያጎ፤ “ሀ አሳ ግዶን ያያነ ህርግያ ኦንካ ደእኮ፥ እ ባ ላገታ ዎዛና ያሻን ትልእሳናፐ ሶ ስሞ” ያጎ። 9 ቶራ ሞጮናት ሄሳ አሳስ ኦድ ዉርስያ ዎደ ጩጋስ ጩጋስ ቶራ ሞጮናታ ዶሮ።

10 እስ ካታማ ኦላናዉ ባዳ ነ እያኮ ማትያ ዎደ፥ ኮይሮትድ ሳሮራ ኤንቲ ኩሸ እማና መላ ኦይቻ። 11 ኤንቲ ሳሮራ ባንታ ኩሽያ እምድ፥ ባንታ ግምበ ፐንግያ ዶይድ ነና ገልስኮ፥ ሄ ካታማን ደእያ አሳ ኡባይ ነዉ ዴፆ ኦሶ ኦꬅድ ሀጋዞ። 12 ሄ ካታማ አሳይ ነዉ ሳሮራ ኩሸ እሞና እፅድ፥ ኦላስ ጊገትኮ፥ ነ ሄ ካታማ ዩሹዋ ተቃ። 13 ጎዳይ፥ ነ ፆሳይ ኤንታ ነዉ አꬅድ እምያ ዎደ ሄ ካታማን ደእያ አደ ኡባ ማሻን ዉርሳ። 14 ግዶሽን፥ ማጫሳ፥ ናይታ፥ መህያነ ካታማን ደእያ ኡባባ ነዉ ድአ። ጎዳይ፥ ነ ፆሳይ ነዉ እምያ ነ ሞርከታ ሻሉዋ ጎኤታ። 15 ነ ደእያ በሳፈ ሃክድ ደእያ ካታማታ ነ ኦይክያ ዎደ ሄሳዳ ኦꬃ።

16 ሽን ጎዳይ፥ ነ ፆሳይ ነዉ ላታ ኦꬅድ እምያ ቢታን ሸምፖራ ደእያባ እሱዋካ አሾና ዎꬋ። 17 ጎዳይ፥ ነ ፆሳይ ኪትዳይሳዳ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ዉርሳዳ ዎꬋ። 18 ሄስ ሀኖና እፅኮ፥ ኤንቲ ባንታ ፆሳታ ጎይንሸ ኦꬅያ እፀትዳ ኦሶታ ህንተ ኦꬃና መላ ህንተና ታማርስድ፥ ጎዳ ህንተ ፆሳ ቦላ ህንተ ናጋራ ኦꬃና መላ ደንꬃና።

19 እስ ካታማ ኦይካናዉ ዩሹዋ ነ ተቃዳ፥ ዳሮ ጋላስ ኦለታሸ ጋምእያ ዎደ፥ እያን ደእያ አይፈ እምያ ምꬃ አይፍያ ማፐ አትሽን፥ ቃንፆፋ። ነ ዩሹዋ ተቅድ ኦለይ አሰፐ አትሽን፥ ደንባን ደእያ ምꬃ ግደና። 20 ግዶሽን፥ ነ አይፈ እሞና ሀራ ምꬃታ ቃንፃዳ፥ ኔራ ኦለትያ ካታማይ ኩንዳና ጋካናዉ ያን ሚፃ ኬፃ።