1 ነ ላታና መላ ጎዳይ፥ ነ ፆሳይ ነዉ እምያ ቢታን፥ ኦን ዎꬍዳኮ ኤረቶና አህ ኩንድድ በንትኮ፥ 2 ህንተ ዳይናትነ ጭማት ብድ፥ አሀይ ኩንድዳ በሳፈ ማታ ካታማታ ጋካናዉ ደእያ ሃሆተꬃ ዋꬎ። 3 ሄሳፈ ጉየ፥ አሀይ ኩንድዳ በሳስ ማትያ ካታማ ጭማት፥ ዋታቦናነ ሞርገን ቃምባር ዎꬍቦና ኡስ ኤኮ። 4 እዮ ጎግያ ሃꬅ ደእያ ጎየትድ ኤሮናነ ዘረትድ ኤሮና ዛንጋራ ኤፍድ፥ ሄ ኡሴ ቆꬍያ ምርቅድ መንꬆ። 5 ሄሳ መላ ቆሁዋነ ኦሻ ሻክድ ፕርዳናዉ ጎዳይ፥ ህንተ ፆሳይ ባ ስንꬃን ኦꬃና መላነ ባ ሱንꬃን አንጃና መላ ኤንታ ዶርዳ ግሾ፥ ሌወ ኮቸ ግድዳ ካህነት ሄ በሳ ቦ። 6 ሄሳፈ ጉየ፥ አሀይ ኩንድዳ በሳስ ማትያ ካታማ ጭማት ዛንጋራን ቆ ምርቅድ ዎꬍዳ ኡሴ ቦላ ባንታ ኩሽያ ሜጨትድ፥ 7 “ኑ ኩሸይ ሀ ሱꬃ ጉስቤና፤ ኑ አይፈይ ሄሳ በእቤና። 8 አቤት ጎዳዉ፥ ኔኒ ዎዝዳ ነ አሳ፥ እስራኤለ ማራ፤ ሀ ፅሎ ሱꬃ ነ አሳ ቦላ ናቆ ኦꬃዳ ታይቦፓ። ሀ ፅሎ ሱꬃ ግሾ ኑ ናጋራይ አቶ ጋ” ያጎ። 9 ነኒ ጎዳ አይፍያ ስንꬃን ሄሳዳ ኦꬃዳ፥ ፅሎ ሱꬃይ ጉክዳ ናጋራ ነ ግዶፈ ድጋ።

10 ነ ሞርከታራ ነ ኦለታናዉ ከይን፥ ጎዳይ፥ ነ ፆሳይ ኤንታ ነ ኩሸን አꬅድ እምን፥ ኤንታ ድእያ ዎደ፥ 11 ድኤትዳ አሳ ግዶን እስ ማላ ሎኦ ማጫስ በአዳ፥ እዉ ምሸታዳ ማቻናዉ ኮይኮ፥ 12 እዮ ነ ሶ ኤሀ። እ ሁጵያ ሜዳ፤ እ ፁጉንꬃ ጭጋ፤ 13 ድኤትያ ዎደ ደእያ ማኡዋ ላማዳ፥ እስ አጌና ነ ሶን ኡታዳ፥ ባ አዋስነ ባ አየስ ካዮቶ። ሄሳፈ ጉየ፥ እዮ ማቻ። 14 ያታ ስማዳ፥ ኢራ ዱሳይ ነና ኡፋይሶና እፅኮ፥ እያ ባ ኮይዳ ሶ ባና መላ እዮ የዳ። ኔኒ እዮ ማቾ ኦꬃዳ ኢራ እስፈ አቅዳ ግሾ፥ እዮ ሚሸን ባይዛናዉ ዎይኮ አይለ ኦꬃናዉ በሰና።

15 እስ አሳስ እ ዶስያነ ዶሶና ናምኡ ማቸት ደእኮ፥ ሄ ናምአይካ እያዉ አደ ናአ የልኮ፥ ባይራይ እ ዶሶና ማቸፔ የለትዳባ ግድኮ፥ 16 እ ባ ናይታ ባ ሻሉዋ ላትስያ ዎደ፥ እ ዶሶናርፐ የለትዳ ባይራይ ደእሽን፥ እ ዶስያርፐ የለትዳ ካሉዋ ባይራያናዉ በሰና። 17 ሀራ ናይታስ እመይሳፈ እያዉ ናምኡ ኩሸ አꬅድ እምድ እ ዶሶናር ናአይ ባይራ ግደይሳ ኤርሳናዉ በሴስ። ሄ ናአይ እያዉ ኩሸ ቶሆ ጳልቅዳ ባይራ ግድያ ግሾ፥ ባይራተꬃ እ ኤካናዉ በሴስ።

18 አዋስነ አየስ ኪተቶና እፅዳ፥ ኤንቲ ሴርንካ ስሞና፥ ዎዛና ሙመነ ማካላንቾ ግድዳ ናእ ደእኮ፥ 19 አዋይነ አይያ ሄ ካታማ ፐንገን ደእያ ጭማታኮ እያ ኤሆ። 20 ኤንቲ ጭማታኮ፥ “ሀይስ ኑ ናአይ ዎዛና ሙመነ ማካላንቾ፤ እ ኑስ ኪተተና፤ እ ያራምባነ ኡሻንቾ” ያግድ ኦዶ። 21 ሄሳፈ ጉየ፥ ሄ ካታማን ደእያ አደ ኡባይ እያ ሹቻን ጫድድ ዎꬎ። ሄሳዳ ኦꬅድ ህንተ ግዶፈ ኢታ ኡራ ꬋይስተ፤ እስራኤለ ኡባይ ሄሳ ስእድ ያያና።

22 እስ አስ ሀይቆ ፕርድስያ ባላ ኦꬅኮ፥ ነ እያ ምꬃ ቦላ ካቃዳ ዎꬍኮ፥ 23 ሄ ምꬃ ቦላ እያ አሀይ አቆፖ፤ እያ ሄ ጋላስ ሞጋ። ምꬃ ቦላ ካቀትድ ሀይቅያ ኦንካ ፆሳን ባደትዳይሳ። ጎዳይ፥ ነ ፆሳይ ነዉ ላታ ኦꬅድ እምያ ነ ቢታ ቱንሶፓ።